Read དམ་པའི་གསུང་རབ་བོད་འགྱུར་གསར་མ།-New Tibetan Bible ག་ལད་ཡཱ་པ། 2 Bible Online

ག་ལད་ཡཱ་པ། 2 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ག་ལད་ཡཱ་པ། 2

¹དེ་ནས་ལོ་བཅུ་བཞི་འགོར༌རྗེས། བདག་དང་པཱར་ན་པཱ་གཉིས་ཀྱིས་ཐེ་ཏུ་ཁྲིད་ནས་སླར་ཡང་ཡར་ཡེ་རུ་སཱ་ལེམ་དུ་སོང༌ངོ་༎

²ང་རང་ནི་མངོན་པར་མཛད་པ་བཞིན་སོང༌སྟེ། ཕྱི་ཕྱོགས་པ་རྣམས་ལ་སྒྲོག་བཞིན་པའི་འཕྲིན་བཟང་དེ་སྤུན་ཟླ་རྣམས་ལ་སྨྲས་པ༌དང༌། རང་གིས་འདས་དང་ད་ལྟར་ཅི་བྱས་པ་ཐམས་ཅད་དོན་མེད་དུ་མི་འགྱུར་བའི༌ཕྱིར། ཆོས་དཔོན་གྲགས་ཆེན་རྣམས་ལའང་ཟུར་དུ་སྨྲས༌པའོ།།

³འོན༌ཀྱང༌། བདག་དང་མཉམ་དུ་འགྲོ་བའི་ཐེ་ཏུ་ནི་གྷི་རིག་པ་ཡིན༌ཡང༌། ཁོ་རང་ལ་བཙན་གྱིས་མཚན་སྐྱི་གཅོད་དུ་མ་བཅུག

⁴དེ་ནི་སྤུན་ཟླ་རྫུས་མ་འགའ་ཞིག་ལྐོག་འཛུལ་གྱིས་ཡོང་ནས་བདག་ཅག་བྲན་གཡོག་ཏུ་སྒྱུར་བའི༌ཆེད་དུ། མཱ་ཤི་ཀ་ཡེ་ཤུའི་ནང་གི་ང་ཚོའི་རང་དབང་ལ་ལྐོག་ལྟ་བྱས༌པའི་ཕྱིར་ཡིན།

⁵འཕྲིན་བཟང་གི་བདེན་པ་ཉིད་དེ་ཁྱོད་རྣམས་ཀྱི་ཁྲོད་དུ་སྔར་བཞིན་གནས་པའི༌ཕྱིར། ངེད་ཅག་གིས་ཡུད་ཙམ་ལའང་དེ་དག་གི་གཏམ་ལ་མ་བསྟུན་མོད།

⁶འོན་ཀྱང་མི་གྲགས་ཆེན་དེ་དག་ནི་མི་ཅི་ལྟ་བུ་ཞིག་ཡིན་ཡང་བདག་ལ་འབྲེལ་བ་མེད༌དེ། དཀོན་མཆོག་ལ་ཕྱོགས་རིས་མེད་ཅིང་། མི་གྲགས་ཆེན་དེ་རྣམས་ཀྱིས་ཀྱང་ང་ལ་ཁ་སྣོན་ཅི་ཡང་མ་བརྒྱབ༌པར།

⁷དཀོན་མཆོག་གིས་སྐུ་ཚབ་པ་པེ་ཏྲོ་ཁོང་ཉིད་མཚན་སྐྱི་བཅད་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་བ༌ལྟར། ང་རང་ཡང་ཕྱི་ཕྱོགས་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་ཡོད་པ་ཁོ་རྣམས་ཀྱིས་ཤེས་སོ།།

⁸ཅིའི་ཕྱིར་ཞེ་ན། མཚན་སྐྱི་བཅད་པ་རྣམས་ལ་སྐུ་ཚབ་པའི་ལས་སྒྲུབ་པར་པེ་ཏྲོ་ཁོང་ཉིད་ལ་སྐུལ་སློང་གནང་མཁན་དེ་ཉིད་ཀྱིས། ཕྱི་ཕྱོགས་པ་རྣམས་ལ་སྐུ་ཚབ་པའི་ལས་སྒྲུབ་པར་ང་རང་ལའང་སྐུལ་སློང་གནང་བའི་ཕྱིར་རོ༎

