Read New Revised Asante Twi Bible 2 Korintofoɔ 6 Bible Online

2 Korintofoɔ 6 - New Revised Asante Twi Bible bible

2 Korintofoɔ 6

¹ Na yɛn a yɛne no bom yɛ adwuma no tu mo fo nso sɛ monnnye Nyankopɔn adom no kwa.

² Na ɔka sɛ: Ɛberɛ a ɛsɛ mu na matie woɔ, nkwagyeɛ da mu na maboa woɔ! Hwɛ, ɛnnɛ ne adom berɛ; hwɛ, ɛnnɛ ne nkwagyeɛ da.

³Na yɛnto obiara suntidua, na wɔannya mfomsoɔ biara wɔ yɛn som ho,

⁴ na mmom nnoɔma nyinaa mu, yɛyi yɛn ho kyerɛ sɛ Nyankopɔn asomfoɔ: Boasetɔ pii mu, ahohia mu, ahokyere mu, ahometeɛ mu;

⁵ ɛhweɛ mu, afiaseda mu, mansotwe mu, adwuma den mu, ɛpɛsire mu, mmuada mu;

⁶ ahoteɛ mu, nimdeɛ mu, abodwokyɛre mu, ayamyɛ mu, Honhom Kronkron mu, ɔdɔ a nkontompo nni mu mu;

⁷ nokorɛ asɛnka mu, Nyankopɔn tumi mu, tenenee akodeɛ mu wɔ nifa ne benkum;

⁸animuonyam ne animguaseɛ mu, atenka bɔne ne atenka pa mu; sɛ asisifoɔ, nanso wɔyɛ nokwafoɔ;

⁹ sɛ wɔn a wɔnnim wɔn, nanso wɔnim wɔn yie, sɛ wɔn a wɔrewuo, na hwɛ, yɛte ase; sɛ wɔn a wɔtwe wɔn aso, nanso wɔnkum wɔn;

¹⁰ sɛ awerɛhofoɔ, nanso wɔn ani gye daa; sɛ ahiafoɔ, nanso wɔma nnipa bebree nya wɔn ho; sɛ wɔn a wɔnni hwee, nanso wɔwɔ nnoɔma nyinaa.

¹¹O Korintofoɔ, yɛaka no pefee akyerɛ mo, yɛn akoma mu atrɛ.

¹²Ɛnyɛ yɛn mu na monsene, na mmom mo ara mo yam na monsene.

¹³ Na mo nso — meka yei kyerɛ mo sɛ mma — montrɛ mo mu saa ara mfa ntua ka.

¹⁴ Mo ne wɔn a wɔnnye nnie ntwe kɔnnua korɔ; twaka bɛn na tenenee ne amumuyɛ wɔ? Anaasɛ ayɔnkofa bɛn na hann ne esum wɔ?

¹⁵Na koroyɛ bɛn na ɛwɔ Kristo ne Belial ntam? Anaasɛ kyɛfa bɛn na ogyidini ne deɛ ɔnnye nnie wɔ?

¹⁶ Na baakoyɛ bɛn na Nyankopɔn asɔrefie ne abosom wɔ? Na yɛyɛ Onyankopɔn a ɔte aseɛ no asɔrefie, sɛdeɛ Onyankopɔn aka sɛ: Mɛtena wɔn mu, na manante wɔn mu, na mayɛ wɔn Nyankopɔn, na wɔayɛ me man.

¹⁷ Enti momfiri wɔn mu, na monte mo ho mfiri wɔn mu, Awurade na ɔseɛ, na monnka deɛ ɛyɛ fi; na me nso magye mo,

¹⁸ na mayɛ mo agya, na moayɛ me mmammarima ne mmammaa, Awurade Tumfoɔ na ɔseɛ.