Read དམ་པའི་གསུང་རབ་བོད་འགྱུར་གསར་མ།-New Tibetan Bible ཡོ་ཧ་ནན་དང་པོ། 4 Bible Online

ཡོ་ཧ་ནན་དང་པོ། 4 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཡོ་ཧ་ནན་དང་པོ། 4

¹སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་སེམས་ཉིད་ཐམས་ཅད་ལ་ཡིད་ཆེས་པར་མི་བྱའོ།། སེམས་ཉིད་དེ་དག་ནི་དཀོན་མཆོག་ནས་བྱུང་མིན་ལ་ཚོད་བརྟག་བྱ་དགོས། རྒྱུ་མཚན་ནི་འཇིག་རྟེན་དུ་ལུང་སྟོན་པ་རྫུས་མ་མང་པོ་བྱུང་ཡོད་པས༌སོ།།

²སེམས་ཉིད་གང་ཞིག་གིས་ཡེ་ཤུ་མཱ་ཤི་ཀ་ནི་མི་ཡི་ཕུང་བོར༌གྱུར་ནས་ཕེབས་པར་ཁས་ལེན་ན། སེམས་ཉིད་དེ་ནི་དཀོན་མཆོག་ལས་བྱུང་བ་ཡིན། དེ་ལས་ཁྱོད་ཅག་གིས་དཀོན་མཆོག་གི་ཐུགས་ཉིད་ངོ་ཤེས་ཐུབ་པར༌འགྱུར་རོ།།

³སེམས་ཉིད་གང་ཞིག་གིས་སྐྱབས་མགོན་ཡེ་ཤུ་ཁས་མི་ལེན་ན། སེམས་ཉིད་དེ་ནི་དཀོན་མཆོག་ནས་བྱུང་བ་མ་ཡིན༌པར། སྐྱབས་མགོན་མཱ་ཤི་ཀ་དགྲ་རུ་འཛིན་པའི་བསྟན་དགྲའི་སེམས་ཉིད་ཡིན། ཁྱོད་ཅག་གིས་སྔར་ནས་བསྟན་དགྲ་དེ་ཡོང་ངེས་པ་ཐོས་ཤིང་། ད་ལྟ་འཇིག་རྟེན་དུ་ཡོང་ཟིན་ནོ།།

⁴བུ་ཕྲུག༌རྣམས། ཁྱོད་ཅག་ནི་དཀོན་མཆོག་ལ་གཏོགས་ཤིང་བསྟན་དགྲ་དེ་དག་ལས་རྣམ་པར་རྒྱལ་ལོ།། ཅིའི་ཕྱིར་ཞེ་ན། ཁྱོད་ཅག་གི་ནང་དུ་བཞུགས་པ་དེ་ཉིད་ནི་འཇིག་རྟེན་དུ་ཡོད་པ་དེ་ལས་ཀྱང་ཆེན་པོ་ཡིན་ནོ།།

⁵དེ་དག་ནི་འཇིག་རྟེན་ལ་གཏོགས་པས་འཇིག་རྟེན་གྱི་དོན་འཆད་པ་དང་། འཇིག་རྟེན་གྱི་མི་རྣམས་ཀྱིས་ཀྱང་དེ་དག་གི་ངག་ལ་ཉན་པ་ཡིན།

⁶ངེད་ཅག་ནི་དཀོན་མཆོག་ལ་གཏོགས་པས་དཀོན་མཆོག་ངོ་ཤེས་པ་དག་གིས་ངེད་ཅག་གི་ངག་ལ་ཉན་པ༌དང༌། དཀོན་མཆོག་ལ་མི་གཏོགས་པ་རྣམས་ཀྱིས་ངེད་ཅག་གི་ངག་ལ་མི་ཉན་ནོ།། དེ་ལས་བདག་ཅག་གིས་གང་ཞིག་བདེན་པ་ཉིད་ཀྱི་སེམས་ཉིད་དང་གང་ཞིག་རྫུན་གྱི་སེམས་ཉིད་ཡིན་པ་ཤེས་ནུས་སོ།།

