Read དམ་པའི་གསུང་རབ་བོད་འགྱུར་གསར་མ།-New Tibetan Bible མཛད་འཕྲིན། 26 Bible Online

མཛད་འཕྲིན། 26 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

མཛད་འཕྲིན། 26

¹དེ་ནས་ཨག་རི་པཱ་བྱ་བས་ཕོལ་ལོལ་ལ། ཁྱོད་ཀྱིས་རང་གི་རྒྱུ་མཚན་སྨོས་ཆོག་ཅེས་སྨྲས་པ༌དང༌། ཕོལ་ལོལ་གྱིས་ལག་བརྡ་བྱེད་བཞིན་དག་འབུད་བྱེད་པའི་གཏམ་འདི་ལྟར་སྨྲས༌པ།

²ཀྱེ། རྒྱལ་པོ་ཨག་རི་པཱ༌ལགས། ངས་དེ་རིང་གི་དུས་འདིར་ཡ་ཧུ་དཱ་པ་རྣམས་ཀྱིས་ང་རང་གཏུགས་པའི་དོན་དེ་ཐམས་ཅད་ཁྱེད་ཀྱི་དྲུང་དུ་དག་འབུད་བྱེད་ཐུབ་པ་ནི་དངོས་གནས་སྟབས་ལེགས༌པ་རེད།

³དེ་ལས་ཀྱང་ཤིན་ཏུ་ལེགས་པ་ནི་ཁྱེད་ཀྱིས་ཡ་ཧུ་དཱ་པའི་ལུགས་སྲོལ་དང་ཁོ་རྣམས་ཀྱི་རྩོད་གླེང་གི་ནང་དོན་ཡང་རྟོགས་པས་ཁྱེད་ཀྱིས་ཐུགས་མི་སུན་པར་བདག་ལ་གསན་རོགས༌ཞུ།

⁴ང་རང་ནི་ཆུང་དུས་ནས༌བཟུང༌། རང་ཡུལ་གྱི་མི་རྣམས་ཀྱི་ཁྲོད་དང་ཡེ་རུ་སཱ་ལེམ་དུ་སྤྱོད་ལམ་ག་འདྲ་ཡིན་པ་ཡ་ཧུ་དཱ་པ་ཐམས་ཅད་ཀྱིས་ཤེས༌པ་ཡིན།

⁵གལ་ཏེ་ཁོ་རྣམས་ཀྱིས་བདེན་དཔང་བྱེད་འདོད༌ན། ང་ནི་སྔོན་ཆད་ངེད་ཅག་གི་ཆོས་ལུགས་ལྟར་ཆོས་ཁྲིམས་ཆེས་དམ་པོའི་ཕ་རུ་ཤི་པའི་གྲུབ་མཐར་ཞུགས་མྱོང་བ་རྟོགས་སོ།།

⁶ད་ལྟ་ངས་གནས་འདི་ནས་འདྲི་གཅོད་མྱོང་བ་ནི་དཀོན་མཆོག་གིས་བདག་ཅག་གི་ཕ་མེས་ལ་ཞལ་གྱིས་བཞེས་པར་རེ་སྨོན་བཅངས་པའི་ཕྱིར་ཡིན༌ཏེ།

⁷ངེད་ཅག་ཚོ་བ་བཅུ་གཉིས་ཐམས་ཅད་ཀྱིས་ཉིན་མཚན་ཀུན་ཏུ་འབད་པ་ལྷུར་ལེན་སྒོས་དཀོན་མཆོག་ལ་བསྙེན་བཀུར་བྱས་ནས་ཞལ་བཞེས་དེ་འཐོབ་པར་རེ་སྨོན་བྱེད། རྒྱལ་པོ༌ལགས། ཡ་ཧུ་དཱ་པས་ང་རང་གཏུགས་པ་ནི་རེ་སྨོན་འདིའི་རྐྱེན་ཡིན།

⁸དཀོན་མཆོག་གིས་གཤིན་པོ་རྣམས་སླར་གསོན་པར་མཛད་པའི་དོན་དེར་ཁྱོད་རྣམས་ཀྱིས་ཅིའི་ཕྱིར་ཡིད་རྟོན་མི་བྱེད་དམ།

