Read New Revised Asante Twi Bible Deuteronomium 24 Bible Online

Deuteronomium 24 - New Revised Asante Twi Bible bible

Deuteronomium 24

¹ Sɛ ɔbarima bi ware yerɛ, na ɛba sɛ n’ani nnye ɔbaa no ho a, ɛfiri sɛ wahunu ne ho aniwudeɛ bi a, ɛnneɛ ɔntwerɛ awaregyaeɛ nwoma mma no na ɔmfa nhyɛ ne nsa, na ɔnnya no kwan mfiri ne fie.

²Na sɛ ɔfiri ne fie kɔ na ɔkɔware ɔbarima bi,

³na ekunu foforɔ no nso mpɛ no, na ɔtwerɛ awaregyaeɛ nwoma ma no de hyɛ ne nsa na ɔgya no kwan firi ne fie, anaasɛ ekunu a ɔwaree no akyire yi no wu a,

⁴ɛnneɛ ne kane kunu a ɔgyaa no kwan no nnsane mmmɛware no bio, ne ho figuo no akyi, ɛfiri sɛ ɛno yɛ AWURADE anim akyiwadeɛ, na mfa bɔne ngu asase a AWURADE wo Nyankopɔn de rema wo sɛ di soɔ no so.

⁵ Sɛ ɔbarima bi ware yerɛ foforɔ a, ɔnnkɔ ɔsa, na wɔmmfa adwuma biara nnto ne so; na ɔnne ne ho wɔ ne fie afirinhyia, na ɔne ne yere a ɔwaree no no ani nnye.

⁶Obi nnnye oyuyammoɔ ne ne ba sɛ awowa deɛ; sɛ ɛba saa a na onii no regye nkwa sɛ awowadeɛ.

⁷ Sɛ wɔhunu obi a ɔwia ne nuanom Israelfoɔ mu nipa bie na ɔdi no nya anaasɛ ɔtɔn no a, ɛnneɛ owifoɔ no nwu; na yi bɔne no firi wo mu.

⁸ Hwɛ yie kwata yadeɛ ho, na woahwɛ ayɛ sɛdeɛ asɔfoɔ Lewifoɔ no bɛkyerɛ mo no nyinaa pɛpɛɛpɛ; sɛdeɛ mehyɛɛ wɔn no, saa na monhwɛ nyɛ.

⁹ Kae deɛ AWURADE wo Nyankopɔn yɛɛ Miriam wɔ kwan soɔ, berɛ a mofiri Misraim reba no.

¹⁰Sɛ wode biribi fɛm wo yɔnko a, nhyɛne ne dan mu nkɔgye n’awowa;

¹¹adihɔ na gyina, na onipa a wofɛm no adeɛ no mfa awowa no mmrɛ wo wɔ adihɔ.

¹²Na sɛ ɔyɛ onipa a ɔdi hia a, mfa n’awowa no nna;

¹³ owia kɔtɔ a, dane awowa no kɔma no, na ɔmfa ne ntoma nna, na ɔnhyira wo, na ɛnyɛ wo tenenee wɔ AWURADE wo Nyankopɔn anim.

¹⁴ Nhyɛ ɔpaani, mmɔborɔni ne ohiani a ɔfiri wo nuanom anaa ahɔhoɔ a wɔwɔ w’asase soɔ, wo nkuro mu no so.

¹⁵Da a ɔyɛ adwuma no ara na ma no n’apaadeɛ, na mma owia nnkɔtɔ so, ɛfiri sɛ ɔdi hia, na ɔde n’ani ato so; na wansu amfrɛ AWURADE antia wo, na annane wo bɔne.

¹⁶ Wɔnnkum nananom wɔ wɔn mma bɔne so nti, na wɔnnkum mma wɔ wɔn nananom bɔne so nti; na obiara bɔne nti na wɔnku no.

¹⁷ Nkyea ɔhɔhoɔ anaa awisiaa atɛn, na nnye okunafoɔ atadeɛ awowa.

¹⁸ Na kae sɛ woyɛɛ akoa Misraim, na AWURADE wo Nyankopɔn gyee wo firii hɔ, enti na merehyɛ wo sɛ di asɛm yi soɔ.

¹⁹ Sɛ wotwa w’aduane w’afuo mu na wo werɛ firi afi bi afuo mu hɔ a, nsane nkɔfa; ma no nyɛ ɔhɔhoɔ, awisiaa ne okunafoɔ deɛ, na AWURADE wo Nyankopɔn ahyira wo wɔ wo nsa ano adwuma nyinaa mu.

²⁰Sɛ wopore wo ngo dua a, nsane nkɔtwee so; ma no nyɛ ɔhɔhoɔ, awisiaa ne okunafoɔ deɛ.

²¹Sɛ wote wo bobeturom aba a, nsane nkɔdi so mpɛpɛ; ma no nyɛ ɔhɔhoɔ, awisiaa ne okunafoɔ deɛ.

²²Na kae sɛ woyɛɛ akoa Misraim asase so; enti na merehyɛ wo sɛ di asɛm yi soɔ.