Read དམ་པའི་གསུང་རབ་བོད་འགྱུར་གསར་མ།-New Tibetan Bible ཨིབ་རི་པ། 10 Bible Online

ཨིབ་རི་པ། 10 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཨིབ་རི་པ། 10

¹ཡང་བཀའ་ཁྲིམས་ནི་མ་འོངས་འབྱུང་འགྱུར་གྱི་དོན་བཟང་པོ་དག་གི་གྲིབ་གཟུགས་ཡིན་པ་ལས་དངོས་པོའི་གཟུགས་དབྱིབས་ངོ་མ་མིན་པས། ལོ་རེ་བཞིན་མཆོད་པ་གཅིག་མཚུངས་ཡང་དང་ཡང་དུ་འབུལ་བ་ལ་བརྟེན་ནས། ཉེ་བར་བཅར་བའི་མི་རྣམས་ཡང་དག་པར་མཛད་མི་ནུས༌སོ།།

²གལ་སྲིད། དེ་ལྟར་མིན༌ན། མཆོད་པ་འབུལ་བའི་དོན་ནི་གནའ་སྔ་མོ་ནས་མཚམས་བཞག་ཟིན་པ་མ་ཡིན༌ནམ། ཅིའི་ཕྱིར་ཞེ་ན། བསྙེན་བཀུར་ཞུ་བའི་མི་རྣམས་ཀྱི་སེམས་ཐེངས་གཅིག་ལ་གཙང་མར་མཛད་པ་ཡིན་ན། སེམས་ལ་སྡིག་པའི་ནོངས་ཡོད་པར་མི་འགྱུར༌བའི་ཕྱིར་རོ།།

³འོན་ཀྱང་། མཆོད་པ་འདི་དག་གིས་ལོ་རེ་བཞིན་མི་རྣམས་ལ་སྡིག་པ་དྲན་ཏུ་འཇུག་ཅིང་།

⁴རྒྱུ་མཚན་ནི་གླང་ཐུག་གི་ཁྲག་དང་ར་ཁྲག་གིས་སྡིག་པ་གཏན་ནས་བསལ་མི་ནུས༌སོ།།

⁵དེའི༌ཕྱིར། སྔོན་ཆད་སྐྱབས་མགོན་མཱ་ཤི་ཀ་འཇིག་རྟེན་དུ་ཕེབས་དུས་ཁོང་གིས་འདི་སྐད༌དུ། ཀྱེ་ཀྱེ་བླ་ན་མེད་པའི་དཀོན་མཆོག་ལགས།། མཆོད་པ་དང་ནི་འབུལ་བར་ཁྱེད་མི་མཉེས།། ཁྱེད་ཀྱིས་བདག་ལ་ལུས་གཟུགས་སྟ་གོན༌མཛད།།

⁶སྦྱིན་སྲེག༌དང་ནི་སྡིག་བཤགས་མཆོད་པ་ལ།། དཀོན་མཆོག་ཁྱེད་ནི་དེ་ལ་ཐུགས་མི༌དགྱེས།། ཞེས་གསུངས་སོ།།

⁷དེའི་དུས་སུ། བདག་གིས་འདི་ལྟར་སྨྲས་པ་སྟེ། ཀྱེ་ཀྱེ་དཀོན་མཆོག༌ཁྱེད་ཀྱིས་གཟིགས་པར་གྱིས།། ཁྱེད་ཀྱི་ཐུགས་དགོངས་བསྒྲུབ་ཕྱིར་བདག་ནི་སླེབས།། ང་ཡི་དོན་འདི་ཤོག་སྒྲིལ་མདོ་ལ་བཀོད།། ཅེས་པའོ།།

⁸གོང་དུ་སྐྱབས་མགོན་མཱ་ཤི་ཀས་འདི་སྐད༌དུ། མཆོད་པ་དང་འབུལ་བ། སྦྱིན་སྲེག་དང་སྡིག་བཤགས་མཆོད་པ་བཅས་ལ་ཁྱེད་རང་ཐུགས་མི་མཉེས་ཤིང་། འདི་ནི་བཀའ་ཁྲིམས་བཞིན་དུ་ཕུལ་བ་ལའང་ཁྱེད་ཐུགས་མི་དགྱེས་ཞེས་གསུངས་པ༌དང༌།

