Read དམ་པའི་གསུང་རབ་བོད་འགྱུར་གསར་མ།-New Tibetan Bible མད་ཐཱ། 11 Bible Online

མད་ཐཱ། 11 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

མད་ཐཱ། 11

¹སྐྱབས་མགོན་ཡེ་ཤུས་ཐུགས་སྲས་བཅུ་གཉིས་ལ་བཀའ་གནང་ཚར༌རྗེས་ཡུལ་དེ་དང་ཁ་བྲལ་ཏེ། ཁོ་རྣམས་ཀྱི་གྲོང་ཁྱེར་དག་ཏུ་ཆོས་གསུང་བ་དང་ཆོས་བསྒྲག་པར་ཕེབས་སོ།།

²ཁྲུས་གསོལ་མཁན་ཡོ་ཧ་ནན་གྱིས་བཙོན་ཁང་ནས་སྐྱབས་མགོན་མཱ་ཤི་ཀའི་མཛད་པ་རྣམས་ཐོས་ནས་རང་གི་སློབ་མ་འགའ་མངགས༌ཏེ།

³སྐྱབས་མགོན་ཡེ་ཤུ་ལ་འདི་ལྟར་ཞུས་པ་སྟེ། མ་འོངས་པར་ཕེབས་ངེས་པ་དེ་ཉིད་ནི་ཁྱེད་རང་ཡིན༌ནམ། ཡང་ན་ངེད་ཅག་གིས་ད་དུང་གཞན་ཞིག་ལ་བསྒུག་དགོས་པ་ཡིན་ཞེས་པ༌ལ།

⁴སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཕྱིར་སོང༌ནས།

⁵ལོང་བའི་མིག་གིས་མཐོང་ཞིང་གྱོལ་པོ་རྣམས་འགྲོ་བ༌དང༌། མཛེ་ནད་བསལ་ཞིང་འོན་པའི་རྣ་བས་ཐོས་པ༌དང༌། གཤིན་པོ་རྣམས་ཀྱང་སླར་གསོན་པོར་གྱུར་པ་དང༌། དབུལ་འཕོངས་རྣམས་ལ་འཕྲིན་བཟང་བསྒྲགས་པ་སོགས་ཁྱོད་རྣམས་ཀྱི་མཐོང་ཐོས་དེ་རྣམས་ཡོ་ཧ་ནན་ལ་ཤོད༌ཅིག

⁶བདག་གི་རྐྱེན་གྱིས་དད་པ་མི་ཉམས་པ་རྣམས་བདེའོ་ཞེས་གསུངས༌སོ།།

⁷མི་དེ་རྣམས་ཕྱིར་སོང༌རྗེས། སྐྱབས་མགོན་ཡེ་ཤུས་ཡོ་ཧ་ནན་གྱི་སྐོར་མི་ཚོགས་ལ་འདི་སྐད་དུ་གསུངས་པ་སྟེ། དེ་སྔོན་ཁྱོད་རྣམས་དབེན་སྟོང་དུ་ཅི་ཞིག་ལ་བལྟ་རུ་སོང༌ངམ། རླུང་གིས་གཡོས་པའི་འདམ་རྩྭ་ཞིག་ལ་བལྟ་རུ་སོང་བ་ཡིན༌ནམ།

⁸མ་གཞི་ཁྱོད་རྣམས་ཅི་ཞིག་ལ་བལྟ་རུ་སོང༌ངམ། ཡང་ན་སྲབ་ཅིང་འཇམ་པའི་གོས་ཆེན་གྱོན་པའི་མི་ཞིག་ལ་བལྟ་རུ་སོང༌ངམ། ལུས་ལ་སྲབ་ཅིང་འཇམ་པའི་གོས་ཆེན་གྱོན་མཁན་རྣམས་ནི་རྒྱལ་པོའི་ཕོ་བྲང་དུ་ཡོད་པ་ཡིན།

⁹མ་གཞི་ཁྱོད་རྣམས་ཅི་ཞིག་ལ་བལྟ་རུ་སོང༌ངམ། ཡང་ན་ལུང་སྟོན་པ་ཞིག་ལ་བལྟ་རུ་སོང༌ངམ། ལགས༌སོ། །བདག་གིས་ཁྱོད་རྣམས་ལ་སྨྲ་སྟེ། ཡོ་ཧ་ནན་ནི་ལུང་སྟོན་པ་ལས་མཆོག་ཏུ་གྱུར་པ་ཡིན།

¹⁰དེ་ལ་གསུང་རབ་ཀྱི་མདོ་ལས་ཇི་སྐད༌དུ། བདག་གི་ཕོ་ཉ་ཁྱོད་ཀྱི་མདུན་དུ༌མངགས།། ཁྱོད་ཀྱི་ལམ་ནི་གྲ་སྒྲིག་བྱེད་ལ༌ལྟོས།། ཞེས་བཀོད་པ་དེ་ནི་ཁོའི་སྐོར་ཡིན༌ནོ།།