⁷སྙིང་ནས་བརྩེ་བའི་སྤུན་ཟླ༌རྣམས། བདག་ཅག་གིས་ཕན་ཚུན་ལ་བྱམས་ཤིང་གཅེས་འོས་སོ།། ཅིའི་ཕྱིར་ཞེ་ན། བྱམས་པ་ནི་དཀོན་མཆོག་ནས་བྱུང་བས༌སོ། །གཅེས་སེམས་ཡོད་པ་ཐམས་ཅད་ནི་དཀོན་མཆོག་ནས་སྐྱེས་ཤིང་དཀོན་མཆོག་ངོ་ཤེས་པ་ཡིན།

⁸གཅེས་སེམས་མེད་པ་དེས་དཀོན་མཆོག་ངོ་མི་ཤེས་སོ།། ཅིའི་ཕྱིར་ཞེ་ན། དཀོན་མཆོག་ནི་བྱམས་པ་ཡིན་པའི་ཕྱིར་རོ།།

⁹དཀོན་མཆོག་གིས་རང་ཉིད་ཀྱི་སྲས་གཅིག་པུ་འཇིག་རྟེན་དུ་མངགས་ཤིང་། དེ་ནི་བདག་ཅག་ཁོང་ལ་བརྟེན་ནས་གསོན་པོར་གནས་པའི་ཕྱིར་ཡིན་ལ། དེ་ལས་དཀོན་མཆོག་གི་བྱམས་པ་བདག་ཅག་ལ་མངོན༌པ་ཡིན།

¹⁰བདག་ཅག་གིས་དཀོན་མཆོག་ལ་གཅེས་པ་མ་ཡིན་པར་ཁོང་གིས་བདག་ཅག་ལ་བྱམས་པ་ཡིན༌ཏེ། ཁོང་གིས་རང་ཉིད་ཀྱི་སྲས་མངགས་ནས་བདག་ཅག་གི་སྡིག་པའི་ཉེས་ཆད་བསལ་བའི་མཆོད་རྫས་སུ་མཛད་ཅིང་། དེ་ནི་དཀོན་མཆོག་གི་བྱམས་པ་ཡིན།

¹¹སྙིང་ནས་བརྩེ་བའི་སྤུན་ཟླ༌རྣམས། དཀོན་མཆོག་གིས་བདག་ཅག་ལ་འདི་ལྟར་བྱམས་པས། བདག་ཅག་གིས་ཀྱང་ཕན་ཚུན་ལ་བྱམས་ཤིང་གཅེས་འོས་སོ།།

¹²སུ་ཞིག་གིས་ཀྱང་དཀོན་མཆོག་མཐོང་མ་མྱོང༌མོད། འོན་ཀྱང་བདག་ཅག་གིས་ཕན་ཚུན་ལ་བྱམས་ཤིང་གཅེས༌པ་ཡིན་ན། དཀོན་མཆོག་བདག་ཅག་གི་ནང་དུ་བཞུགས་ཡོད་ལ། ཁོང་གི་བྱམས་པ་ནི་བདག་ཅག་གི་ནང་དུ་ཆ་ཡོངས་སུ་ཚང་བའོ།།

¹³དཀོན་མཆོག་གིས་ཁོང་གི་ཐུགས་ཉིད་བདག་ཅག་ལ་གནང༌བས། བདག་ཅག་དཀོན་མཆོག་གི་ནང་དུ་གནས་པ་དང་། ཁོང་ཉིད་ཀྱང་བདག་ཅག་གི་ནང་དུ་བཞུགས་པ་བདག་ཅག་གིས་ཤེས༌སོ།།

¹⁴ཡབ་ཀྱིས་ཁོང་གི་སྲས་འཇིག་རྟེན་གྱི་སྐྱབས་མགོན་དུ་མངགས༌པ་ནི། ངེད་ཅག་གིས་དངོས་སུ་མཐོང་ཞིང་བདེན་དཔང་ཡང་བྱེད་པ་ཡིན།

