Read New Revised Asante Twi Bible Luka 22 Bible Online

Luka 22 - New Revised Asante Twi Bible bible

Luka 22

¹Na Apiti afahyɛ a wɔfrɛ no Twam no bɛnee.

² Na asɔfoɔ mpanimfoɔ ne Atwerɛfoɔ no hwehwɛɛ sɛdeɛ wɔbɛyɛ na wɔakum Yesu; ɛfiri sɛ na wɔsuro ɔman no.

³ Na Satan kɔhyɛnee Yuda a wɔfrɛ no Iskariot a ɔyɛ dummienu no mu baako no mu.

⁴Na ɔne asɔfoɔ mpanimfoɔ ne asafohene no kɔkasa kyerɛɛ sɛdeɛ ɔbɛyɛ na wayi no ama wɔn.

⁵Na ɛyɛɛ wɔn anigyeɛ, na wɔne no hyehyɛɛ sɛ wɔbɛma no sika bi.

⁶Na ɔpenee; na ɔhwehwɛɛ sɛdeɛ ɔbɛnya kwan ayi no ama wɔn wɔ nkurɔfokuo no akyi.

⁷ Na afei Apiti da a ɛsɛ sɛ wɔkum Twam dwan no durui.

⁸Na Yesu somaa Petro ne Yohane sɛ: Monkɔ nkɔsiesie Twam no mma yɛn, na yɛmmɛdi.

⁹Na wɔsee no sɛ: Ɛhe na wopɛ sɛ yɛkɔsiesie?

¹⁰Na ɔsee wɔn sɛ: Hwɛ, moduru kuro no mu a, onipa bi a ɔso ahina a nsuo wɔ mu bɛhyia mo; monni n’akyi nkɔ efie a ɔbɛkɔ mu no mu.

¹¹Na monse efiewura no sɛ: Kyerɛkyerɛfoɔ se wo sɛ: Ɛhe na ahɔhodan a me ne m’asuafoɔ bɛdi mu Twam no wɔ?

¹²Na ɔbɛkyerɛ mo abansoro asa kɛseɛ bi a wɔahyehyɛ mu; ɛhɔ na monkɔsiesie!

¹³ Na wɔkɔ kɔhunuu sɛdeɛ ɔka kyerɛɛ wɔn no, na wɔsiesiee Twam no.

¹⁴Na dɔn no duruiɛ no, ɔbɛtenaa ase, na asomafoɔ no ka ne ho.

¹⁵Na ɔka kyerɛɛ wɔn sɛ: Pɛ na mepɛɛ sɛ me ne mo di Twam yi ansa na mahunu amane.

¹⁶ Na mese mo sɛ, merenni bi bio, gye da a aba mu Nyankopɔn ahennie mu.

¹⁷Na ɔfaa kuruwa no daa ase, na ɔkaa sɛ: Monnye yei, na monkyɛ mu!

¹⁸Na mese mo sɛ, merennom bobe aba no bi bio, gye da a Nyankopɔn ahennie no bɛba.

¹⁹ Na ɔfaa paanoo daa ase bubui, na ɔde maa wɔn kaa sɛ: Yei ne me honam a mo nti wɔde rema; monyɛ yei mfa nyɛ me nkaeɛ.

²⁰Saa ara nso na wɔwiee adidie no, ɔfaa kuruwa no kaa sɛ: Kuruwa yi ne apam foforɔ me mogya mu, ɛno na mo nti wɔrehwie aguo.

²¹ Nso hwɛ, deɛ ɔreyi me ama no ne me te pono ho didi.

²²Na Onipa Ba no rekɔ sɛdeɛ wɔahyɛ no deɛ, nanso onipa a ɔbɛyi no ama no nnue!

²³Na wɔfirii aseɛ bisabisaa wɔ wɔn mu sɛ, hwan ara na ɔrebɛyɛ saa adeɛ yi.

²⁴ Na akasakasa bi nso baa wɔn mu sɛ, wɔn mu hwan na wɔbɛbu no kɛseɛ.

²⁵Na ɔsee wɔn sɛ: Wiase amanaman ahemfo di wɔn so ahensɛm, na wɔn a wɔdi wɔn so tumi no, wɔfrɛ wɔn adɛɛfoɔ.

