Read New Revised Asante Twi Bible Luka 9 Bible Online

Luka 9 - New Revised Asante Twi Bible bible

Luka 9

¹Na ɔfrɛɛ dummienu no hyiae, maa wɔn ahonhommɔne nyinaa ne ayaresa so tumi ne ahoɔden.

²Na ɔsomaa wɔn sɛ wɔnkɔka Nyankopɔn ahennie ho asɛm, na wɔnsa yadeɛ.

³Na ɔka kyerɛɛ wɔn sɛ: Mommfa biribiara nntu kwan, mommfa poma anaa bɔtɔ anaa aduane anaa sika anaa ntadeɛ mmienu mmienu.

⁴ Na efie biara a mobɛkɔ mu no, ɛhɔ ara na montena, na moafiri hɔ akɔ.

⁵ Na wɔn a wɔrennye mo no, mofiri kurom hɔ rekɔ a, momporoporo mo nan ase mfuturo mfa nni adanseɛ ntia wɔn.

⁶Na wɔsii mu hɔ faa nkuraa nyinaa ase mmaako mmaako kaa asɛmpa no, na wɔsaa yadeɛ baabiara.

⁷Na ɔmansinihene Herode tee deɛ ɔyɛeɛ nyinaa; na ne tiri mu yɛɛ no keserenee sɛ ebinom se: Wɔanyane Yohane afiri awufoɔ mu,

⁸na ebinom se: Elia ayi ne ho akyerɛ, na afoforɔ se: Tete adiyifoɔ no mu baako asɔre.

⁹ Na Herode kaa sɛ: Yohane deɛ, matwa ne ti, na hwan ne oyi a mete ne ho nsɛm a ɛte sɛɛ yi? Na ɔhwehwɛɛ sɛ ɔhu no.

¹⁰Na asomafoɔ no sane bae, na wɔbɛkaa deɛ wɔakɔyɛ nyinaa kyerɛɛ no. Na ɔfaa wɔn de wɔn kɔɔ afa baabi, kuro a wɔfrɛ no Betsaida no ho.

¹¹Na nkurɔfoɔ akuakuo no hunuiɛ no, wɔdii n’akyi; na ɔgyee wɔn kaa wɔn Nyankopɔn ahennie ho asɛm, na ɔsaa wɔn a ɛhia ayaresa no yadeɛ.

¹²Na adeɛ reyɛ asa; na dummienu no ba bɛsee no sɛ: Gya nkurɔfokuo no kwan na wɔnkɔ nkuro ne nkuraase a atwa ahyia yi so nkɔtena hɔ, na wɔanya aduane; na baabi a yɛwɔ yi yɛ ɛserɛ so.

¹³Na ɔka kyerɛɛ wɔn sɛ: Momma wɔn biribi nni! Na wɔse: Yɛnni biribiara sɛ paanoo nnum ne mpataa mmienu pɛ, gye sɛ yɛkɔtɔ aduane ma nkurɔfoɔ yi nyinaa.

¹⁴Na wɔbɛyɛ mmarima mpemnum. Na ɔka kyerɛɛ n’asuafoɔ no sɛ: Momma wɔntenatena ase akuakuo bɛyɛ aduonum aduonum.

¹⁵Na wɔyɛɛ saa, na wɔmaa wɔn nyinaa tenatenaa ase.

¹⁶Na ɔfaa paanoo nnum ne mpataa mmienu no hwɛɛ ɔsoro hyiraa so, na ɔbubu de maa asuafoɔ no sɛ wɔnkyɛ mma nkurɔfokuo no.

¹⁷ Na wɔdii, na wɔn nyinaa meemee, na wɔtasee mporoporowa a ɛkaeɛ no nkɛntɛn dummienu.

¹⁸Na ɛbaa sɛ ɔno nko wɔ hɔ rebɔ mpaeɛ no, na n’asuafoɔ no ka ne ho; na ɔbisaa wɔn sɛ: Nkurɔfoɔ akuakuo no se: Mene hwan?

¹⁹Na wɔbuaa sɛ: Yohane suboni, na ebinom se: Elia, na afoforɔ se: Tete adiyifoɔ no mu bi na wasɔreɛ.

²⁰Na ɔbisaa wɔn sɛ: Mo deɛ, mose mene hwan? Na Petro buaa sɛ: Onyankopɔn Kristo no.

