Read New Revised Asante Twi Bible 2 Petro 3 Bible Online

2 Petro 3 - New Revised Asante Twi Bible bible

2 Petro 3

¹ Adɔfo, yei ne nwoma a ɛtɔ so mmienu a meretwerɛ mabrɛ mo. Emu na mede nkaeɛ mekanyane mo adwene gyenegyene,

²sɛ monkae nsɛm a adiyifoɔ kronkron no aka ato hɔ, ne yɛn a yɛyɛ mo asomafoɔ ahyɛdeɛ a ɛyɛ yɛn Awurade ne Agyenkwa deɛ no.

³ Monhunu yei kane sɛ, nna a ɛdi akyire no mu, fɛdifoɔ a wɔdi wɔn ara wɔn akɔnnɔ akyire de fɛdie bɛba

⁴ abɛka sɛ: Ne ba ho bɔhyɛ no wɔ he? Na ɛfirii sɛ agyanom dedaeɛ yi, ade nyinaa te sɛdeɛ ɛte firi adebɔ mfitiaseɛ.

⁵ Na wɔhyɛ da ara ma wɔn werɛ firi sɛ, ɛfiri teteete na ɔsoro wɔ hɔ, ne asase a ɛfiri nsuo mu, na ɛfiri nsuo mfimfini na ɛbɛtimm hɔ wɔ Onyankopɔn asɛm so.

⁶ Wɔn so ara na ɛnam na nsuo yiri sɛee wiase a na ɛwɔ hɔ wɔn berɛ so no.

⁷ Na ɔsoro ne asase a ɛwɔ hɔ yi, wɔde n’asɛm no ara na akora, na wɔde asie ama ogya, ama atemmuo ne nnipa amumuyɛfoɔ sɛeɛ da no.

⁸ Na, adɔfo, mommma adeɛ baako yi nnhunta mo, sɛ da koro yɛ Awurade sɛ mfirinhyia apem, na mfirinhyia apem yɛ no sɛ da koro.

⁹ Awurade nkyɛre ne bɔhyɛ ho, sɛdeɛ ebinom bu no sɛ ɛkyɛreɛ, na mmom ɔma ne bo dwo kyɛre ma mo, ɔmpɛ sɛ obiara bɛyera, na mmom ɔpɛ sɛ wɔn nyinaa ba adwensakyera mu.

¹⁰ Na Awurade da no bɛba sɛdeɛ owifoɔ ba. Emu na ɔsoro de kukurududu bɛtwam akorɔ, na ewie mu mfitiasedeɛ bɛhye asɛe, na asase ne mu nnwuma bɛhye.

¹¹Enti sɛ yeinom nyinaa bɛsɛe a, nnipa bɛn na ɛsɛ sɛ moyɛ wɔ abrabɔ kronkron ne nyamesom pa mu,

¹²sɛ motwɛn na morepɛ Nyankopɔn da no ba ntɛm yi? Ɛno mu na ɔsoro bɛsɔ ogya asɛeɛ, na wiem mfitiasedeɛ anane ahye.

¹³ Na sɛdeɛ ne bɔhyɛ teɛ no, yɛretwɛn ɔsoro foforɔ ne asase foforɔ a tenenee te mu no.

¹⁴ Enti, adɔfo, ɛnam sɛ moretwɛn yeinom nti, mommɔ mmɔden na wɔahu mo sɛ nnipa a wɔnni nkekaeɛ ne dɛm asomdwoeɛ mu,

¹⁵ na mommu yɛn Awurade abodwokyɛre no sɛ nkwagyeɛ, sɛdeɛ yɛn nua dɔfo Paulo nso de ne nyansa a wɔde ama no twerɛɛ mo no,

¹⁶sɛdeɛ ɔyɛeɛ wɔ ne nwoma nyinaa a ɔka yeinom ho nsɛm wɔ mu no mu nso. Emu na nsɛm a ne nteaseɛ yɛ den, na wɔn a wɔnsuaa adeɛ na wɔn ase ntimiiɛ toto no, sɛdeɛ wɔyɛ atwerɛ nsɛm a aka no nso, ma wɔn ara wɔn sɛeɛ no.

¹⁷ Enti, adɔfo, ɛnam sɛ monim dada nti, monhwɛ mo ho so yie, na wɔamfa amumuyɛfoɔ nnaadaasɛm no amfa mo ankɔ bi, na moamfiri mo ara mo tim a moatim no mu anhwe ase.

¹⁸Na monnyini yɛn Awurade ne Agyenkwa Yesu Kristo adom ne nimdeɛ mu. Ɔno na animuonyam nka no seesei ne daa. Amen.[1]