Read New Revised Asante Twi Bible Marko 6 Bible Online

Marko 6 - New Revised Asante Twi Bible bible

Marko 6

¹Na Yesu firi hɔ kɔe, na ɔbaa ne kurom; na n’asuafoɔ no dii n’akyi.

² Na homeda duruiɛ no, ɔfitii aseɛ kyerɛkyerɛɛ wɔ hyiadan mu; na nnipa pii a wɔteeɛ no ho dwirii wɔn, na wɔkaa sɛ: Ɛhe na oyi kɔnyaa nnoɔma yi? Nyansa bɛn na wɔde ama no yi, na saa ahoɔdenneɛ a ɔde ne nsa yɛ yi aseɛ ne sɛn?

³Ɛnyɛ duadwumfoɔ yi a ɔyɛ Maria ba no, Yakobo ne Yose ne Yuda ne Simon nom nua no nie? Na ɛnyɛ ne nuammaa na wɔwɔ yɛn nkyɛn ha yi? Na ɔyɛɛ suntidua maa wɔn.

⁴Na Yesu see wɔn sɛ: Anidie mmɔ odiyifoɔ gye ne kurom ne n’abusuafoɔ mu ne ne fie.

⁵Na wantumi anyɛ ahoɔdenneɛ biara hɔ, gye ayarefoɔ kakraa bi na ɔde ne nsa guu wɔn so saa wɔn yadeɛ.

⁶Na wɔn gye a wɔnnye nnie no yɛɛ no nwanwa. Na ɔkyinkyinii nkuraa no ase hyiae, na ɔkyerɛkyerɛe.

⁷ Na ɔfrɛɛ dummienu no baa ne nkyɛn na ɔfitii aseɛ somaa wɔn baanu baanu, na ɔmaa wɔn ahonhom fi so tumi.

⁸Na ɔhyɛɛ sɛ wɔmmfa biribiara nntu kwan gye poma nko ara; wɔmmfa aduane anaa kotokuo, anaa sika wɔ wɔn abɔsoɔ mu;

⁹na wɔnhyɛ mpaboa, nso wɔnnhyɛ ntadeɛ mmienu mmienu.

¹⁰Na ɔsee wɔn sɛ: Baabiara a mobɛhyɛne efie bi mu no, ɛhɔ na montena nkɔduru sɛ mobɛfiri hɔ akorɔ.

¹¹Na wɔn a wɔrennye mo, na wɔrentie mo asɛm no, sɛ morefiri hɔ akɔ a, momporoporo mo nan ase mfuturo nni wɔn adanseɛ.

¹²Na wɔkɔ kɔkaa asɛm sɛ wɔnsakyera wɔn adwene.

¹³ Na wɔtutuu ahonhommɔne bebree, na wɔde ngo sraa ayarefoɔ pii saa wɔn yadeɛ.

¹⁴Na Ɔhene Herode tee; ɛfiri sɛ na Yesu din atrɛ, na ɔkaa sɛ: Yohane a na ɔbɔ asu no anyane afiri awufoɔ mu, enti na ahoɔdenneɛ yi di dwuma wɔ ne mu.

¹⁵Na ebinom se: Ɛyɛ Elia; na ebinom nso se: Ɛyɛ odiyifoɔ te sɛ adiyifoɔ no mu baako.

¹⁶Na Herode teeɛ no, ɔkaa sɛ: Yohane a metwaa ne tire no, ɔno na wanyane.

¹⁷Na Herode no ara asoma ma wɔabɛsɔ Yohane mu, akyere no ato afiase, ne nua Filipo yere Herodia nti, ɛfiri sɛ na waware no.

¹⁸ Na Yohane aka akyerɛ Herode sɛ: Wonni ho kwan sɛ woware wo nua yere!

¹⁹Na Herodia nyaa no menasepɔ, na ɔpɛɛ sɛ ɔkum no, nanso wantumi.

²⁰Na Herode suro Yohane, ɛfiri sɛ ɔnim sɛ ɔyɛ onipa tenenee ne kronkron; na ɔbɔɔ ne ho ban, na ɔretie no a, ne ho yera no pii, nanso ɔde anigyeɛ tiee no.

²¹Na ɛda a ɛsɛ duruiɛ a Herode redi n’awoda no, ɔtoo pono maa n’atitire ne n’asafohene ne Galilea mpanimfoɔ,

²²na Herodia no ara babaa ba bɛsae, na ɔsɔɔ Herode ne wɔn a wɔne no te adidiiɛ no ani. Ɛnna ɔhene see ababaawa no sɛ: Bisa me biribiara a wopɛ, na mɛma wo.

²³ Na ɔkaa no ntam sɛ: Adeɛ biara a wobɛbisa me no, mɛma wo, de kɔsi m’ahennie fa so.

²⁴Na ɔfirii adi kɔbisaa ne na sɛ: Ɛdeɛn na menkɔbisa? Na ɔkaa sɛ: Yohane a ɔbɔ asuo no ti.

²⁵Na ntɛm ara ɔde ahoɔherɛ baa ɔhene nkyɛn bɛkaa sɛ: Mepɛ sɛ wode Yohane subɔni no ti to plɛte so ma me seesei ara.

²⁶Na ɛyɛɛ ɔhene ya pii, nanso ne ntam ne wɔn a wɔne no te adidiiɛ no nti, wampɛ sɛ ɔkame no.

²⁷Na ntɛm ara ɔhene somaa ɔbrafoɔ, hyɛɛ sɛ wɔmfa ne tiri mmra. Na ɔkɔtwaa ne ti, afiase hɔ,

²⁸na ɔde ne tiri no too plɛte so baeɛ, na ɔde maa ababaawa no, na ababaawa no de kɔmaa ne na.

