Read དམ་པའི་གསུང་རབ་བོད་འགྱུར་གསར་མ།-New Tibetan Bible མད་ཐཱ། 22 Bible Online

མད་ཐཱ། 22 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

མད་ཐཱ། 22

¹དེ་ནས་ཡང་སྐྱབས་མགོན་ཡེ་ཤུས་དཔེའི་སྒོ་ནས་དེ་རྣམས་ལ་འདི་སྐད༌དུ།

²ནམ་མཁའི་རྒྱལ་སྲིད་ནི་རྒྱལ་པོ་ཞིག་གིས་རང་གི་སྲས་ལ་བག་སྟོན་བྱེད་པ་དང་འདྲ༌སྟེ།

³ཁོང་གིས་རང་གི་གཡོག་པོ་འགའ་བག་སྟོན་དུ་བོས་པའི་མགྲོན་པོ་རྣམས་གདན་འདྲེན་བྱེད་དུ་མངགས༌ནའང༌། མི་དེ་རྣམས་ཡོང་བར་མ་འཐད་དོ།།

⁴ཡང་ཁོང་གིས་གཡོག་པོ་གཞན་དག་མངགས༌ཏེ། ཁྱོད་ཅག་གིས་མགྲོན་དུ་བོས་པ་རྣམས་ལ་འདི༌ལྟར་སྨྲོས་ཤིག བདག་གིས་བ་གླང་དང་སྒོ་ཕྱུགས་ཤ་ཤེད་ཅན་བཤས་ཏེ་ཐམས་ཅད་སྟ་གོན་བྱས་ཚར༌བས། ཁྱེད་རྣམས་བག་སྟོན་ལ་ཕེབས་པར་ཞུ་ཞེས་གསུངས༌ནའང༌།

⁵མི་དེ་རྣམས་ཀྱིས་དོན་དེར་དོ་སྣང་མ་བྱས༌པར། མི་གཅིག་རང་གི་ཞིང་ཁར་སོང་བ༌དང༌། གཞན་ཞིག་ཚོང་རྒྱག་སར་སོང༌།

⁶ཡང་མགྲོན་དུ་བོས་པའི་མི་གཞན་དག་གིས་གཡོག་པོ་དེ་རྣམས་བཟུང་བ་དང་བརྙས་བཅོས་བྱས་ཏེ་བསད་དོ།།

⁷དེ་ནས་རྒྱལ་པོ་ཐུགས་ཤིན་ཏུ་ཁྲོས་ཏེ་དམག་བཏང་ནས་ལག་དམར་དེ་རྣམས་མེད་པར་བྱས་པ༌དང༌། མི་དེ་དག་གི་གྲོང་ཁྱེར་ཡང་མེར་བསྲེགས།

⁸ཡང་ཁོང་གིས་རང་གི་གཡོག་པོ་རྣམས་ལ་འདི་སྐད༌དུ། བག་སྟོན་སྟ་གོན་བྱས་ཟིན་ནའང་མགྲོན་དུ་བོས་པ་རྣམས་བག་སྟོན་ལ་ཞུགས་མི་འོས།

⁹དེའི༌ཕྱིར། ཁྱོད་རྣམས་ལམ་མདོ་རུ་སོང་སྟེ་མི་སུ་དང་འཕྲད༌ན། དེ་རྣམས་བག་སྟོན་ལ་བོས་ཤིག་ཅེས་གསུངས་སོ།།

¹⁰གཡོག་པོ་དེ་རྣམས་ཁྲོམ་སྲང་དུ་སོང༌སྟེ། མི་བཟང་ངན་སུ་ཡིན་ཡང་འཕྲད་པ་ཐམས་ཅད་བསྡུས༌པས། བག་སྟོན་གྱི་གནས་དེར་མགྲོན་པོས་བཀང་ངོ་།།

¹¹དེ་ནས་རྒྱལ་པོའང་ཕེབས་ཏེ་མགྲོན་པོ་རྣམས་ལ་གཟིགས་པ༌ན། གཟབ་གོས་སྤྲས་མེད་པའི་མགྲོན་པོ་ཞིག་མཐོང་སྟེ་འདི་སྐད༌དུ།