²¹Na ɔhyɛɛ wɔn nyinaa ketee, baraa wɔn sɛ wɔnnka yei nnkyerɛ obiara

²² sɛ: Ɛsɛ sɛ Onipa Ba no hunu amane pii, na mpanimfoɔ ne asɔfoɔ mpanimfoɔ ne Atwerɛfoɔ apo no, na wɔakum no, na da a ɛtɔ so mmiɛnsa no, wanyane.

²³Na ɔka kyerɛɛ wɔn nyinaa sɛ: Sɛ obi pɛ sɛ ɔdi m’akyiri a, ɔmpa ne ho akyi, na ɔmfa n’asɛnnua daa, na ɔnni m’akyi.

²⁴ Na obiara a ɔpɛ sɛ ɔbɛgye ne kra no, ɛbɛfiri ne nsa, na deɛ me nti ne kra bɛfiri ne nsa no, ɔbɛgye no nkwa.

²⁵Na sɛ onipa nya wiase nyinaa, na ɔyera anaasɛ ɔhwere ne ho a, mfasoɔ bɛn na ɔbɛnya?

²⁶ Na obiara a n’ani bɛwu me ne me nsɛm ho no, ɔno nso ho bɛyɛ Onipa Ba no aniwu ɛda a ɔde ɔno ne n’agya ne n’abɔfoɔ kronkron animuonyam bɛba no.

²⁷Na nokorɛ mese mo sɛ: Wɔn a wɔgyina ha yi mu binom wɔ hɔ a, wɔrenka owuo nhwɛ kɔsi sɛ wɔbɛhunu Nyankopɔn ahennie ansa.

²⁸Na ɛbaa sɛ nsɛm yi akyi bɛyɛ nnawɔtwe no, ɔfaa Petro ne Yohane ne Yakobo, na ɔne wɔn kɔɔ bepɔ so mpaebɔ.

²⁹Na ɔrebɔ mpaeɛ no, n’anim tebea sakyerae, na n’atadeɛ yɛɛ fitaa, na ɛhrann.

³⁰Na hwɛ, mmarima baanu a ɛyɛ Mose ne Elia ne no bɛkasae;

³¹ na wɔyii wɔn ho adi animuonyam mu, na wɔkaa ne wuo a ɔbɛwu wɔ Yerusalem ho asɛm.

³²Na nna afa Petro ne wɔn a wɔka ne ho no; na wɔnyaneeɛ no, wɔhunuu n’animuonyam no ne mmarima baanu no sɛ wɔne no gyina hɔ.

³³Na ɛbaa sɛ wɔrefiri ne nkyɛn akorɔ no, Petro ka kyerɛɛ Yesu sɛ: Owura, ɛyɛ sɛ yɛtena ha, na ma yɛmmɔ asese mmiɛnsa, wo deɛ baako, Mose deɛ baako, na Elia deɛ baako; ɛfiri sɛ na ɔnnim deɛ ɔreka.

³⁴Na ɔreka saa no, mununkum ba bɛkataa wɔn so; na wɔrekɔ mununkum no mu no, wɔsuroe.

³⁵ Na ɛnne bi firii mununkum no mu kaa sɛ: Oyi ne me ba a mayi no, montie no!

³⁶Na ɛnne no twaa mu no, wɔhunuu Yesu nko ara. Na wɔmuamuaa so, na nna no mu no, wɔanka nnoɔma a wɔhunuiɛ no ankyerɛ obiara.

³⁷Na ɛbaa sɛ adeɛ kyeeɛ a wɔfiri bepɔ no so sii fam no, nkurɔfokuo bebree bɛhyiaa no.

³⁸Na hwɛ, ɔbarima bi a ɔfiri nkurɔfoɔ no mu teaa mu sɛ: Kyerɛkyerɛfoɔ, mesrɛ wo, hwɛ me ba yi, na ɔyɛ me ba korɔ.

³⁹Na hwɛ, honhom bi kye no, na ɔfu mu tea mu su, na ɛsensene no ma n’ano twa ahuro, na ɔbu fa so, na ɛdene no ansa na agyaa no.

⁴⁰Na mesrɛɛ w’asuafoɔ no sɛ wɔntu no, nanso wɔantumi.