⁹སྔོན་ཆད་ངས་ཀྱང་ཕྱོགས་གང་མང་ནས་ནཱ་ཙ་རེལ་གྱི་ཡེ་ཤུའི་མཚན་ལ་ངོ་རྒོལ་བྱ་འོས་པར་སྙམ༌ཞིང༌།

¹⁰ཡེ་རུ་སཱ་ལེམ་དུའང་དེ་ལྟར་བྱས་མྱོང༌སྟེ། མཆོད་དཔོན་ཆེན་པོ་རྣམས་ལས་དབང་ཆ་ཐོབ་པ་དང་དད་ལྡན་དམ་པ་མང་པོ་བཙོན་དུ་བཅུག་ཅིང་དེ་རྣམས་དམར་གསོད་བྱེད་པ་ལའང་ཡིད་འཐད་བྱུང་བ༌ཡིན།

¹¹ངས་ཆོས་ཁང་སོ་སོ་ནས་ཐེངས་མང་པོར་ལུས་ཆད་བཅད་པ་དང་བཙན་ཤེད་ཀྱིས་དེ་རྣམས་ལ་གཙོ་བོ་ཡེ་ཤུར་སྐུར་འདེབས་ཀྱི་གཏམ་སྨྲ་བར་བསྐུལ་བ༌དང༌། ཡང་དད་ལྡན་དམ་པ་དེ་རྣམས་ལ་ཞེ་སྡང་གིས་སྤྱོས་ཤིང་ཕྱི་ཕྱོགས་ཀྱི་གྲོང་ཁྱེར་དག་ལ་དེད་ནས་སོང་མྱོང༌ངོ་།།

¹²སྐབས༌དེར། ངས་མཆོད་དཔོན་ཆེན་པོ་རྣམས་ཀྱི་དབང་ཆ་དང་བཀའ་དང་དུ་བླངས་ཏེ་དཱ་མེ་སེག་ཏུ་སོང་བ༌ཡིན།

¹³རྒྱལ་པོ་ལགས། ལམ་དུ་ཆས་པའི་ཉིན་གུང་གི་དུས༌སུ། ངས་ནམ་མཁའི་ཞིང་ཁམས་ནས་ཉི་མ་ལས་ཀྱང་ཤིན་ཏུ་གསལ་བའི་འོད་ཅིག་འཕྲོས་པ་མཐོང༌ཞིང༌། འོད་དེ་ང་དང་ངའི་ལམ་གྲོགས་རྣམས་ཀྱི་ཕྱོགས་བཞིར་ཤར་ཏོ།།

¹⁴དེ་མ་ཐག་ངེད་རྣམས་ས་རུ་འགྱེལ་བ་དང་ཨིབ་རིའི་མི་རིགས་ཀྱི་སྐད་ཀྱིས་བདག་ལ་འདི་སྐད༌དུ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན༌ནམ། དབྱུག་པ་ལ་རྡོག་ཐོས་བརྒྱབ་ན་ཁྱོད་ཀྱིས་དཀའ་ཞེས་པའི་སྐད་སྒྲ་ཞིག་གྲགས་པ་ཐོས༌བྱུང་ངོ༌།།

¹⁵དེ་ནས་ངས་གཙོ་བོ༌ལགས། ཁྱེད་རང་སུ་ཡིན་ནམ་ཞེས་ཞུས་པ༌ན། གཙོ་བོས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ཡེ་ཤུ་ཡིན།

¹⁶ཁྱོད་ཡར་ལངས་ནས་སྡོད༌ཅིག ང་རང་ཆེད་དུ་ཁྱོད་ལ་མངོན་པར་བྱེད༌དེ། ཁྱོད་ཀྱིས་བདག་ལ་ཞབས་ཕྱི་བྱེད་པ༌དང༌། ཁྱོད་ཀྱིས་མཐོང་བའི་དོན་འདི་དག༌དང༌། ངས་རྗེས་སུ་ཁྱོད་ལ་སྟོན་པར་འགྱུར་བའི་དོན་ཐམས་ཅད་ལ་བདེན་དཔང་བྱེད་པར་བསྐོ་བའི་ཕྱིར༌ཡིན།

