Read New Revised Asante Twi Bible Yohane 11 Bible Online

Yohane 11 - New Revised Asante Twi Bible bible

Yohane 11

¹ Na ɔyarefoɔ bi wɔ hɔ a wɔfrɛ no Lasaro a ɔfiri Betania, Maria ne ne nuabaa Marta kuro mu.

² Na ɛyɛ Maria a ɔde ngo hwamhwam sraa Awurade na ɔde ne tirinwi pepaa ne nan ho no na ne nua Lasaro yareɛ no.

³Enti ne nuammaanom soma baa Yesu nkyɛn sɛ: Awurade, hwɛ, deɛ wodɔ no no yare.

⁴ Na Yesu teeɛ no, ɔkaa sɛ: Yadeɛ yi nyɛ owuo yadeɛ, na Nyankopɔn animuonyam ntira, sɛ wɔbɛfa so ahyɛ Nyankopɔn Ba no animuonyam.

⁵Nso Yesu dɔ Marta ne ne nuabaa no ne Lasaro.

⁶Na afei ɔtee sɛ ɔyareɛ no, ɔtenaa faako a ɔwɔ hɔ no ara nnanu.

⁷Na ɛno akyiri no, ɔsee n’asuafoɔ no sɛ: Momma yɛnkɔ Yudea bio!

⁸ Asuafoɔ no see no sɛ: Rabi, nnansa yi ara, na Yudafoɔ rehwehwɛ sɛ wɔsi wo aboɔ, na worekɔ hɔ bio yi?

⁹ Yesu buaa sɛ: Ɛnyɛ nnɔnhwereɛ dummienu na ɛwɔ da baako mu? Sɛ obi nam awia a, ɔnsunti, ɛfiri sɛ ɔhunu wiase hann;

¹⁰ na sɛ obi nam anadwo a, ɔsunti, ɛfiri sɛ hann nni ne mu.

¹¹ Ɔkaa yeinom, na ɛno akyiri no, ɔsee wɔn sɛ: Yɛn adamfo Lasaro ada; na merekɔ makɔnyane no.

¹²Ɛnna n’asuafoɔ no kaa sɛ: Awurade, sɛ wada deɛ a, ɔbɛsɔre.

¹³Na Yesu deɛ, ɔkaa ne wuo ho asɛm; na wɔn deɛ, wɔsusuu sɛ nna pa ho asɛm na ɔreka.

¹⁴Ɛnna afei Yesu see wɔn pefee sɛ: Lasaro awu;

¹⁵na mo nti ɛyɛ me dɛ sɛ menni hɔ, na moagye adi. Nanso momma yɛnkɔ ne nkyɛn!

¹⁶Ɛnna Toma a wɔfrɛ no Ata no ka kyerɛɛ ne mfɛfoɔ asuafoɔ no sɛ: Yɛn nso, momma yɛnkɔ na yɛne no nkɔwu!

¹⁷Ɛnna Yesu duruu hɔ no, ɔbɛhunuu sɛ wadi ɛda mu nnanan dada.

¹⁸Nso Betania bɛn Yerusalem, ɛbɛyɛ kwansini mmienu,

¹⁹na Yudafoɔ no mu pii aba Marta ne Maria nkyɛn sɛ wɔrebɛgyam wɔn, wɔn nua no nti.

²⁰Ɛnna Marta tee sɛ Yesu reba no, ɔkɔhyiaa no; na Maria deɛ, ɔtenaa fie.

²¹Ɛnna Marta see Yesu sɛ: Awurade, sɛ wowɔ ha a, anka me nuabarima anwu.

²²Na seesei mpo menim sɛ, biribiara a wobɛbisa Onyankopɔn no, Onyankopɔn de bɛma wo.

²³Yesu see no sɛ: Wo nuabarima no bɛsɔre bio.

²⁴ Marta see no sɛ: Menim sɛ owusɔreɛ mu, da a ɛdi akyire no, ɔbɛsɔre.

²⁵Yesu see no sɛ: Mene owusɔreɛ ne nkwa; deɛ ɔgye me die no, sɛ wawu mpo a, ɔbɛnya nkwa.

²⁶ Na obiara a ɔte ase na ɔgye me die no renwu da. Wogye yei di anaa?

²⁷ Ɔsee no sɛ: Aane, Awurade, megye medi sɛ wone Kristo no, Nyankopɔn Ba a ɔreba wiase no.

²⁸Na ɔkaa saa no, ɔsii mu kɔfrɛɛ ne nua Maria kokoam sɛ: Kyerɛkyerɛfoɔ no aba, na ɔrefrɛ wo.

²⁹Ɔno nso teeɛ no, ɔsɔree ntɛm baa ne nkyɛn.

³⁰ Nanso na Yesu nnya nhyɛnee kuro no mu, na ɔwɔ deɛ Marta bɛhyiaa no hɔ.

³¹Ɛnna Yudafoɔ a wɔne no wɔ efie hɔ regyam no no hunuu sɛ Maria asɔre ntɛmntɛm afiri adie no, wɔdii n’akyi kaa sɛ: Ɔrekɔ ɛda no so hɔ akɔsu.