¹²གྲོགས་པོ༌ལགས། ཁྱོད་ཀྱིས་གཟབ་གོས་མ་སྤྲས་པར་འདིར་ཡོང་བ་ཅི་ཡིན་ནམ་ཞེས་གསུངས་པ༌ན། མགྲོན་པོ་དེ་ལ་ལན་འདེབས་རྒྱུ་མེད་པར་གྱུར་ཏོ།།

¹³དེ་ནས་རྒྱལ་པོས་ཞབས་ཕྱི་པ་རྣམས་ལ། མགྲོན་པོ་འདིའི་རྐང་ལག་བཀྱིགས༌ཏེ། ཕྱི་རོལ་གྱི་མུན་ནག་ནང་དུ་གཡུག་པར༌གྱིས། གནས་དེ་རུ་ངུ་འབོད་བྱེད་ཅིང་ཨམ་གཙིགས་བསྡམ་པར་འགྱུར་ཞེས་སྨྲས་སོ།།

¹⁴དེ་ནི་མགྲོན་དུ་བོས་པ་མང་ཡང་དངོས་སུ་བདམས་པ་ཉུང་བའི་ཕྱིར་ཡིན་ཞེས་གསུངས༌སོ།།

¹⁵དེའི་དུས༌སུ། ཕ་རུ་ཤི་པ་རྣམས་ཕྱི་རོལ་ཏུ་སོང་ནས་ཇི་ལྟར་ཡེ་ཤུའི་གསུང་ལ་སྙད་བརྐོས་ནས་ཁོང་ལ་གནོད་པ་བྱེད་པར་གྲོས་བྱས༌ཏེ།

¹⁶རང་གི་སློབ་མ་དང་ཧེ་རོ་དཱའི་ཕྱོགས་ཁག་གི་མི་འགའ་སྐྱབས་མགོན་ཡེ་ཤུའི་དྲུང་དུ་མངགས༌ཤིང༌། དེ་རྣམས་ན༌རེ། སློབ་དཔོན༌ལགས། ཁྱེད་ནི་གཞུང་རྒྱུད་དྲང་ཞིང་དཀོན་མཆོག་གི་ལམ་ཡང་དག་པར་བདེན་པར་སྟོན་པ༌དང༌། ཁྱེད་ཀྱིས་མིའི་ཁ་ངོར་མི་གཟིགས་ཤིང་ཀུན་ལ་ཕྱོགས་རིས་མེད་པ་ངེད་རྣམས་ཀྱིས་ཤེས།

¹⁷དེའི༌ཕྱིར། ཁྱེད་ཀྱིས་ཇི་ལྟར་དགོངས་པ་ངེད་རྣམས་ལ་གསུང་བར༌མཛོད། ད་ལྟ་ངེད་ཅག་གིས་སེ་བཟིར་ལ་ཁྲལ་འཇལ་རུང་ངམ་མི༌རུང་ཞེས་དྲིས།

¹⁸ཁོང་གིས་དེ་རྣམས་ཀྱི་ངན་སེམས་མཁྱེན་ཏེ་འདི་སྐད༌དུ། ཚུལ་འཆོས་པ་ཁྱོད་ཅག་གིས་བདག་ལ་ཚོད་བགམ་པའི་རྒྱུ་མཚན༌ཅི།

¹⁹ཁྲལ་དུ་སྤྲད་པའི་དངུལ་སྒོར་ཞིག་བདག་ལ་སྟོན་ཅིག་ཅེས་གསུངས་པ༌དང༌། དེ་རྣམས་ཀྱིས་དངུལ་སྒོར་ཞིག་ཁྱེར་ཡོང་ནས་ཁོང་ལ་བྱིན།

²⁰ཁོང་གིས་དེ་རྣམས་ལ་རི་མོ་དང་ཡི་གེ་འདི་སུའི་ཡིན་ནམ་ཞེས་དྲིས་པ༌ན།

²¹དེ་རྣམས་ཀྱིས་སེ་བཟིར་གྱི་ཡིན་ཞེས་སྨྲས་སོ།། ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་གང་ཞིག་སེ་བཟིར་གྱི་ཡིན་ན་དེ་ནི་སེ་བཟིར་ལ་ཕུལ༌དང༌། གང་ཞིག་དཀོན་མཆོག་གི་ཡིན་ན་དེ་ནི་དཀོན་མཆོག་ལ་ཕུལ་ཅིག་ཅེས་གསུངས་སོ།།

