Read New Revised Asante Twi Bible 2 Timoteo 2 Bible Online

2 Timoteo 2 - New Revised Asante Twi Bible bible

2 Timoteo 2

¹Afei wo, me ba, yɛ den adom a ɛwɔ Kristo Yesu mu no mu!

²Na deɛ wote firii m’anomu, adansefoɔ bebree anim no, ɛno ara na fa hyɛ nnipa anokwafoɔ a wɔbɛtumi akyerɛkyerɛ ebinom nso nsa.

³ Na wo nso, mia w’ani hunu amane sɛ Kristo Yesu sraani pa.

⁴Obi nkɔ ɔsa mfa daadaa asetena mu nsɛm mmarebare ne ho, na wasɔ ɔsahene ani.

⁵ Na sɛ obi si akan nso a, wɔmmɔ no nkonim abotire, gye sɛ wasi no sɛdeɛ ɛho mmara teɛ.

⁶ Okuafoɔ a ɔyɛ adwuma na ɛsɛ sɛ ɔnya mu aba no bi kane.

⁷Hunu deɛ meseɛ yi, na Awurade bɛma wo ade nyinaa mu nteaseɛ.

⁸ Kae Yesu Kristo a ɔsɔre firii awufoɔ mu a ɔfiri Dawid aseɛ, sɛdeɛ m’asɛmpa no teɛ no.

⁹ Ɛno mu na mehunu amane bɛduru ɔkyerɛ mu sɛ ɔdebɔneyɛfoɔ, nanso Nyankopɔn asɛm deɛ, wɔnkyeree no.

¹⁰ Yei nti meto me bo ase amaneɛ nyinaa mu, wɔn a wɔayi wɔn no nti, na wɔn nso anya nkwagyeɛ a ɛwɔ Kristo Yesu mu no ne daa animuonyam.

¹¹ Nokwasɛm nie: Sɛ yɛne no awu a, yɛne no bɛtena ase nso.

¹² Sɛ yɛgyina pintinn a, yɛne no bɛdi hene. Sɛ yɛpa no a, ɔno nso bɛpa yɛn.

¹³ Sɛ yɛnyɛ anokwafoɔ a, ɔno deɛ, ɔyɛ ɔnokwafoɔ ara, ɛfiri sɛ ɔntumi mpa ne ho akyi.

¹⁴ Yeinom na kae wɔn, na di wɔn adanseɛ Nyankopɔn anim, na wɔannye nsɛm ho akyinnyeɛ hunu a mfasoɔ biara nni so, a ɛsɛe atiefoɔ adwene.

¹⁵ Bɔ mmɔden gyina Nyankopɔn anim sɛdeɛ ɔfata, sɛ odwumayɛni a ɛnni sɛ ɔfɛreɛ, na ɔpɛɛpɛɛ nokwasɛm no mu pɛpɛɛpɛ.

¹⁶ Na nsɛnhuhuo a ɛho nteɛ no deɛ, yi wo ho firi ho, na wɔbɛkɔ wɔn anim ara mmusubɔ mu,

¹⁷ na wɔn asɛm bɛyerɛ sɛ yare bɔne; na wɔn mu bi ne Himeneo ne Fileto

¹⁸a wɔapae afiri nokorɛ no ho reka sɛ owusɔreɛ atwam, na wɔdane binom gyidie butuo.

¹⁹ Nanso Nyankopɔn nnyinasoɔ tim hɔ pintinn kura nsɔano yi: Awurade nim wɔn a wɔyɛ ne deɛ; ɛne: Ma obiara a ɔbɔ Awurade din ntwe ne ho mfiri deɛ ɛntene ho.

²⁰Na efie kɛseɛ mu nni sika ne dwetɛ nnoɔma nko, na nnua ne dɔteɛ deɛ nso wɔ mu bi, na wɔbu bi, na ebi nso yɛ deɛ wɔmmuo.

²¹Na sɛ obi te ne ho firi yeinom ho a, ɔbɛyɛ adeɛ a wɔbuo, na wɔate ho a, owura no de yɛ biribi a, ɛyɛ yie, na wɔasiesie de reyɛ adwuma pa biara.

²² Dwane firi mmabunuberɛ mu akɔnnɔ ho, na di tenenee, gyidie, ɔdɔ ne asomdwoeɛ a ɛka wo ne wɔn a wɔfiri akoma a emu teɛ mu frɛ Awurade bɔ mu no akyi.

²³ Na nkwasea akyinnyegyeɛ a wɔmfa nsua hwee no deɛ, gu, ɛfiri sɛ wonim sɛ, ɛde ntɔkwa ba.

²⁴ Na ɛnsɛ Awurade akoa bi sɛ ɔyɛ ntɔkwapɛfoɔ, na mmom ɛsɛ sɛ ɔdwo ma nnipa nyinaa, ɔhunu nkyerɛkyerɛ, ɔto ne bo ase bɔne ho,

²⁵na ɔde ɔdwoɔ kasa kyerɛ wɔn a wɔne no di asie wɔ nsɛm mu, sɛ ebia Onyankopɔn bɛma wɔn adwensakyera akɔ nokorɛ no hunu mu,

²⁶na wɔn ani so atete afiri ɔbonsam a wakyere wɔn sɛ wɔnyɛ deɛ ɔpɛ no afidie mu.