⁹ང་རང་ལ་གནང་བའི་ཐུགས་རྗེ་དེ་ནི་ཆོས་དཔོན་རྣམས་ཀྱིས་ཤེས༌ཤིང༌། ཆོས་ཚོགས་ཀྱི་ཀ་བ་ཡིན་ཟེར་བའི་ཡ་ཀོབ༌དང༌། ཀེ་ཕཱ། ཡོ་ཧ་ནན་བཅས་ཀྱིས་ང་དང་པཱར་ན་པཱ་གཉིས་མཉམ་གྲོགས་ཡིན་པའི་རྟགས་སུ་ངེད་གཉིས་ལ་གཡས་ལག་གིས་ལག་འཇུ་བྱས༌ཏེ། ངེད་གཉིས་ཕྱི་ཕྱོགས་པ་རྣམས་ལ་ཆོས་སྤེལ་བ་དང་ཁོ་རྣམས་མཚན་སྐྱི་བཅད་པ་རྣམས་ལ་ཆོས་སྤེལ་དུ་འགྲོ་བར་ཐག་བཅད།

¹⁰ཁོ་རྣམས་ཀྱིས་ངེད་གཉིས་ལ་དབུལ་པོ་རྣམས་སེམས་ལ་འཛིན་དགོས་པར་བསྐུལ༌ཞིང༌། དེ་ནི་བདག་གིས་བརྩོན་སེམས་ཆེན་པོས་སྒྲུབ་འདོད་པའང་ཡིན༌ནོ།།

¹¹དོན་དེའི་རྗེས༌སུ། ཀེ་ཕཱ་ནི་ཨན་ཏི་ཡོག་ཡཱ་རུ་སླེབས་པ༌དང༌། ཁོ་རང་ལ་ནོར་འཁྲུལ་གྱི་ཆ་ཡོད་པས་བདག་གིས་ཁ་རི་ཁ་ཐུག་གིས་ཁོ་རང་ལ་འགོག་རྒོལ་བྱས་པ་ཡིན་ནོ།།

¹²རྒྱུ་མཚན་ནི་ཡ་ཀོབ་ཀྱི་ཕྱོགས་ནས་ཡོང་བའི་མི་རྣམས་མ་སླེབས་པའི་སྔོན༌ལ། ཁོས་ཕྱི་ཕྱོགས་པ་རྣམས་དང་མཉམ་དུ་ཁ་ཟས་སྤྱད་ཅིང༌། ཡང་མི་དེ་རྣམས་སླེབས་པ༌དང༌། ཁོ་རང་མཚན་སྐྱི་བཅད་པ་རྣམས་ལ་འཇིགས་ཏེ་ཕྱི་ཕྱོགས་པ་རྣམས་དང་ཁ་བྲལ་ནས་སོང་བའི་ཕྱིར༌རོ།།

¹³དེ་ནས་ཡ་ཧུ་དཱ་པ་གཞན་རྣམས་ཀྱིས་ཀྱང་ཁོ་དང་མཉམ་དུ་ཚུལ་འཆོས་བྱས་ཤིང༌། པཱར་ན་པཱ་ཡིས་ཀྱང་དེ་དག་དང་ལྷན་དུ་ཚུལ་འཆོས་བྱས་པ་ཡིན།

¹⁴འོན༌ཀྱང༌། བདག་གིས་ཁོ་རྣམས་ཀྱི་སྤྱོད་ལམ་མི་དྲང་བ་དེ་ནི་འཕྲིན་བཟང་གི་བདེན་ལུགས་དང་མི་མཐུན་པ་མཐོང༌བས། མི་ཚོགས་ཀྱི་མདུན་ནས་ཀེ་ཕཱ་ལ་འདི་ལྟར༌དུ། ཁྱོད་ནི་ཡ་ཧུ་དཱ་པ་ཞིག་ཡིན་ཡང་ཡ་ཧུ་དཱ་པའི་ཆོས་ཀྱི་ལུགས་སྲོལ་དོར་ནས་ཕྱི་ཕྱོགས་པ་ལྟར་སྤྱད་པ་སྤྱོད་ན། ད་དུང་བཙན་གྱིས་ཕྱི་ཕྱོགས་པ་རྣམས་ལ་ཡ་ཧུ་དཱ་པ་ལྟར་སྤྱད་པ་སྤྱོད་པར་བསྐུལ་བ་དེ་ཅི་ཡིན་ནམ་ཞེས་སྨྲས༌ཤིང༌།

¹⁵བདག་ཅག་ནི་སྐྱེས་མ་ཐག་ནས་ཡ་ཧུ་དཱ་པ་ཡིན་པ༌ལས། ཕྱི་ཕྱོགས་པ་སྡིག་ཅན་ལྟ་བུ་ཞིག་མིན༌ཡང༌།

