Read New Revised Asante Twi Bible Yohane 12 Bible Online

Yohane 12 - New Revised Asante Twi Bible bible

Yohane 12

¹ Afei, aka nnansia na Twam no aduru no, Yesu baa Betania, faako a Lasaro a ɔnyanee no firii awufoɔ mu no wɔ.

²Ɛnna wɔtoo no pono wɔ hɔ, na Marta somee; na Lasaro deɛ, na ɔyɛ wɔn a wɔne no te adidiiɛ no mu baako.

³ Ɛnna Maria faa ngo hwamhwam kronkron a ne boɔ yɛ den kariboɔ baako de bɛsraa Yesu nan ho, na ɔde ne tirinwi pepaa ne nan ho; na ngo no hwam yɛɛ ɛdan no mu ma.

⁴Ɛnna n’asuafoɔ no mu baako, Yuda Iskariot (a ɔrebɛyi no ama no), kaa sɛ:

⁵Adɛn nti na wɔantɔn ngo hwamhwam yi annye denare ahasa, na wɔamfa amma ahiafoɔ?

⁶ Ɛnyɛ sɛ ɔdwene ahiafoɔ ho nti na ɔkaa yei, na mmom ɔyɛ owifoɔ, na ɔkura kotokuo no, na ɔwiawia deɛ wɔde gu mu ntira.

⁷Ɛnna Yesu kaa sɛ: Monnyaa no, na ɔde yei asie ama me sie da.

⁸ Na ahiafoɔ deɛ, mowɔ wɔn mo nkyɛn daa; na me deɛ, monni me daa.

⁹Ɛnna Yudafoɔ no mu nkurɔfokuo pii tee sɛ ɔwɔ hɔ, na wɔbae, ɛnyɛ Yesu nko ara ntira, na mmom sɛ wɔbɛhunu Lasaro a ɔnyanee no firii awufoɔ mu no nso ntira.

¹⁰Na asɔfoɔ mpanimfoɔ no tuu agyina sɛ wɔbɛkum Lasaro nso,

¹¹ɛfiri sɛ, ne nti na Yudafoɔ mu pii kɔeɛ, kɔgyee Yesu diiɛ.

¹²Adeɛ kyeeɛ no, nkurɔfokuo pii a wɔbaa afahyɛ no aseɛ tee sɛ Yesu reba Yerusalem no,

¹³ wɔfefaa berɛ, na wɔfirii adi sɛ wɔrekɔhyia no, na wɔteateaa mu sɛ: Hosiana! Nhyira ne deɛ ɔreba Awurade din mu no, Israel hene no!

¹⁴ Na Yesu hunuu afunumu ba bi no, ɔtenaa ne so, sɛdeɛ wɔatwerɛ sɛ:

¹⁵Nsuro, Sion babaa; hwɛ, wo hene reba, ɔte afunumu ba so.

¹⁶Nso n’asuafoɔ no anhunu yeinom kane no; na Onyankopɔn hyɛɛ Yesu animuonyam akyiri no, ɛno na wɔkaee sɛ wɔatwerɛ yeinom ne ho, na wɔayɛ ama no.

¹⁷Ɛnna nkurɔfokuo a wɔne no wɔ hɔ berɛ a ɔfrɛɛ Lasaro firii adakamena mu na ɔnyanee no firii awufoɔ mu no dii adanseɛ.

¹⁸Yei nti nso na nkurɔfokuo no kɔhyiaa no, ɛfiri sɛ wɔate sɛ wayɛ saa nsɛnkyerɛnneɛ no.

¹⁹ Ɛnna Farisifoɔ no kaa no wɔn mu sɛ: Mohunu sɛ montumi nyɛ ho hwee; hwɛ, wiase atu di n’akyi.

²⁰Na Helafoɔ bi wɔ wɔn a wɔbaa sɛ wɔrebɛsɔre afahyɛ no ase no mu;

²¹ ɛnna wɔbaa Filipo a ɔfiri Betsaida a ɛwɔ Galilea no nkyɛn, na wɔbɛka kyerɛɛ no sɛ: Owura, yɛpɛ sɛ yɛhunu Yesu.

²²Filipo ba bɛka kyerɛɛ Andrea, na afei Andrea ne Filipo bɛka kyerɛɛ Yesu.

²³Na Yesu buaa wɔn sɛ: Dɔn no aduru sɛ wɔbɛhyɛ Onipa Ba no animuonyam.

²⁴ Mereka akyerɛ mo nokorɛ mu pa ara sɛ, ayuo baako antɔ fam anwu a, ɛwɔ hɔ korɔ no ara; na sɛ ɛwu a, ɛso aba pii.

