Read New Revised Asante Twi Bible Filemon 1 Bible Online

Filemon 1 - New Revised Asante Twi Bible bible

Filemon 1

¹ Paulo, Kristo Yesu deduani, ne onua Timoteo, de kɔma Filemon, yɛn dɔfo ne yɛn yɔnko dwumayɛni,

² ne onuabaa Apia, ne Arkipo, yɛn yɔnko sraani, ne asafo a ɛwɔ wo fie:

³Adom ne asomdwoeɛ a ɛfiri yɛn Agya Nyankopɔn ne Awurade Yesu Kristo nka mo!

⁴Da biara a mekae wo wɔ mpaebɔ mu no, meda me Nyankopɔn ase,

⁵ɛfiri sɛ mete wo dɔ a wowɔ ma ahotefoɔ nyinaa ne wo gyidie a wowɔ no Awurade Yesu mu no nka.

⁶Na mebɔ mpaeɛ sɛ nnepa pa nyinaa a ɛnam Kristo so wɔ wo mu ho nimdeɛ bɛma wo gyidie adɔeɛ nnwuma no ada adi kɛse.

⁷Me nua, mewɔ wo dɔ ho anigyeɛ ne awerɛkyekyerɛ bebree, sɛ woama ahotefoɔ akoma atɔ wɔn yam.

⁸Ɛno nti, ɛwom sɛ anka mewɔ akokoɔduro kɛse wɔ Kristo mu sɛ mehyɛ wo sɛ yɛ adeɛ a ɛfata yi,

⁹nanso, ɔdɔ nti mesrɛ wo mmom, me, akora Paulo a seesei mesane meyɛ Kristo Yesu deduani nso:

¹⁰ Mesrɛ wo mema me ba a mewoo no wɔ nkyehoma mu, Onesimo

¹¹(a kane no, ne ho nni mfasoɔ mma woɔ, na afei ɔyɛ ma wo ne me).

¹²Ɔno ara na masoma no wo nkyɛn bio; onipa a ɔte sɛ me ara m’akoma.

¹³Anka mepɛɛ sɛ mesianka no ma no tena me nkyɛn, na wasi w’anan mu asom me wɔ asɛmpa nkyehoma no mu,

¹⁴nanso mampɛ sɛ mefiri w’akyiri meyɛ biribiara, na wo yieyɛ anyɛ sɛ ɛfiri ɔhyɛ mu, na mmom afiri ɔpɛ mu.

¹⁵Na ebia yei nti na ɔne wo tetee mu kakra, sɛ wobɛnya no daa,

¹⁶ɛnyɛ sɛ akoa bio, na mmom deɛ ɔsene akoa, sɛ onua dɔfo a ɔyɛ ma me titire, na kampɛsɛ wo, honam ne Awurade fam.

¹⁷Enti sɛ wobu me sɛ ɔyɔnkoɔ deɛ a, gye no sɛ me ara.

¹⁸Na sɛ wayɛ wo bɔne bi, sɛ nso ɔde wo ka biara a, bu brɛ me.

¹⁹Me Paulo na mede me ara me nsa meretwerɛ sɛ: Mɛtua ka biara a ɔde wo, na anka mempɛ sɛ mekae wo mpo sɛ wo ara ankasa wode me ka.

²⁰Aane, onua, ma mennya wo ho biribi a ɛyɛ, Awurade mu, na ma m’akomam ntɔ me yam wɔ Kristo mu.

²¹Mewɔ awerɛhyɛmu wɔ wo setie ho nti na meretwerɛ wo nwoma yi, na menim sɛ wobɛyɛ asene deɛ maka yi mpo.

²²Nanso siesie ahɔhotenabea ma me, na m’ani da so sɛ, ɛnam mo mpaebɔ so. wɔde me bɛsane abrɛ mo.

²³ Epafra, me yɔnko deduani wɔ Kristo Yesu mu,

²⁴ Marko, Aristarko, Dema ne Luka, me yɔnkonom adwumayɛfoɔ, kyeakyea wo.

²⁵Awurade Yesu Kristo adom nka wo honhom.