Read དམ་པའི་གསུང་རབ་བོད་འགྱུར་གསར་མ།-New Tibetan Bible པེ་ཏྲོ་དང་པོ། 2 Bible Online

པེ་ཏྲོ་དང་པོ། 2 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

པེ་ཏྲོ་དང་པོ། 2

¹དེ་ལྟར་ཡིན་པས། ཁྱོད་རྣམས་ཀྱིས་གདུག་རྩུབ་དང་། གཡོ༌སྒྱུ། ཚུལ་འཆོས། ཕྲག༌དོག སྐུར་འདེབས་ཀྱི་གཏམ་སྣ་ཚོགས་སྤངས༌ནས།

²གསར་སྐྱེས་ཀྱི་ཕྲུ་གུས་བྱེད་པ་བཞིན། ཁྱོད་ཅག་གིས་བཀའ་ཡི་འོ་མ་ལྷད་མེད་དེ་ལ་ཡིད་སྨོན་བྱེད་དགོས༌ཏེ། ཁྱོད་རྣམས་དེ་ལ་བརྟེན་ནས་ཐར་པའི་ཕྱོགས་སུ་རིམ་བཞིན་དད་པ་ཇེ་བརྟན་དུ་འགྱུར་བའི་ཕྱིར༌ཡིན་ཞིང་།

³ཁྱོད་རྣམས་ཀྱིས་གཙོ་བོའི་ཐུགས་རྗེ་ཉམས་སུ་མྱངས་པས་དེ་ལྟར་བྱེད་འོས་སོ།།

⁴ཁོང་ནི་རྡོ་གསོན་པོ་ཞིག་ཡིན་ལ། དེ་ནི་མི་ཡིས་སྤངས་ནའང་དཀོན་མཆོག་གིས་བདམས་ཤིང་རིན་ཐང་ཆེན་པོར་བརྩིས་པ་ཡིན་ལ། ཁྱོད་རྣམས་ཁོང་གི་དྲུང་དུ་ཡོང་བའི་དུས་སུ།

⁵ཁྱོད་ཅག་ཀྱང་རྡོ་གསོན་པོ་ཡིན་པ་བཞིན་དུ། དམ་པའི་ཐུགས་ཉིད་ཀྱི་བཞུགས་གནས་སུ་བཟོ་བ་སྟེ། ཁྱོད་ཅག་ནི་དམ་པའི་མཆོད་དཔོན་ཡིན་ཞིང་། ཡེ་ཤུ་མཱ་ཤི་ཀར་བརྟེན་ནས་དཀོན་མཆོག་དགྱེས་པའི་ཐུགས་ཉིད་ཀྱི་མཆོད་པ་འབུལ་བའི་ཕྱིར༌རོ།།

⁶ཅིའི་ཕྱིར་ཞེ་ན། དེ་ལ་གསུང་རབ་ཀྱི་མདོ་ལས་ཇི་སྐད༌དུ། ལྟོས་དང་། བདག་གིས་ཛ་ཡན་ཡུལ་དུ་རྡོ་ཞིག༌བཞག ། བདམས་པའི་ཟུར་གྱི་རྨང་རྡོ་ནོར་བུ་ཡིན༎ ཁོང་ལ་བརྟེན་ཅིང་དད་པ་བྱེད་མཁན༌ཀུན།། ཁ་ནི་མི་སྐྱེངས་ངོ་ཡང་མི་གནོང༌ངོ༌།། ཞེས་གསུངས༌པའི་ཕྱིར་རོ།།

⁷དེའི༌ཕྱིར། ཁྱོད་ཅག་དད་ལྡན་རྣམས་ལ་མཚོན་ན་ཁོང་ནི་ནོར་བུ་ཞིག་ཡིན༌ལ། དད་པ་མེད་པ་རྣམས་ལ་མཚོན་ན་ཇི་སྐད༌དུ་གསུངས་པ་སྟེ། བཟོ་བ་རྣམས་ཀྱིས་སྤངས་པའི༌རྡོ།། ཁང་པའི་ཟུར་གྱི་རྨང་རྡོར༌གྱུར།། ཞེས་པའོ།།

⁸ཡང་ཇི་སྐད༌དུ། དེ་ནི་རྐང་པ་འདྲེད་པའི་རྡོ།། ས་རུ་སྒྱེལ་བའི་ཕ་བོང་ཡིན།། ཞེས་གསུངས། ཁོ་རྣམས་ཀྱིས་བཀའ་དེ་ལ་མི་ཉན་པས་ས་རུ་འགྱེལ། ཁོ་རྣམས་དེ་ལྟར་འགྱེལ་བ་ནི་དཀོན་མཆོག་གིས་སྔར་ནས་ཐག་གིས་བཅད་ཟིན༌ནོ།།

