Read དམ་པའི་གསུང་རབ་བོད་འགྱུར་གསར་མ།-New Tibetan Bible ཐེ་སཱ་ལོ་ནེ་ཀེ་གཉིས་པ། 3 Bible Online

ཐེ་སཱ་ལོ་ནེ་ཀེ་གཉིས་པ། 3 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཐེ་སཱ་ལོ་ནེ་ཀེ་གཉིས་པ། 3

¹སྤུན་ཟླ༌རྣམས། མཐར་ཁྱོད་ཅག་གིས་ངེད་རྣམས་ཀྱི་དོན་དུ་གསོལ་བ་འདེབས་པར་ཞུའོ། །དེ་ཡང་ཁྱོད་ཅག་གི་ཁྲོད་ནས་ཇི་ལྟར་བྱུང་བ་བཞིན། གཙོ་བོའི་བཀའ་དེ་མྱུར་དུ་ཁྱབ་པ༌དང་གཟི་བརྗིད་ཀྱང་འཐོབ་ཅིང་།

²ངེད་རྣམས་ལུགས་དང་མི་མཐུན་པའི་མི་ངན་དག་ལས་ཐར་བའི་ཕྱིར་གསོལ་བ་འདེབས་པར་གྱིས། མི་ཐམས་ཅད་ལ་དད་སེམས་ཡོད་པ་མིན་ནོ།།

³གཙོ་བོ་ནི་ཡིད་རྟོན་རུང་བ་ཡིན༌པས། ཁོང་གིས་ཁྱོད་རྣམས་ཀྱི་དད་སེམས་བརྟན་པོར་མཛད་ཅིང་བདུད་ངན་དེ་ལས་བསྲུངས་ཤིང་སྐྱོབ་ངེས༌ཡིན།

⁴ངེད་ཅག་གིས་གཙོ་བོ་ལ་བརྟེན་ནས་ཁྱོད་རྣམས་ཀྱིས་དུས་ད་ལྟ་མ་འོངས་གང་དུའང༌། ངེད་ཅག་གིས་ཁ་བསྒོ་བཏང་བ་བཞིན་ངེས་པར་སྒྲུབ་པ་ལ་ཡིད་ཆེས་སོ།།

⁵གཙོ་བོས་ཁྱོད་རྣམས་ཀྱི་སེམས་ནི་དཀོན་མཆོག་གི་བྱམས་པ་དང་སྐྱབས་མགོན་མཱ་ཤི་ཀའི་བཟོད་སྒོམ་ནང་དུ་འདྲེན་པར༌སྨོན།

⁶སྤུན་ཟླ༌རྣམས། ངེད་ཅག་གིས་རང་རེའི་གཙོ་བོ་ཡེ་ཤུ་མཱ་ཤི་ཀའི་མཚན་གྱི་སྒོ་ནས་ཁྱོད་རྣམས་ལ་ཁ་བསྒོ་གཏོང་བར་བྱ༌སྟེ། སྤུན་ཟླ་སུ་ཞིག་ལེ་ལོ་ཡིན་པ་དང་ངེད་རྣམས་ལས་ཐོབ་པའི་སྲོལ་རྒྱུན་མི་བསྲུངས༌ན། མི་དེ་རྣམས་དང་རྒྱང་བཀྱེད་པར༌བྱའོ།།

⁷ཅིའི་ཕྱིར་ཞེ་ན། ཁྱོད་ཅག་གིས་ཅི་ལྟར་ངེད་རྣམས་མིག་དཔེ་རུ་འཛིན་དགོས་པ་ཤེས༌ཏེ། སྔོན་ཆད་ངེད་རྣམས་ཁྱོད་ཅག་གི་ཁྲོད་དུ་ཡོད་པའི་དུས་སུ་ལེ་ལོ་ཅན་མིན་པ་དང༌།

⁸རིན་མ་བྱིན་པར་མི་གཞན་གྱི་ཟས་ཀྱང་མ་ཟོས༌ལ། ཁྱོད་རྣམས་སུ་ལའང་འོ་བརྒྱལ་མི་བཟོ་བའི༌ཕྱིར། འབད་བརྩོན་བྱས་ཤིང་དཀའ་སྡུག་མྱངས་ནས་ཉིན་མཚན་ཀུན་ཏུ་ལས་ཀ་བསྒྲུབས་པ་ཡིན།

