Read New Revised Asante Twi Bible 1 Korintofoɔ 16 Bible Online

1 Korintofoɔ 16 - New Revised Asante Twi Bible bible

1 Korintofoɔ 16

¹ Na ɛfa ɛtoɔ a wɔde kɔma ahotefoɔ no ho deɛ, sɛdeɛ mehyehyɛɛ no Galatia asafo mu no, mo nso monyɛ saa ara.

² Daa, nnawɔtwe no mu da a ɛdi kan no, mo mu biara mfa deɛ ɛbɛsi no yie ama no anya no nsie, na mamma ansa na wɔayi toɔ no.

³Na menya me ba a, mɛma wɔn a mode nwoma bɛkyerɛ sɛ wɔfata no de mo ayɛyɛdeɛ no akɔ Yerusalem.

⁴Na sɛ ɛsɛ sɛ me nso mekɔ a, wɔne me akɔ.

⁵ Na metwa mu Makedonia a, mɛba mo nkyɛn; ɛfiri sɛ Makedonia na merekɔfa.

⁶ Na ebia mɛtena mo nkyɛn, anaasɛ mɛdi awɔberɛ nso mo nkyɛn, na baabiara a mɛkorɔ no moagya me kwan.

⁷ Na mempɛ sɛ meretwa mu nko ara na mehunu mo, na m’ani da so sɛ Awurade ma ho kwan a, mɛdi mo nkyɛn nna kakra.

⁸ Na mɛtena Efeso akɔsi Pentekoste;

⁹ ɛfiri sɛ wɔabue ɛpono kɛseɛ a emu adwumayɛ bɛso aba ama me, na wɔn a wɔasɔre atia dɔɔso.

¹⁰ Na sɛ Timoteo ba a, monhwɛ na wamfa ehu ne mo antena; na ɔyɛ Awurade adwuma no bi sɛ me nso.

¹¹ Ɛno nti obiara mmmu no animtia, na monnya no kwan asomdwoeɛ mu, na ɔmmra me nkyɛn; na meretwɛn no ne anuanom no.

¹² Na onua Apolo deɛ, matu no fo pii sɛ ɔne anuanom no mmra mo nkyɛn; nso ɔmpɛ koraa sɛ ɔba seesei, na mmom ɔnya ho deɛ a, ɔbɛba.

¹³ Monwɛn, monnyina mo gyidie mu, monyɛ mmarima, momma mo ho nyɛ den.

¹⁴Monyɛ mo adeɛ nyinaa ɔdɔ mu.

¹⁵ Na metu mo fo, anuanom monim Stefano fie sɛ ɛne Akaia aba a ɛdi kan, na wɔde wɔn ho ama ahotefoɔ som no,

¹⁶ sɛ mo nso mommrɛ mo ho ase mma wɔn a wɔte saa no ne obiara a ɔyɛ adwuma no bi na ɔbrɛ mu no.

¹⁷Na m’ani gye Stefano ne Fortunato ne Akaiko ba no ho, ɛfiri sɛ monni me nkyɛn yi, wɔn na wɔabɛsi mo ananmu;

¹⁸ na wɔama me honhom ne mo deɛ ahome. Enti monni wɔn a wɔte saa no ni yie.

¹⁹ Asafo a ɛwowɔ Asia no kyeakyea mo. Akwila ne Priska ne asafo a ɛwɔ wɔn fie no kyea mo pii, Awurade mu.

²⁰ Anuanom nyinaa kyea mo. Momfa mfeano kronkron nkyeakyea mo ho.

²¹ Me Paulo me nsam nkyea ni.

²² Sɛ obi mpɛ Awurade Yesu Kristo asɛm a, ɔnnue! Marana-ta (Yɛn Awurade, bra!).

²³Awurade Yesu adom ne mo ntena.

²⁴Me dɔ nka mo nyinaa Kristo Yesu mu. Amen.