Read New Revised Asante Twi Bible Luka 11 Bible Online

Luka 11 - New Revised Asante Twi Bible bible

Luka 11

¹Na ɛbaa sɛ ɔwɔ baabi rebɔ mpaeɛ na ɔgyaeeɛ no, n’asuafoɔ no mu baako ka kyerɛɛ no sɛ: Awurade, kyerɛ yɛn mpaebɔ, sɛdeɛ Yohane nso kyerɛɛ n’asuafoɔ no.

²Na ɔsee wɔn sɛ: Mobɔ mpaeɛ a, monka sɛ: Agya, wo din ho nte, w’ahennie mmra.

³Ma yɛn yɛn daa aduane daa!

⁴Na fa yɛn bɔne kyɛ yɛn, ɛfiri sɛ yɛn nso de kyɛ obiara a ɔde yɛn aka. Na mfa yɛn nkɔ sɔhwɛ mu!

⁵Na ɔka kyerɛɛ wɔn sɛ: Mo mu hwan na ɔwɔ adamfoɔ, na ɔbɛkɔ ne nkyɛn ɔdasuo mu akɔka akyerɛ no sɛ: Damfo, fɛm me paanoo mmiɛnsa,

⁶na m’adamfo bi firi kwan so aba me nkyɛn, na mennya biribi memma no.

⁷Na ɔfiri mu nohoa bɛbua no sɛ: Nha me, na wɔato pono mu, na me mma wɔ me nkyɛn wɔ mpa so, na merentumi mensɔre mmɛma wo.

⁸ Mese mo sɛ: Adamfoɔ nko mu deɛ a, anka ɔrensɔre mmɛma no; na n’aniɛden nti ɔbɛsɔre abɛma no dodoɔ a ɛhia no.

⁹Nso mese mo sɛ: Mommisa, na wɔbɛma mo; monhwehwɛ, na mobɛhunu; mommom, na wɔbɛhini mo.

¹⁰Na obiara a ɔbisa no, ɔnya; na deɛ ɔhwehwɛ no, ɔhunu; na deɛ ɔbɔ mu no, wɔbɛhini no.

¹¹Na mo mu hwan na ɔyɛ agya, na ne ba bisa no [paanoo a, ɔbɛma no ɔboɔ? Anaasɛ nso ɔbisa no][5] apataa a, ɔde ɔwɔ bɛyɛ apataa ama no?

¹²Anaasɛ nso ɔbisa kosua a, ɔbɛma no nyanyankyerɛ?

¹³Na sɛ mo a moyɛ abɔnefoɔ nim sɛdeɛ mode nnepa ma mo mma a, mprɛ ahe ara na mo Agya a ɔwɔ soro no remfa Honhom Kronkron mma wɔn a wɔbisa no?

¹⁴Na ɔretu honhommɔne bi a ɔyɛ mum. Na ɛbaa sɛ honhommɔne no firii adie no, emum no kasae. Na ɛyɛɛ nkurɔfoɔ akuakuo no nwanwa.

¹⁵Na wɔn mu binom kaa sɛ: Ɔnam ahonhommɔne panin Beelsebul so na ɔtu ahonhommɔne.

¹⁶ Na ebinom sɔɔ no hwɛe hwehwɛɛ ne nkyɛn nsɛnkyerɛnneɛ bi a ɛfiri soro.

¹⁷Nanso na ɔnim wɔn adwene nti, ɔsee wɔn sɛ: Ahennie biara a ɛne ne ho di mpaepaemu no dane amamfo, na efie ne fie a ɛdi mpaepaemu no nso bɔ.

¹⁸Na sɛ Satan nso ne ne ho di mpaepaemu a, ɛbɛyɛ dɛn na n’ahennie agyina? Sɛ mose: Menam Beelsebul so na metu ahonhommɔne.

¹⁹Na sɛ menam Beelsebul so na metu ahonhommɔne a, hwan so na mo mma nam tu wɔn? Enti wɔbɛyɛ mo atemmufoɔ.

²⁰ Na sɛ mede Nyankopɔn nsateaa metu ahonhommɔne a, ɛnneɛ na Nyankopɔn ahennie aba mo so.

²¹Sɛ ɔhoɔdenfoɔ amia rewɛn ne fie a, n’ahodeɛ wɔ hɔ komm.

²² Na sɛ deɛ ɔsene no ahoɔden ba ne so na ɔdi ne so nkonim a, ɔgye n’akodeɛ a n’ani da soɔ no, na ɔkyɛ n’asadeɛ mu.

²³ Deɛ ɔnka me ho no, na ɔne me anya; na deɛ ɔne me mmoaboa ano no hwete mu.

²⁴Sɛ honhom fi firi onipa mu a, ɔkɔkyinkyini akwaweɛ so, hwehwɛ ɔhome; na ɔnnya bi a, ɔse: Mɛsane makɔ me dan a mefiri mu mebaeɛ no mu.

²⁵Na ɔba a, ɔbɛhunu sɛ wɔaprapra mu na wɔahyehyɛ mu.

²⁶ Afei ɔkɔ kɔfa ahonhom foforɔ nson a wɔyɛ bɔne sene ɔno ara ka ne ho, na wɔbɛhyɛne mu a, wɔtena hɔ; na onipa no akyire asetena yɛ bɔne sene kane deɛ no.

²⁷ Na ɛbaa sɛ ɔreka yeinom no, ɔbaa bi a ɔwɔ nkurɔfokuo no mu maa ne nne so ka kyerɛɛ no sɛ: Nhyira ne yafunu a ɛwoo woɔ ne nufoɔ a wonumiiɛ!

