Read New Revised Asante Twi Bible Yohane 4 Bible Online

Yohane 4 - New Revised Asante Twi Bible bible

Yohane 4

¹ Afei Yesu[2] hunuu sɛ Farisifoɔ ate sɛ: Ɔno Yesu renya asuafoɔ bebree, na ɔrebɔ nnipa pii asu sene Yohane.

²Nso Yesu no ara deɛ, na ɔmmɔ asu, na mmom n’asuafoɔ no.

³Ɔfirii Yudea, na ɔsii mu kɔɔ Galilea bio.

⁴Na ɛtwa sɛ ɔfa Samaria.

⁵ Na afei ɔduruu Samaria kuro bi a wɔfrɛ no Sikar a ɛbɛn asasewa a Yakob de maa ne ba Yosef no ho.

⁶Nso na Yakob abura wɔ hɔ. Na ɛnam sɛ Yesu abrɛ wɔ n’akwantuo mu nti, ɔtenaa abura no so. Na abɔ bɛyɛ sɛ awia dummienu.

⁷Na ɔbaa bi a ɔfiri Samaria baa hɔ bɛtoo nsuo. Yesu see no sɛ: Ma me bi mennom!

⁸Na n’asuafoɔ no kɔ kuro no mu rekɔtɔ aduane.

⁹Ɛnna Samariani baa no see no sɛ: Ɛyɛɛ dɛn na wo a woyɛ Yudani, bisa me a meyɛ Samariani baa hɔ nsuo anom? (Ɔkaa saa ɛfiri sɛ na Yudafoɔ ne Samariafoɔ nka.)[3]

¹⁰ Yesu bua see no sɛ: Sɛ wonim Nyankopɔn akyɛdeɛ, ne deɛ ɔse wo sɛ: Ma me bi mennom yi a, anka wobɛbisa no, na wama wo nkwa nsuo.

¹¹Ɔbaa no ka kyerɛɛ Yesu sɛ: Owura, wonni adeɛ a wɔde toɔ, na abura no mu nso dɔ, enti ɛhe na wonya nkwa nsuo no fire?

¹²Woyɛ kɛseɛ sene yɛn agya Yakob a ɔmaa yɛn abura yi, na ɔno ara ne ne mma ne ne mmoa nomm bie no anaa?

¹³Yesu see no sɛ: Obiara a ɔnom nsuo yi bie no, osukɔm bɛde no bio.

¹⁴ Na deɛ ɔbɛnom nsuo a mɛma no bie no deɛ, osukɔm renne no da; na nsuo a mɛma no no bɛyɛ nsuo abura a ɛfifiri kɔ daa nkwa mu wɔ ne mu.

¹⁵Ɔbaa no ka kyerɛɛ no sɛ: Owura, ma me saa nsuo yi bi, na osukɔm anne me, na mamma ha mammɛto nsuo.

¹⁶Yesu see no sɛ: Kɔfrɛ wo kunu bra ha!

¹⁷Ɔbaa no bua kaa sɛ: Menni kunu. Yesu see no sɛ: Woaka no yie sɛ wose: Menni kunu;

¹⁸na wo ne mmarima baanum na atena, na deɛ wo ne no wɔ hɔ seesei ara yi mpo, ɔnyɛ wo kunu. Yei deɛ woaka no nokorɛ mu.

¹⁹Ɔbaa no see no sɛ: Owura, mahunu sɛ woyɛ odiyifoɔ.

²⁰ Yɛn agyanom sɔree bepɔ yi so; na mo deɛ, moka sɛ Yerusalem ne faako a ɛsɛ sɛ wɔsɔre.

²¹Yesu see no sɛ: Ɔbaa, gye me di sɛ, dɔn no reba a ɛnyɛ bepɔ yi so, anaasɛ Yerusalem na mobɛsɔre Agya no.

²² Mosɔre deɛ monnim; yɛn deɛ, yɛsɔre deɛ yɛnim, ɛfiri sɛ nkwagyeɛ no firi Yudafoɔ mu.

²³Na dɔn no reba, na adu, sɛ wɔn a wɔsɔre nokorɛ mu no bɛsɔre Agya no honhom ne nokorɛ mu; na wɔn a wɔsɔre no saa no na Agya no rehwehwɛ.

²⁴ Onyankopɔn yɛ honhom, na wɔn a wɔsɔre no no, ɛsɛ sɛ wɔsɔre no honhom ne nokorɛ mu.

²⁵ Ɔbaa no see no sɛ: Menim sɛ Mesaia (a wɔfrɛ no Kristo) no reba; na sɛ ɔba a, ɔno na ɔbɛkyerɛ yɛn nnoɔma nyinaa.

²⁶ Yesu see no sɛ: Me a me ne wo rekasa yi, mene no.

²⁷Saa berɛ no ara na n’asuafoɔ no baeɛ, na ɛyɛɛ wɔn nwanwa sɛ ɔne ɔbaa no rekasa, nanso obi ammisa no sɛ: Deɛn na wohwehwɛ? Anaasɛ: Adɛn na wo ne ɔbaa no rekasa yi?