¹⁶མི་རྣམ་དག་ཏུ་བརྩི་བ་ནི་བཀའ་ཁྲིམས༌ལྟར་སྒྲུབ་པའི་རྐྱེན་གྱིས་མ་ཡིན༌ཏེ། ཡེ་ཤུ་མཱ་ཤི་ཀ་ལ་དད་པ་བྱས་པའི་རྐྱེན་ཡིན་པ་ངེད་ཅག་གིས་ཤེས་པས། བདག་ཅག་ཀྱང་བཀའ་ཁྲིམས་ལྟར་སྒྲུབ་པའི་རྐྱེན་གྱིས་མ་ཡིན་པར། སྐྱབས་མགོན་མཱ་ཤི་ཀ་ལ་དད་པའི་སྒོ་ནས་མི་རྣམ་དག་ཏུ་བརྩི་བའི༌ཕྱིར། མཱ་ཤི་ཀ་ཡེ་ཤུ་ལ་དད་པ་བྱས་སོ༎ རྒྱུ་མཚན་ནི་ཤ་ཁྲག་ལྡན་པའི་མི་སུ་ཡིན་ཡང་བཀའ་ཁྲིམས་ལྟར་བསྒྲུབས་ནས་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པའི་ཕྱིར༌རོ།།

¹⁷བདག་ཅག་ནི་སྐྱབས་མགོན་མཱ་ཤི་ཀར་དད་པ་བྱས་ནས་མི་རྣམ་དག་ཏུ་བརྩི་འདོད༌ཀྱང༌། ད་དུང་བདག་ཅག་མི་སྡིག་ཅན་ཡིན་པར་བརྩིས་ན། སྐྱབས་མགོན་མཱ་ཤི་ཀས་མི་ལ་སྡིག་པ་བྱེད་དུ་འཇུག་པ་ཡིན་ནམ་ཞེ༌ན། དེ་འདྲ་གཏན་ནས་མ་ཡིན༌ཏེ།

¹⁸བདག་གིས་སྔར་ནས་བཤིགས་པ་དེ་ཡང་བསྐྱར་བརྩིགས་པ་ཡིན༌ན། དེ་ནི་ང་རང་ཉེས་པ་བྱེད་མཁན་ཡིན་པར་བདེན་དཔང་བྱས་པ་ཡིན།

¹⁹ཅིའི་ཕྱིར་ཞེ་ན། བཀའ་ཁྲིམས་བརྒྱུད་ནས་དེའི་ཕྱོགས་སུ་རང་ཉིད་ཤི་བ་སྟེ། བདག་[1]ནི་དཀོན་མཆོག་གི་ཕྱོགས་སུ་གསོན་པོར་གནས་ཐུབ་པའི་ཕྱིར༌རོ།།

²⁰བདག་ནི་སྐྱབས་མགོན་མཱ་ཤི་ཀ་དང་མཉམ་དུ་ཤིང་རྒྱ་གྲམ་གྱི་སྟེང་དུ་བརྡབས་ཟིན། ད་ལྟ་གསོན་པོར་གནས་པ་ནི་ང་རང་མིན༌ཏེ། སྐྱབས་མགོན་མཱ་ཤི་ཀ་བདག་གི་སེམས་སུ་གསོན་པོར་བཞུགས་པ་ཡིན། ད་ལྟ་བདག་གི་ལུས་ཕུང་གསོན་ཞིང་འཚོ་བཞིན་ཡོད་པ་ནི་དཀོན་མཆོག་གི་སྲས་ལ་དད་པ་བྱས་པར་བརྟེན་ནས་འཚོ་ཞིང་གཞེས་པ་ཡིན༌ལ། ཁོང་གིས་ང་རང་ལ་བྱམས་ཤིང་གཅེས་པས་བདག་གི་དོན་དུ་རང་སྲོག་ཀྱང་བློས་བཏང༌ངོ་།།

²¹དེའི༌ཕྱིར། བདག་གིས་དཀོན་མཆོག་གི་ཐུགས་རྗེ་མི་འདོར། གལ༌ཏེ། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་ཡིན༌ན། སྐྱབས་མགོན་མཱ་ཤི་ཀ་ནི་དོན་མེད་དུ་སྐུ་གྲོངས་པ་མ་ཡིན་ནམ་ཞེས་སྨྲས༌པའོ།།