Read དམ་པའི་གསུང་རབ་བོད་འགྱུར་གསར་མ།-New Tibetan Bible ཀོ་རིན་ཐུ་པ་དང་པོ། 5 Bible Online

ཀོ་རིན་ཐུ་པ་དང་པོ། 5 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཀོ་རིན་ཐུ་པ་དང་པོ། 5

¹དེ་ཡང་གོ་ཐོས༌ལྟར་ན་ཁྱོད་ཅག་གི་ཁྲོད་དུ་ལོག་གཡེམ་བྱེད་པའི་དོན་བྱུང་ཡོད་ལ། ལོག་གཡེམ་གྱི་སྤྱོད་པ་དེ་ལྟ་བུ་ནི་ཕྱི་ཕྱོགས་པའི་ཁྲོད་དུའང་མེད་དེ། ཁྱོད་ཅག་གི་ཁྲོད་ནས་མི་ཞིག་གིས་རང་གི་མ་གཡར་ལ་ལུས་འབྲེལ་བྱེད་བཞིན་འདུག་པའོ།།

²ཁྱོད་ཅག་གིས་ད་དུང་རང་རློམ་བྱེད་པ་ལས་འགྱོད་གདུང་བྱས་ནས། དེ་ལྟར་བྱེད་མཁན་ནི་ཁྱོད་ཅག་གི་ཁྲོད་ནས་ཕྱིར་སྐྲོད༌དགོས་པ་མ་ཡིན་ནམ།

³བདག་གི་ལུས་པོ་ཁྱོད་ཅག་དང་མཉམ་དུ་མེད༌ནའང༌། བདག་གི་སེམས་ཁྱོད་རྣམས་དང་ལྷན་དུ་ཡོད༌དེ། བདག་ནི་དངོས་སུ་ཁྱོད་ཅག་དང་མཉམ་དུ་ཡོད་པ༌བཞིན། དེ་ལྟར་བྱེད་མཁན་ལ་ཐག་བཅད༌པ་ཡིན།

⁴ཁྱོད་རྣམས་འཚོགས་པའི་དུས༌སུ། བདག་གི་སེམས་ནི་ཁྱོད་ཅག་དང་མཉམ་དུ་མཆིས༌ཤིང༌། བདག་ཅག་གི་གཙོ་བོ་ཡེ་ཤུའི་མཚན་དང་ཁོང་གི་མཐུ་སྟོབས་ལ་བརྟེན༌ནས།

⁵མི་དེ་ལྟ་བུ་ནི་བདུད་སཱ་ཏན་ལ་སྤྲད༌དེ། གཙོ་བོའི་ཉིན་མོར་ཁོའི་རྣམ་ཤེས་ལ་ཐར་པ་འཐོབ་པའི་ཕྱིར། ཁོའི་ལུས་ཕུང་ཉམས་དམས་སུ་གཏོང་བར་བྱའོ།།

⁶ཁྱོད་ཅག་གིས་རང་རློམ་བྱེད་པ་ནི་མི་ལེགས༌ཏེ། སྐྱུར་རྩི་ཉུང་ཙམ་གྱིས་བག་ཕྱེ་ཚང་མ་སྐྱུར་ལང་དུ་འཇུག་པ་དེ་ཁྱོད་ཅག་གིས་མི་ཤེས༌སམ།

⁷ཁྱོད་ཅག་ནི་སྐྱུར་རྩི་མེད་པའི་བག་ཕྱེ་གསར་པ་ཞིག་ཏུ་འགྱུར་བའི༌ཕྱིར། སྐྱུར་རྩི་རྙིང་བ་དེ་རྩ་བ་ནས་དོར༌ཞིག དོན་དམ་དུ་ཁྱོད་ཅག་ནི་སྐྱུར་རྩི་མེད་པའི་བག་ཕྱེ་ཡིན་ནོ།། ཅིའི་ཕྱིར་ཞེ་ན། བདག་ཅག་གི་པེ་སག་དུས་ཆེན་གྱི་མཆོད་པའི་ལུ་གུ༌སྟེ། སྐྱབས་མགོན་མཱ་ཤི་ཀ་ནི་མཆོད་པར་ཕུལ་ཟིན་པའི་ཕྱིར༌རོ།།

