Read དམ་པའི་གསུང་རབ་བོད་འགྱུར་གསར་མ།-New Tibetan Bible མད་ཐཱ། 19 Bible Online

མད་ཐཱ། 19 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

མད་ཐཱ། 19

¹སྐྱབས་མགོན་ཡེ་ཤུས་དེ་ལྟར་གསུངས༌རྗེས། ག་ལིལ་ཡུལ་དང་ཁ་བྲལ་ནས་ཡོར་དན་གཙང་པོའི་ཕར་ཕྱོགས་སུ་ཡོད་པའི་ཡ་ཧུ་དཱའི་ཡུལ་དུ་ཕེབས་པ༌དང༌།

²མི་སྐོར་ཚོ་མང་པོ་ཁོང་གི་རྗེས་སུ་འབྲངས་ཤིང་། ཁོང་གིས་ཡུལ་དེ་ནས་ནད་པ་རྣམས་གསོས་པའོ།།

³ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུར་ཚོད་བགམ་པའི་ཕྱིར་ཁོང་གི་དྲུང་དུ་ཡོང༌སྟེ་ན་རེ། སྐྱེས་པ་ཞིག་གིས་རྒྱུ་རྐྱེན་གང་རུང་གི་དབང་གིས་རང་གི་ཆུང་མ་སྤངས་ན་བཀའ་ཁྲིམས་དང་མཐུན་ནམ་ཞེས་ཞུས་པ༌ན།

⁴ཁོང་གིས་འདི་སྐད༌དུ། དེ་ཡང་ཐོག་མར་མི་སྐྲུན་མཁན་གྱིས་མི་ནི་ཕོ་དང་མོ་གཉིས་སུ་མཛད་པ༌དང༌།

⁵ཡང་ཇི་སྐད༌དུ། དེ་བས་སྐྱེས་པ་ནི་རང་གི་ཕ་མ་དང་ཁ་བྲལ་ནས་རང་གི་ཆུང་མར་འབྲེལ་ཏེ་ཁོ་གཉིས་ལུས་པོ་གཅིག་ཏུ་འགྱུར་ཞེས་གསུངས་ཡོད་པ་བཀླགས་མ་མྱོང༌ངམ།

⁶དེས་ན། ཕྱིན་ཆད་ཁོ་གཉིས་ནི་མི་གཉིས་མ་ཡིན་པར་ལུས་པོ་གཅིག་རང་ཡིན། དེའི་ཕྱིར། དཀོན་མཆོག་གིས་སྦྲེལ་བ་དེ་མི་སུས་ཀྱང་གཏོར་མི་རུང་ཞེས་བཀའ་ལན་གསུངས་སོ།།

⁷ཡང་ཕ་རུ་ཤི་པ་རྣམས་ན༌རེ། དེས་ན་མོ་ཤེ་ཡིས་ཅིའི་ཕྱིར་བཟའ་འཐོར་ཡི་གེ་སྤྲད་ན་ཆུང་མ་སྤངས་ཆོག་ཅེས་བཀའ་གནང་བ་ཡིན་ནམ་ཞེས་ཞུས་པ༌ལ།

⁸ཁོང་གིས་འདི་སྐད༌དུ། དེ་ནི་ཁྱོད་ཅག་གི་སེམས་གྱོང་པོ་ཡིན་པས་མོ་ཤེ་ཡིས་ཁྱོད་ཅག་ལ་ཆུང་མ་སྤོང་ཆོག་པའི་བཀའ་གནང་ནའང་། ཐོག་མ་ཉིད་ནས་དེ་ལྟར་མ་ཡིན་ནོ།།

⁹བདག་གིས་ཁྱོད་རྣམས་ལ་སྨྲ་བར་བྱ༌སྟེ། ལོག་གཡེམ་བྱས་པའི་རྒྱུ་རྐྱེན་ལས༌གཞན། ཁྱོ་བོ་སུ་ཞིག་གིས་རང་གི་ཆུང་མ་སྤངས་ཏེ་བུད་མེད་གཞན་ཞིག་བླངས༌ན། དེ་ནི་ལོག་གཡེམ་བྱས་པ་ཡིན་ཞེས་གསུངས༌སོ།།

¹⁰ཐུགས་སྲས་རྣམས་ན༌རེ། སྐྱེས་པ་དང་ཆུང་མ་གཉིས་ཀྱི་འབྲེལ་བ་དེ་འདྲ་ཡིན་ན། གཉེན་སྒྲིག་མ་བྱས་ན་མི་ལེགས་སམ་ཞེས་ཞུས་པ༌ལ།

¹¹ཡང་ཁོང་གིས་འདི་སྐད༌དུ། སྐད་ཆ་འདི་ནི་མི་ཐམས་ཅད་ཀྱིས་དང་དུ་ལེན་ཐུབ་པ་ཞིག་མིན༌ཏེ། སུ་ཞིག་ལ་གནང་བ་ཡིན༌ན། མི་དེ་ཁོ་ནས་དང་དུ་ལེན་ཐུབ་པ་ཡིན།

