Read New Revised Asante Twi Bible Hebrifoɔ 3 Bible Online

Hebrifoɔ 3 - New Revised Asante Twi Bible bible

Hebrifoɔ 3

¹ Ɛno nti, anuanom akronkronfoɔ a mofra ɔsoro frɛ no mu, monhwɛ yɛn asɛm a yɛgyina so ka no ho Ɔsomafoɔ ne Ɔsɔfo Panin Yesu

² a ɔdi deɛ ɔde no sii hɔ no nokorɛ sɛdeɛ Mose nso dii Nyankopɔn fie nyinaa mu nokorɛ no.

³Na oyi deɛ, wɔabu no sɛ animuonyam bebree sɛ no, sene Mose, te sɛ deɛ ɔsi efie wɔ anidie bebree sene efie no.

⁴(Ɛfiri sɛ efie biara, obi na ɔsie, na deɛ ɔyɛɛ nnoɔma nyinaa ne Onyankopɔn.)

⁵Na Mose deɛ, ɔdii Nyankopɔn fie nyinaa mu nokorɛ sɛ ɔsomfoɔ, sɛ ɔbɛdi nsɛm a wɔrebɛka da bi no ho adanseɛ.

⁶ Na Kristo deɛ, ɔdi ne fie so sɛ ɔba; nso ne fie no ne yɛn, nanso gye sɛ yɛsɔ anidasoɔ no ho nnam ne ahohoahoa mu pintinn kɔsi awieeɛ.

⁷ Enti, sɛdeɛ Honhom Kronkron ka no: Ɛnnɛ, sɛ mote ne nne a,

⁸ mommpirim mo akoma sɛ atuateɛ no mu, sɔhwɛ da no wɔ serɛ so hɔ,

⁹deɛ mo agyanom gyegyee me hɔ no de sɔɔ me hwɛeɛ, na wɔhunuu me nnwuma mfirinhyia aduanan.

¹⁰Enti saa awoɔ ntoatoasoɔ yi ho yɛɛ me ahi, na mekaa sɛ: Wɔfom daa wɔ wɔn akoma mu. Nanso wɔn deɛ, wɔanhunu m’akwan;

¹¹ sɛdeɛ mekaa ntam wɔ m’abufuo mu no: Wɔrenhyɛne me home mu da.

¹²Monhwɛ yie, anuanom, na akoma bɔne a ɛnnye nnie amma mo mu biara mu, na wanwae amfiri Onyankopɔn teasefoɔ ho.

¹³ Na mmom montutu mo ho fo da biara a wɔda so bɔ din sɛ “ɛnnɛ” no, na bɔne nnaadaa ampirim mo mu biara akoma.

¹⁴ Nanso sɛ deɛ yɛfirii aseɛ de yɛn ho too soɔ no, yɛsɔ mu pintinn kɔsi awieeɛ a, yɛn ne Kristo bɛyɛ baako.

¹⁵ Sɛ wɔka sɛ: Ɛnnɛ, sɛ mote ne nne a, mommpirim mo akoma sɛ ahiyie no mu a,

¹⁶na ɛhefoɔ na wɔteeɛ a wɔtee atua no? Ɛnyɛ wɔn a wɔnam Mose so firii Misraim nyinaa no anaa?

¹⁷ Na ɛhefoɔ ho na ɛyɛɛ no ahi mfirinhyia aduanan no? Ɛnyɛ wɔn a wɔyɛɛ bɔne a wɔn amu guguu serɛ soɔ no anaa?

¹⁸ Na ɛhefoɔ na ɔkaa wɔn ntam sɛ wɔrenhyɛne n’ahome mu? Ɛnyɛ wɔn a wɔyɛɛ asoɔden no anaa?

¹⁹Na yɛhunu sɛ ɔgyeɛ a wɔannye annie nti, wɔantumi anhyɛn n’ahomegyeɛ no mu.