²⁸Ɛnna ɔbaa no gyaa n’asuhina no hɔ, na ɔkɔɔ kuro no mu kɔka kyerɛɛ nnipa no sɛ:

²⁹Mommra mmɛhwɛ onipa bi a waka deɛ mayɛ nyinaa akyerɛ me, sɛ ɛnyɛ oyi ne Kristo no anaa?

³⁰Ɛnna nkurɔfoɔ no firii kuro no mu baa Yesu nkyɛn.

³¹Saa berɛ no mu no n’asuafoɔ no see no sɛ: Rabi, didi!

³² Na ɔsee wɔn sɛ: Mewɔ aduane medi a monnim.

³³Enti n’asuafoɔ no sesee wɔn ho sɛ: Obi abrɛ no biribi adi anaa?

³⁴ Yesu see wɔn sɛ: M’aduane ne sɛ meyɛ deɛ ɔsomaa me no apɛdeɛ, na mewie n’adwuma.

³⁵ Ɛyɛ a, monka sɛ aka abosome nnan na otwa berɛ adu anaa? Hwɛ, mese mo sɛ, momma mo ani so, na monhwɛ mfuo mu, sɛ anya ahoa ama otwa.

³⁶Na deɛ ɔtwa no gye akatua, na ɔboaboa aba no ano kɔ daa nkwa mu; na deɛ ɔguiɛ ne deɛ ɔtwaeɛ nyinaa ani agye prɛko.

³⁷Na yei mu na asɛm no yɛ nokorɛ sɛ: Obi gu, na obi twa.

³⁸Me deɛ, mesomaa mo sɛ monkɔtwa deɛ moanyɛ ho adwuma; ebinom abrɛ wɔn ho ayɛ, na mo deɛ, moabɛdi wɔn adwuma no so aba.

³⁹Na Samariafoɔ a wɔwɔ kuro no mu no mu pii gyee no dii, ɛsiane ɔbaa no adanseɛ a ɔdii sɛ: Waka deɛ mayɛ nyinaa akyerɛ me, no nti.

⁴⁰Enti Samariafoɔ no baa ne nkyɛn no, wɔsrɛɛ no sɛ ɔntena wɔn nkyɛn; na ɔtenaa hɔ nnanu.

⁴¹Na nnipa pii a ɛsene kane deɛ no gyee no dii n’asɛm nti,

⁴²na nkurɔfoɔ no ka kyerɛɛ ɔbaa no sɛ: Afei ɛnyɛ w’asɛm nti na yɛgye die, na yɛn ara yɛate, na yɛahunu sɛ oyi ne wiase Agyenkwa no ampa.

⁴³ Na nnanu akyiri no, Yesu firii hɔ kɔɔ Galilea.

⁴⁴ Na Yesu no ara dii adanseɛ sɛ, odiyifoɔ nni anidie ɔno ara ne kuro mu.

⁴⁵ Na ɔduruu Galilea no, Galileafoɔ no a wɔhunuu deɛ ɔyɛeɛ Yerusalem afahyɛ ase no nyinaa gyee no; ɛfiri sɛ wɔn nso wɔbaa afahyɛ no ase bi.

⁴⁶ Ɛnna ɔkɔɔ Kana a ɛwɔ Galilea, faako a ɔdanee nsuo nsa no bio. Na ahenkwaa panin bi wɔ hɔ a ne ba yare wɔ Kapernaum.

⁴⁷Na ɔtee sɛ Yesu firi Yudea aba Galilea no, ɔsii mu kɔɔ ne nkyɛn, na ɔsrɛɛ no sɛ ɔmmra mmɛsa ne ba yadeɛ; na ɔreyɛ awu.

⁴⁸ Ɛnna Yesu see no sɛ: Sɛ moanhunu nsɛnkyerɛnneɛ ne nkonyaa a, morennye nni.

⁴⁹Ahenkwaa panin no see no sɛ: Owura, bra, na me ba no anwu ansa.

⁵⁰Yesu see no sɛ: Kɔ, wo ba no ho ayɛ no den! Na onipa no gyee asɛm a Yesu ka kyerɛɛ no no diiɛ, na ɔkɔeɛ.

⁵¹Na ɔrekorɔ no, ne nkoa bɛhyiaa no, na wɔkaa sɛ: Wo ba no ho ayɛ no den!

⁵²Ɛnna ɔbisaa wɔn dɔn korɔ a ne ho tɔɔ no. Na wɔka kyerɛɛ no sɛ: Nnora bɛyɛ awia dɔnko no na ɔfoɛ no gyaa no.

⁵³Ɛnna agya no hunuu sɛ ɛyɛ dɔn no ara a Yesu see no sɛ: Wo ba no ho ayɛ no den no mu; na ɔno ne ne fiefoɔ nyinaa gye diiɛ.

⁵⁴ Yei nso ne nsɛnkyerɛnneɛ a ɛtɔ so mmienu a Yesu firi Yudea baa Galilea no, ɔyɛeɛ.