Read New Revised Asante Twi Bible Luka 1 Bible Online

Luka 1 - New Revised Asante Twi Bible bible

Luka 1

¹Ɛsiane sɛ nnipa pii afa ato wɔn ho so sɛ wɔbɛkyerɛ nsɛm a aba mu wɔ yɛn ntam no nnidisoɔ nnidisoɔ,

²sɛdeɛ wɔn a wɔfiri mfitiaseɛ de wɔn ani hunuiɛ na wɔyɛɛ asɛm no ho asomfoɔ no de abrɛ yɛn no nti,

³ Onimuonyamfoɔ kɛse Teofilo, ɛyɛɛ me sɛ, ɛyɛ sɛ me nso, mahwehwɛ ne nyinaa mu pɛpɛɛpɛ firi mfitiaseɛ no, metwerɛ no nnidisoɔ nnidisoɔ mebrɛ woɔ,

⁴na woahunu sɛ nsɛm a wɔakyerɛkyerɛ woɔ no yɛ nokorɛ.

⁵ Yudahene Herode berɛ so no, ɔsɔfoɔ bi tenaa ase a wɔfrɛ no Sakaria a ɔfiri Abia asɔfokuo mu, na ne yere yɛ Aaron mmammaa no mu bi a wɔfrɛ no Elisabet.

⁶Na wɔn baanu nyinaa tene wɔ Nyankopɔn anim di Awurade ahyɛdeɛ ne teneneedeɛ nyinaa so a ɛho nni asɛm,

⁷nanso wɔnni ba, ɛfiri sɛ na Elisabet yɛ obonini, na wɔn baanu nyinaa anyinyini pa ara!

⁸Na ɛbaa sɛ ɛduruu n’asɔfokuo so na ɔreyɛ n’asɔfodwuma wɔ Nyankopɔn anim no,

⁹ sɛdeɛ asɔfodwuma no teɛ no, ɛduruu ne so sɛ ɔkɔ Awurade asɔredan mu kɔhye ohwam.

¹⁰Na ɔrehye ohwam no, na nnipakuo no nyinaa gyina adihɔ rebɔ mpaeɛ.

¹¹Na Awurade bɔfoɔ bi bɛyii ne ho kyerɛɛ no, na ɔbɛgyinaa ohwam afɔrebukyia no nifa.

¹²Na Sakaria hunuu no no, n’akoma tui, na ehu kaa no.

¹³Na ɔbɔfoɔ no see no sɛ: Sakaria, nsuro, na wɔatie wo mpaebɔ, na wo yere Elisabet bɛwo ɔbabarima ama wo, na woato ne din Yohane.

¹⁴Na ɛbɛyɛ wo anigyeɛ ne ahosan, na n’awoɔ nti nnipa bebree ani bɛgye.

¹⁵ Ɛfiri sɛ ɔbɛyɛ kɛseɛ Awurade anim, na ɔrennom bobesa anaa nsa biara, na Honhom Kronkron bɛhyɛ no ma afiri ne na yam mpo.

¹⁶Na ɔbɛdane Israel mma mu bebree aba Awurade, wɔn Nyankopɔn, nkyɛn.

¹⁷ Na ɔde Elia honhom ne ahoɔden bɛdi n’anim akɔdane agyanom akoma aba wɔn mma so ne asoɔdenfoɔ akɔ teneneefoɔ adwene ho, na wasiesie ɔman a wɔaboaboa wɔn ho no de ama Awurade.

¹⁸ Na Sakaria see ɔbɔfoɔ no sɛ: Ɛdeɛn na mede bɛhunu yei? Ɛfiri sɛ mabɔ akora, na me yere nso abɔ aberewa.

¹⁹ Na ɔbɔfoɔ no bua see no sɛ: Mene Gabriel a megyina Nyankopɔn anim, na wɔasoma me sɛ memmɛkasa menkyerɛ wo, na menka wo nsɛmpa yi.

²⁰Na hwɛ, wobɛtɔre mum, na worentumi nkasa de bɛkɔ akɔsi da a yeinom bɛba mu, ɛfiri sɛ, woannye me nsɛm a ɛbɛba mu ne berɛ mu no anni.

²¹Na nkurɔfoɔ no retwɛn Sakaria; na ɛyɛɛ wɔn nwanwa sɛ wakyɛre asɔredan mu hɔ saa.

²²Na ɔfirii adie no, wantumi ankasa ankyerɛ wɔn; na wɔhunuu sɛ wanya anisoadehunu bi wɔ asɔredan mu hɔ; na ɔno deɛ, ɔde ne nsa yɛɛ nsɛnkyerɛnneɛ, na wantumi ankasa.