⁴¹Na Yesu buaa sɛ: O ɛnnɛ mma a wɔnni gyidie na wɔakyeakyea, mentena mo nkyɛn na mento me bo ase mo ho nkɔduru da bɛn? Fa wo ba no bra ha!

⁴² Na ɔreba no, honhommɔne no himm no hwee fam, na ɛsensenee no. Na Yesu teateaa honhom fi no, na ɔsaa abɔfra no yadeɛ, na ɔde no maa n’agya.

⁴³Na Nyankopɔn ahoɔden kɛseɛ yi yɛɛ wɔn nyinaa ahodwiri. — Na nnoɔma a Yesu yɛeɛ no nyinaa yɛɛ wɔn nwanwa no, ɔka kyerɛɛ n’asuafoɔ no sɛ:

⁴⁴ Momma nsɛm yi nkɔ mo aso mu; na wɔrebɛyi onipa ba no ahyɛ nnipa nsa.

⁴⁵ Na wɔante asɛm yi ase, ɛfiri sɛ na wɔde ahunta wɔn na wɔanhunu. Na wɔsuroo sɛ wɔbɛbisa no asɛm yi.

⁴⁶Na asɛm bi baa wɔn mu sɛ wɔn mu hwan na ɔbɛyɛ kɛseɛ?

⁴⁷Na Yesu hunuu wɔn akoma mu nsusuiɛ no, ɔfaa abɔfra bi bɛgyinaa ne nkyɛn,

⁴⁸ na ɔsee wɔn sɛ: Obiara a ɔbɛgye abɔfra yi me din mu no, wagye me; na obiara a ɔbɛgye me no, na wagye deɛ ɔsomaa me no. Na deɛ ɔyɛ mo nyinaa mu akumaa no, ɔno na ɔbɛyɛ kɛseɛ.

⁴⁹Na Yohane buaa sɛ: Owura, yɛhunuu sɛ obi de wo din retu ahonhommɔne; na yɛbaraa no, ɛfiri sɛ ɛnyɛ ɔne yɛn na ɛnam.

⁵⁰ Na Yesu ka kyerɛɛ no sɛ: Mommmara no! Na deɛ ɔnyɛ biribi ntia mo no na ɔwɔ mo afa.

⁵¹ Na ɛbaa sɛ nna a wɔrebɛfa no akɔ ɔsoro reyɛ awie duru no, ɔde sii n’anim sɛ ɔbɛkɔ Yerusalem.

⁵² Na ɔsomaa abɔfoɔ dii n’anim; na wɔkɔeɛ no, wɔkɔhyɛnee Samariafoɔ akuraa bi ase sɛ wɔrekɔsiesie hɔ ama no.

⁵³Na wɔannye no, ɛfiri sɛ na n’ani kyerɛ Yerusalem.

⁵⁴ Na n’asuafoɔ Yakobo ne Yohane hunuiɛ no, wɔkaa sɛ: Awurade, wopɛ sɛ yɛka na ogya firi soro bɛhye wɔn?

⁵⁵Na ɔdanee ne ho kaa wɔn anim.[3]

⁵⁶ Na wɔkɔɔ akuraa foforɔ bi ase.

⁵⁷Na ɛbaa sɛ wɔnam kwan mu rekorɔ no, obi ka kyerɛɛ no sɛ: Awurade, baabiara a wobɛkorɔ no, mɛdi w’akyi.

⁵⁸Na Yesu see no sɛ: Nsakraman wɔ abɔn, na ewiem nnomaa wɔ mpirebuo; na Onipa Ba no deɛ, ɔnni deɛ ɔde ne tiri toɔ.

⁵⁹Na ɔka kyerɛɛ ɔfoforɔ sɛ: Di m’akyi! Na ɔno deɛ ɔse: Ma me kwan na menkɔsie m’agya ansa.

⁶⁰Na Yesu see no sɛ: Ma awufoɔ nsie wɔn awufoɔ, na wo deɛ, kɔ na kɔka Nyankopɔn ahennie ho asɛm!

⁶¹ Na ɔfoforɔ nso kaa sɛ: Awurade, mɛdi w’akyi, na ma me kwan na menkɔkra wɔn a wɔwɔ me fie ansa.

⁶²Na Yesu ka kyerɛɛ no sɛ: Obiara a ɔde ne nsa kɔsɔ funtumdadeɛ mu na ɔhwɛ n’akyire no mfata Nyankopɔn ahennie no mu.