¹⁵སུ་ཞིག་གིས་སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པར་ཁས་ལེན༌ན། དཀོན་མཆོག་མི་དེའི་ནང་དུ་བཞུགས་ཤིང་། མི་དེ་ཡང་དཀོན་མཆོག་གི་ནང་དུ་གནས་སོ།།

¹⁶དཀོན་མཆོག་གིས་བདག་ཅག་ལ་བྱམས་པ་ནི་བདག་ཅག་གིས་ཤེས་ཤིང་ཡིད་ཆེས་ཀྱང་བྱེད༌པ་དང་། དཀོན་མཆོག་ནི་བྱམས་པ་ཡིན། སུ་ཞིག་བྱམས་པའི་ནང་དུ་གནས་པ་ཡིན་ན། དཀོན་མཆོག་གི་ནང་དུའང་གནས་པ་ཡིན༌ལ། དཀོན་མཆོག་ཀྱང་མི་དེའི་ནང་དུ་བཞུགས༌པ་ཡིན།

¹⁷དེ་ལྟར་བྱམས་པ་ནི་བདག་ཅག་གི་ནང་དུ་ཆ་ཡོངས་སུ་ཚང་བ་ཡིན་པས། མ་འོངས་པའི་ལེགས་ཉེས་ཀྱི་ཁྲིམས་ཐག་གཅོད་པའི་ཉིན་ལ་བདག་ཅག་བག་ཕེབས་ཞུམ་མེད་ངང་སྡོད་ནུས་སོ།། ཅིའི་ཕྱིར་ཞེ་ན། ཁོང་ནི་ཅི་ལྟར་ཡིན་པ་བཞིན་བདག་ཅག་ཀྱང་འཇིག་རྟེན་འདིར་དེ་ལྟར་ཡིན་པའི་ཕྱིར་རོ།།

¹⁸བྱམས་པའི་ནང་དུ་འཇིགས་པ་མེད་ལ། བྱམས་པ་ནི་ཆ་ཡོངས་སུ་ཚང་བས། འཇིགས་པ་ཐམས་ཅད་བསལ་བ་ཡིན། འཇིགས་པ་ནི་ཉེས་ཆད་དང་འབྲེལ་བ་ཡོད་པས། འཇིགས་པ་ཡོད་པའི་མི་ནི་བྱམས་པའི་ནང་དུ་ཆ་ཡོངས་སུ་ཚང་བ་མ་ཡིན་ནོ།།

¹⁹བདག་ཅག་གིས་བྱམས་ཤིང་གཅེས་པ་སྟེ། རྒྱུ་མཚན་ནི་ཐོག་མར་དཀོན་མཆོག་གིས་བདག་ཅག་ལ་བྱམས་པའི་ཕྱིར་རོ།།

²⁰གལ་ཏེ། མི་ཞིག་ན་རེ། བདག་གིས་དཀོན་མཆོག་ལ་གཅེས་ཞེས་སྨྲ་ཡང་། རང་གི་སྤུན་ཟླར་སྡང་བ་ཡིན་ན། མི་དེ་ནི་རྫུན་སྨྲ་མཁན་ཡིན། རྒྱུ་མཚན་ནི་མིག་གིས་མཐོང་བའི་སྤུན་ཟླར་གཅེས༌པ་མིན་ན། མཐོང་མ་མྱོང་བའི་དཀོན་མཆོག་ལའང་གཅེས་མི་སྲིད།

²¹དཀོན་མཆོག་ལ་གཅེས་པ་ཡིན་ན། སྤུན་ཟླ་ལའང་གཅེས་དགོས་སོ།། འདི་ནི་དཀོན་མཆོག་ནས་བདག་ཅག་ལ་ཐོབ་པའི་བཀའ་ཡིན༌ནོ།།