²³Na ɛbaa sɛ ne som nna wiee duro no, ɔfirii hɔ kɔɔ ne fie.

²⁴Na nna yi akyiri no, ne yere Elisabet nyinsɛnee, na ɔde ne ho siee abosome nnum kaa sɛ:

²⁵ Sɛdeɛ Awurade ayɛ me, nna a wabɛhwɛ me sɛ ɔbɛyi m’ahohora afiri nnipa mu no mu ni.

²⁶Na bosome a ɛtɔ so nsia no mu no, Onyankopɔn somaa Ɔbɔfoɔ Gabriel kɔɔ Galilea kuro bi a wɔfrɛ no Nasaret mu,

²⁷ ababaa bi a wɔde no ama ɔbarima bi a wɔfrɛ no Yosef a ɔfiri Dawid abusua mu awadeɛ nkyɛn; na ababaa no din de Maria.

²⁸Na ɔbɔfoɔ no baa ne nkyɛn bɛkaa sɛ: Ei, ma w’ani nnye, wo a wɔadom woɔ! Awurade ka wo ho.[1]

²⁹Na n’akoma tuu n’asɛm no ho, na ɔdwenee ho sɛ: Nkyea bɛn ni?

³⁰Na ɔbɔfoɔ no see no sɛ: Nsuro, Maria, na woanya Nyankopɔn hɔ adom.

³¹ Na hwɛ, wobɛnyinsɛn, na woawo ɔbabarima, na woato ne din Yesu.

³² Ɔbɛyɛ ɔkɛseɛ, na wɔafrɛ no deɛ Ɔwɔ Sorosoro no Ba; na Awurade Nyankopɔn de n’agya Dawid ahennwa bɛma no.

³³Na ɔbɛdi Yakob fie so hene daapem, na n’ahennie no to rentwa da.

³⁴Na Maria see ɔbɔfoɔ no sɛ: Yei bɛyɛ dɛn na aba mu, ɛfiri sɛ mennim ɔbarima biara?

³⁵ Na ɔbɔfoɔ no bua see no sɛ: Honhom Kronkron no bɛba wo so, na Deɛ Ɔwɔ Sorosoro no ahoɔden abɛkata wo so; enti na ade kronkron a wobɛwoɔ no, wɔbɛfrɛ no Nyankopɔn ba.

³⁶Na hwɛ, wo busuani Elisabet nso anyinsɛn ɔbabarima ne mmerewa berɛ mu; na deɛ wɔfrɛ no obonini no, yei ne ne bosome a ɛtɔ so nsia;

³⁷ ɛfiri sɛ Nyankopɔn fam deɛ, biribiara nni hɔ a ɛrentumi nyɛ hɔ.

³⁸Ɛnna Maria se: Hwɛ, Awurade afenaa ne me; ɛnyɛ mma me sɛdeɛ w’asɛm seɛ. Na ɔbɔfoɔ no gyaa no hɔ kɔe.

³⁹Na nna no mu ara, Maria de ahoɔherɛ sɔre kɔɔ mmepɔ so Yuda kuro no mu,

⁴⁰na ɔkɔɔ Sakaria fie kɔkyeaa Elisabet.

⁴¹ Na ɛbaa sɛ Elisabet tee Maria nkyea no, akɔkoaa no hurii ne yam; na Honhom Kronkron hyɛɛ Elisabet ma,

⁴² na ɔde nne kɛseɛ teaa mu sɛ: Wɔahyira wo mmaa mu, na wɔahyira wo yam adeɛ!

⁴³Na yei firi he sɛ m’Awurade ne na reba me nkyɛn yi?

⁴⁴Na hwɛ, wo nkyea twaa m’aso mu ara pɛ, akɔkoaa no de ahosan hurii me yam.

⁴⁵ Na nhyira ne deɛ wagye adie, ɛfiri sɛ nsɛm a Awurade ama wɔabɛka akyerɛ no no bɛba mu.

⁴⁶ Na Maria kaa sɛ: Me kra, kamfo Awurade,

⁴⁷na m’agyenkwa Nyankopɔn ho na me honhom ho asane no;

⁴⁸ ɛfiri sɛ wahwɛ n’afenaa ohia asetena. Na hwɛ, ɛfiri nnɛ awoɔ ntoatoasoɔ nyinaa bɛfrɛ me nhyira;

⁴⁹ɛfiri sɛ Otumfoɔ no ayɛ adeɛ kɛseɛ ama me, na ne din ne kronkron,

⁵⁰ na ne mmɔborɔhunu wɔ wɔn a wɔsuro no so, awoɔ ntoatoasoɔ a ɛdidi soɔ nyinaa mu.