⁹ཕྱིས་སུ་ཡང་ཁོང་གིས་འདི་སྐད་དུ། བདག་ནི་ཁྱེད་ཀྱི་ཐུགས་དགོངས་བཞིན་དུ་བསྒྲུབ་པའི་ཕྱིར་ཡོང་བ་ཡིན་ཞེས་གསུངས་ཤིང་། ཁོང་གིས་ཕྱི་མ་འཛུགས་པའི་ཕྱིར་སྔ་མ་མེད་པར་མཛད་དོ།།

¹⁰དཀོན་མཆོག་གི་ཐུགས་དགོངས་དེ་བཞིན་ཡེ་ཤུ་མཱ་ཤི་ཀས་རང་ཉིད་ཀྱི་སྐུ་ལུས་ཐེངས་གཅིག་ཁོ་ནར་ཕུལ་བར་བརྟེན་ནས། བདག་ཅག་དམ་པར་མཛད་པ་ཡིན༌ནོ།།

¹¹སྤྱིར་མཆོད་དཔོན་ཀུན་པོས་ཉིན་རེ་བཞིན་ལངས་ནས་བསྡད་དེ་དཀོན་མཆོག་ལ་ཞབས་ཕྱི་སྒྲུབ༌ཅིང༌། མཆོད་པ་གཅིག་མཚུངས་ཡང་དང་ཡང་དུ་འབུལ་ནའང་། མཆོད་པ་དེ་དག་གིས་སྡིག་པ་གཏན་ནས་བསལ་མི་ནུས༌སོ།།

¹²འོན་ཀྱང༌། སྐྱབས་མགོན་ཡེ་ཤུས་རྟག་གཏན་གྱི་སྡིག་བཤགས་མཆོད་པ་ཐེངས་གཅིག་ལ་ཕུལ་བས། དཀོན་མཆོག་གི་གཡས་ཕྱོགས་སུ་བཞུགས་པར་གྱུར་ཏོ།།

¹³དེ་ནས་བཟུང༌། བསྟན་དགྲ་ཐམས་ཅད་ཁོང་གི་ཞབས་སྟེགས་སུ་འཁོད་པའི་བར་དུ་ཁོང་གིས་སྒུག་ནས་བཞུགས་ཡོད།

¹⁴ཅིའི་ཕྱིར་ཞེ་ན། ཁོང་གིས་ཐེངས་གཅིག་ཁོ་ནར་མཆོད་པ་ཕུལ་བ་བརྒྱུད་ནས། དམ་པར་གྱུར་པ་རྣམས་རྟག་ཏུ་ཡང་དག་པར་མཛད༌པའི་ཕྱིར་རོ།།

¹⁵དམ་པའི་ཐུགས་ཉིད་ཀྱིས་བདག་ཅག་ལའང་བདེན་དཔང་མཛད་དོ།། ཅིའི་ཕྱིར་ཞེ་ན། ཁོང་གིས་འདི་སྐད༌དུ།

¹⁶གཙོ་བོས་འདི་སྐད༌དུ། ཉིན་མོ་དེ་རྣམས་རྗེས་སུ་བདག་གིས༌ནི།། མི་རྣམས་དེ་ལ་ཞལ་ཆད་འདི་ལྟར༌བཞག ། ང་ཡིས་རང་གི་བཀའ་ཁྲིམས་དེ་རྣམས༌ཀྱི།། སེམས་ལ་འཇོག་ཅིང་ཡིད་ལ་བརྐོ་བར༌བྱ།། ཞེས་དང་།

¹⁷ཕྱིས་སུ་ཡང་འདི་སྐད༌དུ། དེ་ཚོའི་སྡིག་པ་དང་ནི་ཉེས༌པ་དག ། བདག་གིས་ནམ་ཡང་དྲན་པར་མི་བྱེད་དོ།། ཞེས་གསུངས༌པའི་ཕྱིར་རོ།།

¹⁸སྡིག་པ་འདི་དག་བསལ་ཟིན་པས། ད་ནི་སྡིག་པའི་ཆེད་དུ་མཆོད་པ་འབུལ་དགོས་དོན་མེད་དོ།།

¹⁹སྤུན་ཟླ༌རྣམས། དེ་ལྟར་ཡིན་པས། སྐྱབས་མགོན་ཡེ་ཤུའི་སྐུ་ཁྲག་ལ་བརྟེན་ནས་བདག་ཅག་བག་ཕེབས་ངང་གནས་དམ་མཆོག་ནང་དུ་འགྲོ་ཐུབ་ཅིང༌།