²²ཁོ་རྣམས་ཀྱིས་གསུང་དེ་ཐོས་པ་དང་ངོ་མཚར་བར་གྱུར་ཏེ་ཁོང་དང་ཁ་བྲལ་ནས་སོང༌ངོ༌།།

²³ཉིན་དེར། སླར་གསོན་པའི་དོན་དེ་མེད་ཟེར་མཁན་སཱ་ཅུ་སེ་པ་འགའ་ཞིག་ཁོང་གི་དྲུང་དུ་ཡོང༌སྟེ།

²⁴སློབ་དཔོན༌ལགས། མོ་ཤེའི་མདོ༌ལས། གལ་སྲིད་སྐྱེས་པ་ཞིག་ལ་བུ་ཕྲུག་མེད་པར་ཤི༌ན། དེའི་གཅུང་པོས་གཅེན་པོའི་ཆུང་མ་བླངས་ནས་གཅེན་པོའི་དོན་དུ་རིགས་རྒྱུད་སྤེལ་དགོས་ཞེས་གསུངས༌ཡོད།

²⁵སྔོན་ཆད་ངེད་ཅག་གི་ཡུལ་འདིར་སྤུན་བདུན་ཡོད་པ༌ལ། སྤུན་ཆེ་བས་ཆུང་མ་ཞིག་བླངས་ནས་བུ་ཕྲུག་མེད་པར་ཤི་བས། ཆུང་མ་གཅུང་པོ་ལ་བསྐྱུར།

²⁶སྤུན་གཉིས་པ་དང་གསུམ་པ་ནས་སྤུན་བདུན་པའི་བར༌དུ། ཚང་མ་དེ་བཞིན་ཡིན་ལ།

²⁷མཇུག་མཐར་བུད་མེད་དེའང༌ཤིའོ།།

²⁸དེས་ན་གཤིན་པོ་རྣམས་སླར་གསོན་པར་འགྱུར་བའི་དུས་དེ་སླེབ༌ཚེ། སྤུན་བདུན་པོས་བུད་མེད་དེ་ཆུང་མར་བླངས་མྱོང༌བས། ཁོ་མོ་ནི་སྤུན་བདུན་ལས་སུ་ཞིག་གི་ཆུང་མ་ཡིན་ནམ་ཞེས་དྲིས་པ༌ལ།

²⁹སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ཁྱོད་ཅག་གིས་གསུང་རབ་ཀྱི་དོན་མི་རྟོགས་ཤིང་དཀོན་མཆོག་གི་མཐུ་སྟོབས་ཀྱང་མི་ཤེས་པས་ནོར༌སོང་ངོ་༎

³⁰ཅིའི་ཕྱིར་ཞེ༌ན། གཤིན་པོ་རྣམས་སླར་གསོན་པའི་དུས༌སུ། མི་རྣམས་ཀྱིས་བག་མ་ཕར་བསྐྱལ་ཚུར་ལེན་མི་བྱེད་པར་ནམ་མཁའི་ཞིང་ཁམས་ཀྱི་ཕོ་ཉ་རྣམས་དང༌འདྲའོ།།

³¹འོན་ཀྱང་གཤིན་པོ་རྣམས་སླར་གསོན་ངེས་པའི་སྐོར་ལ་དཀོན་མཆོག་གིས་གསུང་རབ་ཀྱི་མདོ་ལས་ཁྱོད་རྣམས་ལ་འདི་སྐད༌དུ།

³²བདག་ནི་ཨབ་ར་ཧམ་གྱི་དཀོན་མཆོག༌དང༌། ཨི་སཱག་གི་དཀོན༌མཆོག ཡ་ཀོབ་ཀྱི་དཀོན་མཆོག་ཡིན་ཞེས་གསུངས་ཡོད་པ་ཁྱོད་ཅག་གིས་བཀླགས་མ་མྱོང༌ངམ། ཁོང་ནི་གཤིན་པོ་རྣམས་ཀྱི་དཀོན་མཆོག་མ་ཡིན༌ཏེ། གསོན་པོ་རྣམས་ཀྱི་དཀོན་མཆོག་ཡིན་ཞེས་གསུངས་སོ།།

