Read New Revised Asante Twi Bible Rut 3 Bible Online

Rut 3 - New Revised Asante Twi Bible bible

Rut 3

¹ Na n’ase Naomi ka kyerɛɛ no sɛ: Me ba, mennhwehwɛ ahomeeɛ memmma wo na asi wo yie anaa?

²Na afei, Boas a wo ne ne mmaawa nanteeɛ no nyɛ yɛn manni anaa? Hwɛ, ɔrehu atokoɔ so anadwo yi wɔ aporeeɛ.

³Na dware na sra hyɛ wo ntadeɛ na siane kɔ aporeeɛ hɔ; na nyi wo ho adi nkyerɛ ɔbarima no kɔsi sɛ ɔbɛwie adidie ne ɔnom ansa;

⁴na sɛ ɔkɔda na wokɔhunu ne daberɛ hɔ a, kɔ kɔyi n’anafoɔ ntoma na da hɔ, na ɔno ara bɛkyerɛ wo deɛ yɛ.

⁵Na ɔka kyerɛɛ no sɛ: Mɛyɛ deɛ woka nyinaa.

⁶Na ɔsiane kɔɔ aporeeɛ hɔ kɔyɛɛ sɛdeɛ n’ase hyɛɛ no no nyinaa.

⁷Na Boas didi nomeeɛ na ne bo tɔɔ ne yam no, ɔkɔ kɔdaa atokokuo no ano hɔ. Na ɔbaa komm bɛyii n’anafoɔ ntoma na ɔdaa hɔ.

⁸Na dasuom no, ɔbarima no bɔɔ binim, na ɔmaa ne mu so hwɛe, na hwɛ, na ɔbaa da n’anafoɔ.

⁹ Na ɔkaa sɛ: Ɛyɛ wo hwan a? Na ɔse: Ɛyɛ me, w’abaawa Rut. Trɛ w’atadeɛ mmuano mu fa kata w’abaawa so, ɛfiri sɛ abusua mu gyefoɔ ne wo.

¹⁰ Na ɔkaa sɛ: AWURADE nhyira wo, me ba, woama w’akyiri adɔeɛ ayɛ yie sene kan deɛ no, sɛ woanni mmeranteɛ, ahiafoɔ oo, adefoɔ oo, akyire.

¹¹Na afei, me ba, nsuro. Deɛ woka nyinaa, mɛyɛ mama wo, ɛfiri sɛ me manfoɔ a wɔfa kuro pono ano nyinaa nim sɛ woyɛ ɔbaa pa.

¹²Na afei, ɛwom sɛ abusua mu gyefoɔ ne me, nanso abusua mu gyefoɔ bi wɔ hɔ a ɔbɛn sene me.

¹³Tena ha anadwo yi, na sɛ anɔpa, ɔyɛ wo ɔgyefoɔ ade a, ɛyɛ, ma no nyɛ ɔgyefoɔ; na sɛ ɔmpɛ sɛ ɔyɛ wo ɔgyefoɔ ade a, ɛnneɛ sɛ AWURADE te aseɛ yi, me na mɛyɛ wo ɔgyefoɔ. Da ma adeɛ nkye.

¹⁴Na ɔdaa n’anafoɔ hɔ kɔduruu anɔpa. Na ɔsɔree ansa na obi rehunu ne yɔnko. Na ɔkaa sɛ: Wɔmma wɔnnte sɛ ɔbaa no baa aporeeɛ ha.

¹⁵Na ɔka kyerɛɛ no sɛ: Fa mmuatoma a ɛgu wo soɔ no bra, na sɔ mu. Na ɔsɔɔ mu, na ɔsusuu atokoɔ susukoraa nsia guu mu, na ɔde soaa no, na ɔkɔɔ kuro no mu.

¹⁶Na ɔduruu n’ase nkyɛn no, ɔkaa sɛ: Ɛte sɛn, me ba? Na ɔkaa deɛ ɔbarima no yɛɛ no no nyinaa kyerɛɛ no.

¹⁷Na ɔkaa sɛ: Atokoɔ susukoraa nsia yi na ɔmaa me, na ɔse, mfa nsansa nkɔ w’ase nkyɛn.

¹⁸Na ɔkaa sɛ: Tena hɔ, me ba, kɔsi sɛ wobɛhunu sɛdeɛ asɛm yi bɛsie, ɛfiri sɛ ɔbarima no renhome gye sɛ ɔwie asɛm yi di nnɛ ansa.