²⁸ Na ɔno deɛ, ɔkaa sɛ: Ampa ara nhyira ne wɔn a wɔte Nyankopɔn asɛm na wɔdi soɔ!

²⁹Na nkurɔfoɔ akuakuo no boaboaa wɔn ano pitipiti no, ɔfirii aseɛ kaa sɛ: Nnɛ mma yi yɛ abusua bɔne; wɔhwehwɛ nsɛnkyerɛnneɛ, nanso wɔremma wɔn nsɛnkyerɛnneɛ biara, gye Yona nsɛnkyerɛnneɛ no.

³⁰Na sɛdeɛ Yona yɛɛ nsɛnkyerɛnneɛ maa Ninewefoɔ no, saa ara nso na Onipa Ba no bɛyɛ ama nnɛ mma yi.

³¹ Anafoɔ hemmaa no ne nnɛ mma yi mu mmarima bɛsɔre atemmuo no mu, na wabu wɔn fɔ; ɛfiri sɛ ɔfiri asase ano nohoa bɛtiee Salomo nyansa. Na hwɛ, deɛ ɔsene Salomo wɔ ha.

³² Ninewe mmarima ne nnɛ mma yi bɛsɔre atemmuo no mu, na wɔabu wɔn fɔ; ɛfiri sɛ Yona asɛnka no nti, wɔsakyeraa wɔn adwene. Na hwɛ, deɛ ɔsene Yona wɔ ha yi.

³³ Obi nsɔ kanea mfa nhyɛ kokoam anaa kodoɔ ase, na ɔde si kaneadua so, na wɔn a wɔba mu no ahunu ne hran.

³⁴Wo nipadua kanea ne w’ani. Enti sɛ w’ani yɛ a, wo nipadua nyinaa nso bɛyɛ hann; na sɛ ɛnyɛ a, wo nipadua nso bɛyɛ kusuu.

³⁵Enti hwɛ yie, na hann a ɛwɔ wo mu no annane sum.

³⁶Enti sɛ wo nipadua nyinaa yɛ hann na baabiara nni sum a, ne nyinaa bɛyɛ hann, sɛdeɛ kanea de ne hyerɛn ma wo hann no.

³⁷ Na ɔrekasa no, Farisini bi srɛɛ no sɛ ɔne no nkɔdidi; na ɔkɔɔ mu kɔtenaa ase.

³⁸ Na Farisini no hunuu sɛ wanhohoro ne nsa ansa na ɔdidiiɛ no, ɛyɛɛ no nwanwa.

³⁹Na Awurade ka kyerɛɛ no sɛ: Afei mo Farisifoɔ deɛ, mohohoro kuruwa ne ayowa ho; na mo mu deɛ, amim ne nnebɔne ahyɛ mu ma.

⁴⁰Nkwaseafoɔ! Ɛnyɛ deɛ ɔyɛɛ akyire no na ɔyɛɛ emu nso?

⁴¹Na hwɛ, deɛ ɛwɔ mu no, momfa bi nyɛ adɔeɛ; ɛno na ne nyinaa ho bɛfiri ama mo.

⁴²Na mo Farisifoɔ, monnue sɛ momma ɛme ne nunum ne fan nyinaa so ntotosoɔ du du, na mogya atemmuo ne Nyankopɔn dɔ hɔ. Yei na anka ɛsɛ sɛ moyɛ, nanso ɛnsɛ sɛ mogya deɛ ɛka ho no hɔ.

⁴³ Mo Farisifoɔ, monnue, sɛ mopɛ mpanimfoɔ tenaberɛ wɔ hyia adan mu ne edwa mu nkyea.

⁴⁴Monnue sɛ mote sɛ nnamena a ɛnna adie, na nnipa a wɔnam soɔ no nhunu.

⁴⁵Na mmarakyerɛfoɔ no mu baako buaa no sɛ: Kyerɛkyerɛfoɔ, woka saa a, na worebɔ yɛn nso adapaa.

⁴⁶Na ɔkaa sɛ: Mo mmarakyerɛfoɔ nso, monnue sɛ mode nnesoa a ne soa yɛ ya soa nnipa, na mo ankasa deɛ, momfa mo nsateaa mu baako mpo nka nnesoa no.

⁴⁷Monnue sɛ moto adiyifoɔ a mo agyanom na ekumm wɔn nna soɔ.

⁴⁸Sɛdeɛ modi mo agyanom nnwuma ho adanseɛ na mopene ne no, sɛ wɔn na wɔkumm wɔn, na mo nso na moto wɔn nna soɔ.

⁴⁹Yei nti nso na Nyankopɔn nyansa no se: Mɛsoma adiyifoɔ ne asomafoɔ akɔ wɔn mu, na wɔakum na wɔataa wɔn mu binom,

⁵⁰na wɔahwehwɛ adiyifoɔ nyinaa mogya a wɔhwie guiɛ firi wiase asehyɛ so wɔ nnɛ mma yi nsam,

⁵¹ɛfiri Habel mogya so de kɔsi Sakaria a ɔtɔɔ afɔrebukyia ne asɔredan ntam no mogya so. Aane, mese mo sɛ, wɔbɛhwehwɛ wɔ nnɛ mma yi nsam.

⁵²Mo mmarakyerɛfoɔ, monnue sɛ moafa nimdeɛ safoa; mo ara moankɔ mu, na wɔn a wɔrekɔ mu no nso, mosii wɔn kwan.

⁵³Na ɔfiri hɔ kɔeɛ no, Atwerɛfoɔ ne Farisifoɔ no fitii aseɛ hyɛɛ no so pii, na wɔhyɛɛ no kasa wɔ nsɛm bebree ho,

⁵⁴ na wɔtɛɛ no hwehwɛɛ sɛ wɔbɛnya n’anom asɛm bi.