Read New Revised Asante Twi Bible Deuteronomium 12 Bible Online

Deuteronomium 12 - New Revised Asante Twi Bible bible

Deuteronomium 12

¹Yeinom ne ahyɛdeɛ ne atemmudeɛ a monhwɛ nyɛ no asase a AWURADE wo nananom Nyankopɔn de rema wo sɛ fa no soɔ, nna a mode te asase soɔ nyinaa.

² Sɛeɛ na monsɛe ɔsombea a amanaman a morekɔtu wɔn no som wɔn anyame, mmepɔ atentene so ne nkokoɔ so ne dua mono biara ase no nyinaa;

³na monnwiri wɔn afɔrebukyia, na mommubu wɔn aboɔ adum, na momfa ogya nhye wɔn abosompɔ, na mommobɔ wɔn anyame ahoni, na monsɛe wɔn din mfiri hɔ.

⁴Monnyɛ AWURADE mo Nyankopɔn saa,

⁵na mmom faako a ɔbɛyi mo mmusuakuo nyinaa mu sɛ ɔde ne din bɛtoɔ na watena no na monhwɛ, na ɛhɔ na monkorɔ;

⁶na ɛhɔ na momfa mo hyeɛ afɔdeɛ ne mo kum afɔdeɛ ne mo ntotosoɔ du du ne mo nsam mmasoɔ adeɛ ne mo bɔhyɛ adeɛ ne mo ayamyi afɔdeɛ ne mo anantwie ne mo nnwan mmakan nkorɔ;

⁷na ɛhɔ na monnidi AWURADE mo Nyankopɔn anim, na mo ne mo afie ani nnye ade a mode mo nsa ka a AWURADE wo Nyankopɔn de ahyira woɔ no mu nyinaa.

⁸Monnyɛ sɛdeɛ yɛreyɛ no ɛha nnɛ yi biara a obiara yɛ deɛ ɛtene n’ani soɔ nyinaa no;

⁹na ɛde bɛsi sɛsɛɛ yi monnya nnuruu home ne agyapadeɛ a AWURADE wo Nyankopɔn de rema woɔ no mu.

¹⁰ Na sɛ monya twa Yordan kɔtena asase a AWURADE mo Nyankopɔn de rema mo sɛ monni soɔ no so, na ɔma mo home firi mo atamfoɔ a wɔatwa mo ho ahyia no nyinaa ho na motena ase dwoodwoo a,

¹¹ɛnneɛ faako a AWURADE mo Nyankopɔn bɛyi ama ne din atena no, ɛhɔ na momfa deɛ merehyɛ mo no nyinaa nkorɔ: Mo hyeɛ afɔdeɛ ne mo kum afɔdeɛ ne mo ntotosoɔ du du ne mo nsam mmasoɔ adeɛ ne mo bɔhyɛ adeɛ a moyie a mode hyɛ AWURADE bɔ no nyinaa.

¹² Na momma mo ani nnye AWURADE mo Nyankopɔn anim, mo ne mo mmammarima ne mo mmammaa ne mo nkoa ne mo mfenaa ne Lewini a ɔwɔ mo kuro apono mu, ɛfiri sɛ ɔno deɛ, ɔnni mo mu kyɛfa anaa agyapadeɛ.

¹³Hwɛ wo ho yie na woammɔ wo hyeɛ afɔdeɛ baabiara a wohunu,

¹⁴gye faako a AWURADE bɛyi wɔ wo mmusuakuo baako mu no, ɛhɔ na bɔ wo hyeɛ afɔdeɛ, na yɛ deɛ merehyɛ woɔ nyinaa.

¹⁵ Nanso ɛnam biara a wo kra kɔn dɔ no, kum di, sɛ AWURADE wo Nyankopɔn ahyira wo wɔ wo nkuro nyinaa mu; obi a ne ho nteɛ ne deɛ ne ho teɛ nni bi, sɛ ɔwansane ne ɔforoteɛ;

¹⁶ mogya no nko na monnnie, monhwie ngu fam sɛ nsuo.

