Read དམ་པའི་གསུང་རབ་བོད་འགྱུར་གསར་མ།-New Tibetan Bible ཡ་ཀོབ། 3 Bible Online

ཡ་ཀོབ། 3 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཡ་ཀོབ། 3

¹བདག་གི་སྤུན་ཟླ༌རྣམས། ངེད་ཅག་ལ་མི་གཞན་ལས་ལེགས་ཉེས་ཀྱི་ཁྲིམས་ཐག་ལྷག་པར་ནན་མོ་གཅོད་ངེས༌པས། ཁྱོད་རྣམས་ལས་མི་མང་པོ་ཞིག་སློབ་དཔོན་བྱེད་པར་མི༌བྱའོ།།

²མ་གཞི་བདག་ཅག་ལ་ལས་སྣ་ཚོགས་ཀྱི་ཆ་ནས་ནོར་འཁྲུལ་ཡོད་པ་ཡིན། གལ༌ཏེ། སུ་ཞིག་ལ་སྨྲ་བརྗོད་ཀྱི་ཆ་ནས་ནོར་འཁྲུལ་མེད༌ན། མི་དེ་ནི་ཕུལ་དུ་བྱུང་ཞིང་རང་ལུས་ཧྲིལ་པོའང་གཅུན་ནུས་སོ།།

³བདག་ཅག་གིས་རྟ་རྒོད་འདུལ་བའི་ཆེད་དུ་རྟའི་ཁ་ནང་དུ་ལྕགས་བཞག་པ་ན་དེའི་ལུས་ཧྲིལ་པོར་ཁ་ལོ་བསྒྱུར་ནུས༌པ་ཡིན།

⁴ལྟོས༌དང༌། གྲུ་གཟིངས་ནི་ཤིན་ཏུ་ཆེ་ཞིང་རླུང་ཆེན་དྲག་པོས་དེད༌ཀྱང༌། དེད་དཔོན་གྱིས་གྲུ་སྐྱ་ཆུང་ངུར་བརྟེན་ནས་གང་དུ་སྐྱོད་འདོད་པ་བཞིན་གྲུ་གཟིངས་ལ་ཁ་ལོ་བསྒྱུར་ནུས་སོ།།

⁵དེ་བཞིན༌དུ། ལྕེ་ནི་ལུས་ཀྱི་ཆ་ཤས་ཆུང་ངུ་ཞིག་ཡིན༌ཡང༌། ལྕེ་ཡིས་ཁ་ཕོ་ཆེན་པོ་སྨྲ་བར་བྱེད། ལྟོས༌དང༌། མེ་ལྕེ་ཆུང་ངུ་ཞིག་གིས་ནགས་ཚལ་ཆེན་པོ་བསྲེག་ནུས་པ་ཡིན།

⁶ལྕེ་ནི་མེ་ཡིན༌ཏེ། སྡིག་པས་ཁེངས་པའི་འཇིག་རྟེན་ཞིག་ཀྱང་ཡིན༌ལ། བདག་ཅག་གི་ལུས་ཀྱི་ཆ་ཤས་གཞན་དག་ཁྲོད་ནས་མིའི་ལུས་ཧྲིལ་པོ་མི་གཙང་བར་བྱེད༌ཅིང༌། བདེ་སྐྱིད་ཀྱི་འཚོ་བ་ཡོངས་སུ་བསྲེགས་པར་མ༌ཟད། དམྱལ་བའི་གནས་ལས་ཀྱང་བསྲེག་པར་འགྱུར༌རོ།།

⁷རི་དྭགས༌དང༌། འདབ༌ཆགས། ལྟོ་འགྲོའི༌རིགས། རྒྱ་མཚོའི་སྲོག་ལྡན་ཐམས་ཅད་མི་ཡིས་འདུལ་ནུས་ཤིང་བཏུལ་བའང་ཡིན༌མོད།

⁸འོན་ཀྱང་སྨྲ་ལྕེ་འདུལ་ཐུབ་མཁན་གཅིག་ཀྱང་མེད༌ལ། དེ་ནི་རྒྱུན་ཆད་མེད་པར་འབྱུང་བའི་ནག་ཉེས༌དང༌། འཆི་ལམ་དུ་གཏོད་བྱེད་དུག་གི་རླངས་པས་ཁྱབ་པ་ཞིག༌ཡིན།