¹⁷ཡང་ངས་ཁྱོད་རང་ཡ་ཧུ་དཱ་པ་དང་ཕྱི་ཕྱོགས་པ་རྣམས་ཀྱི་ལག་ནས་སྐྱོབ་ཅིང༌། ད་ལྟ་མི་དེ་རྣམས་ཀྱི་གམ་དུ་མངག་པར་བྱ༌སྟེ།

¹⁸ཁྱོད་ཀྱིས་མི་དེ་རྣམས་ཀྱི་མིག་འབྱེད་པའི་ཕྱིར༌རོ།། དེ་ནས་དེ་རྣམས་མུན་པ་ལས་འོད་སྣང་གི་ཕྱོགས་སུ་འཁོར་བ༌དང༌། བདུད་སཱ་ཏན་གྱི་དབང་འོག་ནས་དཀོན་མཆོག་གི་ཕྱོགས་སུ་བསྒྱུར་བ༌དང༌། སྡིག་པ་བསལ་བ༌དང༌། བདག་ལ་དད་པའི་སྒོ་ནས་དམ་པར་གྱུར་པའི་མི་རྣམས་དང་ལྷན་དུ་བགོ་སྐལ་འཐོབ་པར་འགྱུར་ཞེས་གསུངས་མྱོང་ངོ་།།

¹⁹རྒྱལ་པོ་ཨག་རི་པཱ༌ལགས། དེའི་ཕྱིར་ང་རང་ནམ་མཁའི་ཞིང་ཁམས་ལས་གནང་བའི་ཞལ་གཟིགས་དེ་དང་འགལ་མ་མྱོང༌།

²⁰ངས་ཐོག་མར་དཱ་མེ་སེག་དང༌། ཕྱིས་སུ་ཡེ་རུ་སཱ་ལེམ༌དང༌། ཡ་ཧུ་དཱའི་ཡུལ་ཐམས་ཅད༌དང༌། གཞན་ཡང་ཕྱི་ཕྱོགས་པ་རྣམས་ལ་ཆོས་བསྒྲགས༌ཏེ། དེ་རྣམས་ཀྱིས་འགྱོད་བཤགས་བྱེད་དགོས་པ་དང་རང་སེམས་དཀོན་མཆོག་གི་ཕྱོགས་སུ་འཁོར་བ༌དང༌། འགྱོད་བཤགས་ཀྱི་སེམས་དང་མཐུན་པའི་ལས་བྱེད་པར་བསྐུལ་ལོ།།

²¹དེའི༌ཕྱིར། ཡ་ཧུ་དཱ་པ་རྣམས་ཀྱིས་ང་རང་མཆོད་ཁང་གི་ནང་དུ་སྡོད་དུས་བཟུང་ཞིང་གསོད་པར་བརྩམས་མོད།

²²འོན༌ཀྱང༌། དཀོན་མཆོག་གིས་ང་རང་སྐྱབས་སུ་བཟུང་བས་དེ་རིང་གི་བར་དུ་བདག་ནི་གསོན་པོར་བསྡད་ཡོད་པ་དང་མི་མཐོ་དམན་རྒན་གཞོན་ཀུན་ལ་བདེན་དཔང་བྱེད་པ༌ཡིན། ངས་ལུང་སྟོན་པ་རྣམས་དང་མོ་ཤེ་ཡིས་གསུངས་པ་ལྟར་རྗེས་སུ་འབྱུང་ངེས་པའི་དོན་དེ་ཁོ་ན་སྨྲས་པ་ཡིན༌ལ།

²³དེ་ནི་སྐྱབས་མགོན་མཱ་ཤི་ཀས་སྡུག་བསྔལ་མྱང་དགོས་པ་དང་ཁོང་ནི་གྲོངས་པ་ནས་སླར་གསོན་པའི་ཐོག་མའང་ཡིན༌ཏེ། འོད་ཟེར་དང་ལྡན་པའི་བཀའ་དེ་ཡ་ཧུ་དཱ་པ་དང་ཕྱི་ཕྱོགས་པ་རྣམས་ལ་སྒྲོག་པར་འགྱུར་བ་དེ་ཡིན་ཞེས་གསུངས༌སོ།།

