Read New Revised Asante Twi Bible Luka 13 Bible Online

Luka 13 - New Revised Asante Twi Bible bible

Luka 13

¹Saa berɛ no ara na nnipa bi a wɔwɔ hɔ kaa Galileafoɔ a Pilato de wɔn mogya frafraa wɔn afɔdeɛ mu ho asɛm kyerɛɛ no.

² Na ɔbua see wɔn sɛ: Mosusu sɛ Galileafoɔ yi hunuu saa amaneɛ yi nti na wɔyɛ nnebɔneyɛfoɔ sene Galileafoɔ nyinaa?

³ Mese mo sɛ: Ɛnte saa, na mmom sɛ moansakyera mo adwene a, mo nyinaa bɛyera saa ara.

⁴Anaasɛ nnipa dunwɔtwe a Siloa abantenten no bu hwee wɔn so na ɛkumm wɔn no, mosusu sɛ wɔyɛ nnebɔneyɛfoɔ sene nnipa a wɔte Yerusalem nyinaa?

⁵Mese mo sɛ: Ɛnte saa, na mmom sɛ moansakyera mo adwene a, mo nyinaa bɛyera saa ara.

⁶ Na ɔbuu wɔn bɛ yi sɛ: Obi wɔ borɔdɔma a wadua wɔ ne bobe turom; na ɔba bɛhwehwɛɛ so aba, na wannya bi.

⁷Na ɔka kyerɛɛ turomhwɛfoɔ no sɛ: Hwɛ, mfirinhyia mmiɛnsa ni a maba mabɛhwehwɛ borɔdɔma yi so aba, na mannya bie. Twa twene! Adɛn nti na agye asase no akɛntɛne soɔ?

⁸ Na ɔbua see no sɛ: Owura, ma no nsi hɔ afe yi nso nkɔsi sɛ mɛfunifuni ho na magu aseɛ sumina.

⁹Na ebia ɛbɛso; na sɛ anso ansa a, woatwa atwene.

¹⁰Na ɔkyerɛkyerɛɛ hyiadan bi mu homeda.

¹¹Na hwɛ, na ɔbaa bi wɔ hɔ a ɔwɔ ahoɔmmerɛ honhom mfirinhyia dunwɔtwe, na wapono a ɔntumi ntene ne mu koraa mpo.

¹²Na Yesu hunuu no no, ɔfrɛɛ no, na ɔsee no sɛ: Ɔbaa wɔasane wo afiri w’ahoɔmmerɛ mu.

¹³ Na ɔde ne nsa guu ne so, na amonom hɔ ara ɔtenee, na ɔyii Onyankopɔn ayɛ.

¹⁴Na hyiadan no mu panin a ɛyɛɛ no ahi sɛ Yesu saa yadeɛ homeda no bua see nkurɔfokuo no sɛ: Nnansia wɔ hɔ a ɛsɛ sɛ nnipa yɛ adwuma; emu na mommra na wɔnsa mo yadeɛ, na ɛnyɛ homeda.

¹⁵ Na Awurade buaa no sɛ: Nyaatwomfoɔ! Mo mu biara nsane ne nantwie anaa n’afunumu mfiri n’adididaka ho mma no nkɔnom nsuo homeda?

¹⁶ Na hwɛ, ɔbaa yi a ɔyɛ Abraham babaa a Satan akyekyere no mfirinhyia dunwɔtwe yi, ɛnsɛ sɛ wɔsane no firi kyekyerɛ yi mu homeda?

¹⁷Na ɔkaa saa no, n’atamfoɔ no nyinaa ani wuiɛ, na nkurɔfokuo no nyinaa ani gyee animuonyam adeɛ a ɔyɛeɛ no nyinaa nti.

¹⁸Na ɔkaa sɛ: Adeɛ bɛn na Nyankopɔn ahennie sɛ no anaasɛ ɛdeɛn ho na mede bɛtoɔ?

¹⁹Ɛte sɛ sinapi fua a onipa fa kɔduaa wɔ ne turom; na ɛnyinii, na ɛyɛɛ dua, na ewiem nnomaa bɛsisii ne mman so.

²⁰Na ɔkaa bio sɛ: Ɛdeɛn ho na mede Nyankopɔn ahennie bɛtoɔ?

²¹Ɛte sɛ mmɔka a ɔbaa bi fa kɔfetee no esiam nkorokuma mmiɛnsa mu de kɔsii sɛ ne nyinaa kaeɛ.

²²Na ɔnenam nkuro mu ne nkuraa ase rekyerɛkyerɛ, na na ɔnam so rekɔ Yerusalem.

²³Na obi bisaa no sɛ: Awurade, wɔn a wɔbɛgye wɔn yɛ kakraa bi anaa?

²⁴ Na ɔka kyerɛɛ wɔn sɛ: Mompere nhyɛne ɛpono teateaa no mu! Na mese mo sɛ: Nnipa pii bɛhwehwɛ mu ahyɛne, na wɔrentumi.

²⁵ Ɛfiri berɛ a efiewura no bɛsɔre ato pono mu no ara na mobɛfiri aseɛ agyina akyire, na moabɔ ɛpono no mu sɛ: Owura, hini yɛn! Na ɔbɛbua mo sɛ: Mo deɛ, mennim deɛ mofire.

²⁶ Ɛnna mobɛfiri aseɛ aka sɛ: Yɛadidi na yɛanom w’anim, na woakyerɛkyerɛ wɔ yɛn mmɔntene so pɛn.

²⁷Na ɔbɛka sɛ: Mo deɛ, mennim deɛ mofire. Momfiri me so, mo a moyɛ deɛ ɛntene nyinaa!

²⁸Ɛhɔ na mobɛsu atwɛre mo se sɛ mohunu Abraham, Isak ne Yakob ne adiyifoɔ no nyinaa Nyankopɔn ahennie mu, na mo deɛ, wɔapam mo afiri mu.

²⁹ Na wɔbɛfiri apueeɛ, atɔeɛ, atifi ne anafoɔ aba abɛtena adidiiɛ Nyankopɔn ahennie mu.

³⁰ Na hwɛ, akyikafoɔ bi wɔ hɔ a wɔbɛdi kan, na adikanfoɔ bi wɔ hɔ a wɔbɛka akyire.

³¹Dɔn no ara mu na Farisifoɔ bi ba bɛsee no sɛ: Firi ha kɔ! Na Herode repɛ wo aku wo.

³²Na ɔsee wɔn sɛ: Monkɔka nkyerɛ sakraman no sɛ: Hwɛ, metu ahonhommɔne, na mesa yadeɛ nnɛ ne ɔkyena, ne n’adekyeeɛ na mawie.

³³Nanso ɛsɛ sɛ menante nnɛ ne ɔkyena ne n’adekyeeɛ; na ɛnni ho kwan sɛ odiyifoɔ bi bɛtɔ baabi, gye Yerusalem.

³⁴O Yerusalem, Yerusalem a wokum adiyifoɔ na wosii wɔn a wɔsomaa wɔn wo nkyɛn no aboɔ! Mprɛ ahe nie a mepɛɛ sɛ meboaboa wo mma ano sɛ akokɔbaatan boaboa ne mma ano ne ntaban aseɛ, nanso moampɛ.

³⁵ Hwɛ, wɔbɛgya mo fie fituo ama mo. Na mese mo sɛ: Morenhu me, gye da a ɛbɛba sɛ mobɛka sɛ: Nhyira ne deɛ ɔnam Awurade din mu reba no!