⁵¹ Ɔde ne basa ayɛ ahoɔdenneɛ; wapansam wɔn a wɔyɛ ahantan wɔn akoma nsusuiɛ mu.

⁵² Watu atumfoɔ afiri wɔn nhennwa so na wapagya ahiafoɔ.

⁵³ Ɔde nnepa ahyɛ wɔn a ɛkɔm de wɔn ma, na wagya ahonyafoɔ kwan yafumpan.

⁵⁴Wasɔ n’akoa Israel mu, sɛ ɔde bɛkae ne mmɔborɔhunu,

⁵⁵ sɛdeɛ ɔka kyerɛɛ yɛn agyanom no, ama Abraham ne n’asefoɔ daa.

⁵⁶Na Maria tenaa Elisabet nkyɛn bɛyɛ abosome mmiɛnsa; na ɔsane kɔɔ ne fie.

⁵⁷Elisabet awoɔ duruu so, na ɔwoo ɔbabarima.

⁵⁸Na n’afipamfoɔ ne n’abusuafoɔ tee sɛdeɛ Awurade ayɛ no adɔeɛ kɛseɛ no, wɔne no ani gyee.

⁵⁹ Na ɛbaa sɛ ne nnawɔtwe soɔ no, wɔbaa sɛ wɔrebɛtwa abɔfra no twetia. Na anka wɔde no reto n’agya Sakaria,

⁶⁰ nanso ne na kaa sɛ: Dabi, wɔmfrɛ no Yohane.

⁶¹Na wɔsee no sɛ: Obiara nni w’abusua mu a wɔfrɛ no saa.

⁶²Na wɔde nsɛnkyerɛnneɛ bisaa n’agya edin a ɔpɛ sɛ wɔde to no.

⁶³Na ɔgyee twerɛpono ketewa bi twerɛɛ so sɛ: Ne din ne Yohane. Na ɛyɛɛ wɔn nyinaa nwanwa.

⁶⁴Na n’ano buee, na ne tɛkyerɛma homa sanee amonom hɔ ara, na ɔkasa yii Onyankopɔn ayɛ.

⁶⁵Na ehu kaa wɔn a wɔatwa wɔn ho ahyia no nyinaa, na wɔkekaa nsɛm yi nyinaa wɔ Yudea mmepɔ so nkuro nyinaa mu.

⁶⁶Na wɔn a wɔteeɛ nyinaa de siee wɔn akoma mu kaa sɛ: Ɛdeɛn ara na abɔfra yi rebɛyɛ? Hwɛ, Awurade nsa wɔ ne so.

⁶⁷Na n’agya Sakaria deɛ, Honhom Kronkron ahyɛ no ma, na ɔhyɛɛ nkɔm sɛ:

⁶⁸ Nhyira ne Awurade, Israel Nyankopɔn, ɛfiri sɛ wabɛhwɛ na wagye ne man;

⁶⁹ na wama nkwagyeɛ abɛn so ama yɛn n’akoa Dawid fie,

⁷⁰sɛdeɛ ɔde n’adiyifoɔ kronkron a wɔwɔ hɔ firi teteete no ano kaeɛ no,

⁷¹sɛ wɔnnye yɛn mfiri yɛn atamfoɔ ne wɔn a wɔkyiri yɛn nyinaa nsam;

⁷² sɛ ɔbɛhu yɛn agyanom mmɔbɔ, na wakae n’apam kronkron no:

⁷³ Ntam a ɔka kyerɛɛ yɛn agya Abraham

⁷⁴ sɛ ɔbɛma wɔayi yɛn afiri yɛn atamfoɔ nsam, na yɛasom no a ehu nni mu,

⁷⁵ahoteɛ ne tenenee mu wɔ n’anim, yɛn nna nyinaa.

⁷⁶ Na wo, abɔfra yi, wɔbɛfrɛ wo Ɔsorosoroni no diyifoɔ; ɛfiri sɛ wobɛdi Awurade anim akɔsiesie n’akwan,

⁷⁷ na wode nkwagyeɛ ho nimdeɛ ama ne man, wɔ wɔn bɔne fakyɛ a

⁷⁸ ɛfiri yɛn Nyankopɔn mmɔborɔhunu a ɛmaa ne yam hyehyee no no mu. Ɛno nti na adekyeeɛ a ɛfiri soro abɛpue yɛn soɔ,

⁷⁹ sɛ ɛbɛhyerɛn ama wɔn a wɔtete sum mu ne owuo sunsum aseɛ, na wagye yɛn taataa akɔ asomdwoeɛ kwan so.

⁸⁰ Na abɔfra no nyiniiɛ, na ɔnyaa honhom mu ahoɔden; na ɔtenaa serɛ so de kɔduruu da a ɔde ne ho kɔkyerɛɛ Israel.