²⁴དེ་ནས་ཕོལ་ལོལ་གྱིས་དེ་ལྟར་དག་འབུད་བྱས་པ༌ལ། ཕེ་ཏིས་སྐད་ཆེན༌པོས། ཕོལ་ལོལ་ཁྱོད་རང་སྨྱོས་པ་མིན༌ནམ། ཁྱོད་ལ་ཡོན་ཏན་མང་དྲགས་པས་ཁྱོད་རང་སྨྱོས་པ་རེད་ཅེས་སྨྲས་པ༌དང༌།

²⁵ཡང་ཕོལ་ལོལ་གྱིས་འདི་སྐད༌དུ། གུས་པར་འོས་པའི་སྤྱི་དཔོན་ཕེ་ཏི༌ལགས། ང་རང་སྨྱོས་པ་མིན༌ཏེ། ངས་བདེན་གཏམ་གསལ་པོར་སྨྲས་པ་ཡིན།

²⁶རྒྱལ་པོ་ཁོང་གིས་ཀྱང་དོན་འདི་དག་རྟོགས་པས་ངས་སྙིང་སྟོབས་བསྐྱེད་ནས་འཛེམ་བག་མེད་པར་ཁོང་ལ་ཞུས་པ༌ཡིན། དོན་འདི་ཐམས་ཅད་ལྐོག་ཏུ་བསྒྲུབས་པ་མ་ཡིན་པས་རྒྱལ་པོ་ཁོང་ལ་སྦ་གསང་བྱས་པ་གཅིག་ཀྱང་མེད་པར་ང་རང་ཡིད་ཆེས༌ཟབ་མོ་ཡོད།

²⁷རྒྱལ་པོ་ཨག་རི་པཱ༌ལགས། ཁྱེད་རང་ལུང་སྟོན་པ་རྣམས་ལ་ཡིད་ཆེས༌སམ། ཁྱེད་རང་ཡིད་ཆེས་པ་བདག་གིས་ཤེས་ཞེས་གསུངས༌སོ།།

²⁸ཡང་ཨག་རི་པཱ་ན༌རེ། ཁྱོད་ཀྱིས་དུས་ཐུང་ངུ་ལ་བསྐུལ་བ་ཙམ་གྱིས་ང་རང་མཱ་ཤི་ཀ་པ་ཞིག་ཏུ་འགྱུར་འདོད་དམ་ཞེས་སྨྲས་པ༌ལ།

²⁹ཡང་ཕོལ་ལོལ་གྱིས་འདི་སྐད༌དུ། དུས་རིང་ཐུང་ཅི་ཙམ་ལ་བསྐུལ་ནའང་བདག་གིས་དཀོན་མཆོག་ལ་གསོལ་བ་འདེབས་པ་ནི་ཁྱེད་ཁོ་ནའི་ཆེད་དུ་མ་ཡིན༌པར། དེ་རིང་བདག་གི་གཏམ་ལ་ཉན་པ་ཐམས་ཅད་ཀྱི་ཆེད་དུ་ཡིན༌ཏེ། ཁྱོད་རྣམས་ལ་བདག་ལྟར་དུ་ལྕགས་སྒྲོག་མི་རྒྱག་པ་ལས་གཞན། བདག་དང་འདྲ་བར་འགྱུར་ངེས་ཡིན་ཞེས་གསུངས༌སོ།།

³⁰དེ་ནས་ས་གནས་རྒྱལ་པོ་དང་སྤྱི་དཔོན། གཞན་ཡང་པུར་ནེ་ཀེ་དང་མཉམ་དུ་སྡོད་པའི་མི་ཐམས་ཅད་ཡར་ལངས༌ཏེ།

³¹ཟུར་དུ་བུད་ནས་ཕན་ཚུན་ལ་ན༌རེ། མི་འདིས་བཙོན་དུ་སྦྱོར་བ་དང་གསོད་དགོས་པའི་ཉེས་པ་གང་ཡང་བྱས་མེད་ཅེས་སྨྲས་སོ།།

³²དེ་ནས་ཨག་རི་པཱ་བྱ་བས་ཕེ་ཏི་ལ་འདི་ལྟར༌སྨྲས་པ། གལ་ཏེ་མི་འདིས་སེ་བཟིར་ལ་གཏུག་བཤེར་མ་ཞུས་ན་བཙོན་གྲོལ་བཏང་ཆོག་ཅེས་པའོ།།