Read New Revised Asante Twi Bible Yohane 7 Bible Online

Yohane 7 - New Revised Asante Twi Bible bible

Yohane 7

¹ Na yeinom akyiri no, Yesu kyinii Galilea; na ɔmpɛ sɛ ɔkyini Yudea, ɛfiri sɛ na Yudafoɔ no rehwehwɛ no akum no.

² Na Yudafoɔ Asesebɔ afahyɛ abɛn.

³ Ɛnna ne nuanom ka kyerɛɛ no sɛ: Firi ha kɔ Yudea, na w’asuafoɔ nso nhunu wo nnwuma a woyɛ no.

⁴Na obi nyɛ biribi kokoam nhwehwɛ sɛ wɔbɛhu no badwa mu. Sɛ woyɛ yeinom a, yi wo ho kyerɛ wiase!

⁵Na ne nuanom mpo annye no anni.

⁶ Ɛnna Yesu see wɔn sɛ: Me deɛ, me berɛ nnya nnurui, na mo berɛ deɛ, ɛduru daa.

⁷ Wiase ntumi ntane mo; na me na ɛtane me, ɛfiri sɛ, medi adanseɛ sɛ, ne nnwuma yɛ bɔne.

⁸Mo deɛ, monkɔ afahyɛ yi ase. Me deɛ, mennya menkɔɔ afahyɛ yi ase; ɛfiri sɛ me berɛ nnya nnurui.

⁹Na ɔsee wɔn saa no, ɔtenaa Galilea.

¹⁰Na ne nuanom kɔeɛ no, ɛnna ɔno nso kɔɔ afahyɛ no aseɛ; wanyi ne ho adi, na mmom ɔhuntae.

¹¹Ɛnna Yudafoɔ no hwehwɛɛ no afahyɛ no aseɛ, na wɔse: Ɔwɔ he?

¹²Na huhuhuhu bebree aba nkurɔfoɔ akuakuo no mu wɔ ne ho. Ebinom se: Ɔyɛ onipa pa; na ebinom se: Dabi, na ɔdaadaa nkurɔfoɔ mmom.

¹³ Nanso Yudafoɔ no ho hu nti, obi anyi anim anka ne ho asɛm pefee.

¹⁴Na afahyɛ no mfimfini no, Yesu kɔɔ asɔrefie kɔkyerɛkyerɛeɛ.

¹⁵ Na ɛyɛɛ Yudafoɔ no nwanwa, na wɔse: Ɛyɛɛ dɛn na oyi nsuaa nwoma pɛn, na ɔnim yi?

¹⁶Yesu buaa wɔn kaa sɛ: Me nkyerɛkyerɛ nyɛ me dea, na deɛ ɔsomaa me no dea.

¹⁷Sɛ obi pɛ sɛ ɔyɛ n’apɛdeɛ a, ɔbɛhunu sɛ nkyerɛkyerɛ no firi Onyankopɔn anaasɛ ɛfiri me ara me tirim na meka.

¹⁸ Deɛ ɔbɔ ɔno ara ne tirim kasa no, hwehwɛ ɔno ara animuonyam; na deɛ ɔhwehwɛ deɛ ɔsomaa no no animuonyam no, ɔno na ɔyɛ ɔnokwafoɔ a, deɛ ɛntene nni ne mu.

¹⁹ Ɛnyɛ Mose na ɔmaa mo mmara no? Nanso mo mu biara nni mmara no so. Adɛn na morehwehwɛ me aku me?

²⁰ Nkurɔfokuo no buaa sɛ: Wowɔ honhommɔne; hwan na ɔrehwehwɛ wo aku woɔ?

²¹ Yesu bua see wɔn sɛ: Mayɛ adwuma baako, na yei na ɛyɛ mo nyinaa nwanwa.

²² Mose maa mo twetiatwa (ɛnyɛ sɛ ɛfiri Mose, na ɛfiri agyanom) nanso homeda motwa onipa twetia.

²³Sɛ onipa nya twetiatwa homeda na wɔanto Mose mmara no a, adɛn nti na mo bo afu me sɛ mama onipa mu ho ayɛ no den homeda?

²⁴Mommmu atɛn sɛdeɛ mohunu kwa, na mommu atɛn a ɛtene!

²⁵ Ɛnna Yerusalemfoɔ no mu bi kaa sɛ: Ɛnyɛ oyi ne deɛ wɔrehwehwɛ no aku no no?

²⁶Na hwɛ ɔkasa pefee, na wɔnka no hwee. Sɛsɛɛ mpanimfoɔ ahunu ampa sɛ oyi ne Kristo no anaa?

²⁷ Nanso oyi deɛ, yɛnim deɛ ɔfire; na Kristo no deɛ, sɛ ɔba a, obi renhunu deɛ ɔfire.

