Read New Revised Asante Twi Bible Asomafoɔ 23 Bible Online

Asomafoɔ 23 - New Revised Asante Twi Bible bible

Asomafoɔ 23

¹ Na Paulo gyenee n’ani hwɛɛ abadwafoɔ no kaa sɛ: Anuanom, me deɛ, ahonim pa nyinaa na mede mabɔ me bra mama Onyankopɔn de abɛsi ɛnnɛ da yi.

²Na Ɔsɔfopanin Anania hyɛɛ wɔn a wɔgyina ne ho sɛ wɔmmɔ n’ano so.

³ Ɛnna Paulo ka kyerɛɛ no sɛ: Bɔ na Onyankopɔn bɛbɔ woɔ, wo ɔfasuo a wɔahoa ho; na wote hɔ rebu me atɛn sɛdeɛ mmara no teɛ, nanso wobu mmara no so hyɛ sɛ wɔmmɔ me?

⁴Na wɔn a wɔgyina hɔ no kaa sɛ: Nyankopɔn sɔfo panin na woya no yi?

⁵ Ɛnna Paulo kaa sɛ: Anuanom, mennim sɛ ɔyɛ ɔsɔfo panin; ɛfiri sɛ wɔatwerɛ sɛ: Nka wo man panin ho asɛm bɔne!

⁶ Na Paulo hunuu sɛ nnipa no fa yɛ Sadukifoɔ, na ɔfa nso yɛ Farisifoɔ no, ɔteaa mu badwa mu hɔ sɛ: Anuanom, meyɛ Farisini ne Farisifoɔ ba; awufoɔ sɔreɛ ne ɛho anidasoɔ nti na wɔrebu me atɛn yi.

⁷Na ɔkaa saa no, akasakasa baa Farisifoɔ ne Sadukifoɔ no ntam, na nnipakuo no mu paee.

⁸ Ɛfiri sɛ Sadukifoɔ ka sɛ awufoɔ sɔreɛ, anaa ɔbɔfoɔ, anaa honhom nni hɔ, na Farisifoɔ deɛ, wɔgye ne nyinaa di.

⁹ Na wɔteateaa mu kɛseɛ, na Atwerɛfoɔ a wɔwɔ Farisifoɔ afa no sɔre kasakasaa sɛ: Yɛnhunu bɔne biara wɔ onipa yi mu; na sɛ honhom anaa ɔbɔfoɔ akasa akyerɛ no ɛ?

¹⁰Na akasakasa no mu yɛɛ den no, ɔsafohene no suroo sɛ ebia wɔbɛtete Paulo mu nti, ɔhyɛɛ asraafoɔ no sɛ wɔnsiane mmɛhwim no mfiri wɔn nsam, na wɔmfa no nkɔ aban mu.

¹¹ Na anadwo no, Awurade bɛgyinaa ne nkyɛn kaa sɛ: Ma wo bo nyɛ duru; na sɛdeɛ woadi me ho adanseɛ Yerusalem ha yi no, saa ara nso na ɛsɛ sɛ wokɔdi adanseɛ wɔ Roma.

¹²Na adeɛ kyeeɛ no, Yudafoɔ no mu binom pam kekaa wɔn ho ntam sɛ wɔrennidi, nanso wɔrennom, gye sɛ wɔakum Paulo ansa.

¹³Na wɔn a wɔbɔɔ mu pamm ne tiri soɔ yi bɛboro aduanan.

¹⁴Na wɔbaa asɔfoɔ mpanimfoɔ ne mpanimfoɔ no nkyɛn bɛkaa sɛ: Yɛakeka yɛn ho ntam sɛ hwee renka yɛn ano, gye sɛ yɛakum Paulo ansa.

¹⁵Enti afei mo ne badwafoɔ nkɔbɔ din nkyerɛ ɔsafohene no, na ɔmfa no mmrɛ mo, sɛdeɛ morebɛbisa ne ho asɛm no mu yie; na yɛn deɛ, ansa na ɔbɛduru ha no, yɛbɛku no.

¹⁶Na Paulo wɔfase tee wɔn tɛ no, ɔkɔ kɔhyɛnee aban no mu kɔyii Paulo asotire.