²⁶Na mo deɛ, monnyɛ saa, na mmom deɛ ɔyɛ mo mu kɛseɛ no, ɔnyɛ sɛ akumaa; na deɛ ɔyɛ otitire no nyɛ sɛ deɛ ɔsom.

²⁷ Na hwan na ɔso, deɛ ɔte aduane pono ho anaasɛ deɛ ɔsom? Ɛnyɛ deɛ ɔte aduane pono ho? Na me deɛ, mewɔ mo mu sɛ deɛ ɔsom.

²⁸Na mone wɔn a wɔda so ka me ho wɔ me sɔhwɛ mu.

²⁹Na me nso, sɛdeɛ m’agya ayi ahennie ama me no, saa ara na mayi mama mo,

³⁰ na moadidi na moanom me pono so wɔ m’ahennie mu, na moatena nhennwa so abu Israel mmusuakuo dummienu no atɛn.

³¹ Simon, Simon, hwɛ, anka na Satan pɛ sɛ ɔnya mo na ɔhuhu mo so sɛ aburoo.

³² Nanso masrɛ mama wo, na woampa wo gyidie. Na wo deɛ, sɛ daakye, sɛ wosan gyina a, hyɛ wo nuanom den!

³³Na ɔsee no sɛ: Awurade, masiesie me ho sɛ me ne wo bɛkɔ afiase ne owuo mu.

³⁴Na ɔse: Petro, meka mekyerɛ wo, ɛnnɛ, ansa na akokɔ bɛbɔn no, na woasane mprɛnsa sɛ wonnim me.

³⁵ Na ɔsee wɔn sɛ: Mesomaa mo a na monkura sika kotokuo ne akwantuo bɔtɔ ne mpaboa no, biribi ho hiaa mo anaa? Na wɔse: Anhia yɛn hwee.

³⁶Ɛnna ɔsee wɔn sɛ: Afei deɛ, deɛ ɔwɔ sika kotokuo no, ma no mfa, ne akwantuo bɔtɔ saa ara; na deɛ ɔnni bie no, ma no ntɔn ne ntoma mfa ntɔ nkrantɛ.

³⁷ Na mese mo sɛ, yei a wɔatwerɛ nso, ɛtwa sɛ ɛba mu wɔ me ho sɛ: Wɔakan no afra mmaratofoɔ mu. Na deɛ ɛfa me ho no wɔ awieeɛ.

³⁸Na wɔse: Awurade, hwɛ, nkrantɛ mmienu ni. Na ɔsee wɔn sɛ: Ɛdɔɔso.

³⁹ Na ɔfirii adi, na sɛdeɛ ɔyɛ daa no, ɔkɔɔ Ngo Bepɔ no so; na asuafoɔ no nso dii n’akyi.

⁴⁰Na ɔduruu hɔ no, ɔsee wɔn sɛ: Mommɔ mpaeɛ na moankɔ sɔhwɛ mu!

⁴¹Na ɔtwee ne ho firii wɔn nkyɛn bɛyɛ sɛ deɛ wɔto ɔboɔ a, ɛbɛtɔ no, ɔkotoo ne nan anim bɔɔ mpaeɛ

⁴²sɛ: Agya, sɛ wopɛ a, ma kuruwa yi nsiane me ho nkɔ, nanso ɛnyɛ deɛ mepɛ, na deɛ wopɛ na ɛnyɛ hɔ.

⁴³ Na ɔbɔfoɔ firii soro bɛyii ne ho kyerɛɛ no hyɛɛ no den.

⁴⁴Na ɔwɔ owuo yea mu no, ɔmaa ne mpaebɔ mu yɛɛ den. Na ne ho fifire yɛɛ sɛ mogya ntowantowa a ɛsosɔ fam.

⁴⁵Na ɔsɔre firii mpaebɔ mu baa asuafoɔ no nkyɛn no, ɔbɛhunuu wɔn sɛ awerɛhoɔ nti wɔadeda,

⁴⁶na ɔsee wɔn sɛ: Adɛn na moreda? Monsɔre mmɔ mpaeɛ na moankɔ sɔhwɛ mu.