¹²རྒྱུ་མཚན་ནི་མི་ཁ་ཤས་སྐྱེས་མ་ཐག་ནས་མཚན་མའི་དབང་བོ་ཉམས༌ཤིང༌། ཡང་ལ་ལ་ནི་མི་གཞན་གྱིས་ཉུག་རུམ་པར་བཅོས་པ་དང༌། ཡང་མི་ཁ་ཤས་ནི་ནམ་མཁའི་རྒྱལ་སྲིད་ཀྱི་ཕྱིར། རང་གིས་རང་ཉིད་ཉུག་རུམ་པར་བྱས་པ་ཡིན། སུ་ཞིག་གིས་དོན་འདི་དང་ལེན་བྱེད་ནུས་ན་དང་དུ་བླངས་ཆོག་ཅེས་གསུངས༌སོ།།

¹³དེའི་དུས༌སུ། མི་རྣམས་ཀྱིས་བྱིས་པ་འགའ་སྐྱབས་མགོན་ཡེ་ཤུས་ཕྱག་བཞག་སྟེ་ཁོ་ཚོའི་ཆེད་དུ་གསོལ་བ་འདེབས་པའི་ཕྱིར་ཁོང་གི་དྲུང་དུ་ཁྲིད་ཡོང༌ནའང༌། ཐུགས་སྲས་རྣམས་ཀྱིས་དེ་དག་ལ་བཀའ་བཀྱོན་བྱས་སོ།།

¹⁴འོན༌ཀྱང༌། སྐྱབས་མགོན་ཡེ་ཤུས་འདི་སྐད༌དུ། ནམ་མཁའི་རྒྱལ་སྲིད་ནི་དེ་ལྟ་བུ་རྣམས་ཀྱི་ཡིན༌པས། བྱིས་པ་རྣམས་མི་འགོག་པར་བདག་གི་དྲུང་ལ་ཡོང་དུ༌ཆུག་ཅེས་གསུངས༌ཤིང༌།

¹⁵ཁོང་གིས་བྱིས་པ་དེ་རྣམས་ཀྱི་ལུས་ལ་ཕྱག་བཞག༌རྗེས། ཡུལ་དེ་དང་ཁ་བྲལ་ནས་ཕེབས༌སོ།།

¹⁶མི་ཞིག་སྐྱབས་མགོན་ཡེ་ཤུའི་དྲུང་དུ་ཡོང་སྟེ་ན༌རེ། སྟོན་པ༌ལགས། ངས་དོན་བཟང་པོ་གང་འདྲ་བྱས་ན། ད་གཟོད་མཐའ་མེད་པའི་ཚེ་སྲོག་འཐོབ་ཐུབ་བམ་ཞེས་ཞུས་པ༌ན།

¹⁷ཁོང་གིས་འདི་སྐད༌དུ། ཁྱོད་ཀྱིས་ཅིའི་ཕྱིར་དོན་བཟང་པོའི་སྐོར་བདག་ལ༌འདྲིའམ། བཟང་པོ་དེ་ཉིད་ལས་གཞན་བཟང་པོ་གཅིག་ཀྱང༌མེད། གལ་ཏེ་ཁྱོད་ལ་མཐའ་མེད་པའི་ཚེ་སྲོག་འཐོབ་འདོད༌ན། བཀའ་ཁྲིམས་རྣམས་སྲུངས་ཤིག་ཅེས་གསུངས་སོ།།

¹⁸ན་གཞོན་ན༌རེ། བཀའ་ཁྲིམས་གང་ཞིག་བསྲུང་དགོས་སམ་ཞེས་ཞུས་པ༌ལ། སྐྱབས་མགོན་ཡེ་ཤུས་འདི་སྐད༌དུ། མི་མ༌གསོད། ལོག་གཡེམ་མ༌བྱེད། རྐུ་མ༌བྱེད། རྫུན་གྱི་དཔང་པོ་མ༌བྱེད།

¹⁹རང་གི་ཕ་མ་གཉིས་ལ་བཀུར་བསྟི་བྱེད་དགོས༌པ་དང༌། ཁྱིམ་མཚེས་ལའང་རང་དང་འདྲ་བར་གཅེས་ཤིག་ཅེས་གསུངས་སོ།།

²⁰ན་གཞོན་ན༌རེ། ངས་བཀའ་དེ་ཐམས་ཅད་བསྲུངས་པ༌ཡིན་ལ་ད་དུང་མི་ཚང་བ་གང་ཞིག་ཡོད་དམ་ཞེས་ཞུས་པ༌ན།