²⁸Ɛnna Yesu rekyerɛkyerɛ asɔrefie no, ɔteaa mu sɛ: Monim me, na monim deɛ mefire. Na ɛnyɛ me ara na mehyɛɛ me ho mebaeɛ; na deɛ ɔsomaa me no yɛ ɔnokwafoɔ a monnim no.

²⁹ Na me deɛ, menim no; ɛfiri sɛ mefiri ne nkyɛn, na ɔno na ɔsomaa me.

³⁰ Enti na anka wɔrehwehwɛ no akye no; nanso obiara amfa ne nsa anka no, ɛfiri sɛ na ne dɔn nnya nnuruiɛ.

³¹ Na nkurɔfokuo no mu pii gyee no dii, na wɔkaa sɛ: Kristo no, sɛ ɔba a, ɔbɛyɛ nsɛnkyerɛnneɛ bebree asene yeinom a oyi ayɛ yi?

³²Farisifoɔ no tee sɛ nkurɔfokuo no rewiinwii keka yeinom wɔ ne ho. Na Farisifoɔ ne asɔfoɔ mpanimfoɔ no somaa asomfoɔ sɛ wɔnkɔkye no.

³³ Ɛnna Yesu see wɔn sɛ: Mewɔ mo nkyɛn berɛ tiaa bi, na merebɛkɔ deɛ ɔsomaa me no nkyɛn.

³⁴ Mobɛhwehwɛ me, na morenhu me; na deɛ mewɔ no, mo deɛ, montumi mma hɔ.

³⁵Ɛnna Yudafoɔ no sesee wɔn ho sɛ: Ɛhe na oyi rebɛkorɔ a yɛrenhu no? Ɔrebɛkɔ wɔn a wɔapete Helafoɔ mu no mu akɔkyerɛkyerɛ Helafoɔ?

³⁶Asɛm bɛn na ɔka yi sɛ: Mobɛhwehwɛ me, na morenhu me, na deɛ mewɔ no, mo deɛ, montumi mma hɔ.

³⁷ Na da a ɛdi akyire a ɛyɛ afahyɛ no mu da kɛseɛ no, Yesu sɔre gyinae, na ɔteaa mu sɛ: Sɛ osukɔm de obi a, ɔmmra me nkyɛn, mmɛnom nsuo!

³⁸ Sɛdeɛ atwerɛsɛm no kaeɛ no: Deɛ ɔgye me die no, nkwa asubɔnten bɛsene afiri ne yam.

³⁹ Na yei deɛ, ɔkaa wɔ Honhom a wɔn a wɔgye no die rebɛnya no ho; na Honhom no nnya mmae, ɛfiri sɛ wɔnnya nhyɛɛ Yesu animuonyam.

⁴⁰ Na nkurɔfokuo no tee nsɛm yi no, wɔn mu binom kaa sɛ: Odiyifoɔ no nie ampa!

⁴¹ Ebinom se: Kristo no nie! Na ebinom nso bisaa sɛ: Kristo no bɛfiri Galilea anaa?

⁴² Atwerɛsɛm no anka sɛ Dawid asefoɔ mu ne Betlehem kuro a Dawid tenaa hɔ no mu na Kristo no bɛfire anaa?

⁴³ Na ne nti mpaepaemu baa nkurɔfokuo no mu.

⁴⁴ Na wɔn mu binom pɛɛ sɛ wɔkye no; nanso obiara amfa ne nsa anka no.

⁴⁵Ɛnna asomfoɔ no baa asɔfoɔ mpanimfoɔ ne Farisifoɔ no nkyɛn, na wɔbɛbisaa wɔn sɛ: Adɛn nti na moamfa no amma?

⁴⁶ Asomfoɔ no buaa sɛ: Onipa biara nkasaa sɛ onipa yi da.

⁴⁷Ɛnna Farisifoɔ no buaa wɔn sɛ: Wɔadaadaa mo nso anaa?

⁴⁸Mpanimfoɔ anaa Farisifoɔ no mu bi agye no adi anaa?

⁴⁹Na nkurɔfokuo yi a wɔnnim mmara no, wɔadome wɔn!

⁵⁰ Nikodemo a ɔbaa ne nkyɛn da bi a ɔyɛ wɔn mu baako no see wɔn sɛ:

⁵¹ Yɛn mmara ntiee onipa na ɛnhunuu deɛ ɔyɛeɛ ansa a, ɛbu no atɛn anaa?

⁵² Wɔbua see no sɛ: Dabrɛ wo nso wofiri Galilea? Hwehwɛ mu, na wobɛhunu sɛ odiyifoɔ nsɔree wɔ Galilea pɛn.

⁵³[Na wɔn nyinaa kokɔɔ wɔn afie mu mmaako mmaako.