⁸དེ་བས་བདག་ཅག་དུས་ཆེན་དེ་ལ་རོལ་བ༌ན། སྐྱུར་རྩི་རྙིང་བ་དང་། ངན་སེམས་དང་གདུག་རྩུབ་ཀྱི་སྐྱུར་རྩི་མི་བཀོལ༌བར། ལྷག་བསམ་དང་བདེན་པ་ཡིན་པའི་སྐྱུར་མེད་བག་ལེབ་བཀོལ་ནས་རོལ་དགོས༌སོ།།

⁹དེ་སྔོན་བདག་གིས་ཁྱོད་ཅག་ལ་ལོག་གཡེམ་བྱེད་པའི་མི་དང་འགྲོག་པར་མི་བྱའོ་ཞེས་རང་གི་འཕྲིན་ཡིག་ནང་དུ་བྲིས་མྱོང༌ལ།

¹⁰གཏམ་དེ་ནི་འཇིག་རྟེན་འདི་ན་ལོག་གཡེམ་བྱེད་པའི་མི༌དང༌། འདོད་རྔམ༌ཅན། མགོ་སྐོར་གཏོང༌མཁན། ཡང་ན་སྐུ་འདྲར་བརྟེན་མཁན་བཅས་ལ་འགྲོག་མི་རུང་ཞེས་པའི་དོན་མིན༌ཏེ། དེ་ལྟར་བྱས༌ན། ཁྱོད་ཅག་ནི་འཇིག་རྟེན་འདི་དང་ཁ་འབྲལ་དགོས་པ་ཡིན་ནོ།།

¹¹འོན༌ཀྱང༌། ད་ལྟ་ངས་ཁྱོད་ཅག་ལ་འཕྲིན་ཡིག་བྲིས༌ཏེ། དད་ལྡན་སྤུན་ཟླའི་མིང་ཐོགས་པ་ཞིག་གིས་ལོག་གཡེམ་བྱེད་པ༌དང༌། འདོད་རྔམ་བཅངས༌པ། ཡང་ན་སྐུ་འདྲར་བརྟེན་པ། ཚིག་ངན་སྨྲ༌བ། ཆང་གིས་ར་རོར་གྱུར༌པ། མགོ་སྐོར་གཏོང་བ་བཅས་བྱེད༌ན། མི་དེ་ལྟ་བུ་དང་འགྲོག་པར་མི་བྱ༌ཞིང༌། མི་དེ་དང་མཉམ་དུ་ཁ་ཟས་ཀྱང་ཟ་མི་འོས་ཞེས་སྨྲས༌པའོ།།

¹²ཅིའི་ཕྱིར་ཞེ་ན། ཆོས་ཚོགས་ཕྱི་རོལ་གྱི་མི་རྣམས་ལ་ཁྲིམས་ཐག་གཅོད་པ་ནི་བདག་དང་འབྲེལ་བ་མེད༌ལ། ཆོས་ཚོགས་ནང་གི་མི་རྣམས་ལ་ཁྱོད་ཅག་གིས་ཁྲིམས་ཐག་གཅོད་དགོས་པ་མ་ཡིན་ནམ།

¹³འོན༌ཀྱང༌། དཀོན་མཆོག་གིས་ཆོས་ཚོགས་ཕྱི་རོལ་གྱི་མི་རྣམས་ལ་ཁྲིམས་ཐག་གཅོད་པར་འགྱུར། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁྱོད་རྣམས་ཀྱིས་སྡིག་ཅན་དེ་ཁྱོད་ཅག་གི་ཁྲོད་ནས་ཕྱིར་སྐྲོད་ཅིག་ཅེས་གསུངས་པ་བཞིན༌ནོ།།