Read New Revised Asante Twi Bible Deuteronomium 3 Bible Online

Deuteronomium 3 - New Revised Asante Twi Bible bible

Deuteronomium 3

¹ Ɛnna yɛdanee yɛn ani foro kɔɔ Basan kwan soɔ; na Basan hene Og firi bɛhyiaa yɛn, ɔno ne ne man nyinaa ne yɛn bɛkoe wɔ Edrei.

²Na AWURADE ka kyerɛɛ me sɛ: Nsuro no, na mede ɔne ne man nyinaa ne n’asase mahyɛ wo nsa, sɛ yɛ no sɛdeɛ woyɛɛ Amorifoɔ hene Sihon a ɔtenaa Hesbon no.

³Na AWURADE yɛn Nyankopɔn de Basan hene Og nso ne ne man nyinaa hyɛɛ yɛn nsa, na yɛkumm wɔn kɔsii sɛ wɔn mu fua mpo anka amma no.

⁴Na yɛfaa ne nkuro nyinaa, berɛ no mu; kuro biara nni hɔ a yɛannye wɔn nsam; nkuro aduosia, Argob asase nyinaa, Og ahennie a ɛwɔ Basan.

⁵Yeinom nyinaa yɛ nkuro a ɛho wɔ afasuo atenten, aponkɛseɛ, ne adaban; ɛsono nkuraa a ɛdɔɔso bebree no.

⁶Na yɛsɛee wɔn pasapasa sɛdeɛ yɛyɛɛ Hesbon hene Sihon no, yɛsɛee nkuro no ne emu mmarima, mmaa ne mmɔfra nyinaa pasapasa.

⁷ Na afieboa nyinaa ne nkuro no mu asadeɛ deɛ, yɛfom fae.

⁸Na yɛgyee asase no firii Amorifoɔ ahemfo baanu a wɔwɔ Yordan agya no nsam, saa berɛ no, ɛfiri Arnon subonhwa mu kɔsi Hermon bepɔ ho,

⁹ (Sidonfoɔ frɛ Hermon sɛ Sirion, na Amorifoɔ frɛ no Senir),

¹⁰asaseta so nkuro nyinaa ne Gilead nyinaa ne Basan nyinaa kɔduru Salka ne Edrei, Basanhene Og ahennie no nkuro.

¹¹(Na Basanhene Og nko na aka wɔ abrane akɛseɛ nkaeɛ no mu. Hwɛ, ne mpa a ɛyɛ dadeɛ mpa, ɛnsi Amon mma Raba anaa? Ne tentene basafa nan ne fa, na ne tɛtrɛtɛ basafa mmienu, sɛdeɛ onipa basafa teɛ.)

¹² Na yɛfaa asase yi saa berɛ no; ɛfiri Aroer a ɛda Arnon subonhwa mu ne Gilead bepɔ fa ne ne nkuro na mede memaa Rubenfoɔ ne Gadfoɔ;

¹³na Gilead nkaeɛ ne Basan nyinaa, Og man a ɛyɛ Argob asase nyinaa, mede maa Manase abusuakuo fa. (Saa Basan no nyinaa na wɔfrɛ no abrane akɛseɛ asase.

¹⁴Manase ba Yair faa Argob asase no nyinaa a ɛne Basan kɔsii Gesurfoɔ ne Maakatfoɔ hyeɛ so, na ɔde ne din too asase no frɛɛ no Hawot-yair de bɛsi nnɛ da yi.)

¹⁵Na mede Gilead maa Makir.

¹⁶Na Rubenfoɔ ne Gadfoɔ no, memaa wɔn Gilead fa bi, ɛkɔduru Arnon subonhwa ho a subonhwa no mfimfini ne ɛhyeɛ, de kɔpem Yabok subonhwa no, Amon mma hyeɛ so,

¹⁷Araba mpaperɛ so ne Yordan ne ɛho asase, ɛfiri Kineret kɔsi Araba mpaperɛ so po a ɛne Nkyene Po no ano wɔ Pisga bepɔ ase apueeɛ fam.

¹⁸Na mehyɛɛ mo saa berɛ no sɛ: AWURADE mo Nyankopɔn de asase yi ama mo sɛ monni so, mo akofoɔ nyinaa mmia ntwam nni mo nuanom Israelfoɔ anim;

¹⁹mo yerenom ne mo mma ne mo mmoa deɛ, menim sɛ mowɔ mmoa pii, wɔntena mo nkuro a mede mama mo no mu;

²⁰nkɔsi sɛ AWURADE bɛma mo nuanom ahome sɛ mo, na wɔn nso wɔadi asase a AWURADE mo Nyankopɔn de rema wɔn Yordan agya no so, ansa na moasane aba mo agyapadeɛ a mede mama mo no so.

²¹ Na Yosua nso, mehyɛɛ no saa berɛ no sɛ: W’ani ahunu deɛ AWURADE mo Nyankopɔn de yɛɛ ahemfo baanu yi nyinaa: Saa ara nso na AWURADE bɛyɛ ahennie a woretwam akɔ hɔ nyinaa;

²² monnsuro wɔn, ɛfiri sɛ AWURADE mo Nyankopɔn na ɔbɛko ama mo.

²³Na mesrɛɛ AWURADE saa berɛ no sɛ:

²⁴AWURADE Nyankopɔn, wo na woafiri aseɛ de wo kɛseyɛ ne wo nsa a ɛyɛ den no akyerɛ w’akoa, na onyame bɛn na ɔwɔ soro anaa asase soɔ a ɔbɛtumi ayɛ wo nnwuma ne wo mmaninneɛ yi bie?

²⁵Mesrɛ wo, ma mentwa menkɔhwɛ asase pa a ɛwɔ Yordan agya no, bepɔ fɛfɛ no ne Lebanon.

²⁶ Nanso mo nti AWURADE bo fuu me, na wantie me; na AWURADE ka kyerɛɛ me sɛ: Ɛdɔɔso ma wo, nkɔ so ne me nkasa asɛm yi ho bio.

²⁷Foro kɔ Pisga so, na ma w’ani so hwɛ atɔeɛ ne atifi fam ne anafoɔ ne apueeɛ, na fa w’ani hwɛ, na Yordan yi deɛ, worentwa.

²⁸ Na hyɛ Yosua yie, na hyɛ no den na hyɛ no aboɔduro, ɛfiri sɛ ɔno na ɔbɛdi ɔman yi anim akyɛ asase a wobɛhunu no mu ama wɔn.

²⁹Na yɛtenaa bonhwa no mu, Bet-peor ntentensoɔ.