Read New Revised Asante Twi Bible Adiyisɛm 22 Bible Online

Adiyisɛm 22 - New Revised Asante Twi Bible bible

Adiyisɛm 22

¹ Na ɔkyerɛɛ me nkwa nsuo asubɔnten a ani teɛ sɛ ahwehwɛ a ɛfiri Nyankopɔn ne Adwammaa no ahennwa no mu

² ne kuro no abɔntene mfimfini. Asubɔntene no afanu nyinaa na nkwa dua a ɛso aba ahodoɔ dummienu sisie, na ɛsoso n’aba bosome biara. Na dua no ahahan na wɔde sa amanaman no yadeɛ.

³ Na mmusuo biara nni hɔ bio; na Onyankopɔn ne Adwammaa no ahennwa no na ɛbɛsi mu, na ne nkoa bɛsom no,

⁴ na wɔbɛhunu n’anim, na ne din bɛba wɔn moma so.

⁵ Na anadwo nni hɔ, na kanea anaa owia hann nhia wɔn, ɛfiri sɛ Awurade Nyankopɔn bɛhyerɛn wɔn so. Na wɔbɛdi ahene daa daa.

⁶ Na ɔka kyerɛɛ me sɛ: Nsɛm yi wɔ mu, na ɛyɛ nokorɛ, na Awurade, adiyifoɔ ahonhom Nyankopɔn no, asoma ne bɔfoɔ sɛ ɔmmɛkyerɛ ne nkoa adeɛ a ɛtwa sɛ ɛba ntɛm.

⁷ Na hwɛ, mereba ntɛm. Nhyira ne deɛ ɔkura nwoma yi mu adiyisɛm mu.

⁸ Na me, Yohane, ne deɛ ɔhunuu nnoɔma yi na ɔteeɛ. Na meteeɛ na mehunuiɛ no, mehwee ase sɛ merekoto asɔre ɔbɔfoɔ a ɔkyerɛɛ me nnoɔma yi nan ase.

⁹Na ɔka kyerɛɛ me sɛ: Hwɛ, nyɛ saa, meyɛ wo ne wo nuanom adiyifoɔ, ne wɔn a wɔkura nwoma yi mu nsɛm mu no awurakwaa. Koto sɔre Onyankopɔn!

¹⁰ Na ɔka kyerɛɛ me sɛ: Nsɔ nwoma yi mu adiyisɛm ano, na ɛberɛ no abɛn.

¹¹Deɛ ɔntene no nntene ara, na deɛ ɔyɛ fi no nyɛ fi ara. Na deɛ ɔtene no ntene ara, na deɛ ɔyɛ kronkron no nyɛ kronkron ara.

¹² Hwɛ, mereba ntɛm, na mekura m’akatua sɛ mede merebɛma obiara sɛdeɛ n’adwuma teɛ.

¹³ Mene Alfa ne Omega, ɔkannifoɔ ne okyidifoɔ, mfitiaseɛ ne awieeɛ no.

¹⁴ Nhyira ne wɔn a wɔhoro wɔn ntadeɛ, sɛdeɛ wɔbɛnya nkwa dua no ho kwan, na wɔafa apono no ano akɔ kuro no mu.

¹⁵ Na kuro no akyiri na akraman ne adutofoɔ ne nnwamammɔfoɔ ne awudifoɔ ne abosonsomfoɔ ne wɔn a wɔpɛ atorɔ na wɔdie nyinaa wɔ.

¹⁶ Me, Yesu, na masoma me bɔfoɔ sɛ ɔmmɛdi mo nnoɔma yi ho adanseɛ asafo no mu. Mene Dawid nhini ne n’aseni, adekyeeɛ nsoromma a ɛhran no.

¹⁷ Na honhom no ne ayeforɔ no se: Bra! Na deɛ ɔtie no nka sɛ: Bra! Na deɛ sukɔm de no mmra, na deɛ ɔpɛ no mmɛgye nkwa nsuo no kwa.

¹⁸ Mebɔ obiara a ɔte nwoma yi mu adiyie nsɛm no kɔkɔ sɛ: Sɛ obi de biribi ka nnoɔma yi ho a, Onyankopɔn de ɔhaw ahodoɔ a wɔatwerɛ wɔ nwoma yi mu no bɛka no ho.

¹⁹ Na sɛ obi yi adiyie nwoma yi mu nsɛm bi a, Onyankopɔn bɛyi ne kyɛfa afiri nkwa dua ne kuro kronkron a wɔatwerɛ ho nsɛm nwoma yi mu no mu.

²⁰Deɛ ɔdi nnoɔma yi ho adanseɛ no se: Aane, mereba ntɛm. Amen. Awurade Yesu, bra!

²¹Yɛn Awurade Yesu adom nka mo nyinaa. [Amen.]