Read དམ་པའི་གསུང་རབ་བོད་འགྱུར་གསར་མ།-New Tibetan Bible ཀོ་རིན་ཐུ་པ་གཉིས་པ། 2 Bible Online

ཀོ་རིན་ཐུ་པ་གཉིས་པ། 2 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཀོ་རིན་ཐུ་པ་གཉིས་པ། 2

¹བདག་གིས་སེམས་ཐག་བཅད་རྗེས། ཕྱིས་སུ་སླར་ཡང་སྐྱོ་སྡུག་ངང་ཁྱོད་ཅག་གི་གམ་དུ་མི་ཡོང་ངོ་།།

²གལ༌ཏེ། བདག་གིས་ཁྱོད་ཅག་ལ་སེམས་སྐྱོ་བར་བྱེད༌ན། བདག་གིས་གང་ཞིག་ལ་སེམས་སྐྱོ་བར་བྱེད་པ་དེ་ལས་གཞན། སུ་ཞིག་གིས་བདག་ལ་དགའ་ཞིང་སྤྲོ་བར་བྱེད་ནུས༌སམ།

³ང་རང་སླེབ་པའི་དུས༌སུ། ང་རང་དགའ་བར་བྱེད་འོས་པ་རྣམས་ཀྱིས་བདག་གི་སེམས་སྐྱོ་བར་མི་བྱེད་པའི༌ཕྱིར། བདག་གིས་སྔོན་ཆད་དོན་འདི་ཁྱོད་རྣམས་ལ་འཕྲིན་ཡིག་ཏུ་བྲིས༌པ་ཡིན། ང་རང་དགའ་ཞིང་སྤྲོ་བ་ལ་བརྟེན་ནས་ཁྱོད་རྣམས་ཀྱང་དགའ་ཞིང་སྤྲོ་བར་འགྱུར་བ་བདག་ལ་ཡིད་ཆེས་བརྟན་པོ་ཡོད།

⁴དེ་སྔར་བདག་གི་སེམས་སྡུག་ཆེན་པོ་དང་སྐྱོ་བའི་ངང་ནས་མཆི་མ་མང་པོ་བཞུར་གྱིན་ཁྱོད་རྣམས་ལ་འཕྲིན་ཡིག་བྲིས༌ཤིང༌། དེ་ནི་ཁྱོད་ཅག་གི་སེམས་སྐྱོ་རུ་འཇུག་པའི་ཕྱིར་མ་ཡིན༌པར། བདག་གིས་ཁྱོད་ཅག་ལ་ཤིན་ཏུ་གཅེས་པ་ནི་ཁྱོད་ཅག་ལ་ཤེས་སུ་འཇུག་པའི་ཕྱིར༌ཡིན་ནོ།།

⁵སུ་ཞིག་གིས་མི་སེམས་སྐྱོ་བར་བྱེད༌ན། མི་དེ་ཡིས་བདག་སེམས་སྐྱོ་བར་བྱས་པར་མ་ཟད། ཁྱོད་ཅག་ཐམས་ཅད་ལའང་སེམས་ཅུང་ཙམ་སྐྱོ་རུ་འཇུག༌པ་ཡིན། བདག་གིས་དེ་ལྟར་སྨྲས་པ་ཕལ་ཆེར་འུད་ཆེ་ཡང་སྲིད༌མོད།

⁶འོན་ཀྱང་མི་དེ་ལྟ་བུར་མི་མང་ཤས་ཀྱི་ཆད་པ་འཕོག་པས་ཆོག་ལ།

⁷ཁོ་རང་སྐྱོ་སྡུག་ཆེན་པོས་མནར་ཅིང་ཡོངས་སུ་མི་ཕམ་པའི༌ཕྱིར། དེ་ལས་ལྡོག་པར་ཁོ་ལ་གུ་ཡངས་གཏོང་བ་དང་སེམས་གསོ་བྱ་འོས་སོ།།

⁸དེའི༌ཕྱིར། ཁྱོད་རྣམས་ཀྱིས་ཁོ་ལ་ཡང་བསྐྱར་བྱམས་པ་གནང་བར་བྱའོ་ཞེས་བདག་གིས་བསྐུལ༌བ་ཡིན།

⁹བདག་གིས་དེ་སྔར་ཁྱོད་རྣམས་ལ་འཕྲིན་ཡིག་འབྲི་དོན་ནི་ཁྱོད་རྣམས་ཀྱིས་དོན་ཀུན་ནས་བདག་དང་བསྟུན་མིན་ལ་བརྟགས༌པ་ཡིན།