²⁰དེ་ནི་ཁོང་གིས་བདག་ཅག་ལ་གསར་ཞིང་གསོན་པོའི་ལམ་ཞིག་ཕྱེས་ཤིང་ཡོལ་བ་དེ་བརྒྱུད་ནས་འགྲོ་ཞིང་། ཡོལ་བ་དེ་ནི་སྐྱབས་མགོན་ཡེ་ཤུའི་སྐུ་ལུས་ཡིན་ནོ།།

²¹ཡང་དཀོན་མཆོག་གི་ཁྱིམ་གཞིས་ལ་བདག་སྐྱོང་མཛད་པའི་མཆོད་དཔོན་ཆེན་པོ་ཞིག་བདག་ཅག་ལ་ཡོད་པས།

²²ནོངས་ཡོད་པའི་བསམ་པ་ལ་ཁྲག་གཏོར་ཞིང་ཆུ་གཙང་མས་ལུས་པོ་བཀྲུས་པར་མཛད་པ་དང་། བདག་ཅག་ལྷག་བསམ་རྣམ་དག་དང་དད་སེམས་ཆེན་པོ་བཅངས་ནས་དཀོན་མཆོག་གི་དྲུང་དུ་འགྲོ་བར་བྱ་འོས༌སོ།།

²³ཡང་ཞལ་བཞེས་གནང་མཁན་དཀོན་མཆོག་ནི་ཡིད་རྟོན་རུང་བ་ཡིན་པས། བདག་ཅག་གིས་ཁས་ལེན་པའི་རེ་བ་དེ་ཐེ་ཚོམ་མེད་པར་བརྟན་པོར་བསྲུང་དགོས།

²⁴ཡང་བདག་ཅག་གིས་ཕན་ཚུན་ལ་བྱམས་ཤིང་གཅེས་པ་དང་ལས་བཟང་པོའི་ཕྱོགས་སུ་ཅི་ལྟར་བསྐུལ་བར་བསམ་བློ་གཏོང་བར་བྱའོ།།

²⁵མི་ཁ་ཤས་ལྷན་དུ་མི་འཚོགས་པར་གོམས་པ་བཞིན། བདག་ཅག་གིས་འདུ་ཚོགས་ཀྱི་མཚམས་གཅོད་མི་རུང་སྟེ། ཁྱོད་ཅག་གིས་ཉིན་མོ་དེ་ཉེ་བར་སླེབས་པ་ཤེས་པ་བཞིན། ལྷག་ཏུ་ཕན་ཚུན་ལ་སྐུལ་སློང་བྱ་དགོས༌སོ།།

²⁶བདག་ཅག་གིས་བདེན་པ་ཉིད་རྟོགས་རྗེས། ད་དུང་ཤེས་བཞིན་སྡིག་པ་བྱེད༌ན། ད་ནི་སྡིག་བཤགས་ཀྱི་མཆོད་པ་མེད་དེ།

²⁷ཉེས་ཆད་གཅོད་པར་འགྱུར་བ་དང་དགྲ་བོ་ཐམས་ཅད་ཚར་གཅོད་པའི་མེ་དཔུང་དྲག་པོ་ལ་འཇིགས་སྣང་གིས་སྒུག་ནས་སྡོད་དགོས༌པའོ།།

²⁸སུ་ཞིག་གིས་མོ་ཤེའི་བཀའ་ཁྲིམས་དོར་ནའང་། མི་གཉིས་གསུམ་གྱི་དཔང་པོ་ཙམ་ལ་བརྟེན་ནས་མི་དེ་སྙིང་རྗེ་མེད་པར་གསོད་པ་ཡིན༌ན།

²⁹དཀོན་མཆོག་གི་སྲས་རྐང་འོག་ཏུ་བརྫིས་ཤིང་། ཁོ་རང་དམ་པར་མཛད་པའི་ཞལ་ཆད་ཀྱི་ཁྲག་དེ་མི་གཙང་བར་བརྩིས༌ཏེ། ཐུགས་རྗེ་གནང་མཁན་དམ་པའི་ཐུགས་ཉིད་ཀྱང་ཁྱད་དུ་གསོད་པར་བྱས་ན། མི་དེ་དག་ལ་དེ་ལས་ཀྱང་ཉེས་ཆད་ལྕི་མོ་འཕོག་འོས་པར་ཁྱོད་རྣམས་ཀྱིས་བསམ་པར་བྱའོ།།