¹¹ཡང་བདག་གིས་ཁྱོད་རྣམས་ལ་བདེན་པར་སྨྲ༌སྟེ། མ་ཡིས་བཙས་པ་ཐམས་ཅད་ཀྱི་ཁྲོད་ནས་ཁྲུས་གསོལ་མཁན་ཡོ་ཧ་ནན་ལས་མཆོག་ཏུ་གྱུར་པ་གཅིག་ཀྱང་མེད། འོན་ཀྱང་ནམ་མཁའི་རྒྱལ་སྲིད་ཀྱི་ནང་དུ་ཐམས་ཅད་ལས་ཆུང་བ་དེའང་ཡོ་ཧ་ནན་ལས་ཆེ་བ་ཡིན།

¹²ཁྲུས་གསོལ་མཁན་ཡོ་ཧ་ནན་གྱི་དུས་ནས་ད་ལྟའི་བར༌དུ། ནམ་མཁའི་རྒྱལ་སྲིད་ལ་གཞན་དག་གིས་ངོ་རྒོལ་དྲག་པོ་བྱེད་ཅིང་། གདུག་རྩུབ་ཅན་རྣམས་ཀྱིས་ཀྱང་དེ་བཙན་བཟུང་བྱེད་པ་ཡིན།

¹³ཡོ་ཧ་ནན་གྱི་བར་དུ་བཀའ་ཁྲིམས་དང་ལུང་སྟོན་པ་ཐམས་ཅད་ཀྱིས་ལུང་བསྟན་གནང་བའོ།།

¹⁴གལ༌ཏེ། ཁྱོད་ཅག་གིས་ཡིད་ཆེས་པར་འདོད༌ན། ཡོ་ཧ་ནན་ནི་མ་འོངས་པར་ཕེབས་ངེས་པའི་ཨེ་ལི་ཡཱ་ཡིན།

¹⁵ཡང་རྣ་བ་ཡོད་པ་ཐམས་ཅད་ཀྱིས་གཏམ་འདིར་ཉོན༌ཅིག།།

¹⁶བདག་གིས་མི་རབས་འདི་ནི་གང་ཞིག་ལ་བསྡུར་བར༌བྱའམ། དེ་རྣམས་ནི་ཁྲོམ་སྲང་དུ་སྡོད་པའི་བྱིས་པ་རྣམས་ཀྱིས་རང་གི་གྲོགས་པོ་རྣམས་བོས༌ཏེ།

¹⁷ངེད་རྣམས་ཀྱིས་ཁྱོད་རྣམས་ལ་གླིང་བུ་བུས་ཀྱང་ཁྱོད་རྣམས་བྲོ་མི་འཁྲབ། ངེད་རྣམས་ཀྱིས་སྐྱོ་གླུ་བླངས་ཀྱང་ཁྱོད་རྣམས་ངུ་བ་མིན་ཞེས་ཟེར་བ་དང༌འདྲའོ།།

¹⁸དེ་ལྟར་ཡོ་ཧ་ནན་ཡོང་ནས་མ་ཟོས་མ་འཐུངས་ཤིང་། མི་རྣམས་ཀྱིས་ཁོ་རང་གདོན་འདྲེས་བཟུང་འདུག་ཅེས་ཟེར་བ༌དང༌།

¹⁹དེ་ནས་མིའི་བུ་ཕེབས་ཏེ་བཟའ་བཏུང་ལོངས་སུ་སྤྱད༌ཅིང༌། མི་རྣམས་ཀྱིས་མི་འདི་ནི་ཤ་ཆང་ལ་རྔམ་པ་ཞིག་ཡིན༌ལ། ཁྲལ་ལེན་མཁན་དང་སྡིག་ཅན་རྣམས་ཀྱི་གྲོགས་པོ་ཡིན་ཟེར༌མོད། འོན་ཀྱང་ཤེས་རབ་ནི་དེའི་འབྲས་བུ་ལས་བདེན་ཅིང་ཡང་དག་པ་ཡིན་པར་ར་སྤྲོད་བྱུང་ཞེས་གསུངས༌སོ།།

²⁰སྐྱབས་མགོན་ཡེ་ཤུས་གྲོང་ཁྱེར་རྣམས་སུ་ངོ་མཚར་ཆེ་བའི་མཛད་པ་གང་མང་བསྟན༌ནའང༌། གྲོང་ཁྱེར་དེ་དག་གིས་འགྱོད་བཤགས་མ་བྱས་པས། ཁོང་གིས་འདི་སྐད་དུ་བཀའ་བཀྱོན་གནང་བ༌སྟེ།

