Read New Revised Asante Twi Bible 2 Korintofoɔ 5 Bible Online

2 Korintofoɔ 5 - New Revised Asante Twi Bible bible

2 Korintofoɔ 5

¹ Na yɛnim sɛ, sɛ wɔnya dwiri yɛn asase so ntomadan yi a, yɛbɛnya efie a ɛfiri Onyankopɔn, ɛdan a wɔamfa nsa ansie, a ɛwɔ hɔ daa ɔsoro.

² Ɛfiri sɛ yei mu deɛ, yɛsi apini na yɛn ani agyina sɛ yɛbɛhyɛ yɛn fie a ɛfiri soro no afoa so,

³ɛno na sɛ yɛhyɛ a, wɔrenhu yɛn adagya mu.

⁴ Na yɛn a yɛte ntomadan yi mu yi si apini na ɛhyɛ yɛn so, ɛfiri sɛ ɛnsɛ sɛ yɛbɛda adagya, na mmom yɛpɛ sɛ yɛhyɛ foa soɔ, na nkwa amene deɛ ɛwuo no.

⁵ Na deɛ wasiesie yɛn ama saa adeɛ yi ne Onyankopɔn a ɔno ara ankasa de Honhom no dwaha nso ama yɛn no.

⁶ Enti yɛhyɛ yɛn ho den daa, na yɛnim sɛ yɛte fie wɔ nipadua mu yi, yɛnte fie wɔ Awurade nkyɛn;

⁷ ɛfiri sɛ yɛnam gyidie mu, na ɛnyɛ anihunu so.

⁸ Na yɛwɔ saa awerɛhyɛmu yi, na ɛyɛ yɛn fɛ mmom sɛ yɛbɛfiri nipadua mu fie ha akɔtena efie wɔ Awurade nkyɛn.

⁹ Enti nso yɛbɔ mmɔden sɛ, sɛ yɛwɔ nipadua mu fie oo, yɛfiri hɔ oo, yɛbɛsɔ n’ani.

¹⁰ Na ɛtwa sɛ yɛn nyinaa yɛkɔpue Kristo atemmuo adwa no anim hɔ, na obiara anya deɛ ɔnam nipadua so yɛeɛ no, papa oo, bɔne oo, sɛdeɛ ɔyɛeɛ no.

¹¹Na sɛ yɛnim Awurade ho hu nti, yɛkasa kyerɛ nnipa sɛ wɔnhu no saa, na Onyankopɔn deɛ, yɛada adi ama no; na m’ani da so sɛ, yɛada adi wɔ mo ahonim mu nso.

¹² Na yɛnsane nyi yɛn ho ayɛ nkyerɛ mo bio, na mmom yɛrema mo deɛ monam so bɛhoahoa mo ho yɛn fam, na moanya deɛ mode bɛbua wɔn a wɔhoahoa wɔn ho nnipa anim na ɛnyɛ akoma mu.

¹³Na sɛ yɛbɔ dam a, yɛbɔ ma Onyankopɔn; na sɛ yɛn adwene mu da hɔ a, ɛda ma mo.

¹⁴Na Kristo dɔ no kanyan yɛn; ɛfiri sɛ yɛbu atɛn sɛ, ɔbaako wu maa wɔn nyinaa, enti na wɔn nyinaa awu.

¹⁵ Na ɔwu maa wɔn nyinaa na wɔn a wɔte aseɛ no antena ase amma wɔn ho bio, na mmom wɔatena ase ama deɛ ɔwuiɛ na wɔnyanee no maa wɔn no.

¹⁶Enti ɛfiri nnɛ yi, yɛnnim obiara honam fa mu; na sɛ yɛhunuu Kristo honam fa mu mpo a, afei deɛ yɛnnim no saa bio.

¹⁷ Enti sɛ obi wɔ Kristo mu a, na ɔyɛ abɔdeɛ foforɔ; nnoɔma dada no atwa mu; hwɛ, nnoɔma nyinaa ayɛ foforɔ.

¹⁸ Na yei nyinaa firi Onyankopɔn a ɔnam Kristo so apata atwe yɛn afam ne ho, na ɔde nkabom som dwumadie ama yɛn no;

¹⁹ ɛne sɛ, Onyankopɔn wɔ Kristo mu a ɔrepata twe wiase fam ne ho, na wammu wɔn mfomsoɔ angu wɔn so, na wɔde nkabom asɛm no ahyɛ yɛn nsa.

²⁰ Enti yɛyɛ abɔfoɔ ma Kristo, ɛte sɛ Onyankopɔn nam yɛn so retu foɔ; yɛgyina Kristo ananmu srɛ mo sɛ: Mo ne Nyankopɔn nka mmom.

²¹ Ɛfiri sɛ, deɛ ɔnnim bɔne no, ɔde no yɛɛ bɔne maa yɛn, na yɛayɛ Nyankopɔn tenenee wɔ ne mu.