²¹ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་ཁྱོད་རང་མི་ཕུལ་ཏུ་བྱུང་བ་ཞིག་བྱེད་འདོད༌ན། རང་ལ་ཅི་ཡོད་པ་ཐམས་ཅད་བཙོངས་ཏེ་དབུལ་པོ་རྣམས་ལ་བྱིན༌ཅིག དེ་ནས་ནམ་མཁའི་ཞིང་ཁམས་སུ་ཁྱོད་ལ་ནོར་བུ་འཐོབ་པར་འགྱུར། ཡང་བདག་གི་རྗེས་སུ་འབྲང་བར་གྱིས་ཞེས་གསུངས་སོ།།

²²འོན་ཀྱང་། ན་གཞོན་གྱིས་གསུང་དེ་ཐོས་པ༌དང༌། རང་ལ་རྒྱུ་ནོར་ཤིན་ཏུ་མང་པོ་ཡོད་པས་ཡིད་སྐྱོ་བའི་ངང་ནས་ཕྱིར་སོང༌ངོ༌།།

²³སྐྱབས་མགོན་ཡེ་ཤུས་རང་གི་ཐུགས་སྲས་རྣམས་ལ་འདི་སྐད༌དུ། བདག་གིས་ཁྱོད་རྣམས་ལ་བདེན་པར་སྨྲ༌སྟེ། ཕྱུག་བདག་ཅིག་ནམ་མཁའི་རྒྱལ་སྲིད་དུ་ཞུགས་པ་ནི་དཀའོ།།

²⁴ཡང་བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཕྱུག་བདག་ཅིག་དཀོན་མཆོག་གི་རྒྱལ་སྲིད་དུ་ཞུགས་པ་ལས་རྔ་མོང་ཞིག་ཁབ་མིག་ཏུ་འཛུལ་བ་སླ་ཞེས་གསུངས་སོ།།

²⁵ཐུགས་སྲས་རྣམས་ཀྱིས་གསུང་དེ་ཐོས་པ་དང་ཤིན་ཏུ་ཧ་ལས༌ཏེ། དེས་ན་སུ་ཞིག་ལ་ཐར་པ་འཐོབ་ཐུབ་བམ་ཞེས་ཞུས་པ༌ན།

²⁶སྐྱབས་མགོན་ཡེ་ཤུས་ཁོ་རྣམས་ལ་གཟིགས་ཏེ་འདི་སྐད༌དུ། དེ་ནི་མི་ཡིས་མི་ནུས་ཀྱང་དཀོན་མཆོག་གིས་ཐམས་ཅད་བསྒྲུབ་སྲིད་ཅེས་གསུངས༌སོ།།

²⁷པེ་ཏྲོ་ན༌རེ། ཁྱེད་ཀྱིས་གཟིགས༌དང༌། ངེད་ཅག་གིས་ཐམས་ཅད་སྤངས་ནས་ཁྱེད་ཀྱི་རྗེས་སུ་འབྲངས༌པས། ཕྱིས་སུ་ངེད་ཅག་ལ་ཅི་ཞིག་ཐོབ་སྲིད་དམ་ཞེས་ཞུས་པ༌ན།

²⁸ཡང་སྐྱབས་མགོན་ཡེ་ཤུས་འདི་སྐད༌དུ། བདག་གིས་ཁྱོད་ཅག་ལ་བདེན་པར་སྨྲ༌སྟེ། བདག་གི་རྗེས་སུ་འབྲང་མཁན་ཁྱོད་ཅག་ལ་མཚོན་ན། ཡོངས་རྫོགས་ཡང་བསྐྱར་མཛད་པའི་དུས་སུ། མིའི་བུ་རང་གི་གཟི་བརྗིད་ལྡན་པའི་ཁྲི་ལ་བཞུགས་པ་དང་། ཁྱོད་རྣམས་ཀྱང་ཁྲི་བཅུ་གཉིས་ལ་བསྡད་དེ་ཡེས་ར་ཨེལ་རིགས་ཀྱི་ཚོ་ཁག་བཅུ་གཉིས་ལ་ལེགས་ཉེས་ཀྱི་ཁྲིམས་ཐག་གཅོད་པར་འགྱུར་རོ༎

²⁹སུ་ཞིག་གིས་ངའི་མིང་གི་ཕྱིར། རང་གི་ཁང༌པའམ། ཕུ་ནུའམ། ལྕམ་སྲིང་ངམ། ཕ་མའམ། བུ༌ཕྲུག་གམ། ས་ཞིང་སོགས་སྤངས་ན། མི་དེ་ལ་ལྡབ་བརྒྱ་འགྱུར་གྱིས་འཐོབ་ངེས༌ཤིང༌། མཐའ་མེད་པའི་ཚེ་སྲོག་ཀྱང་འཐོབ་ངེས༌ཡིན།

³⁰འོན་ཀྱང་། སྔ་མ་མང་པོ་ཕྱི་མར་འགྱུར་ཞིང་། ཕྱི་མ་མང་པོ་སྔ་མར་འགྱུར་ཞེས་གསུངས༌སོ།།