⁹འོན་ཀྱང་། ཁྱོད་རྣམས་ནི་བདམས་ཟིན་པའི་རིགས་རྒྱུད་དང་། རྒྱལ་རྒྱུད་ཀྱི་མཆོད་དཔོན། མི་རིགས་དམ༌པ། དཀོན་མཆོག་ལ་གཏོགས་པའི་མི་རྒྱུད་བཅས་ཡིན་ཏེ། དེ་ནི་ཁྱོད་རྣམས་མུན་ནག་ལས་ཁོང་གི་ངོ་མཚར་ཆེ་བའི་འོད་ཟེར་ནང་དུ་ཞལ་འབོད་གནང་མཁན་ཁོང་གི་འཕྲིན་ལས་སྒྲོག་པའི་ཕྱིར་རོ།།

¹⁰སྔོན་ཆད་ཁྱོད་རྣམས་ནི་མི་རྒྱུད་མིན་མོད། འོན་ཀྱང་ད་ལྟ་ཁྱོད་ཅག་ནི་དཀོན་མཆོག་གི་མི་རྒྱུད་ཡིན། སྔོན་ཆད་ཁྱོད་རྣམས་ལ་ཐུགས་རྗེ་མ་ཐོབ༌མོད། འོན་ཀྱང་ད་ལྟ་ཁྱོད་རྣམས་ལ་ཐུགས་རྗེ་ཐོབ་ཟིན༌ནོ།།

¹¹སྙིང་ཉེ་བའི་སྤུན་ཟླ༌རྣམས། ཁྱོད་རྣམས་ནི་མགྲོན་པོ་དང་ཕྱི་མི་ཡིན་པ༌བཞིན། བདག་གིས་ཁྱོད་རྣམས་ལ་ཤ་གཟུགས་ཀྱི་འདོད་ཆགས་སྤང་བར་བསྐུལ༌བར་བྱའོ།། འདོད་ཆགས་ཀྱིས་སེམས་ལ་རྒོལ་བ་ཡིན་ནོ།།

¹²ཕྱི་ཕྱོགས་པ་རྣམས་ཀྱི་ཁྲོད་དུ་ཁྱོད་ཅག་གི་སྤྱོད་ལམ་དྲང་པོ་ཡིན་དགོས་སོ།། ཅིའི་ཕྱིར་ཞེ་ན། ཁྱོད་རྣམས་ནི་ལས་ངན་པ་བྱེད་མཁན་ཡིན་ཞེས་དམའ་འབེབས་བྱེད་མཁན་དག་གིས་ཁྱོད་ཅག་གི་ལས་བཟང་པོར་བལྟས་ནས། དཀོན་མཆོག་གི་གཟིགས་སྐྱོང་མཛད་པའི་དུས་སུ། ཁོང་ལ་བསྟོད་བསྔགས་བརྗོད་པའི་ཕྱིར༌རོ།།

¹³གཙོ་བོའི་ཆེད་དུ་ཁྱོད་རྣམས་ཀྱིས་གོང་མ་རྒྱལ་པོའམ། ཡང་ན་རྒྱལ་པོས་ལས་ངན་པ་བྱེད་མཁན་ལ་ཁྲིམས་ཐག་གཅོད་པ་དང་ལས་བཟང་པོ་བྱེད་མཁན་ལ་གཟེངས་བསྟོད་བྱེད་པར་མངགས་པའི་སྤྱི་དཔོན་ནམ། མིའི་ལམ་ལུགས་ཐམས་ཅད་བརྩི་སྲུང་བྱེད་དགོས་སོ།།

¹⁵ཅིའི་ཕྱིར་ཞེ་ན། དཀོན་མཆོག་གི་ཐུགས་དགོངས་ནི་ཁྱོད་རྣམས་ཀྱིས་ལས་བཟང་པོ་བྱས་ཏེ། ཤེས་པ་མེད་པའི་བླུན་པོ་རྣམས་ཀྱི་སྨྲ་སྒོ་གཅོད་པའི་ཕྱིར་ཡིན།

¹⁶ཁྱོད་ཅག་ནི་མི་རང་དབང་ཅན་ཡིན་ནའང་། རང་དབང་ལ་བརྟེན་ནས་ལས་ངན་པ་འགེབས་མི་རུང༌སྟེ། རྟག་ཏུ་དཀོན་མཆོག་གི་ཞབས་ཕྱི་པ་ཡིན་དགོས་སོ།།

¹⁷ཁྱོད་ཅག་གིས་མི་ཐམས་ཅད་ལ་བརྩི་བཀུར་དང་། དད་ལྡན་སྤུན་ཟླ་ལ་གཅེས་པ། དཀོན་མཆོག་ལ་གུས༌ཤིང་འཇིགས་པ། རྒྱལ་པོ་ལ་བརྩི་བཀུར་བཅས་བྱེད་པར༌གྱིས།