¹⁷Na Paulo frɛɛ ɔha so mpanimfoɔ no mu baako kaa sɛ: Fa aberanteɛ yi kɔ ɔsafohene nkyɛn; na ɔwɔ asɛm bi ka kyerɛ no.

¹⁸Ɛnna ɔfaa no de no kɔɔ ɔsafohene no nkyɛn kaa sɛ: Ɔdeduani Paulo frɛɛ me srɛɛ me sɛ memfa aberanteɛ yi mmra wo nkyɛn, na ɔwɔ asɛm bi ka kyerɛ wo.

¹⁹Na ɔsafohene no sɔɔ ne nsa, na ɔne no kɔɔ fa baabi, na ɔbisaa sɛ: Ɛdeɛn na wowɔ ka kyerɛ me?

²⁰Na ɔse: Yudafoɔ apam sɛ wɔbɛsrɛ wo, na ɔkyena wode Paulo asiane aba edwam sɛdeɛ wɔrebɛbisa ne ho asɛm mu yie.

²¹Nanso ntie wɔn! Na wɔn mu mmarima bɛboro aduanan retɛ no; na wɔakeka wɔn ho ntam sɛ wɔrennidi, na wɔrennom, gye sɛ wɔakum no ansa; na afei wɔasiesie wɔn ho, na wɔretwɛn sɛ wobɛma ho kwan.

²²Ɛnna ɔsafohene no gyaa aberanteɛ no kwan, na ɔhyɛɛ no sɛ: Nka nkyerɛ obiara sɛ woayi me asotire!

²³Na ɔfrɛɛ asraafoɔ ɔha so mpanimfoɔ no mu baanu bi kaa sɛ: Monsiesie asraafoɔ ahanu na wɔnkɔ Kaesarea, ne apɔnkɔfoɔ aduɔson, ne mpɛmɛtofoɔ ahanu, anadwo bɛyɛ nnɔnkron berɛ mu.

²⁴Na wɔnsiesie mmoa nso, na wɔmfa Paulo ntena so, mfa no dwoodwoo nkɔma Amrado Felike.

²⁵Na ɔtwerɛɛ nwoma a emu asɛm se:

²⁶Klaudio Lisia de yei kyea amrado pa Felike.

²⁷ Ɔbarima yi a Yudafoɔ kɔfaa no sɛ anka wɔbɛkum no na me ne dɔm kɔ kɔhwimm no no, mate sɛ ɔyɛ Romani.

²⁸ Na mepɛɛ sɛ anka mehunu adekodeɛ a wɔde reto ne soɔ no, mede no mekɔɔ wɔn dwa mu;

²⁹ na mehunuu sɛ wɔn mmara ho asɛmmisa nti na wɔne no wɔ nkuro, na wɔamfa biribi a ɛsɛ owuo anaa ɔkyerɛ anto no so.

³⁰ Nanso wɔayi me asotire sɛ, nnipa bi retɛ ɔbarima no nti, merema wɔde no abrɛ wo, na mahyɛ ne nkurobɔfoɔ no nso sɛ wɔmmɛka deɛ wɔwɔ wɔ ne ho no wɔ w’anim.

³¹Ɛnna asraafoɔ no faa Paulo, sɛdeɛ wɔhyɛɛ wɔn no, na wɔde no kɔɔ Antipatri anadwo no.

³²Na adeɛ kyeeɛ no, wɔmaa apɔnkɔfoɔ no ne no kɔe, na wɔsane baa aban no mu bio.

³³Na wɔn deɛ, wɔduruu Kaesarea na wɔyii nwoma no maa amrado no, wɔde Paulo nso kɔgyinaa n’anim.

³⁴ Na amrado no kenkan nwoma no wieeɛ, na ɔbisaa ɔman ko a ɔfiri mu, na ɔtee sɛ ɔfiri Kilikia no,

³⁵ɔkaa sɛ: Wo nkurobɔfoɔ no ba a, na mɛtie woɔ. Na ɔhyɛɛ sɛ wɔmfa no nsie Herode aban mu.