¹⁷Deɛ ɛnsɛ sɛ wodie wɔ wo nkuro mu ne: W’aburoo ne wo nsa ne wo ngo ntotosoɔ du du ne w’anantwie ne wo nnwan mmakan ne wo bɔhyɛ adeɛ biara a woahyɛ ho bɔ ne w’ayamyi afɔdeɛ ne wo nsam mmasoɔ adeɛ;

¹⁸ gye sɛ AWURADE wo Nyankopɔn anim, faako a ɔbɛyie no na die, wo ne wo babarima ne wo babaa ne w’akoa ne w’afenaa ne Lewini a ɔwɔ wo kuro apono mu, na ma w’ani nnye AWURADE wo Nyankopɔn anim, deɛ wode wo nsa ka nyinaa ho.

¹⁹ Hwɛ yie na wo werɛ amfiri Lewini, nna a wode te w’asase soɔ nyinaa.

²⁰Na sɛ AWURADE wo Nyankopɔn trɛ wo hyeɛ mu sɛdeɛ waka akyerɛ woɔ no, na wose mɛdi nam, ɛfiri sɛ wo kra kɔn dɔ sɛ ɔbɛdi nam a, di nam sɛdeɛ wo kra kɔn dɔ.

²¹Sɛ faako a AWURADE wo Nyankopɔn bɛyi de ne din ato hɔ no ne wo ntam ware a, ɛnneɛ kum w’anantwie ne wo nnwan a AWURADE de ama woɔ no bi, sɛdeɛ mehyɛɛ woɔ no, na di no wo kuro mu, sɛdeɛ wo kra kɔn dɔ;

²² sɛdeɛ wɔdi ɔwansane ne ɔforoteɛ no, saa ara nso na die; obi a ne ho nteɛ ne deɛ ne ho teɛ nyinaa nni.

²³ Hwɛ yie mmom na hwɛ na woanni mogya, ɛfiri sɛ mogya ne ɔkra, na nni ɔkra nka nam no ho;

²⁴nni, hwie gu fam sɛ nsuo;

²⁵nni, na ɛnsi wo ne wo mma a wɔdi w’akyire yie, sɛ woreyɛ deɛ ɛtene AWURADE ani soɔ.

²⁶Fa akronkronneɛ a ɛsɛ sɛ wode ma, ne wo bɔhyɛ adeɛ na ma so kɔ faako a AWURADE bɛkyerɛ hɔ.

²⁷ Na fa nam ne mogya no bɔ wo hyeɛ afɔdeɛ AWURADE wo Nyankopɔn afɔrebukyia so, na wɔnhwie w’afɔdeɛ no mogya ngu n’afɔrebukyia no so, na nam no deɛ, di.

²⁸Hwɛ na tie nsɛm a merehyɛ woɔ nyinaa na ɛnsi wo ne wo mma a wɔdi w’akyire yie daa, sɛ woreyɛ deɛ ɛyɛ na ɛtene AWURADE wo Nyankopɔn ani so.

²⁹Sɛ AWURADE wo Nyankopɔn twitwa amanaman a worekɔ hɔ akɔtu wɔn no firi w’anim, na wotu wɔn tena wɔn asase so a,

³⁰ hwɛ wo ho yie na sɛeɛ a wɔasɛe wɔn afiri w’anim no akyiri no wɔn akyiridie anyɛ wo fidie, na woammisa wɔn anyame akyiri kwan sɛ: Amanaman yi som wɔn anyame sɛn? Na me nso menyɛ saa.

³¹Nyɛ AWURADE wo Nyankopɔn saa, na n’akyiwadeɛ a ɔtane nyinaa na wɔayɛ ama wɔn anyame, na wɔn mmammarima ne wɔn mmammaa mpo, wɔde ogya hye wɔn ma wɔn anyame.

³² Asɛm a merehyɛ mo nyinaa, monhwɛ nni so; mfa bi nka ho na nyi bi nso mfiri mu.