Read དམ་པའི་གསུང་རབ་བོད་འགྱུར་གསར་མ།-New Tibetan Bible རོ་མཱ་པ། 13 Bible Online

རོ་མཱ་པ། 13 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

རོ་མཱ་པ། 13

¹མི་ཀུན་གྱིས་མངའ་བདག་གི་བཀའ་བརྩི་དགོས༌ཏེ། དབང་ཆ་གང་ཞིག་ཡིན་ཡང་དཀོན་མཆོག་ལས་མ་བྱུང་བ་མེད༌ལ། མངའ་བདག་ཐམས་ཅད་ནི་དཀོན་མཆོག་གིས་བསྐོས་པའི་ཕྱིར༌ཡིན།

²དེའི༌ཕྱིར། སུ་ཞིག་གིས་མངའ་བདག་ལ་ངོ་རྒོལ་བྱེད༌ན། དེས་དཀོན་མཆོག་གི་ཁྲིམས་ལ་ངོ་རྒོལ་བྱེད་པ་ཡིན༌ལ། རང་གིས་རང་ལ་ཉེས་ཆད་སློང་བའང་ཡིན་ནོ།།

³སྤྱིར་ལས་ངན་པ་བྱེད་མཁན་མ༌གཏོགས། ལས་བཟང་པོ་བྱེད་མཁན་ནི་དཔོན་རིགས་ལ་འཇིགས་མི་དགོས། ཁྱོད་རང་མངའ་བདག་ལ་འཇིགས་མི་འདོད༌དམ། ཁྱོད་ཀྱིས་ལས་བཟང་པོ་བྱས༌ན། ཁོང་གིས་ཁྱོད་ལ་གཟེངས་བསྟོད་བྱེད་པར་འགྱུར་རོ།།

⁴ཅིའི་ཕྱིར་ཞེ་ན། དཔོན་རིགས་དེ་ནི་དཀོན་མཆོག་གི་ཞབས་ཕྱི་པ་ཡིན་ཞིང་ཁྱོད་ལ་ཕན་ཐོགས་པ༌དང༌། ཁྱོད་ཀྱིས་ལས་ངན་པ་བྱེད་ན་འཇིགས་འོས༌ཏེ། ཁོང་ནི་དོན་མེད་དུ་རལ་གྲི་འདོགས་མཁན་མ་ཡིན༌པར། དེ་ནི་དཀོན་མཆོག་གི་ཞབས་ཕྱི་པ༌དང༌། གནོད་ལན་གནོད་འཇལ་བྱེད་མཁན་ཏེ་ལས་ངན་པ་བྱེད་མཁན་ལ་ཉེས་ཆད་གཅོད་མཁན་བཅས་ཡིན་པའི་ཕྱིར༌རོ།།

⁵དེའི༌ཕྱིར། ཁྱོད་ཀྱིས་ངེས་པར་དཔོན་རིགས་ཀྱི་བཀའ་བརྩི་དགོས༌ཤིང༌། དེ་ནི་ཉེས་ཆད་ཁོ་ནའི་ཆེད་དུ་མ་ཡིན༌པར། སེམས་ཀྱི་ཆེད་དུའང་ཡིན།

⁶ཁྱོད་ཅག་གིས་མངའ་བདག་ལ་ཁྲལ་འཇལ་བའང་འདིའི་རྐྱེན་ཡིན༌ཏེ། ཁོང་རྣམས་ནི་དཀོན་མཆོག་གི་ཞབས་ཕྱི་པ་ཡིན་པས་རྟག་པར་ཆེད་དུ་དོན་དེ་གཉེར༌བ་ཡིན།

⁷མི་སུ་ཞིག་ལ་ཐོབ་འོས་ན་འབུལ་བ༌དང༌། ཁྲལ་ཐོབ་འོས་ན་ཁྲལ་འཇལ་བ༌དང༌། ཚོང་ཁྲལ་ཐོབ་འོས་ན་ཚོང་ཁྲལ་འཇལ་བ༌དང༌། འཇིགས་འོས་ན་འཇིགས་པ༌དང༌། བཀུར་འོས་ན་བཀུར་བར༌བྱའོ།།

⁸སྤྱིར་ཕན་ཚུན་གཅེས་སུ་འཛིན་པ་ལས༌གཞན། དོན་གང་གི་ཆ་ནས་ཀྱང་མི་གཞན་ལ་བུ་ལོན་ཆད་མི་རུང༌། རྒྱུ་མཚན་ནི་མི་གཞན་ལ་བྱམས་ཤིང་གཅེས་མཁན་གྱིས་བཀའ་ཁྲིམས་བསྒྲུབས་པའི་ཕྱིར༌རོ།།

⁹དེ་ནི་ཇི་སྐད༌དུ། ལོག་གཡེམ་མ༌བྱེད། མི་མ་གསོད། རྐུ་མ༌བྱེད། འདོད་ཧམ་མ་བཅང་ཞེས་གསུངས༌པ་དང་། ཡང་ན་བཀའ་ཁྲིམས་གཞན་གང་ཡོད་པ་ཐམས་ཅད༌ནི། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་པའི་བཀའ་འདིའི་ནང་དུ་འདུས༌ཡོད།

¹⁰བྱམས་པས་ཁྱིམ་མཚེས་ལ་གནོད་པ་མི་བྱེད༌པས། བྱམས་པས་བཀའ་ཁྲིམས་འགྲུབ་པར་བྱས༌སོ།།

¹¹གཞན༌ཡང༌། ཁྱོད་ཅག་གིས་ད་ནི་སྔ་མོ་ནས་གཉིད་ལས་སད་འོས་པའི་དུས་ཡིན་པ་ཤེས་དགོས༌ཏེ། ད་ལྟ་ནི་ཐོག་མར་དད་པའི་དུས་ལས་བརྒལ་ནས་ཐར་པའི་དུས་དེ་ཉེ་བར་སླེབས་པས༌སོ།།

¹²མཚན་མོ་འདས་ཤིང་ཉིན་མོ་སླེབ་ལ་ཉེ༌བས། བདག་ཅག་གིས་མུན་ནག་གི་བྱ་སྤྱོད་སྤངས་ནས་འོད་ཟེར་གྱི་གོ་མཚོན་སྤྲ་དགོས།

¹³ཉིན་མོར་བགྲོད་པ་བཞིན་སྤྱོད་ལམ་དྲང་པོ་ཡིན་དགོས་ལ། བག་མེད་དང་ར༌བཟི། གཡེམ་སྦྱོར་དང་འདོད་ཆགས། རྩོད་གླེང་དང་ཕྲག་དོག་བཅས་མི་བྱེད༌པར།

¹⁴གཙོ་བོ་ཡེ་ཤུ་མཱ་ཤི་ཀ་ནི་གོས་བཞིན་དུ་ལུས་ལ་གྱོན༌ཏེ། ཤ་གཟུགས་ཀྱི་ཕུང་བོའི་འདོད་པ་ཚིམ་པར་བྱེད་པའི་བསམ་པ་སྤོངས་ཤིག།།