²⁹Na n’asuafoɔ no teeɛ no, wɔba bɛfaa n’amu no, na wɔde kɔtoo ɔboda bi mu.

³⁰ Na asomafoɔ no boaboaa wɔn ano baa Yesu nkyɛn, na wɔbɛkaa deɛ wɔyɛeɛ ne deɛ wɔkyerɛkyerɛeɛ no nyinaa kyerɛɛ no!

³¹Na ɔsee wɔn sɛ: Mo nso mommra mmɛsene nkɔ ɛserɛ so fa baabi, na monkɔhome kakra. Na wɔn a wɔreba ne wɔn a wɔrekorɔ dɔɔso, na wɔannya adagyeɛ annidi mpo.

³²Na wɔde kodoɔ sii mu kɔɔ ɛserɛ so fa baabi.

³³Na nkurɔfoɔ hunuu wɔn sɛ wɔrekorɔ, nso na pii nim wɔn; na wɔnam fam firi nkuro no nyinaa mu tutuu mmirika kɔɔ hɔ, na wɔtwaree wɔn ano.

³⁴ Na Yesu sii fam no, ɔhunuu nkurɔfokuo pii, na wɔyɛɛ no mmɔbɔ, ɛfiri sɛ na wɔte sɛ nnwan a wɔnni hwɛfoɔ; na ɔfitii aseɛ kyerɛkyerɛɛ wɔn nnoɔma pii.

³⁵ Na onwunu reyɛ adwoɔ no, n’asuafoɔ no baa ne nkyɛn bɛkaa sɛ: Ɛha yɛ ɛserɛ so, na onwunu reyɛ adwo,

³⁶gya wɔn kwan na wɔnkɔ nkuro ne nkuraase a atwa ahyia yi mu nkɔtɔ paanoo bi nni.

³⁷Na ɔbua see wɔn sɛ: Mo ara momma wɔn biribi nni. Na wɔsee no sɛ: Yɛnkɔ nkɔtɔ paanoo denare ahanu, na yɛmfa mma wɔnni anaa?

³⁸Na ɔsee wɔn sɛ: Paanoo ahe na mowɔ? Monkɔ nkɔhwɛ. Na wɔkɔhwɛeɛ no wɔkaa sɛ: Enum ne mpataa mmienu.

³⁹Na ɔhyɛɛ wɔn sɛ wɔmma wɔn nyinaa ntenatena ase akuakuo ɛserɛ mono no so.

⁴⁰Na wɔtenatenaa ase akuakuo, ɔha ɔha, ne aduonum aduonum.

⁴¹ Na ɔfaa paanoo nnum ne mpataa mmienu no, na ɔhwɛɛ soro hyiraa so, na ɔbubuu paanoo no, na ɔde maa n’asuafoɔ no sɛ wɔnkyekyɛ mma wɔn; na ɔkyekyɛɛ mpataa mmienu no nso mu maa wɔn nyinaa.

⁴²Na wɔn nyinaa didii, na wɔmeeɛ.

⁴³Na wɔtasee mporoporowa nkɛntɛn dummienu mama ne mpataa no nso bi.

⁴⁴Na wɔn a wɔdii paanoo no ano si mmarima mpemnum.

⁴⁵Na ntɛm ara na ɔpiapiaa n’asuafoɔ no sɛ wɔnkɔ kodoɔ mu, na wɔnni n’anim nkɔ asuogya nohoa, Betsaida fam, na ɔnnya nkurɔfokuo no kwan ansa.

⁴⁶Na ɔmaa wɔkɔeɛ no, ɔkɔɔ bepɔ so mpaebɔ.

⁴⁷Na ɛduruu anwummerɛ no na kodoɔ no wɔ ɛpo no mfimfini, na ɔno nko ara wɔ fam.

⁴⁸Na ɔhunuu wɔn sɛ wɔrebrɛ ɔhare mu; na mframa rehyia wɔn. Na ɛbɛyɛ anɔpahemahema nnɔnmmiɛnsa ne nnɔnnsia ntam no, ɔnam ɛpo ani baa wɔn nkyɛn; na ɔrepɛ asiane wɔn ho.

⁴⁹Na wɔhunuu no sɛ ɔnam ɛpo no ani no, wɔsusuu sɛ ɛyɛ ɔsaman, na wɔteateaa mu,

⁵⁰na wɔn nyinaa hunuu no, na wɔn akoma tui. Na ntɛm ara ɔne wɔn kasae, na ɔsee wɔn sɛ: Momma mo bo ntɔ mo yam. Me ara; monnsuro.

⁵¹ Na ɔkɔɔ wɔn nkyɛn kodoɔ no mu, na mframa no gyaee. Na wɔn ho dwirii wɔn boroo so.

⁵²Na wɔante paanoo ho asɛm no ase ɛfiri sɛ na wɔn akoma apirim.

⁵³Na wɔtwaeɛ no, wɔduruu Genesaret asase so, na wɔsii fam.

⁵⁴Na wɔfirii kodoɔ no mu no, ntɛm ara na wɔhunuu no;

⁵⁵na wɔde mmirika kɔkyinii asase a atwa ahyia no nyinaa so, na wɔfitii aseɛ soaa wɔn a wɔn ho nyɛ wɔn den kɛtɛ so de wɔn baa baabiara a wɔtee sɛ ɔwɔ.

⁵⁶ Na baabiara a ɔkɔeɛ, nkuraase, anaa nkuro, anaa nkuraa mu no, wɔde ayarefoɔ bɛguu edwa mu; na wɔsrɛɛ no sɛ ɔmma wɔnka n’atadeɛ ano nnwo nko ara; na dodoɔ a wɔkaa no no, wɔn ho yɛɛ wɔn den!