Read New Revised Asante Twi Bible 2 Korintofoɔ 11 Bible Online

2 Korintofoɔ 11 - New Revised Asante Twi Bible bible

2 Korintofoɔ 11

¹Anka monhunu me nkwaseasɛm ma me kakra ɛ! Monte me aseɛ.

² Na ninkunu a metwe no mo ho no, metwe no Nyankopɔn mu ninkunu. Magye mo awadeɛ sɛ ababaawa a efi nkaa no; na mede mo rekɔma ɔbarima baako a ɔno ne Kristo.

³ Nanso mesuro sɛ ebia, sɛdeɛ ɔwɔ no de n’aniteɛ bɛdaadaa Hawa no, saa ara nso na wɔbɛsɛe mo adwene afiri Kristo fam ahofama no ho.

⁴ Na sɛ obi ba bɛka Yesu foforɔ bi ho asɛm a yɛnkaeɛ, anaasɛ monya honhom foforɔ a monnyaeɛ, anaasɛ asɛmpa foforɔ a monnyeeɛ a, mogye to mu ntɛm so!

⁵ Nanso mebu no sɛ asomafoɔ akɛseɛ no nkyɛn me biribiara mu.

⁶ Nanso sɛ mennim ɔkasa mu mpo a, ɛnyɛ nimdeɛ, na mmom yɛama biribiara ada adi ama mo, nnipa nyinaa anim.

⁷ Anaasɛ mayɛ bɔne, sɛ mebrɛɛ me ho ase maa wɔmaa mo soɔ, sɛ mekaa Nyankopɔn asɛmpa no kyerɛɛ mo kwa no?

⁸ Mefaa asafo binom adeɛ sɛ akatua, sɛ mede merebɛsom mo.

⁹ Na mewɔ mo nkyɛn na ɛhiaa me no, manyɛ obiara so adesoa. Na deɛ ɛhiaa me no, anuanom a wɔfiri Makedonia baeɛ no maa me nsa kaeɛ; na nnoɔma nyinaa mu, mehwɛɛ me ho, na mɛhwɛ no saa ara, na manyɛ adesoa mamma mo.

¹⁰ Kristo nokorɛ wɔ me mu yi, obiara remma me mmua m’ano saa ahohoahoa yi ho wɔ Akaia afam hɔnom nyinaa.

¹¹Adɛn ntira? Sɛ mennɔ mo anaa? Onyankopɔn na ɔnim.

¹²Na deɛ meyɛ no, meyɛ ara, na masi wɔn a wɔhwehwɛ me ho kwan no kwan, na wɔahu wɔn deɛ wɔde hoahoa wɔn ho no mu, sɛ yɛn ara.

¹³ Na saa nnipa yi yɛ asomafoɔ atorofoɔ, adwumayɛfoɔ nnaadaafoɔ a wɔdane wɔn ho yɛ sɛ Kristo asomafoɔ.

¹⁴Na ɛnyɛ nwanwa; ɛfiri sɛ Satan no ara mpo dane ne ho sɛ hann bɔfoɔ.

¹⁵Enti sɛ n’asomafoɔ nso dane wɔn ho yɛ sɛ tenenee asomfoɔ a, ɛnyɛ ade nwanwa biara; na ɛbɛwie wɔn sɛdeɛ wɔn nnwuma teɛ.

¹⁶ Meka bio sɛ obiara mmmu me sɛ meyɛ kwasea, na sɛ ɛnte saa a, monnye me sɛ ɔkwasea, na me nso mahoahoa me ho kakra.

¹⁷Deɛ mereka no, menka no Awurade tumi mu, na mmom nkwaseasɛm mu, saa ahohoahoa adwene yi mu.

¹⁸Ɛsiane sɛ nnipa bebree hoahoa wɔn ho honam fam nti, me nso mɛhoahoa me ho bi.

¹⁹Na mode anigyeɛ nya tema ma nkwaseafoɔ, ɛfiri sɛ moyɛ mmadwemma.

²⁰Na sɛ obi di mo nya, sɛ obi didi mo ho, sɛ obi fa mo dommum, sɛ obi ma ne ho so, sɛ obi bɔ mo ani so a, mobɛhunu ama no.

²¹Meka no aniwuo mu sɛ yɛn deɛ yɛayɛ mmerɛ wɔ mu; nanso deɛ obi yɛ nnam wɔ mu no, (meka no sɛ deɛ aba biara nni mu,) me nso meyɛ nnam wɔ mu bi.

²² Wɔyɛ Hebrifoɔ? Me nso meyɛ bi. Wɔyɛ Israelfoɔ? Me nso meyɛ bi. Wɔyɛ Abraham asefoɔ? Me nso meyɛ bi.

²³ Wɔyɛ Kristo asomfo? Meka no sɛ ɛdammɔ, mekyɛne saa. Ɔbrɛ adwuma a ɛboro soɔ mu, afiaseda a ɛboro soɔ mu, ɛhweɛ a ɛtra soɔ mu, owuo amaneɛ a manya no nhunuiɛ mu.

²⁴ Yudafoɔ nsa mu wɔabɔ me mmaa aduanan a aka so baako, mprenum.

²⁵ Wɔaka me mpire mprɛnsa, wɔasi me aboɔ prɛko, matɔ nsuo mu mprɛnsa, madi ɛpo bunu mu adekyeeɛ ne adesaeɛ.

²⁶Akwantuo pii mu, asubɔnten so asiane mu, adwotwafoɔ asiane mu, amannifoɔ mu asiane mu, amanaman mu asiane mu, kuro mu asiane mu, ɛserɛ so asiane mu, ɛpo so asiane mu, anuanom atorofoɔ mu asiane mu;

²⁷ adwuma ne ɔbrɛ mu, apɛsire mu, ɛkɔm ne sukɔm mu, abuada pii mu, awɔ ne adagya mu.

²⁸ Deɛ ɛkeka ho no nyinaa nna nkyɛn, deɛ ɛhyɛ me soɔ ne asafo no nyinaa ho dadwene.

²⁹ Hwan na ɔyɛ mmerɛ, na menyɛ mmerɛ bie? Hwan na wɔato no suntidua, na me yamu nhyehye me?

³⁰ Sɛ ɛsɛ sɛ mehoahoa me ho a, mɛhoahoa me ho wɔ me mmerɛyɛ ho.

³¹ Awurade Yesu Nyankopɔn ne n’Agya a nhyira nka no daa no nim sɛ merenni atorɔ.

³²Damasko hɔ na Ɔhene Areta n’amrado wɛnn Damaskofoɔ kuro no sɛ ɔrepɛ me akyere me;

³³ na wɔde me too kɛntɛnku mu nam mpomma mu faa ɔfasuo so gyaagyaa me maa mefirii ne nsa medwanee.