⁹བདག་ཅག་གིས་ལྕེ་ལ་བརྟེན་ནས་གཙོ་བོ་དང་ཡབ་ལ་བསྟོད་བསྔགས་བརྗོད༌ཅིང༌། ཡང་ལྕེ་ལ་བརྟེན་ནས་དཀོན་མཆོག་གི་སྣང་བརྙན་བཞིན་དུ་བཟོས་པའི་མི་རྣམས་ལ་སྡིགས་དམོད་བྱེད།

¹⁰ཁ་གཅིག་ལས་བསྔགས་བརྗོད་དང་སྡིགས་དམོད་གཉིས་ཀ་འོང་བ་ཡིན། བདག་གི་སྤུན་ཟླ༌རྣམས། དོན་འདི་ནི་མི་འོས་སོ།།

¹¹ཆུ་མིག་གཅིག་ལས་ཆུ་མངར་མོ་དང་ཁ་བ་གཉིས་ཀ་འབྱུང་སྲིད༌དམ།

¹²བདག་གི་སྤུན་ཟླ༌རྣམས། བསེ་ཡབ་ཤིང་ལས་སྐྱུ་རུ་རའི་ཤིང་ཏོག་འབྱུང་སྲིད༌དམ། རྒུན་འབྲུམ་ཤིང་ལས་བསེ་ཡབ་ཀྱི་ཤིང་ཏོག་འབྱུང་སྲིད༌དམ། ཚྭ་ཆུ་ལས་ཆུ་མངར་མོ་འབྱུང་སྲིད་དམ་ཞེ་ན་མི་སྲིད་དོ།།

¹³ཁྱོད་ཅག་གི་ཁྲོད་ན་སུ་ཞིག་མི་ཤེས་རབ་ཅན་དང་ཐོས་རྒྱ་ཅན་ཡིན༌ན། མི་དེས་སྤྱོད་ལམ་བཟང་པོའི་སྒོ་ནས་རང་གི་ལས་དེ་རྣམས་ཤེས་རབ་དང་ཞི་ཞིང་དུལ་བའི་ངང་སྟོན་པར་བྱ་དགོས་སོ།།

¹⁴ཁྱོད་རྣམས་ཀྱི་སེམས་སུ་ཕྲག་དོག་ཁ་ཏིག་ཅན་དང་སྒེར་སེམས་ཡོད༌ན། རང་བསྟོད་མི་བྱེད༌ཅིང་། བདེན་པ་ཉིད་ལ་རྫུན་ཡང་སྨྲ་བར་མི༌བྱའོ།།

¹⁵ཤེས་རབ་དེ་ལྟ་བུ་ནི་སྟེང་ནས་བྱུང་བ་མ་ཡིན༌པར། དེ་ནི་འཇིག་རྟེན༌དང༌། ཤ་ཁྲག གདོན་འདྲེ་བཅས་ཀྱི་རིགས་སུ་གཏོགས།

¹⁶གནས་གང་དུ་ཕྲག་དོག་དང་སྒེར་སེམས་ཡོད༌ན། གནས་དེ་རུ་ཟིང་འཁྲུག་དང་ལས་ངན་པ་སྣ་ཚོགས་ཡོད་པ་ཡིན༌ནོ།།

¹⁷འོན༌ཀྱང༌། སྟེང་ནས་བྱུང་བའི་ཤེས་རབ་ནི་ཐོག་མར་ཡང་དག་པ་དང་ཕྱི་མར་ཞི་ཞིང་དུལ་བ། དེ་ནས་གཤིས་རྒྱུད་འཇམ༌པ། གནས་ལུགས་བརྩི་བ། སྙིང་རྗེ་དང་འབྲས་བུ་བཟང་པོས་ཁེངས་ཡོད་པ། ཕྱོགས་རིས་མེད༌པ། ཚུལ་འཆོས་མེད་པ་བཅས་ཡིན་ནོ།།

¹⁸གཞན་ཡང༌། དྲང་བདེན་གྱི་འབྲས་བུ་ནི། འདུམ་སྒྲིག་པ་རྣམས་ཀྱིས་ཞི་བདེའི་ངང་ནས་འདེབས༌པའོ།།