³³མི་ཚོགས་ཀྱིས་གསུང་དེ་ཐོས་པ་དང་ཁོང་གིས་གསུངས་པའི་ཆོས་ལ་ངོ་མཚར་བར་གྱུར༌ཏོ།།

³⁴དེ་ནས་ཕ་རུ་ཤི་པ་རྣམས་ཀྱིས་སྐྱབས་མགོན་ཡེ་ཤུས་སཱ་ཅུ་སེ་པ་རྣམས་ཀྱི་སྨྲ་སྒོ་བཅད་པ་ཐོས་ནས་ཕྱོགས་གཅིག་ཏུ་འདུས༌ཤིང༌།

³⁵དེ་རྣམས་ལས་བཀའ་ཁྲིམས་ཀྱི་མཁས་པ་ཞིག་གིས་ཁོང་ལ་ཚོད་བགམ་པའི་ཕྱིར་ན༌རེ།

³⁶སློབ་དཔོན༌ལགས། བཀའ་ཁྲིམས་ཐམས་ཅད་ལས་གཙོ་ཤོས་གང་ཡིན་ནམ་ཞེས་དྲིས་པ༌ན།

³⁷སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་སྙིང་ཧྲིལ་པོ༌དང༌། སེམས་ཧྲིལ་པོ༌དང༌། ཡིད་ཧྲིལ་པོས་གཅེས༌ཤིག

³⁸འདི་ནི་བཀའ་ཁྲིམས་ཐམས་ཅད་ལས་ཐོག་མ་དང་ཆེས་གཙོ་ཤོས་ཡིན།

³⁹གཉིས་པའང་དེ་དང་འདྲ༌སྟེ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པ་འདི་ཡིན།

⁴⁰བཀའ་ཁྲིམས་འདི་གཉིས་ནི་བཀའ་ཁྲིམས་དང་ལུང་སྟོན་པའི་མདོ་ཐམས་ཅད་ཀྱི་རྩ་བ་ཡིན་ཞེས་གསུངས༌སོ།།

⁴¹ཕ་རུ་ཤི་པ་རྣམས་གནས་དེར་འཛོམས་དུས། སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ།

⁴²མཱ་ཤི་ཀའི་སྐོར་ནས་ཁྱོད་ཅག་གི་བསམ་ཚུལ་ཅི་ཡིན༌ནམ། ཁོང་ནི་སུ་ཞིག་གི་སྲས་ཡིན་ནམ་ཞེས་བཀའ་འདྲི་གནང་བ༌ལ། དེ་རྣམས་ཀྱིས་དཱ་བིད་ཀྱི་རིགས་སྲས་ཡིན་ཞེས་ཞུས་སོ།།

⁴³ཡང་སྐྱབས་མགོན་ཡེ་ཤུས་འདི་སྐད༌དུ། དེས་ན་དཱ་བིད་ཀྱིས་དམ་པའི་ཐུགས་ཉིད་ཀྱི་ངང་ནས་མཱ་ཤི་ཀ་ལ་གཙོ་བོ་ལགས་ཞེས་འབོད་པ་ཅི་ཡིན༌ནམ། དེ་ལ་ཇི་སྐད༌དུ།

⁴⁴དཀོན་མཆོག་གིས་ནི་ང་ཡི་གཙོ་བོ༌ལ།། བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་འོག་ཏུ་འཇུག་པའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས༌ཤིང༌།

⁴⁵དཱ་བིད་ཀྱིས་ཁོང་ལ་གཙོ་བོ་ཞེས་ཞུས༌ན། ཁོང་ནི་དཱ་བིད་ཀྱི་རིགས་སྲས་སུ་ཇི་ལྟར་གྱུར་པ་ཡིན་ནམ་ཞེས་གསུངས་པ༌ན། [17]

⁴⁶མི་སུས་ཀྱང་ཁོང་ལ་ལན་འདེབས་མ་ནུས༌ལ། ཉིན་དེ་ནས་བཟུང་སུས་ཀྱང་ཁོང་ལ་དྲི་བ་ཅི་ཡང་ཞུ་མ་ཕོད༌དོ།།