³²Ɛnna Maria duruu faako a Yesu wɔ na ɔhunuu no no, ɔhwee ne nan ase ka kyerɛɛ no sɛ: Awurade, sɛ wowɔ ha a, anka me nuabarima anwu.

³³ Ɛnna Yesu hunuu no sɛ ɔresu na Yudafoɔ a wɔne no baeɛ nso resu no, ɔguu ahome honhom mu, na ne ho yeraa no,

³⁴na ɔkaa sɛ: Ɛhe na mode no toeɛ? Wɔsee no sɛ: Awurade, bra bɛhwɛ!

³⁵ Yesu sui.

³⁶Ɛnna Yudafoɔ no kaa sɛ: Hwɛ dɔ a ɔdɔ no!

³⁷Na wɔn mu binom se: Oyi a ɔbuee onifirani ani no, sɛ anka ɔbɛtumi agye oyi afiri wuo mu.

³⁸ Ɛnna Yesu guu ahome ne mu bio, na ɔbaa ɛda no so; ɛyɛ ɔbodan, na ɔboɔ hini ano.

³⁹Yesu kaa sɛ: Monyi ɔboɔ no! Deɛ wawuo no nua Marta see no sɛ: Awurade, sɛsɛɛ deɛ, wabɔn, na wadi nnanan.

⁴⁰ Yesu see no sɛ: Manka mankyerɛ wo sɛ wogye di a, wobɛhunu Nyankopɔn animuonyam?

⁴¹Ɛnna wɔyii ɔboɔ no. Na Yesu maa n’ani so kaa sɛ: Agya, meda wo ase sɛ woatie me.

⁴² Na me deɛ, menim sɛ wotie me daa; na nkurɔfokuo a wɔgyina hɔ no nti na meka saa, na wɔagye adi sɛ wo na wosomaa me.

⁴³Na ɔkaa saa no, ɔde nne kɛseɛ teaa mu sɛ: Lasaro, firi bra!

⁴⁴Na deɛ wawuo no firii adi, ɛda no mu, ntoma kyekyere ne nan ne ne nsa, na duku kyekyere n’anim. Na Yesu see wɔn sɛ: Monsane no, na momma no nkɔ.

⁴⁵Ɛnna Yudafoɔ no mu pii a wɔbaa Maria nkyɛn na wɔhunuu adeɛ a Yesu yɛeɛ no gyee no diiɛ.

⁴⁶Na wɔn mu binom sii mu kɔɔ Farisifoɔ no nkyɛn, na wɔkɔkaa wɔn deɛ Yesu yɛeɛ no.

⁴⁷Ɛnna asɔfoɔ mpanimfoɔ ne Farisifoɔ no maa wɔkɔhyiaa badwafoɔ no, na wɔkaa sɛ: Ɛdeɛn na yɛbɛyɛ, ɛfiri sɛ onipa yi yɛ nsɛnkyerɛnneɛ pii.

⁴⁸Sɛ yɛgyaa no saa a, nnipa nyinaa bɛgye no adi, na Romafoɔ aba abɛfa yɛn ha yi ne yɛn man.

⁴⁹Na wɔn mu baako bi, Kaiafa a ɔdi sɔfo panin afe no mu no, see wɔn sɛ: Mo deɛ, monnim hwee,

⁵⁰ nanso monnwene sɛ ɛyɛ ma mo sɛ onipa baako bɛwu ama ɔman no, na ɔman no nyinaa ansɛe.

⁵¹ Na yei deɛ, ɛmfiri ɔno ara ne tirim na ɔkaeɛ, na mmom sɛ ɔyɛ ɔsɔfo panin saa afe no mu nti, na ɔhyɛɛ nkɔm sɛ Yesu rebɛwu ama ɔman no,

⁵² na ɛnyɛ ɔman no nko, na sɛ ɔbɛka Nyankopɔn mma a wɔapete no nyinaa nso abɔ mu ayɛ wɔn baako.

⁵³Ɛnna ɛfiri da no ara wɔtutuu agyina wɔn mu sɛ wɔbɛku no.

⁵⁴Enti Yesu anyi ne ho adi pefee annante Yudafoɔ no mu bio, na ɔfirii hɔ kɔɔ asase a ɛbɛn ɛserɛ soɔ, kuro bi a wɔfrɛ no Efraim mu, na ɔne n’asuafoɔ no tenaa hɔ.

⁵⁵ Na Yudafoɔ Twam no abɛn; na nnipa pii firii asase no so kɔɔ Yerusalem ansa na Twam no duruiɛ, sɛ wɔrekɔdwira wɔn ho.

⁵⁶Ɛnna wɔhwehwɛɛ Yesu, na wɔgyinaa asɔrefie hɔ sesee wɔn ho sɛ: Ɛdeɛn na mosusuo? Sɛsɛɛ ɔremma afahyɛ yi ase anaa?

⁵⁷Na asɔfoɔ mpanimfoɔ ne Farisifoɔ ahyɛ mmara nso sɛ, sɛ obi nim faako a ɔwɔ a, ɔmmɛkyerɛ, na wɔnkɔkye no.