Read དམ་པའི་གསུང་རབ་བོད་འགྱུར་གསར་མ།-New Tibetan Bible ཐེ་ཏུ། 2 Bible Online

ཐེ་ཏུ། 2 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཐེ་ཏུ། 2

¹དེ་ཡང་ཁྱོད་ཀྱིས་ཡང་དག་པའི་བསྟན་པ་དང་མཐུན་པའི་སྒོ་ནས་སློབ་སྟོན་བྱ་འོས༌ཏེ།

²རྒན་པོ་རྣམས་ལ་རང་ཚོད་ཟིན་པ༌དང༌། བཀུར་འོས༌པ། བག་ཡོད་པར་མ༌ཟད། དད་པ༌དང༌། བྱམས༌སེམས། བཟོད་བསྲན་བཅས་ཀྱི་ཆ་ནས་སྐྱོན་ཅི་ཡང་མེད་པར་བསྐུལ་འོས༌སོ།།

³ཡང་དེ་བཞིན་དུ་རྒན་མོ་རྣམས་ལའང་སྤྱོད་ལམ་ཚུལ་ལྡན་ཡིན་པ༌དང༌། ཕྲ་མའི་གཏམ་མི་སྨྲ༌བ། ཆང་རག་གི་དབང་དུ་མི་འགྲོ་བ། བསླབ་བྱ་བཟང་པོ་སྟོན་པར་བསྐུལ་འོས་སོ།།

⁴དེ་ནས་ཁོ་མོ་རྣམས་ཀྱིས་ད་གཟོད་བུད་མེད་ན་གཞོན་དག་ལའང་རང་གི་ཁྱོ་ག་དང་བུ་ཕྲུག་ལ་གཅེས་པ༌དང༌།

⁵བག་ཡོད་པ༌དང༌། སྤྱོད་ལམ་གཙང༌བ། ཁྱིམ་ལས་བྱེད༌པ། དྲིན་སྐྱོང་བ། རང་རང་གི་ཁྱོ་ག་དང་བསྟུན་པར་བསྐུལ་ནུས་པ་ཡིན། དེ་ལྟར་བྱས་ན་མི་གཞན་རྣམས་ཀྱིས་དཀོན་མཆོག་གི་བཀའ་ལ་དམའ་འབེབས་བྱེད་པར་མི་འགྱུར༌རོ།།

⁶ཡང་དེ་བཞིན༌དུ་ན་གཞོན་རྣམས་ལ་བག་ཡོད་པར་བསྐུལ་བར༌གྱིས།

⁷ཁྱོད་ཀྱིས་བྱ་བ་ཀུན་ལ་ལས་བཟང་པོའི་མིག་དཔེ་སྟོན་དགོས༌ཏེ། སློབ་སྟོན་གནང་སྐབས་གཞུང་དྲང་བ་དང་བཀུར་འོས༌པ།

⁸གཏམ་བདེན་པར་སྨྲ་ཞིང་སྐྱོན་བརྗོད་རྒྱུ་མེད་པར་གྱིས། དེ་ནས་ངོ་རྒོལ་བྱེད་མཁན་རྣམས་ཀྱིས་བདག་ཅག་ལ་སྐྱོན་བརྗོད་རྒྱུ་མེད་པས་ཁོ་རྣམས་ངོ་གནོང་བར་འགྱུར༌རོ།།

⁹གཡོག་པོ་རྣམས་ལ་རྣམ་པ་ཐམས་ཅད་ནས་རང་རང་གི་བདག་པོའི་བཀའ་བརྩི་བ༌དང༌། བདག་པོ་དགའ་བར་བྱེད༌པ། ཚིག་སློག་མི་རྒྱག་པ།

¹⁰མ་བྱིན་པར་མི་ལེན་པ། དོན་ཐམས་ཅད་ལ་བློ་སེམས་དཀར་བ་བཅས་ཡིན་པར་བསྐུལ་ཏེ། ཕྱོགས་ཀུན་ནས་བདག་ཅག་གི་སྐྱབས་མགོན་དཀོན་མཆོག་གི་བསྟན་པ་ལ་གཟི་དཔལ་གྱིས་བརྒྱན་པའི་ཕྱིར་རོ།།

¹¹ཅིའི་ཕྱིར་ཞེ་ན། མི་ཐམས་ཅད་སྐྱོབ་པར་མཛད་པའི་དཀོན་མཆོག་གི་ཐུགས་རྗེ་ནི་མངོན་སུམ་དུ་བྱུང༌སྟེ།

¹²བདག་ཅག་གིས་དཀོན་མཆོག་ལ་དད་གུས་མི་བྱེད་པའི་སེམས་དང་འཇིག་རྟེན་གྱི་འདོད་ཆགས་སྤོང་བར་བྱེད་པ༌དང༌། བསྐལ་པ་འདིར་བག་ཡོད་པ་དང་གཞུང་དྲང༌བ། དད་གུས་ངང་འཚོ་བ་རོལ་བ་དང་།

¹³བླ་ན་མེད་པའི་དཀོན་མཆོག་སྟེ་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་གཟི་བརྗིད་ངང་ནས་མངོན་སུམ་དུ་ཕེབས་ཡོང་བའི་བདེ་སྐྱིད་ལྡན་པའི་རེ་བར་སྒུག༌པའི་ཕྱིར་ཡིན།

¹⁴བདག་ཅག་ཉེས་པ་ཐམས་ཅད་ནས་བླུ་བ༌དང༌། ཁོང་ཉིད་ལ་དབང་བའི་མི་རྒྱུད་ལས་བཟང་པོར་བརྩོན་པ་ཞིག་གཙང་མར་མཛད་པའི་ཆེད་དུ། ཁོང་གིས་རང་ཉིད་ཀྱི་ཚེ་སྲོག་ཀྱང་བློས་བཏང་བའོ།།

¹⁵ཁྱོད་ཀྱིས་རང་གི་དབང་ཐམས་ཅད་ལ་བརྟེན་ནས་དོན་འདི་རྣམས་ཀྱི་སྐོར་མི་རྣམས་ལ་གསལ་པོར་སྟོན་ཅིང་སྐུལ་སློང་བྱེད་པ་དང་ཚིག་ནན་མོ་བརྗོད་དེ། མི་སུ་ལའང་ཁྱོད་ལ་མཐོང་ཆུང་བྱེད་དུ་མི་འཇུག་པར་གྱིས།