Read དམ་པའི་གསུང་རབ་བོད་འགྱུར་གསར་མ།-New Tibetan Bible ཐེ་སཱ་ལོ་ནེ་ཀེ་དང་པོ། 1 Bible Online

ཐེ་སཱ་ལོ་ནེ་ཀེ་དང་པོ། 1 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཐེ་སཱ་ལོ་ནེ་ཀེ་དང་པོ། 1

¹དེ་ཡང་ཕོལ་ལོལ་བདག་དང་སིལ་ཝ་ནཱ། ཐི་མོ་ཐེ་བཅས་ནས་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ནང་དུ་ཡོད་པའི་ཐེ་སཱ་ལོ་ནེ་ཀེ་པ་རྣམས་ཀྱི་ཆོས་ཚོགས་ལ་འཕྲིན་ཡིག་སྤྲིངས་པ་འདི་ལྟ༌སྟེ། ཐུགས་རྗེ་དང་ཞི་བདེ་ཁྱོད་རྣམས་ལ་གནང་བར༌སྨོན།

²ངེད་ཅག་གིས་ཁྱོད་རྣམས་ཐམས་ཅད་ཀྱི་ཆེད༌དུ། རྟག་ཏུ་དཀོན་མཆོག་ལ་བཀའ་དྲིན་ཞུས༌ཤིང༌། གསོལ་བ་འདེབས་པའི་དུས་སུའང་ཁྱོད་རྣམས་གླེང་བ༌དང༌།

³བདག་ཅག་གི་ཡབ་དཀོན་མཆོག་གི་དྲུང་དུ་ཁྱོད་རྣམས་ཀྱིས་དད་སེམས་ལ་བརྟེན་ནས་བྱས་པའི་ལས༌དང༌། བྱམས་པ་ལ་བརྟེན་ནས་མྱངས་པའི་ངལ་དུབ། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཁོང་ཉིད་ལ་རེ་སྨོན་བྱེད་པར་བརྟེན་ནས་བཅངས་པའི་བཟོད་བསྲན་བཅས་རྒྱུན་ཆད་མེད་པར་དྲན༌ཏོ།།

⁴དཀོན་མཆོག་གིས་གཅེས་སུ་འཛིན་པའི་སྤུན་ཟླ༌རྣམས། ངེད་ཅག་གིས་ཁྱོད་རྣམས་ནི་ཁོང་གིས་བདམས་པ་ཡིན་པ་ཤེས་སོ།།

⁵རྒྱུ་མཚན་ནི་དེ་སྔར་ངེད་རྣམས་ཀྱིས་ཁྱོད་ཅག་ལ་འཕྲིན་བཟང་བསྒྲགས་པ་ནི་གཏམ་ཁོ་ནར་རག་ལས་པ་མ་ཡིན༌པར། དབང་དང་དམ་པའི་ཐུགས༌ཉིད། དད་སེམས་ཆེན་པོ་བཅས་ལའང་རག་ལས་པའི་ཕྱིར༌རོ།། དེ་ནི་ངེད་རྣམས་ཀྱིས་ཁྱོད་ཅག་གི་དོན་དུ་ཅི་ལྟར་བྱས་པ་ཁྱོད་རྣམས་ཀྱིས་ཀྱང་ཤེས་གསལ་ལྟར་ཡིན་ནོ།།

⁶གཞན༌ཡང༌། དཀའ་སྡུག་ཆེན་པོའི་ཁྲོད་དུ་ཁྱོད་རྣམས་ལ་དམ་པའི་ཐུགས་ཉིད་ཀྱིས་གནང་བའི་དགའ་སྤྲོ་ཐོབ་པ༌དང༌། འཕྲིན་བཟང་དང་དུ་བླངས་ནས་ངེད་ཅག་དང་གཙོ་བོ་ལ་ལད་མོ་བྱས༌ཤིང༌།

⁷ཐ་ན་ཁྱོད་རྣམས་མ་ཀེ་དོན་ཡཱ་དང་ཨ་ཀ་ཡཱ་ཡུལ་གྱི་དད་ལྡན་ཐམས་ཅད་ཀྱི་མིག་དཔེ་རུ་གྱུར་པའོ།།

⁸ཅིའི་ཕྱིར་ཞེ་ན། གཙོ་བོའི་བཀའ་ནི་ཁྱོད་ཅག་གི་ཁྲོད་ནས་མ་ཀེ་དོན་ཡཱ་དང་ཨ་ཀ་ཡཱ་ཡུལ་དུ་བསྒྲགས་པར་མ༌ཟད། ཁྱོད་རྣམས་ཀྱིས་དཀོན་མཆོག་ལ་དད་པ་བྱས་པའི་གཏམ་དེའང་ཡུལ་ཐམས་ཅད་ལ་ཁྱབ་འདུག་པས་ངེད་རྣམས་ཀྱིས་ཅི་ཡང་སྨྲ་མི་དགོས་པའི་ཕྱིར༌ཏེ།

⁹ཁོ་རྣམས་ཀྱིས་ཀྱང་ཁྱོད་ཅག་གིས་ངེད་རྣམས་ལ་ཇི་ལྟར་བསུ་བ་བྱས་པ༌དང༌། ཁྱོད་ཅག་གིས་བདེན་ཅིང་གསོན་པོར་བཞུགས་པའི་དཀོན་མཆོག་ལ་ཞབས་ཕྱི་སྒྲུབ་པའི་ཆེད༌དུ། ཇི་ལྟར་ལྷ་སྐུ་སྤངས་ནས་དཀོན་མཆོག་གི་ཕྱོགས་སུ་འཁོར་བ༌དང༌།

¹⁰ཁྱོད་ཅག་གིས་ཀྱང་ཁོང་གི་སྲས་དེ་ཉིད་ནམ་མཁའི་ཞིང་ཁམས་ནས་འབྱོན་པར་སྒུག་པ་ཡིན་སྨྲས་པའི་ཕྱིར༌རོ།། དེ་ནི་དཀོན་མཆོག་གིས་རང་ཉིད་ཀྱི་སྲས་གྲོངས་པ་ནས་སླར་གསོན་པར་མཛད༌ཅིང༌། བདག་ཅག་མ་འོངས་པའི་ཐུགས་ཁྲོ་ལས་སྐྱོབ་པར་འགྱུར་བའི་སྐྱབས་མགོན་ཡེ་ཤུ་ཁོང་ཉིད་ཡིན༌ནོ།།