¹⁰ཁྱོད་རྣམས་ཀྱིས་མི་སུ་ཞིག་ལ་གུ་ཡངས་བཏང་ན། བདག་གིས་ཀྱང་དེ་ལྟར་གུ་ཡངས་གཏོང༌བ་དང་། བདག་གིས་དོན་གང་ཞིག་ལ་གུ་ཡངས་བཏང་བ་ཡིན༌ན། དེ་ནི་སྐྱབས་མགོན་མཱ་ཤི་ཀའི་སྤྱན་དྲུང་ནས་ཁྱོད་རྣམས་ཀྱི་ཆེད་དུ་གུ་ཡངས་བཏང་བ་ཡིན༌ཏེ།

¹¹བདུད་སཱ་ཏན་གྱིས་གླགས་བཙལ་ནས་བདག་ཅག་ལས་མི་རྒྱལ་བའི་ཕྱིར་དེ་ལྟར་བྱ་དགོས་སོ།། རྒྱུ་མཚན་ནི་བདག་ཅག་གིས་བདུད་ཀྱི་གཡོ་ཐབས་མི་ཤེས་པ་མ་ཡིན་པའི་ཕྱིར༌རོ།།

¹²སྔོན་ཆད་བདག་ནི་སྐྱབས་མགོན་མཱ་ཤི་ཀའི་འཕྲིན་བཟང་སྒྲོག་པའི་དོན་དུ་ཏྲོ་ཡཱ་རུ་སོང་བ་ན། གཙོ་བོས་ཀྱང་བདག་ལ་སྒོ༌ཕྱེ་བྱུང་།

¹³དུས༌དེར། བདག་གི་སྤུན་ཟླ་ཐེ་ཏུ་དང་མ་འཕྲད་པས། ངའི་སེམས་མ་བདེ་བར་ཡུལ་དེའི་མི་རྣམས་དང་ཁ་བྲལ་ནས་མ་ཀེ་དོན་ཡཱ་ཡུལ་དུ་སོང༌ངོ༌།།

¹⁴དཀོན་མཆོག་གིས་རྟག་ཏུ་སྐྱབས་མགོན་མཱ་ཤི་ཀའི་ནང་དུ་བདག་ཅག་ཁྲིད་དེ་རྣམ་པར་རྒྱལ་བར་མཛད་པ༌དང༌། བདག་ཅག་བརྒྱུད་ནས་ཡུལ་ཀུན་ཏུ་སྐྱབས་མགོན་མཱ་ཤི་ཀ་ངོ་ཤེས་པའི་དྲི་བཟང་ཁྱབ་པར་མཛད་པས་ཁོང་ལ་ཐུགས་རྗེ་ཆེ༌ཞུའོ།།

¹⁵བདག་ཅག་ནི་དཀོན་མཆོག་གི་སྤྱན་དྲུང༌དུ། ཐར་པ་འཐོབ་བཞིན་པ་དང་འཇིག་བཞིན་པའི་མི་རྣམས་ལ་སྐྱབས་མགོན་མཱ་ཤི་ཀའི་དྲི་བཟང་ཡིན་ལ།

¹⁶མི་གཅིག་ལ་འཆི་རུ་འཇུག་པའི་དྲི་མ༌དང༌། མི་གཞན་ལ་གསོན་དུ་འཇུག་པའི་དྲི་མའང་ཡིན། སུ་ཞིག་གིས་དོན་དེ་ལྟ་བུ་སྒྲུབ་ནུས༌སམ་ཞེ་ན་མི་ནུས་སོ།།

¹⁷ངེད་ཅག་ནི་ཁེ་ཕན་གྱི་དོན་དུ་དཀོན་མཆོག་གི་བཀའ་ལ་ལྷད་འཇུག་མཁན་གྱི་མི་མང་པོ་དང་མི་འདྲ༌སྟེ། ངེད་ཅག་ནི་གཤིས་རྒྱུད་དྲང་ཞིང་དཀོན་མཆོག་ནས་ཡོང་བ༌དང༌། དཀོན་མཆོག་གི་སྤྱན་དྲུང་དུ་སྐྱབས་མགོན་མཱ་ཤི་ཀར་བརྟེན་ནས་བཀའ་སྒྲོག་མཁན་ཡིན༌ནོ།།