⁹འདི་ནི་ངེད་ཅག་ལ་དབང་ཤེད་མེད་པའི་རྐྱེན་མ་ཡིན༌གྱི། ངེད་ཅག་གིས་ཁྱོད་རྣམས་ལ་མིག་དཔེ་བསྟན་ཞིང་ཁྱོད་རྣམས་ཀྱིས་ཀྱང་ངེད་ཅག་ལ་ལད་མོ་བྱེད་པའི་ཕྱིར་ཡིན།

¹⁰སྔོན་ཆད་ངེད་རྣམས་ཁྱོད་ཅག་གི་གམ་དུ་ཡོད་པའི་དུས༌སུ། སུ་ཞིག་གིས་ལས་ཀ་བྱེད་མི་འདོད༌ན། མི་དེ་ལ་ཁ་ཟས་སྟེར་མི་རུང་ཞེས་ཁྱོད་རྣམས་ལ་ཁ་བསྒོ་བཏང་མྱོང༌ངོ་།།

¹¹རྒྱུ་མཚན་ནི་ཁྱོད་རྣམས་ཀྱི་ཁྲོད་དུ་ལས་ཀ་ཅི་ཡང་མི་བྱེད༌པར། དོན་མེད་ཀྱི་ལས་ཁོ་ནར་བྲེལ་བའི་ལེ་ལོ་ཅན་ཡོད་པ་ངེད་རྣམས་ཀྱིས་ཐོས་པས༌སོ།།

¹²ད་ལྟ་ངེད་ཅག་གིས་མི་དེ་ལྟ་བུ་རྣམས་ལ་གཙོ་བོ་ཡེ་ཤུ་མཱ་ཤི་ཀར་བརྟེན་ནས་ཁ་བསྒོ་དང་སྐུལ་མ་གཏོང་བར༌བྱའོ།། བློ་བདེ་བག་ཕེབས་ཀྱི་ངང་ནས་ལས་ཀ་བྱས་ཏེ་རང་ཁ་རང་གསོ་བྱེད་པར༌གྱིས།

¹³སྤུན་ཟླ༌རྣམས། ཁྱོད་ཅག་ལས་བཟང་པོ་སྒྲུབ་པར་ཡིད་ཕམ་པར་མི་བྱའོ།།

¹⁴མི་སུས་ཀྱང་ངེད་ཅག་གི་འཕྲིན་ཡིག་འདིའི་ནང་གི་བསླབ་བྱ་ལ་མི་ཉན༌ན། མི་དེ་ངོ་གནོང་བར་འགྱུར་བའི༌ཕྱིར། དོན་དེ་ཡིད་ལ་བཟུང་སྟེ་མི་དེ་དང་འབྲེལ་འདྲིས་མི་བྱ་བར་གྱིས།

¹⁵འོན༌ཀྱང༌། མི་དེ་ལ་དགྲ་བོ་ལྟ་བུའི་རྣམ་འགྱུར་མི་འཛིན་པར་སྤུན་ཟླ་བཞིན་དུ་སྐུལ་མ་གནང་བར༌མཛོད།

¹⁶ཞི་བདེ་གནང་མཁན་གཙོ་བོ་ཁོང་ཉིད་ཀྱིས་དུས་དང་རྣམ་པ་ཀུན་ཏུ་ཁྱོད་རྣམས་ལ་ཞི་བདེ་གནང་བར༌ཤོག གཙོ་བོ་ཁོང་ཉིད་ནམ་ཡང་ཁྱོད་རྣམས་དང་ལྷན་དུ་གནས་པར༌སྨོན།

¹⁷ཕོལ་ལོལ་བདག་གིས་ཁྱོད་རྣམས་ལ་འཚམས་འདྲི་ཞུ་བ་འདི་དངོས་སུ་བྲིས་པ་ཡིན། བདག་གི་འཕྲིན་ཡིག་ཐམས་ཅད་ལ་རྟགས་འདི་[1]ཡོད༌ཅིང༌། བདག་གི་འབྲི་སྟངས་འདི་ལྟར་ཡིན།

¹⁸བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན།།།།