Read New Revised Asante Twi Bible 2 Petro 2 Bible Online

2 Petro 2 - New Revised Asante Twi Bible bible

2 Petro 2

¹ Na adiyifoɔ atorofoɔ nso wɔ ɔman no mu, sɛdeɛ akyerɛkyerɛfoɔ atorofoɔ bɛba mo mu nso. Wɔn na wɔde ɔsɛeɛ fekusɛm bɛba abɛhyɛ mu, na wɔapa Awurade a ɔtɔɔ wɔn na ɔgyee wɔn no mpo, na wɔde ɔsɛeɛ a ɛba ntɛmntɛm aba wɔn ho so.

²Na bebree bɛdi wɔn ahohwisɛm no akyi, na wɔn nti, wɔbɛka nokorɛ kwan no ho nsɛmmɔne.

³Na wɔnam anibereɛ so de nnaadaasɛm bɛpɛ mo ho mfasoɔ. Wɔn na ɛfiri tete wɔn atemmuo ntwentwɛn aseɛ, na wɔn sɛeɛ ntɔ nko.

⁴Na sɛ Onyankopɔn ankora abɔfoɔ a wɔyɛɛ bɔne no, na mmom ɔde esum kabii ahoma kyeree wɔn guu Asamando amanehunu bunu mu, sɛ wɔmfa wɔn nsie atemmuo a,

⁵ na sɛ wankora tete wiase no, na mmom Noa a ɔyɛ tenenee sɛnkafoɔ ne nnipa baason a wɔka ne ho na ɔgyee wɔn na ɔde nsuyire bɛkataa amumuyɛfoɔ wiase soɔ no,

⁶ na sɛ ɔdanee Sodom ne Gomora nkuro nso, na ɔde ɔsɛeɛ buu wɔn fɔ de wɔn yɛɛ nhwɛsoɔ maa wɔn a akyire yi wɔbɛyɛ amumuyɛdeɛ,

⁷na ɔyii Lot a ɔtene a amumuyɛfoɔ no de wɔn ahohwie abrabɔ haa no,

⁸ (na deɛ onipa tenenee no tenaa wɔn mu hunuiɛ na ɔteeɛ no, mmarato nnwuma no yɛɛ ne kra tenenee no ayayadeɛ daa nyinaa;)

⁹ Awurade nim sɛdeɛ ɔbɛyi wɔn a wɔde fɛreɛ som no afiri sɔhwɛ mu, na wama wɔatwe wɔn a wɔntene aso de wɔn asie atemmuo da,

¹⁰ne titire no, wɔn a wɔdi honam akyiri, efi ho akɔnnɔ mu, na wɔte tumidie atua. Wɔyɛ aniɛdenfoɔ, ahopɛfoɔ, wɔn ho mpopo sɛ wɔbɛka animuonyam ho nsɛmmɔne.

¹¹Nanso abɔfoɔ a wɔwɔ ahoɔden ne tumi a ɛso no nka nsɛmmɔne mmu wɔn atɛn Awurade anim.

¹²Na yeinom deɛ, wɔte sɛ mmoa a wɔnni adwene a wɔn su ne sɛ wɔawo wɔn sɛ wɔnkyere wɔn nkum wɔn. Wɔka deɛ wɔnnim ho nsɛmmɔne, wɔbɛsɛe wɔn ara wɔn sɛeɛ mu,

¹³na wɔbɛnya deɛ ɛntene so akatua. Deɛ wɔbu no anigyeɛ ne daa ahohwie asetena, wɔyɛ nkekaeɛ ne dɛm, wɔde wɔn apempensie bɔ ahohwie, nanso na wɔne mo redidi,

¹⁴wɔwɔ ani a awaresɛeɛ ahyɛ no mama, a ɛrennwo wɔ bɔne ho da, wɔdaadaa akra a wɔn ase nnya ntimiiɛ, wɔwɔ akoma a aben anibereɛ mu, wɔyɛ nnomee mma,

¹⁵ wɔagya ɔkwan tenenee no akɔfom kwan, wɔakɔfa Beor ba Bileam kwan no so, ɔno na na ɔpɛ deɛ ɛntene akatua,

¹⁶ nanso ɔnyaa ne mmarato ho atɛnyie; afunumu a ɔntumi nkasa de onipa nne kasae sii odiyifoɔ no nkwaseasɛm no kwan.

¹⁷Yeinom yɛ mmura a nsuo nni mu, suwisie a mframa bɔ huu de rekorɔ, wɔn na wɔde esum kabikabi asie wɔn.

¹⁸Na wɔkeka akonkosɛm a hwee nni mu, nam honam akɔnnɔ mu de ahohwisɛm daadaa wɔn a wɔdwane firii wɔn a wɔbɔ nnaadaa bra no mu ɛnkyɛreeɛ.

¹⁹ Wɔhyɛ wɔn adehyedie ho bɔ, na wɔn ara deɛ, wɔyɛ ɔporɔ nkoa, ɛfiri sɛ deɛ adi obi so nkonim no, ɛno na ɛyɛ no akoa.

²⁰ Na sɛ wɔnam Awurade ne Agyenkwa Yesu Kristo ho nimdeɛ so adwane wiase fi, na wɔtoatoa wɔ mu bio di nkoguo a, wɔn akyire asetena adane wɔn bɔne akyɛne kane deɛ no.

²¹ Na anka ɛyɛ ma wɔn sɛ wɔanhunu tenenee kwan no, kyɛne sɛ wɔahunu, na wɔadane afiri ahyɛdeɛ kronkron a wɔde ahyɛ wɔn no ho.

²² Na ayɛ wɔn, sɛdeɛ nokorɛ bɛ no seɛ: Ɔkraman asane kɔ ɔno ara ne feɛ ho bio, na prako a wɔadware no no asiane kɔ n’atɛkyɛ a ɔyantam mu no mu.