Read New Revised Asante Twi Bible Yosua 15 Bible Online

Yosua 15 - New Revised Asante Twi Bible bible

Yosua 15

¹ Na Yuda mma abusuakuo ntonto no, sɛdeɛ wɔn mmusua teɛ no, ɛtɔɔ Edom hyeɛ ho kɔduruu Sin serɛ so, wɔ anafoɔ fam asase a ɛyɛ anafoɔ hyeɛ no awieeɛ so.

²Na wɔn anafoɔ fam hyeɛ no firi Nkyene Po awieeɛ no ho dɔnnɔn a ɛbu fa anafoɔ fam no ano.

³Na ɛnam Akrabim aforoeɛ anafoɔ fam sene kɔ Sin, na ɛforo kɔ anafoɔ fam wɔ Kades-barnea, na ɛtwam kɔ Hesron, na ɛforo kɔ Adar, na ɛpono kɔ Karka.

⁴Na ɛtwam kɔ Asmon, na ɛkɔpue Misraim subonhwa no ano, na ɛkɔpem mpoano. Yei nyɛ mo anafoɔ fam hyeɛ.

⁵Na apueeɛ hyeɛ ne Nkyene Po no de bɛsi Yordan awieeɛ. Na atifi fam hyeɛ no firi Nkyene Po ho dɔnnɔn a ɛwɔ Yordan awieeɛ no ho.

⁶ Na ɛhyeɛ no foro Bet-hogla, na ɛsene fa Bet-araba atifi fam, na ɛhyeɛ no foro kɔsi Ruben ba Bohan boɔ no ho.

⁷ Na ɛhyeɛ no firi Akor bonhwa no mu foro kɔ Debir, na ɛdane kɔ atifi fam kyerɛ Gilgal a ɛda Adumim aforoeɛ a ɛwɔ subonhwa no anafoɔ fam ntentensoɔ no. Na ɛhyeɛ no twam fa En-semes nsuo no ano, na ɛkɔpem En-rogel.

⁸ Na ɛhyeɛ no foro fa Hinom ba bonhwa no mu, Yebusifoɔ nkyɛn mu anafoɔ fam, (ɛne Yerusalem); na ɛhyeɛ no foro kɔ bepɔ a ɛwɔ Hinom bonhwa no ntentensoɔ wɔ atɔeɛ wɔ Refaim bonhwa no atifi fam awieeɛ no atifi.

⁹ Na ɛhyeɛ no hima firi bepɔ no mpampam kɔ Neftoa asutire no ho, na ɛfiri hɔ kɔ Efron bepɔ so nkuro ho, na ɛhyeɛ no hima kɔ Baala (a ɛne Kiriat-yearim).

¹⁰Na ɛhyeɛ no konton firi Baala kɔ atɔeɛ, Seir bepɔ ho, na ɛsene kɔ Har-yearim, (ɛne Kesalon), nkyɛn mu wɔ atifi fam; na ɛsiane kɔ Bet-semes, na ɛsene kɔ Timna;

¹¹na ɛhyeɛ no pue kɔ Ekron nkyɛn mu atifi fam na ɛhima kɔ Sikron, na ɛtwam kɔ Baala bepɔ no so, na ɛpue kɔ Yabneel; na ɛhyeɛ no kɔpem ɛpo no ano.

¹²Na atɔeɛ hyeɛ no ne ɛpo kɛseɛ no ne ɛho hyeɛ. Yeinom ne Yudafoɔ no hyeɛ a atwa ahyia sɛdeɛ wɔn mmusua teɛ.

¹³ Na Yefune ba Kaleb deɛ, ɔmaa no kyɛfa, Yudafoɔ no mu sɛdeɛ AWURADE hyɛɛ Yosua no: (Anak agya Arba) kuro a ɛne Hebron.

¹⁴Na Kaleb tuu Anak mma baasa no firii hɔ, Sesai ne Ahiman ne Talmai, Anak asefoɔ.

¹⁵Na ɔfiri hɔ foro kɔɔ Debirfoɔ ho; nso akane no na Debir din ne Kiriat-sefer.

¹⁶Na Kaleb kaa sɛ: Deɛ ɔbɛbɔ Kiriat-sefer na ɔbɛfa no, mede me babaa Aksa bɛma no aware.

¹⁷Ɛnna Kaleb nua Kenas ba Otniel kɔfaeɛ, na ɔde ne babaa Aksa maa no awareɛ.

¹⁸Na ɔbaa no kɔɔ Otniel nkyɛn no, ɔhyɛɛ Otniel sɛ ɔmmisa n’agya Kaleb hɔ asase bi; na ɔbaa no firi n’afunumu so sii fam; na Kaleb ka kyerɛɛ no sɛ: Ɛdeɛn na worehwehwɛ?