¹⁸ཁྱོད་ཅག་གཡོག་པོ་རྣམས་ཀྱིས་དོན་ཐམས་ཅད་ཀྱི་ཆ་ནས་གུས་ཞུམ་ངང་བདག་པོའི་བཀའ་བརྩི་དགོས་པ་དང་། བདག་པོ་བཟང་པོ་ཞི་དུལ་ཅན་གྱི་བཀའ་བརྩི་དགོས་པར་མ་ཟད། བདག་པོ་སྤྱོད་རྩིང་ཅན་གྱི་བཀའ་ཡང་བརྩི་དགོས་སོ།།

¹⁹མི་ཞིག་གིས་དཀོན་མཆོག་གི་སྤྱན་སྔར་བསམ་པའི་རྐྱེན་གྱིས། བསྙོན་བཙུགས་པའི་སྡུག་བསྔལ་ལ་བཟོད་བསྲན་བྱས་པ་ཡིན་ན། དེ་ནི་གཅེས་སུ་འཛིན་འོས་སོ།།

²⁰ཁྱོད་ཅག་གིས་ཉེས་པ་བྱས་པས་རྡུང་རྡེག་མྱངས་ཤིང་བཟོད་བསྲན་བྱས་པ་ཡིན་ན། དེ་ལ་བསྟོད་འོས་པ་ཅི་ཡོད༌དམ། འོན་ཀྱང་། ཁྱོད་རྣམས་ཀྱིས་ལས་བཟང་པོ་བྱས་པའི་རྐྱེན་གྱིས། སྡུག་བསྔལ་མྱངས་ཤིང་བཟོད་བསྲན་བྱས་པ་ཡིན༌ན། དེ་ནི་དཀོན་མཆོག་གི་སྤྱན་སྔར་གཅེས་སུ་འཛིན་འོས་སོ།།

²¹ཁྱོད་རྣམས་ལ་ཞལ་འབོད་ཐོབ་པ་ནི་དེའི་ཕྱིར་ཡིན། རྒྱུ་མཚན་ནི་སྐྱབས་མགོན་མཱ་ཤི་ཀས་ཀྱང་ཁྱོད་ཅག་གི་དོན་དུ་སྡུག་བསྔལ་མྱངས་ཤིང་། ཁྱོད་རྣམས་ལ་མིག་དཔེ་མཛད་པ་ཡིན་ཏེ། ཁྱོད་རྣམས་ཁོང་གི་རྗེས་སུ་འབྲང་བའི་ཕྱིར་རོ།།

²²དེ་ལ་ཇི་སྐད༌དུ། ཁོང་གིས་ཉེས་པ་ཅི་ཡང་མ་བྱས༌ཤིང༌།། གཡོ་སྒྱུའི་ཚིག་ཀྱང༌ངག་ལས་བརྗོད་པ་མེད།། ཅེས༌གསུངས་པའོ།།

²³ཁོང་གིས་སྡིགས་དམོད་མྱོང་བའི་དུས་སུ་ཚིག་ལོག་མ་བརྒྱབ་ཅིང་། གནོད་འཚེ་མྱོང་བའི་དུས་སུ་འཇིགས་སྐུལ་གྱི་ཚིག་མ་གསུངས༌པར། དྲང་བདེན་གྱིས་མི་ལ་ཁྲིམས་ཐག་གཅོད་མཁན་དཀོན་མཆོག་ལ་རང་ཉིད་བཅོལ་བ་ཡིན།

²⁴ཁོང་ཉིད་གདུང་མའི་སྟེང་དུ་བཀལ་ཞིང་། ཁོང་གིས་སྐུ་དངོས་སུ་བདག་ཅག་གི་སྡིག་པ་འཁུར་ཏེ། བདག་ཅག་ནི་སྡིག་པའི་ཆ་ནས་འཆི་བ་དང་། དྲང་བདེན་གྱི་ཆ་ནས་སྲོག་འཚོ་བར་འགྱུར་བའི་ཕྱིར་ཡིན་ཞིང་། ཁོང་གི་རྨ་ཁས་ཁྱོད་རྣམས་སོས་པར་གྱུར་ཏོ།།

²⁵སྔོན་ཆད་ཁྱོད་རྣམས་ནི་མགོ་འཐོམ་པའི་ལུག་དང་མཚུངས༌མོད། འོན་ཀྱང་ད་ལྟ་ཁྱོད་ཅག་ནི་སེམས་ཀྱི་རྫི་བོ་དང་སྲུང་མཁན་གྱི་ཕྱོགས་སུ་འཁོར་བའོ།།