Read New Revised Asante Twi Bible Luka 14 Bible Online

Luka 14 - New Revised Asante Twi Bible bible

Luka 14

¹ Na ɛbaa sɛ homeda bi, ɔkɔɔ Farisifoɔ panin bi fie no, na wɔretɛ no.

²Na hwɛ, na onipa bi wɔ n’anim a ɔyare sasaborɔ.

³Na Yesu see mmarakyerɛfoɔ ne Farisifoɔ no sɛ: Ɛwɔ ho kwan sɛ wɔsa yadeɛ homeda anaasɛ wɔnsa?

⁴Na wɔyɛɛ komm. Na ɔfaa no saa no yadeɛ, na ɔmaa no kɔe.

⁵ Na ɔbisaa wɔn sɛ: Mo mu hwan afunumu anaa nantwie na ɔkɔtɔ abura mu a, ɔrenkɔtwe no ntɛmntɛm homeda?

⁶Na wɔantumi ammua no yeinom ho bi bio.

⁷ Na ɔde n’ani karii wɔn a wɔtoo nsa frɛɛ wɔn adidie no sɛdeɛ wɔpa mu yi mpanimfoɔ tenaberɛ no, ɔbuu wɔn bɛ ka kyerɛɛ wɔn sɛ:

⁸Sɛ obi to nsa frɛ wo ayeforɔ ase a, nkɔtena mpanimfoɔ tenaberɛ! Ebia wɔato nsa afrɛ deɛ n’anim yɛ nyam sene woɔ.

⁹Na deɛ ɔtoo nsa frɛɛ wo ne no no ba a, ɔbɛka akyerɛ wo sɛ: Ma oyi kwan! Na ɛno na wode aniwuo bɛfiri aseɛ akɔfa akyire tenaberɛ.

¹⁰Na sɛ wɔto nsa frɛ wo a, kɔ na kɔtena akyire tenaberɛ! Na deɛ ɔtoo nsa frɛɛ woɔ no ba a, waka akyerɛ wo sɛ: Damfo, twi kɔ soro nohoa! Ɛno na wobɛnya anidie wɔn a wɔne wo te adidiiɛ no anim.

¹¹ Na obiara a ɔma ne ho soɔ no, wɔbɛbrɛ no ase; na deɛ ɔbrɛ ne ho aseɛ no, wɔbɛma no so.

¹²Na ɔsee deɛ ɔtoo nsa frɛɛ no no nso sɛ: Sɛ woto pono awia anaa anwummerɛ a, mfrɛ wo nnamfo anaa wo nuanom anaa w’abusuafoɔ anaa afipamfoɔ adefoɔ! Na wɔn nso ammɛto nsa amfrɛ wo bi, na woannya so akatua.

¹³ Na woto pono a, frɛ ahiafoɔ, mmubuafoɔ, mpakye ne anifirafoɔ,

¹⁴ na woanya nhyira; ɛfiri sɛ wɔnni deɛ wɔde bɛtua wo so ka. Na ateneneefoɔ sɔreɛ mu na wɔbɛtua wo so ka.

¹⁵ Na wɔn a wɔne no te adidiiɛ no mu baako tee saa no, ɔsee no sɛ: Nhyira ne deɛ ɔbɛdidi Nyankopɔn ahennie mu!

¹⁶Na Yesu see no sɛ: Onipa bi too pono kɛseɛ, na ɔtoo nsa frɛɛ nnipa pii.

¹⁷Na adidi berɛ duruiɛ no, ɔsomaa n’akoa sɛ ɔnkɔka nkyerɛ wɔn a wɔato nsa afrɛ wɔn no sɛ: Mommra, na wɔasiesie nnoɔma awie.

¹⁸Na wɔn nyinaa firi aseɛ kaa asɛnkorɔ yiyii wɔn ano. Deɛ ɔdi kan see no sɛ: Matɔ afuo, na ɛhia sɛ mekɔhwɛ; mesrɛ wo, yi me firi mu!

¹⁹Na ɔfoforɔ se: Matɔ anantwie mpamho nnum, na merekɔsɔ wɔn mahwɛ; mesrɛ wo, yi me firi mu!

²⁰ Na ɔfoforɔ se: Maware yere, enti merentumi memma.

²¹Na akoa no ba bɛkaa nsɛm no kyerɛɛ ne wura. Ɛnna efiewura no bo fuiɛ, na ɔka kyerɛɛ n’akoa no sɛ: Firi adi ntɛm, kɔ kuro no mmɔntene so ne mmantɛmo, na kɔfa ahiafoɔ, mmubuafoɔ, anifirafoɔ ne mpakye bra!

²²Na akoa no se: Owura, mayɛ sɛdeɛ wohyɛeɛ no, nanso ɛfa da so wɔ hɔ.

²³Na owura no ka kyerɛɛ akoa no sɛ: Firi adi kɔ akwan so ne ban ho, na kɔhyɛ wɔn na wɔmmra, na me fie ha nyɛ ma.

²⁴Na mese mo sɛ: Nnipa a wɔato nsa afrɛ wɔn no mu biara renka m’aduane no nhwɛ.

²⁵Na nkurɔfoɔ akuakuo pii ne no nam. Na ɔdanee ne ho ka kyerɛɛ wɔn sɛ:

²⁶ Sɛ obi ba me nkyɛn, na ɔntane n’agya ne ne na ne ne yere ne ne mma ne ne nuammarimanom ne ne nuammaanom ne ɔno ara ne ho nso a, ɔntumi nyɛ me suani.

²⁷ Na obiara a ɔnsoa n’asɛnnua na ɔnni m’akyire no, ɔntumi nyɛ me suani.

²⁸Na mo mu hwan na ɔpɛ sɛ ɔto abantenten, na ɔrentena ase mmu ho nkonta ansa, sɛ ɔwɔ deɛ ɔde bɛtumi awie?

²⁹Ebia wafiri aseɛ no, wantumi anwie a, wɔn a wɔhunu nyinaa bɛfiri aseɛ agoro ne ho

³⁰sɛ: Onipa yi firii aseɛ toe, na wantumi anwie.

³¹Anaasɛ ɔhene bɛn na ɔne ɔhene bi rekɔko, na ɔntena ase nnwene ho kane, sɛ ɔbɛtumi de ɔpedu akɔhyia deɛ ɔde ɔpeduonu reba ne soɔ no?

³²Anyɛ saa a, ɔbaako no wɔ akyirikyiri no, ɔtu abɔfoɔ kɔsrɛ sɛ wɔmpata.

³³Saa ara nso na mo mu biara a ɔnnya deɛ ɔwɔ nyinaa hɔ ntumi nyɛ me suani.

³⁴ Nkyene yɛ; nanso sɛ nkyene dɛ tu a, ɛdeɛn na sɛ wɔde to mu a ɛbɛma no ayɛ dɛ bio?

³⁵Ɛmfata fam anaa sumina so, na wɔto gu. Deɛ ɔwɔ aso bɛtie no, ma no ntie!