¹⁹Na ɔka kyerɛɛ no sɛ: Ma me akyɛdeɛ bi ɛ, na anafoɔ asase na wode ama me nti, ma me mmasuo nso. Na ɔmaa no atifi mmasuo ne anafoɔ mmasuo.

²⁰Yei ne Yuda mma abusuakuo no agyapadeɛ, sɛdeɛ wɔn mmusua teɛ.

²¹Na Yudafoɔ abusuakuo no nkuro a ɛdeda anafoɔ fam pɛɛ de rekɔ Edom hyeɛ soɔ ne: Kabseel ne Eder ne Yagur,

²²ne Kina ne Dimona ne Adada

²³ne Kedes ne Hasor ne Itnan,

²⁴Sif ne Telem ne Bealot,

²⁵ne Hasor-hadata ne Keriot-hesron, (ɛne Hasor),

²⁶Amam ne Sema ne Molada

²⁷ne Hasar-gada ne Hesmon ne Bet-pelet,

²⁸ne Hasar-sual ne Beer-seba ne ɛho nkuraa,

²⁹Baala ne Iyim ne Esem,

³⁰ne Eltolad ne Kesil ne Horma,

³¹ne Siklag ne Madmana ne Sansana,

³²ne Lebaot ne Silhim ne Ain ne Rimon: Ne nyinaa yɛ nkuro aduonu nkron ne ɛho nkuraa.

³³ Ɛpo ho mpaperɛ so deɛ ne: Estaol ne Sora ne Asna,

³⁴ne Sanoa ne En-ganim, Tapua ne Enam,

³⁵Yarmut ne Adulam, Soko ne Aseka,

³⁶ne Saaraim ne Aditaim ne Gedera ne Gederotaim: Nkuro dunan ne ɛho nkuraa.

³⁷Senan ne Hadasa ne Migdal-gad

³⁸ne Dilean ne Mispe ne Yokteel,

³⁹Lakis ne Boskat ne Eglon,

⁴⁰ne Kabon ne Lahmam ne Kitlis,

⁴¹ne Gederot, Bet-dagon ne Naama ne Makeda: Nkuro dunsia ne ɛho nkuraa.

⁴²Libna ne Eter ne Asan,

⁴³ne Yifta ne Asna ne Nesib

⁴⁴ ne Keila ne Aksib ne Maresa: Nkuro nkron ne ɛho nkuraa.

⁴⁵ Ekron ne ɛho nkuro ne nkuraa,

⁴⁶ɛfiri Ekron de kɔsi ɛpo fam deɛ ɛwɔ Asdod nkyɛn mu nyinaa ne ɛho nkuraa.

⁴⁷ Asdod, ɛho nkuro ne nkuraa, Gasa, ɛho nkuro ne nkuraa de kɔsi Misraim subonhwa no ano, ne Ɛpo Kɛseɛ ne ɛho hyeɛ.

⁴⁸Na mmepɔ so deɛ ne: Samir ne Yatir ne Soko,

⁴⁹ne Dana ne Kiriat-sana (a ɛne Debir),

⁵⁰ne Anab ne Estemo ne Anim,

⁵¹ne Gosen ne Holon ne Gilo: Nkuro dubaako ne ɛho nkuraa.

⁵²Arab ne Duma ne Esan,

⁵³ne Yanum ne Bet-tapua ne Afeka

⁵⁴ne Humta ne Kiriat-arba (a ɛne Hebron), ne Sior: Nkuro nkron ne ɛho nkuraa.

⁵⁵Maon, Karmel ne Sif ne Yuta,

⁵⁶ne Yesreel ne Yokdeam ne Sanoa,

⁵⁷Kain, Gibea ne Timna: Nkuro du ne ɛho nkuraa.

⁵⁸Halhul, Bet-sur ne Gedor,

⁵⁹ne Maarat ne Bet-anot ne Eltekon: Nkuro nsia ne ɛho nkuraa.

⁶⁰ Kiriat-baal (a ɛne Kiriat-yearim), ne Raba: Nkuro mmienu ne ɛho nkuraa.

⁶¹Ɛserɛ so deɛ ne: Bet-araba, Midin ne Sekaka

⁶²ne Nibsan ne Nkyene Kuro no ne En-gedi: Nkuro nsia ne ɛho nkuraa.

⁶³ Na Yebusifoɔ a wɔte Yerusalem no deɛ, Yudafoɔ no antumi antu wɔn, na Yebusifoɔ no ne Yudafoɔ no tenaa Yerusalem de bɛduru nnɛ yi.