Read དམ་པའི་གསུང་རབ་བོད་འགྱུར་གསར་མ།-New Tibetan Bible ཡོ་ཧ་ནན་གཉིས་པ། 1 Bible Online

ཡོ་ཧ་ནན་གཉིས་པ། 1 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

ཡོ་ཧ་ནན་གཉིས་པ། 1

¹དེ་ཡང་དཀོན་མཆོག་གིས་བདམས་པའི་བུད་མེད་དང་ཁོ་མོའི་བུ་ཕྲུག་རྣམས་ལ་ཆོས་ཚོགས་ཀྱི་རྒན་པོ་བདག་གིས་འཕྲིན་ཡིག་འདི་སྤྲིངས་པ་སྟེ། བདག་གིས་ཁྱོད་རྣམས་དངོས་གནས་གཅེས་སུ་འཛིན་པ་དང་། བདེན་པ་ཉིད་རྟོགས་མཁན་ཐམས་ཅད་ཀྱིས་ཀྱང་ཁྱོད་རྣམས་གཅེས་སུ་འཛིན་ནོ།།

²ཁྱོད་རྣམས་གཅེས་སུ་འཛིན་པ་ནི་བདེན་པ་ཉིད་ཀྱི་ཕྱིར་ཡིན༌ལ། བདེན་པ་ཉིད་ནི་བདག་ཅག་གི་ནང་དུ་གནས་ཤིང་། རྟག་ཏུ་བདག་ཅག་དང་ལྷན་དུ་བཞུགས་སོ།།

³ཡབ་དཀོན་མཆོག་དང་ཁོང་གི་སྲས་ཡེ་ཤུ་མཱ་ཤི་ཀ་ལས་བྱམས་དང་སྙིང༌རྗེ། ཞི་བདེ་བཅས་འབྱུང་ཞིང་། བདེན་པ་དང་གཅེས་སེམས་ཀྱི་ངང་ནས་བདག་ཅག་དང་ལྷན་དུ་གནས་པར༌ངེས་སོ།།

⁴ཁྱོད་ཀྱི་བུ་ཕྲུག་འགའ་ཞིག་གིས་བདེན་པ་ཉིད་ཀྱི་ནང་དུ་སྤྱོད་བཞིན་ཡོད་པ་བདག་གིས་ཤེས་པར་གྱུར་པས་ང་ནི་ཤིན་ཏུ༌དགའ་བྱུང་ངོ་༎ དེ་ནི་ཡབ་ཀྱིས་བདག་ཅག་ལ་གནང་བའི་བཀའ་བཞིན་ཡིན།

⁵བུད་མེད༌ཀྱེ། བདག་གིས་ད་ལྟ་ཁྱོད་ལ་བསྐུལ་བར་བྱ༌སྟེ། བདག་ཅག་གིས་ཕན་ཚུན་ལ་བྱམས་ཤིང་གཅེས་སུ་འཛིན་འོས་སོ།། འདི་ནི་བདག་གིས་ཁྱོད་ལ་བཀའ་གསར་པ་ཞིག་འབྲི་བ་མ་ཡིན་པར། ཐོག་མ་ནས་བདག་ཅག་ལ་ཐོབ་པའི་བཀའ་ཡིན།

⁶དཀོན་མཆོག་གི་བཀའ་རྣམས་བཞིན་དུ་སྤྱོད་པ་ཡིན་ན། དེ་ནི་བྱམས་པ་ཡིན། ཁྱོད་རྣམས་ཀྱིས་ཐོག་མ་ནས་ཐོས་ཤིང་དེ་བཞིན་དུ་སྤྱོད་དགོས་པ་དེ་ནི་བཀའ་འདི་ཡིན༌ནོ།།

⁷ཅིའི་ཕྱིར་ཞེ་ན། འཇིག་རྟེན་འདིར་མི་ལ་སླུ་བྲིད་བྱེད་མཁན་མང་པོ་བྱུང༌བ་དང་། དེ་དག་གིས་ཡེ་ཤུ་མཱ་ཤི་ཀ་ནི་མི་ཡི་ཕུང་བོར༌གྱུར་པ་ཁས་མི་ལེན་པའི་ཕྱིར་རོ།། དེ་དག་ནི་མི་ལ་སླུ་བྲིད་བྱེད་མཁན་དང་སྐྱབས་མགོན་མཱ་ཤི་ཀའི་བསྟན་དགྲ་ཡིན།

⁸ངེད་ཅག་གིས་བསྒྲུབས་པའི་དོན་རྣམས་མེད་པར་མི་འགྱུར་བ་དང་ཁྱོད་ཅག་ལ་བྱ་དགའ་ཚང་མ་འཐོབ་པའི་ཕྱིར་ཁྱོད་རྣམས་ཀྱིས་གཟབ་པར་གྱིས།

⁹སུ་ཞིག་སྐྱབས་མགོན་མཱ་ཤི་ཀའི་གསུངས་པའི་ཆོས་དང་རིང་དུ་གྱེས་ཤིང་། དེའི་ནང་དུ་མི་གནས་པ་ནི་དཀོན་མཆོག་དང་འབྲེལ་བ་མེད། ཁོང་གི་གསུངས་པའི་ཆོས་ཀྱི་ནང་དུ་གནས་པ་ནི་དཀོན་མཆོག་ཡབ་སྲས་གཉིས་ལ་འབྲེལ་བ་མཆིས།

¹⁰གལ་ཏེ། མི་སུ་ཞིག་ཁྱོད་ཅག་གི་གམ་དུ་ཡོང་བ་དང་གསུངས་པའི་ཆོས་དེ་དག་མི་སྟོན་ན། མི་དེ་རང་གི་ཁྱིམ་དུ་མི་བསུ་ཞིང་འཚམས་འདྲིའང་ཞུ་བར་མི་བྱའོ།།

¹¹རྒྱུ་མཚན་ནི་མི་དེ་ལྟ་བུར་འཚམས་འདྲི་ཞུས་པ་ཡིན་ན། འཚམས་འདྲི་ཞུ་མཁན་ནི་མི་དེའི་ལས་ངན་པ་དང་འབྲེལ་བ་ཡོད་པའི་ཕྱིར་རོ།།

¹²བདག་ལ་ད་དུང་ཁྱོད་ཅག་ལ་འབྲི་བྱའི་དོན་མང་ཡང་། ཤོག་སྣག་ལ་བརྟེན་ནས་འབྲི་མི་འདོད་དེ། བདག་ཅག་གི་སེམས་སུ་དགའ་སྤྲོས་ཁེངས་པའི་ཕྱིར། ཁྱོད་ཅག་གི་གམ་དུ་ཡོང་སྟེ་གདོང་ཐུག་ནས་གླེང་མོལ་བྱེད་པར་རེ་བ་བཅངས་སོ།།

¹³དཀོན་མཆོག་གིས་བདམས་པའི་ཁྱོད་ཀྱི་གཅུང་མོའི་བུ་ཕྲུག་རྣམས་ཀྱིས་ཁྱོད་ལ་འཚམས་འདྲི༌ཞུའོ།།།།