²¹ཀྱེ། ཀོ་ར་ཟིན་དང་པེ་སད་དཱ་ཁྱོད་གཉིས་ལ་ཆག་སྒོ་འབྱུང༌། རྒྱུ་མཚན་ནི་ཁྱོད་གཉིས་ཀྱི་ནང་དུ་བྱུང་བའི་དོན་ངོ་མཚར་ཅན་དེ༌རྣམས། ཐཱར་དང་ཚི་ཏུན་དུ་བྱུང་བ་ཡིན༌ན། ཡུལ་དེའི་མི་རྣམས་ཀྱིས་སྔར་ནས་འགྱོད་བཤགས་བྱས་པ་དང་། ལུས་ལ་རྩིད་རས་གྱོན་ཞིང་མགོ་ལ་ཐལ་བ་གཏོར་བར་བྱེད།

²²འོན་ཀྱང་བདག་གིས་ཁྱོད་གཉིས་ལ་སྨྲ་བར་བྱ༌སྟེ། ཉེས་ཆད་གཅོད་པའི་ཉིན་མོ་དེ་སླེབ༌ཚེ། ཐཱར་དང་ཚི་ཏུན་གཉིས༌ལས། ཁྱོད་གཉིས་ལ་ཉེས་ཆད་ལྕི་མོ་འཕོག་པར་འགྱུར་རོ།།

²³ཀྱེ། ཀཱ་ཕར་ན་ཧུམ་ཁྱོད་ནི་ནམ་མཁའི་ཞིང་ཁམས་སུ་འདྲེན་པར་འགྱུར་རམ་ཞེ་ན་མི་འདྲེན༌ཏེ། གཤིན་པོའི་གནས་སུ་འཕེན་པར་འགྱུར། རྒྱུ་མཚན་ནི་ཁྱོད་ལ་བྱུང་བའི་ངོ་མཚར་བའི་མཛད་པ༌རྣམས། སཱ་དོམ་ནས་བྱུང་བ་ཡིན༌ན། གྲོང་ཁྱེར་དེ་ནི་ད་ལྟའི་བར་དུ་གནས་ཡོད་པ་ཡིན།

²⁴འོན་ཀྱང་བདག་གིས་ཁྱོད་ཅག་ལ་སྨྲ་བར་བྱ༌སྟེ། ཉེས་ཆད་གཅོད་པའི་ཉིན་མོ་དེ་སླེབ༌ཚེ། སཱ་དོམ་ཡུལ་ལས་ཁྱོད་ལ་ཉེས་ཆད་ལྕི་མོ་འཕོག་པར་འགྱུར་ཞེས་གསུངས༌སོ།།

²⁵དེའི་དུས༌སུ། སྐྱབས་མགོན་ཡེ་ཤུས་འདི་སྐད༌དུ། ཀྱེ། བདག་གི་ཡབ་སྟེ་གནམ་ས་གཉིས་ཀྱི་བདག་པོ༌ལགས། ཁྱེད་ཀྱིས་དོན་འདི་རྣམས་མཁས་པ་དང་བློ་གྲོས་ཅན་ལ་གབ༌ཅིང༌། བྱིས་པ་ལྟ་བུའི་མི་རྣམས་ལ་མངོན་པར་མཛད་པས་བདག་གིས་ཁྱེད་ལ་བསྔགས་པར༌བྱེད།

²⁶ཀྱེ། ཡབ་ལགས། དོན་དེ་ལ་ཁྱེད་ཐུགས་ཤིན་ཏུ་དགྱེས་པའི་ཕྱིར་ཡིན་ཞེས་གསུངས་སོ།།

²⁷ཡང་འདི་སྐད་དུ། བདག་གི་ཡབ་ཀྱིས་དོན་ཐམས་ཅད་བདག་ལ་གནང་བ་ཡིན༌ལ། ཡབ་ལས་གཞན་སུ་ཞིག་གིས་ཀྱང་སྲས་ངོ་མི་ཤེས། སྲས་ཁོང་ཉིད་དང་སྲས་ཀྱིས་ཡབ་སུ་ཡིན་སྟོན་པར་འདོད་པའི་མི་ལས༌གཞན། སུས་ཀྱང་ཡབ་ངོ་མི་ཤེས་སོ།།

²⁸དཀའ་སྡུག་ཆེན་པོ་མྱོང་བ་དང་ཁུར་བོ་ལྕི་མོས་མནན་ཡོད་པ་ཐམས་ཅད་བདག་གི་དྲུང་དུ་ཤོག༌དང༌། བདག་གིས་ཁྱོད་རྣམས་ལ་ངལ་གསོ་སྟེར་བར༌བྱའོ།།

²⁹བདག་གི་གཉའ་ཤིང་ཁུར་ལ་བདག་ནས་སློབས༌དང༌། བདག་ནི་གཤིས་རྒྱུད་འཇམ་ཞིང་སྙེམས་ཆུང་ཡིན། དེ་ལྟར་བྱས༌ན། ཁྱོད་རྣམས་ཀྱི་སེམས་སུ་ངལ་གསོ་འཐོབ་ངེས༌ཡིན།

³⁰རྒྱུ་མཚན་ནི་བདག་གི་གཉའ་ཤིང་བདེ་ཞིང་ངའི་ཁུར་བོའང་ཡང་ངོ་ཞེས་གསུངས༌སོ།།