Read New Revised Asante Twi Bible Hebrifoɔ 8 Bible Online

Hebrifoɔ 8 - New Revised Asante Twi Bible bible

Hebrifoɔ 8

¹ Na nsɛm a yɛreka yi mu titire nie: Yɛwɔ saa ɔsɔfo panin a wakɔtena tumi kɛseɛ ahennwa no nifa, ɔsoro

²sɛ kronkronbea ne nokorɛ ntomadan a Awurade no ara, na ɛnyɛ onipa, pameeɛ no mu sɔfoɔ.

³ Na ɔsɔfo panin biara wɔhyɛ no sɛ ɔmfa ayɛyɛdeɛ ne afɔdeɛ mma, enti ɛsɛ sɛ oyi nso nya biribi a ɔde bɛma.

⁴Na sɛ ɔwɔ asase so deɛ a, anka ɔnyɛ ɔsɔfoɔ mpo, ɛfiri sɛ asɔfoɔ a wɔde ayɛyɛdeɛ ma, sɛdeɛ mmara no teɛ, wɔ hɔ dada.

⁵ Wɔn na wɔsom ɔsoro nnoɔma nhwɛsoɔ ne mfonini, te sɛdeɛ asɛm a berɛ a Mose rebɛsiesie ntomadan no, ɛbaa ne nkyɛn a ɛse: Hwɛ, yɛ adeɛ nyinaa sɛdeɛ nsususoɔ a wɔkyerɛɛ wo bepɔ no soɔ no teɛ.

⁶ Na afei ne nsa aka asɔfodwuma a ɛkyɛne soɔ, sɛ wayɛ apam a ɛkyɛne soɔ a wɔgyina bɔhyɛ a ɛkyɛne soɔ so hyɛɛ ho mmara no ntamgyinafoɔ.

⁷Na sɛ kane apam no ho nni asɛm a, anka wɔrenhwehwɛ deɛ ɛtɔ so mmienu toberɛ.

⁸ Na ɔnunu wɔn sɛ: Hwɛ, nna bi reba, Awurade na ɔseɛ, sɛ me ne Israel fie ne Yuda fie bɛpam apam foforɔ,

⁹ ɛnte sɛ apam a me ne wɔn agyanom pameeɛ da a mesosɔɔ wɔn nsa meyii wɔn mefirii Misraim asase soɔ no; ɛfiri sɛ wɔn deɛ, wɔantena m’apam mu, na me nso mannwene wɔn ho, Awurade na ɔseɛ.

¹⁰Na yei ne apam a nna no akyi me ne Israel fie bɛpam no, Awurade na ɔseɛ: Mede me mmara bɛhyɛ wɔn adwene mu, na matwerɛ no wɔn akoma mu, na mayɛ wɔn Nyankopɔn, na wɔn nso ayɛ me ɔman.

¹¹Na obi renkyerɛkyerɛ ne kuromani, obi renkyerɛkyerɛ ne nua sɛ: Hunu Awurade! Na wɔn nyinaa bɛhunu me afiri wɔn mu akumaa so akɔsi ɔkɛseɛ so.

¹²Na mɛdom wɔn amumuyɛ ho, na wɔn bɔne deɛ, merenkae bio.

¹³ Deɛ ɔka sɛ “foforɔ” yi no, ɔde ayɛ kane deɛ no dada, na deɛ ɛreyɛ dada na ɛretwa mu no, aka kakra na ayera.