⁴⁷Na ɔgu so rekasa no, hwɛ, nnipakuo bi bae a dummienu no mu baako a wɔfrɛ no Yuda di wɔn anim. Na ɔtwe bɛnee Yesu, bɛfee n’ano.

⁴⁸Na Yesu bisaa no sɛ: Yuda, wode mfeano na ɛreyi onipa ba no ama?

⁴⁹Na wɔn a wɔwɔ ne ho no hunuu deɛ ɛrebɛba no, wɔbisaa no sɛ: Awurade, yɛmmobɔ wɔn nkrantɛ anaa?

⁵⁰Na wɔn mu baako bɔɔ ɔsɔfo panin akoa, na ɔtwaa n’aso nifa.

⁵¹Na Yesu buaa sɛ: Momma no nso ha ara! Na ɔsɔɔ n’aso no mu de famm hɔ.

⁵²Na afei Yesu ka kyerɛɛ asɔfoɔ mpanimfoɔ ne asɔrefie asafohene ne mpanimfoɔ a wɔbaa ne soɔ no sɛ: Mobaa sɛdeɛ moreba odwotwafoɔ soɔ na mokura nkrantɛ ne mmaa yi?

⁵³ Me ne mo wɔ asɔrefie hɔ daa no, moankye me; na yei ne mo berɛ ne esum tumi.

⁵⁴Na wɔkyere no kɔe, na wɔde no kɔɔ ɔsɔfo panin fie. Na Petro deɛ, ɔdii wɔn akyi wɔ akyirikyiri.

⁵⁵Na wɔsɔɔ ogya adihɔ hɔ na wɔtenaa ho no, Petro bɛtenaa wɔn mu.

⁵⁶Na abaawa bi hunuu no sɛ ɔte gya no ho, na ɔhwɛɛ no dinn kaa sɛ: Oyi nso ne no na ɛnam.

⁵⁷Na ɔsanee sɛ: Ɔbaa, menni no.

⁵⁸Na ankyɛ na ɔfoforɔ hunuu no, na ɔse: Wo nso wofiri wɔn mu. Na Petro se: Barima, memfiri wɔn mu.

⁵⁹Na ɛno akyi bɛyɛ dɔnhwere baako no, ɔfoforɔ bi nso de bɛtoo so sɛ: Oyi nso ne no na ɛnam ampa, ɛfiri sɛ ɔyɛ Galileani.

⁶⁰Na Petro se: Barima, mennim deɛ woreka yi. Na amonom hɔ ara a ɔgu so rekasa no, akokɔ bɔnee.

⁶¹ Na Awurade danee ne ho hwɛɛ Petro anim; na Petro kaee Awurade asɛm a ɔka kyerɛɛ no sɛ: Ɛnnɛ, akokɔ remmɔn na woapa me mprɛnsa no.

⁶²Na Petro firii adi kɔsuu yayaaya.

⁶³Na mmarima a wɔkura Yesu no goroo ne ho hwee no.

⁶⁴Na wɔkataa n’ani bobɔɔ n’ani so, na wɔbisaa no sɛ: Hyɛ nkɔm! Hwan na ɔbɔɔ woɔ?

⁶⁵Na abususɛm pii keka ho a wɔka guu ne soɔ.

⁶⁶ Na adeɛ kyeeɛ no, ɔman mpanimfoɔ ne asɔfoɔ mpanimfoɔ ne Atwerɛfoɔ no bɛhyiaeɛ, na wɔde no kɔɔ wɔn asɛnniiɛ

⁶⁷kaa sɛ: Wone Kristo no a, ka kyerɛ yɛn! Na ɔka kyerɛɛ wɔn sɛ: Sɛ mese mo a, morennye nni;

⁶⁸na sɛ nso mebisa mo a, moremmua me.

⁶⁹Na ɛfiri nnɛ na Onipa Ba no bɛtena Nyankopɔn tumi nifa soɔ.

⁷⁰Na wɔn nyinaa kaa sɛ: Ɛnneɛ na wone Nyankopɔn ba no anaa? Na ɔka kyerɛɛ wɔn sɛ: Moaka, na mene no.

⁷¹Na wɔse: Adanseɛ bɛn na ɛhia yɛn bio? Na yɛn ara yɛate afiri n’anomu.