Read New Revised Asante Twi Bible Hebrifoɔ 10 Bible Online

Hebrifoɔ 10 - New Revised Asante Twi Bible bible

Hebrifoɔ 10

¹ Na ɛnam sɛ mmara no kura nnepa a ɛbɛba no nhwɛsoɔ na ɛnyɛ nnoɔma no suban ankasa nti, ɛntumi mfa afɔdeɛ korɔ no ara a wɔbobɔɔ no afe afe nyɛ wɔn a wɔbɔ no pɛ da;

²na sɛ asɔrefoɔ a wɔate wɔn ho prɛko nni bɔne ho ahonim bio a, anka wɔannyae afɔrebɔ anaa?

³ Na mmom bɔne ho nkaeɛ wɔ mu daa afirinhyia,

⁴ɛfiri sɛ anantwinini ne mmirekyie mogya ntumi nyi bɔne mfiri hɔ.

⁵ Enti ɔreba wiase no, na ɔkaa sɛ: Afɔdeɛ ne ayɛyɛdeɛ, woampɛ, ɔhonam na woasiesie de ama me.

⁶Ɔhyeɛ afɔdeɛ ne bɔne ho afɔdeɛ ansɔ w’ani.

⁷Ɛno na mekaa sɛ: Hwɛ, mereba, wɔatwerɛ me ho asɛm wɔ nwoma mmobɔeɛ no mu sɛ, merebɛyɛ deɛ wo, Onyankopɔn, wopɛ.

⁸Kane no, ɔkaa sɛ: Afɔdeɛ ne ayɛyɛdeɛ ne ɔhyeɛ afɔdeɛ ne bɔne ho afɔdeɛ, woampɛ, nanso ansɔ w’ani, (ɛne deɛ wɔnam mmara so de ma).

⁹Ɛno na ɔkaa sɛ: Hwɛ, maba sɛ merebɛyɛ deɛ wopɛ; ɔyi deɛ ɛdi kan no hɔ, na ɔde deɛ ɛtɔ so mmienu no asi hɔ.

¹⁰ Saa ɔpɛ no mu na wɔnam Yesu Kristo honam a ɔde bɛmaeɛ no soɔ ate yɛn ho prɛko.

¹¹ Na ɔsɔfoɔ biara gyina hɔ daa resom, na ɔtaa bɔ afɔdeɛ korɔ no ara a ɛntumi nyi bɔne mfiri hɔ da.

¹² Na ɔno deɛ, ɔnya bɔɔ daa bɔne ho afɔdeɛ baako no, ɔkɔtenaa Nyankopɔn nifa.

¹³ Na deɛ aka ne sɛ ɔtwɛn kɔduru sɛ wɔde n’atamfo bɛyɛ ne nan ase ntiasoɔ.

¹⁴ Na ɔde afɔdeɛ korɔ no ara ama wɔn a wɔate wɔn ho no awie pɛyɛ.

¹⁵Na Honhom Kronkron nso di yɛn adanseɛ. Ɛfiri sɛ akane no, ɔkaa sɛ:

¹⁶ Yei ne apam a nna no akyi me ne wɔn bɛpam no, Awurade na ɔseɛ: Mede me mmara bɛhyɛ wɔn akoma mu, na matwerɛ wɔ wɔn adwene mu

¹⁷ Ɔka toa so sɛ, na wɔn bɔne ne wɔn mmarato nso merenkae bio.

¹⁸Na deɛ yeinom fakyɛ wɔ no, bɔne ho afɔrebɔ nni hɔ bio.

¹⁹ Enti, anuanom, sɛ yɛwɔ Yesu mogya mu nnamyɛ a yɛde bɛkɔ kronkronbea hɔ,

²⁰ ɛsiane ɔkwan a wɔsiesie ama yɛn, ɔkwan foforɔ a ɛwɔ nkwa a ɛfa ntwamutam, ɛne sɛ ne honam mu,

²¹ne sɛ yɛwɔ Nyankopɔn fie so sɔfoɔ kɛseɛ nti,

²² momma yɛmfa nokorɛ akoma wɔ gyidie a akyinnyeɛ nni mu koraa mmɛn sɛ nnipa a wɔapete wɔn akoma ho afiri ahonim bɔne mu, na wɔde nsuo korɔgyenn adware wɔn nipadua.

²³ Momma yɛnsɔ anidasoɔ asɛm a yɛgyina so ka no mu pintinn, ɛfiri sɛ ɔnokwafoɔ ne deɛ ɔhyɛɛ bɔ no,

²⁴ na momma yɛnhwehwɛ yɛn ho ntwetwe yɛn ho yɛn ho nkɔ ɔdɔ ne nnwuma pa mu.

²⁵ Na mommma yɛnnnyae yɛn ho yɛn ho nhyiamu, sɛdeɛ ebinom yɛ no, na mmom momma yɛntutu yɛn ho yɛn ho fo, berɛ dodoɔ a mohunu sɛ Ɛda no rebɛn.

²⁶ Na sɛ yɛnya nya nokorɛ no mu nimdeɛ, na akyire yi yɛboapa kɔyɛ bɔne a, na bɔne ho afɔdeɛ biara nni hɔ bio,

²⁷na mmom deɛ aka ne atemmuo akwanhwɛ a ɛyɛ hu bi, ne ogya a ɛrebɛhye atamfoɔ no pasaa.

²⁸ Sɛ obi to Mose mmara a, ɔkwati mmɔborɔhunu gyina adansefoɔ baanu anaa baasa anomu asɛm so wu.

²⁹ Akatua a ɛnyɛ koraa bɛn na mususu sɛ ɛsɛ sɛ wɔde bɛtua deɛ watiatia Nyankopɔn Ba no soɔ, na wabu apam mogya a wɔde ate ne ho no ahuhudeɛ, na wasopa adom honhom no?

³⁰ Na yɛnim deɛ ɔkaa sɛ: Me na aweretɔ wɔ me, me na mɛtua ka. Na bio: Awurade bɛbu ne man atɛn.

³¹Onyankopɔn a ɔte aseɛ no nsa mu hweɛ yɛ hu.

³² Na monkae sɛ kane nna a monyaa hann no, momiaa mo ani hunuu ɔko bebree mu amane.

³³ Ebi ne sɛ, monam ahohora ne ahohia so yɛɛ adwasodeɛ, ebi nso ne sɛ moyɛɛ wɔn a wɔyɛɛ wɔn saa no mfɛfoɔ.

³⁴ Na momaa nneduafoɔ amaneɛ kaa mo, mode anigyeɛ nso penee mo nnoɔma fom sɛ monim sɛ mowɔ ahodeɛ a ɛyɛ kyɛne soɔ ɔsoro a ɛtena hɔ.

³⁵Enti monnto mo nnamyɛ a ɛwɔ akatua kɛseɛ no nntwene.

³⁶ Na boasetɔ hia mo, na sɛ mowie deɛ Onyankopɔn pɛ no yɛ a, mo nsa aka bɔhyɛ no.

³⁷ Na aka kakraa bi na deɛ ɔbɛba no aba, na ɔrenkyɛ.

³⁸ Na deɛ ɔtene no firi gyidie mu bɛnya nkwa, na sɛ ɔtwe ne ho a, me kra ani rensɔ no.

³⁹Na yɛn deɛ, yɛmfra wɔn a wɔtwe wɔn ho kɔ ɔsɛeɛ mu mu, na mmom yɛfra wɔn a wɔgye die na wɔkɔ nkwagyeɛ mu mu.