²⁵ Deɛ ɔdɔ ne kra no, ɛbɛfiri ne nsa; na deɛ ɔtane ne kra wɔ wiase ha yi no, ɔbɛkora no akɔ daa nkwa mu.

²⁶ Sɛ obi som me a, ma no nni m’akyi, na faako a mewɔ no, ɛhɔ na me somfoɔ nso bɛba; na sɛ obi som me a, m’Agya bɛdi no ni.

²⁷ Afei me kra ho yera no; na ɛdeɛn na menka? Agya, gye me firi dɔn yi mu! Nanso yei nti na mebaa dɔn yi mu.

²⁸Agya, hyɛ wo din animuonyam! Ɛnna ɛnne bi firi soro baeɛ: Mahyɛ no animuonyam dada, na mɛhyɛ no bio.

²⁹Ɛnna nkurɔfokuo a wɔgyina hɔ na wɔteeɛ no kaa sɛ: Aprannaa abom! Ebinom se: Ɔbɔfoɔ ne no kasae.

³⁰ Yesu bua kaa sɛ: Ɛnyɛ me nti na ɛnne yi baeɛ, na mo ntira.

³¹ Afei ne wiase atemmuo; afei na wɔbɛyi wiase sodifoɔ no hɔ.

³² Na me deɛ, sɛ wɔma me so firi asase so a, mɛtwe nnipa nyinaa maba me nkyɛn.

³³Yei deɛ, ɔka de kyerɛɛ owu ko a ɔrebɛwuo.

³⁴ Nkurɔfokuo no buaa no sɛ: Yɛn deɛ, yɛate no mmara no mu sɛ, Kristo no te hɔ daa; na adɛn na wose: Ɛtwa sɛ wɔma Onipa Ba no soɔ? Hwan ne Onipa Ba yi?

³⁵ Ɛnna Yesu ka kyerɛɛ wɔn sɛ: Aka hann no berɛ tiaa bi wɔ mo mu. Mowɔ hann no yi, monnante, na esum ammɛto mo; na deɛ ɔnam sum mu no nnim faako a ɔrekorɔ.

³⁶ Mowɔ hann no yi, monnye hann no nni, na moayɛ hann no mma. Yesu kaa yeinom, na ɔfiri wɔn anim hɔ kɔhuntaeɛ.

³⁷Na wayɛ saa nsɛnkyerɛnneɛ bebree wɔ wɔn anim deɛ, nanso wɔannye no anni,

³⁸ na Odiyifoɔ Yesaia asɛm a ɔkaeɛ no aba mu sɛ: Awurade, hwan na wagye yɛn kaseɛ adie, na hwan na wɔyii Awurade basa kyerɛɛ no?

³⁹ Yei nti na wɔantumi annye annie, sɛdeɛ Yesaia kaa bio sɛ:

⁴⁰Wafira wɔn ani, na wapirim wɔn akoma, na wɔamfa wɔn ani anhunu, na wɔamfa wɔn akoma ante aseɛ, na wɔannane wɔn ho na mansa wɔn yadeɛ.

⁴¹ Yesaia kaa yeinom, ɛfiri sɛ ɔhunuu n’animuonyam, na ne ho asɛm na ɔkaeɛ.

⁴² Na mpanimfoɔ no mu pii nso gyee no diiɛ; nanso Farisifoɔ no nti wɔanka, na wɔantu wɔn amfiri hyiadan mu;

⁴³ ɛfiri sɛ na wɔpɛ nnipa animuonyam sene Nyankopɔn animuonyam.

⁴⁴Na Yesu teaa mu sɛ: Deɛ ɔgye me die no, ɛnyɛ me na ɔgye me die, na ɛyɛ deɛ ɔsomaa me no;

⁴⁵ na deɛ ɔhu me no, hunu deɛ ɔsomaa me no.

⁴⁶ Maba wiase sɛ hann, na obiara a ɔgye me die no antena sum mu.

⁴⁷ Na sɛ obi te me nsɛm na wannye anni a, me deɛ, memmu no atɛn; na mamma sɛ merebɛbu wiase atɛn, na mebaa sɛ merebɛgye wiase.

⁴⁸Deɛ ɔmmu me, na ɔnnye me nsɛm no wɔ deɛ ɔbu no atɛn; asɛm a maka no, ɛno ara na ɛbɛbu no atɛn ɛda a ɛdi akyire no mu,

⁴⁹ɛfiri sɛ, me deɛ ɛnyɛ me na mehyɛɛ me ho mekasaeɛ, na Agya a ɔsomaa me no na ɔhyɛɛ me deɛ menka ne sɛdeɛ menkasa.

⁵⁰Na menim sɛ, n’ahyɛdeɛ no yɛ daa nkwa. Enti deɛ meka no, sɛdeɛ Agya no aka akyerɛ me no, saa ara na meka.