Read New Revised Asante Twi Bible Hebrifoɔ 1 Bible Online

Hebrifoɔ 1 - New Revised Asante Twi Bible bible

Hebrifoɔ 1

¹Onyankopɔn a tete no ɔnam mmerɛ ahodoɔ ne akwan ahodoɔ so, nam adiyifoɔ so kasa kyerɛɛ agyanom no,

² nna a ɛdi akyire yi mu nso, ɔnam Ɔba no so akasa akyerɛ yɛn. Ɔno na wayɛ no nnoɔma nyinaa ɔdedifoɔ, a ɔnam ne so nso abɔ wiase nyinaa.

³ Ɔno ara a ɔyɛ n’animuonyam no haran ne ne su nsɛsoɔ, na ɔde ne tumi asɛm sɔ nnoɔma nyinaa mu no, ɔde ɔno ara ne ho dwiraa yɛn bɔne no, ɔkɔtenaa animuonyam kɛseɛ no nifa so ɔsorosoro,

⁴ na wakyɛne abɔfoɔ no mmoroso, sɛdeɛ ne din kunini a wanya no kyɛne wɔn deɛ no.

⁵ Na abɔfoɔ mu hwan na waka akyerɛ no pɛn sɛ: Me ba ne wo, me na mawo wo nnɛ, na bio: Mɛyɛ no Agya, na ɔno nso ayɛ me ɔba?

⁶ Na ɔnya de abakan no ba wiase bio a, ɔse: Ma Nyankopɔn abɔfoɔ nyinaa nsɔre no!

⁷ Na abɔfoɔ no ho deɛ, ɔse: Ɔyɛ n’abɔfoɔ mframa ne n’asomfoɔ, ogyaframa,

⁸ na ɔba no ho deɛ, ɔse: Onyankopɔn, w’ahennwa wɔ hɔ daapem daapem, w’ahennie poma yɛ poma a ɛtene.

⁹Wodɔ tenenee, na wokyiri amumuyɛ enti na Onyankopɔn, wo Nyankopɔn, de ahosan ngo asra woɔ asene wo mfɛfoɔ.

¹⁰ Na: Awurade, mfitiaseɛ no, wotoo asase fapem, na wo nsa ano nnwuma ne ɔsoro.

¹¹Yeinom bɛsɛe, nanso wo deɛ, wowɔ hɔ ara, na ne nyinaa bɛsu sɛ atadeɛ,

¹²na wobɛbobɔ wɔn sɛ firatam, na wɔasakyera wɔn sɛ atadeɛ. Na wo deɛ, wote sɛ deɛ wote ara, na wo mfeɛ renhi da.

¹³ Na abɔfoɔ no mu hwan ho na waka pɛn sɛ: Tena me nifa so kɔsi sɛ mede w’atamfo bɛyɛ wo nan ase ntiasoɔ?

¹⁴ Wɔn nyinaa nyɛ ahonhom asomfoɔ a, wɔn a, wɔbɛyɛ nkwagyeɛ no adedifoɔ no nti, wɔsoma wɔn sɛ wɔnkɔsom no anaa?