³⁰ཅིའི་ཕྱིར་ཞེ་ན། གནོད་ལན་གནོད་འཇལ་ནི་བདག་ལ་རག་ལས་ཤིང་ངས་ལན་འཇལ་ངེས་ཡིན་ཞེས༌གསུངས་པ་དང༌། ཡང་གཙོ་བོས་རང་ཉིད་ཀྱི་མི་རྒྱུད་ལ་ལེགས་ཉེས་ཀྱི་ཁྲིམས་ཐག་གཅོད་པར་འགྱུར་ཞེས་གསུང་མཁན་ཁོང་ཉིད་བདག་ཅག་གིས་ཤེས་པའི་ཕྱིར་ཡིན།

³¹གཏན་དུ་གསོན་པོར་བཞུགས་པའི་དཀོན་མཆོག་གི་ཕྱག་ཏུ་ལྷུང་བ་ནི་དངོས་གནས་འཇིགས་སུ་རུང་བའོ།།

³²ཁྱོད་རྣམས་ཀྱིས་འདས་ཟིན་པའི་ཉིན་མོ་དག་ལ་ཕྱིར་འདང་རྒྱོབས༌དང༌། ཁྱོད་ཅག་གི་བློ་གསལ་པོར་མཛད་པའི་རྗེས་སུ། འཐབ་འཁྲུག་ཆེན་པོའི་སྡུག་བསྔལ་སྣ་ཚོགས་ལ་ཇི་ལྟར་བཟོད་བསྲན་བྱས་པ་སྟེ།

³³གཅིག་ནས་འཕྱ་དམོད་དང་དཀའ་ཚེགས་ལ་འཕྲད་ཅིང་མི་རྣམས་ཀྱི་ལྟད་མོར་གྱུར་པ༌དང༌། གཅིག་ནས་དེ་ལྟ་བུའི་སྡུག་བསྔལ་མྱོང་མཁན་རྣམས་ཀྱི་གྲོགས་སུ་གྱུར༌པའོ།།

³⁴ཅིའི་ཕྱིར་ཞེ་ན། ཁྱོད་རྣམས་ཀྱིས་བཙོན་དུ་བཅུག་ཡོད་པ་རྣམས་ལ་སྙིང་རྗེ་བསྒོམས་པ་དང༌། རང་ལ་དེ་ལས་ཁྱད་དུ་འཕགས་ཤིང་གཏན་དུ་གནས་པའི་བགོ་སྐལ་ཡོད་པ་ཤེས༌པས། མི་གཞན་གྱིས་རང་གི་ཁྱིམ་གཞིས་ཕྲོགས་ནའང་དགའ་མགུའི་ངང་དང་དུ་བླངས་པའི་ཕྱིར་རོ།།

³⁵དེའི་ཕྱིར། ཁྱོད་རྣམས་ཀྱིས་སྤོབས་པ་ལྡན་པའི་སེམས་དེ་འདོར་མི་རུང་། སེམས་དེ་ལྟ་བུ་བཅངས་པ་ལ་བྱ་དགའ་ཆེན་པོ་འཐོབ་པ་ཡིན།

³⁶ཁྱོད་རྣམས་ཀྱིས་དཀོན་མཆོག་གི་ཐུགས་དགོངས་བཞིན་བསྒྲུབས་ནས། ཞལ་བཞེས་གནང་ཡོད་པ་དེ་ཉིད་འཐོབ་པའི་ཕྱིར། ངེས་པར་བཟོད་བསྲན་བྱ་དགོས།

³⁷ཇི་སྐད༌དུ། ད་དུང་ཆུ་ཚོད་ཅུང་ཙམ་ཡོད་པའི་དུས།། ཕེབས་པར་འགྱུར་བ་ཁོང་ཉིད་ཕེབས་ངེས་ཤིང་།། ཁོང་ནི་འགྱངས་པར་མི་བྱེད་ཕེབས་པར༌འགྱུར།།

³⁸རྣམ་དག་མི་ནི་དད་པའི་སྒོ་ནས༌འཚོ།། ཕྱི་བསྣུར་བྱས་ན་བདག་སེམས་དགའ་མི་སྲིད།། ཅེས༌གསུངས་པའི་ཕྱིར་རོ།།

³⁹འོན་ཀྱང་། བདག་ཅག་ནི་ཕྱི་བསྣུར་བྱེད་ཅིང་འཇིག་པར་འགྱུར་བའི་མི་དེ་འདྲ་མ་ཡིན༌པར། དད་པའི་ངང་ནས་ཐར་པ་འཐོབ་ངེས་པའི་མི་རྣམས་ཡིན༌ནོ།།