Read New Revised Asante Twi Bible Galatifoɔ 4 Bible Online

Galatifoɔ 4 - New Revised Asante Twi Bible bible

Galatifoɔ 4

¹Na mese: Ɔdedifoɔ no yɛ akɔkoaa yi, ɔyɛ nnoɔma nyinaa wura deɛ, nanso nsonsonoeɛ biara nna ɔne akoa ntam;

²na mmom ɔwɔ ahwɛfoɔ ne afiesohwɛfoɔ ase de kɔsi da a agya no ahyɛ asie.

³ Sɛ yɛteɛ ara ne no. Yɛyɛ nkɔkoaa no, wɔde yɛn yɛɛ nkoa hyɛɛ wiase honhom mu nsɛm nkyerɛkyerɛ ase,

⁴ na ɛberɛ no wiee duro no, Onyankopɔn somaa ne ba a ɔbaa woo no maa wɔwoo no mmara ase,

⁵ sɛ ɔmmɛgye wɔn a wɔwɔ mmara ase no, na wɔafa yɛn ayɛ mma.

⁶ Na sɛ moyɛ mma nti, Onyankopɔn asoma ne Ba honhom aba mo akoma mu a ɔteam sɛ: Abba, Agya!

⁷ Enti wonyɛ akoa bio, na mmom ɔba; na sɛ woyɛ ɔba a, wonam Nyankopɔn so yɛ ɔdedifoɔ nso bi.

⁸Nanso ɛberɛ a monnim Onyankopɔn no, mosom wɔn a wɔn su mu wɔnyɛ anyame no sɛ nkoa.

⁹Na afei a moahunu Onyankopɔn, anaasɛ Onyankopɔn mmom ahu mo yi, adɛn na moasane mo akyiri bio kɔ honhom mu nsɛm nkyerɛkyerɛ a ɛyɛ mmerɛ, na ɛdi hia no ho, na mopɛ sɛ mofiri aseɛ foforɔ som bio?

¹⁰ Mobu nna ne abosome ne mmerɛ ne mfeɛ.

¹¹ Mesuro wɔ mo ho sɛ ebia maha me ho mama mo kwa.

¹² Anuanom, mesrɛ mo, monyɛ sɛ me, ɛfiri sɛ me nso mayɛ sɛ mo. Moanyɛ me bɔne biara,

¹³ nso monim sɛ honam mmerɛyɛ so na mekaa asɛmpa no mekyerɛɛ mo kane no,

¹⁴na deɛ ɛyɛɛ sɔhwɛ maa mo me honam mu no, moannwoodwoo me, nso moankyiri me, na mmom mogyee me sɛ Nyankopɔn bɔfoɔ, aane, sɛ Kristo Yesu no ara.

¹⁵Na afei mo ahosɛpɛ no wɔ he? Ɛfiri sɛ medi mo adanseɛ sɛ, sɛ ɛbɛtumi a, anka motutuu mo ani maa me.

¹⁶ Na sɛ meka nokorɛ mekyerɛ mo nti, madane mo tamfoɔ anaa?

¹⁷ Ayɛ sɛ deɛ ebinom pɛ mo yiedie ara ma, nanso wɔpɛ sɛ wɔsi mo kwan, na moapere ahwehwɛ wɔn mmom.

¹⁸Nanso ɛyɛ sɛ anka wɔbɔ mo yiedie ho mmɔden daa na ɛnyɛ berɛ a me ne mo wɔ hɔ nko.

¹⁹ Ao, me mma nkumaa a mereko mo awoɔ bio kɔsi sɛ wɔbɛwie Kristo suyɛ wɔ mo mu,

²⁰anka mepɛ sɛ mewɔ mo nkyɛn seesei, na mesakyera me nne, ɛfiri sɛ me tirim ntene me wɔ mo ho.

²¹ Mo a mopɛ sɛ mohyɛ mmara aseɛ, monka nkyerɛ me: Monte deɛ mmara no ka anaa?

²² Na wɔatwerɛ sɛ na Abraham wɔ mmammarima baanu, ɔbaako yɛ afenaa ba, na ɔbaako yɛ ɔdehyeɛ ba.

²³ Na deɛ ɔyɛ afenaa ba no, wɔwoo no honam kwan so, na ɔdehyeɛ ba no deɛ, wɔnam bɔhyɛ so na ɛwoo no.

²⁴ Saa adeɛ yi yɛ mfatoho, ɛfiri sɛ wɔn baanu no yɛ apam mmienu; ɔbaako firi Sinai bepɔ so a ɔrewo gu nkoayɛ mu, ɔno ne Hagar.

²⁵Na Hagar yɛ Sinai bepɔ a ɛwɔ Arabia; na ɛno ne nnɛ Yerusalem sɛso, ɛfiri sɛ ɛyɛ ne mma wɔ nkoasom mu.

²⁶ Na ɔsoro Yerusalem no deɛ, ɛde ne ho, ɛne yɛn na.

²⁷ Ɛfiri sɛ wɔatwerɛ sɛ: Wo obonini a wonwoɔ, ma w’ani nnye; Wo a wonko awoɔ, di ahurisie na team! Ɛfiri sɛ deɛ ɔnni bie no mma dɔɔso kyɛne deɛ ɔwɔ kunu no deɛ.

²⁸ Na yɛn deɛ, anuanom, sɛdeɛ Isak teɛ no, yɛyɛ bɔhyɛ mma.

²⁹ Na sɛdeɛ saa berɛ no, deɛ wɔwoo no honam kwan soɔ no taa deɛ wɔwoo no honhom kwan soɔ no, saa ara na ɛteɛ nnɛ nso.

³⁰ Nanso atwerɛ no se deɛn? Pam afenaa no ne ne ba; ɛfiri sɛ afenaa ba no ne ɔdehyeɛ ba no renni adeɛ.

³¹ Enti, anuanom, yɛnyɛ afenaa mma na mmom yɛyɛ ɔdehyeɛ mma.