Read New Revised Asante Twi Bible Marko 7 Bible Online

Marko 7 - New Revised Asante Twi Bible bible

Marko 7

¹Na Farisifoɔ ne Atwerɛfoɔ no mu binom a wɔfiri Yerusalem ba bɛhyiaa ne nkyɛn.

² Na wɔhunuu n’asuafoɔ bi sɛ wɔde nsa a ɛho nteɛ, ɛne sɛ, nsa a wɔanhohorɔ, redidi.

³(Na Farisifoɔ ne Yudafoɔ nyinaa, sɛ wɔanhohoro wɔn nsa yie a, wɔnnidi, ɛfiri sɛ wɔkura mpanimfoɔ atetesɛm mu;

⁴na sɛ wɔfiri dwa ase ba, na wɔanhohoro wɔn ho a, wɔnnidi; na nnoɔma pii keka ho a wɔgyee sɛ wɔbɛkuta mu, nkuruwa ne mpɔɔdɔ ne kɔbere mfrafraeɛsɛn ne nnamu ho hohorɔ.)

⁵Ɛnna Farisifoɔ ne Atwerɛfoɔ no bisaa no sɛ: Adɛn nti na w’asuafoɔ no nni mpanimfoɔ atetesɛm soɔ, na wɔde nsa fi didie yi?

⁶ Na ɔbua see wɔn sɛ: Ɛdi sɛ Yesaia hyɛɛ mo nyaatwomfoɔ ho nkɔm, sɛdeɛ wɔatwerɛ sɛ: Ɔman yi de wɔn ano na ɛdi me ni, na wɔn akoma deɛ atwe afiri me ho kɔ akyirikyiri.

⁷Na wɔsɔre me kwa, na wɔkyerɛkyerɛ nsɛm a nnipa ahyehyɛ.

⁸Na moagya Nyankopɔn ahyɛdeɛ, kura nnipa atetesɛm mu.

⁹Na ɔsee wɔn sɛ: Mofa nyansa kwan so po Nyankopɔn ahyɛdeɛ sɛdeɛ ɛbɛyɛ na mobɛdi mo atetesɛm soɔ!

¹⁰ Na Mose kaa sɛ: Di w’agya ne wo na ni; ɛne: Deɛ ɔka agya anaa ɛna ho asɛmmɔne no, owuo na ma no nwuo!

¹¹Na mo deɛ, mose: Sɛ onipa bi se n’agya anaa ne na sɛ: Adeɛ a anka wode bɛnya me ho mfasoɔ no yɛ Korban (Ɛne sɛ, wɔde ma Onyankopɔn)[2] a,

¹²na momma no nyɛ biribiara mma n’agya anaa ne na bio,

¹³na mode mo atetesɛm a mokyerɛ no sɛe Nyankopɔn asɛm no, na nnoɔma a ɛte sɛ yeinom pii na moyɛ.

¹⁴Na ɔfrɛɛ nkurɔfokuo no nyinaa baa ne nkyɛn see wɔn sɛ: Mo nyinaa montie, na monte aseɛ!

¹⁵ Biribiara nni onipa ho a ɛkɔ ne mu a ɛbɛtumi agu ne ho fi.

¹⁶(Sɛ obi wɔ aso a ɔde bɛtie a, ɔntie!)

¹⁷Na ɔfirii nkurɔfokuo no nkyɛn baa fie no, n’asuafoɔ no bisaa no bɛ no ase.

¹⁸Na ɔsee wɔn sɛ: Mo nso monni nteaseɛ sei? Monhunu sɛ adeɛ biara a ɛfiri onipa ho, na ɛkɔ ne mu no ntumi ngu ne ho fi anaa?

¹⁹Ɛfiri sɛ ɛnkɔ n’akomam, na mmom ɛkɔ ɔyafunu mu, na mmom ɔyi gu yaane mu. (Ɔkaa yei de tee aduane nyinaa ho).

²⁰Na ɔkaa sɛ: Deɛ ɛfiri onipa mu ba no, ɛno na ɛgu onipa ho fi.

²¹Na nnipa mu, wɔn akoma mu, na adwemmɔne firi ba: Adwamansɛm, akorɔnsɛm, awudisɛm,

²²ayerefasɛm, aniberebereɛ, amumuyɛ, nsisie, ahohwie, anibɔne, abususɛm, ahantan ne nkwaseasɛm.

²³Nnebɔne yi nyinaa firi onipa mu na ɛba, na ɛgu onipa ho fi.

²⁴Na ɔsɔre firii hɔ kɔɔ Tiro ne Sidon fam. Na ɔkɔɔ efie bi mu, na wampɛ sɛ obiara teɛ; nso wantumi anhunta.

²⁵Na amonom hɔ ara ɔbaa bi a ne babaa kumaa bi wɔ honhom fi tee ne nka no, ɔba bɛhwee ne nan ase;

²⁶nso na ɔbaa no yɛ Helani, na n’awoɔ mu ɔyɛ Siro-Foinikeni; na ɔsrɛɛ no sɛ ɔntu honhommɔne no mfiri ne babaa no mu.

²⁷Na Yesu see no sɛ: Ma mma mmee ansa; na ɛnyɛ fɛ sɛ wɔfa mma aduane to ma nkraman.

²⁸Na ɔbaa no bua see no sɛ: Awurade, ɛwom saa deɛ; nanso nkraman a wɔwɔ ɛpono ase no nso di mmɔfra no mporoporowa no bi!

²⁹Na Yesu see no sɛ: Asɛm yi nti, kɔ! Honhommɔne no afiri wo babaa no mu.

³⁰Na ɔkɔɔ ne fie no, ɔkɔhunuu sɛ honhommɔne no afiri kɔ, na ne babaa no da mpa so.

³¹ Na ɔfiri Tiro ahyeɛ so nam Sidon baa Galilea po ho faa Dekapoli ahyeɛ so.

³² Na wɔde ɔsotifoɔ a ɔworo dodoɔ brɛɛ no, na wɔsrɛɛ no sɛ ɔmfa ne nsa nto ne so.

³³ Na Yesu faa no firii nkurɔfokuo no mu kɔɔ nkyɛn de ne nsateaa hyehyɛɛ n’asom, na ɔtee ntasuo de kaa ne tɛkyerɛma,

³⁴ na ɔhwɛɛ soro guu ahome, na ɔsee no sɛ: Hefata! ɛne sɛ: Bue!

³⁵Na n’aso buee, na ne tɛkyerɛma homa no sanee ntɛm ara, na ɔtumi kasaa yie.

³⁶ Na ɔbaraa wɔn sɛ wɔnnka nkyerɛ obiara; nanso ɔrekɔ so bara wɔn no, na wɔrekɔ so pae mu ka.

³⁷Na ɛyɛɛ wɔn ahodwiri boroo so, na wɔkaa sɛ: Wayɛ nnoɔma nyinaa yie, ɔma asotifoɔ te asɛm, na ɔma emum kasa.