Read དམ་པའི་གསུང་རབ་བོད་འགྱུར་གསར་མ།-New Tibetan Bible མངོན་པ། 9 Bible Online

མངོན་པ། 9 - དམ་པའི་གསུང་རབ་བོད་འགྱུར་གསར་མ།-New Tibetan Bible bible

མངོན་པ། 9

¹ཕོ་ཉ་ལྔ་པས་དུང་བུས་པ་ལ། སྐར་མ་ཞིག་ནམ་མཁའི་ཞིང་ཁམས་ནས་ས་སྟེང་དུ་ལྷུང་ཡོད་པ་བདག་གིས་མཐོང་ངོ་༎ ཞབས་མེད་པའི་དོང་གི་ལྡེ་མིག་ནི་སྐར་མ་དེ་ལ་གནང་བ་དང་།

²ཁོས་ཞབས་མེད་པའི་དོང་གི་ཁ་ཕྱེས་པ་ལ། དོང་ལས་དུ་བ་འཕྱུར་ཅིང་དེ་ནི་མེ་ཐབ་ཆེན་པོའི་དུ་བ་དང་འདྲ། ཉི་མ་དང་མཁའ་དབྱིངས་ཐམས་ཅད་དུ་བའི་རྐྱེན་གྱིས་མུན་ནག་ཏུ་གྱུར་ཏོ།།

³དེ་ནས་དུ་བ་ལས་འབུ་ཆ་ག་པ་ཕྱིར་ཐོན་ཏེ་ས་སྟེང་དུ་འཕུར་ཡོང་བ་དང་། ས་ཐོག་གི་སྡིག་པ་རྭ་ཙ་ལ་ཡོད་པའི་ནུས་མཐུ་ལྟ་བུ་ནི་དེ་རྣམས་ལ་གནང་ཡོད་པར་མ་ཟད།

⁴ས་སྟེང་གི་རྩྭ་དང་། རྩི་ཤིང་སྣ་ཚོགས། ཤིང་སྡོང་གང་ལའང་གནོད་འཚེ་མི་བྱེད་པར། དཔྲལ་བར་དཀོན་མཆོག་གི་ཐམ་ག་བཀོད་མེད་པའི་མི་ཁོ་ནར་གནོད་འཚེ་བྱེད་པའི་བཀའ་གནང་ཡོད།

⁵འོན་ཀྱང་སྡིག་པ་རྭ་ཙས་དུག་གིས་བསྣུན་པ་ལྟ་བུའི་མནར་གཅོད་ནི་ཟླ་བ་ལྔའི་རིང་ལ་མི་དེ་རྣམས་ལ་མྱོང་བར་བྱེད་པ་ལས། འབུ་ཆ་ག་པར་མི་དེ་རྣམས་གསོད་པའི་དབང་ནི་གནང་མེད།

⁶ཉིན་དེ་དག་གི་རིང་ལ། མི་རྣམས་ཀྱིས་ཤི་བར་རེ་བ་བཅངས་ནའང་གཏན་ནས་ཤི་བར་མི་འགྱུར་ལ། འཆི་བར་འདོད་ཀྱང་འཆི་བ་ནི་དེ་རྣམས་དང་རིང་དུ་གྱེས་སོ།།

⁷འབུ་ཆ་ག་པའི་ཚུགས་ཀ་ནི་གཡུལ་འཐབ་ལ་ཞུགས་པར་སྟ་གོན་བྱས་པའི་དམག་རྟ་དང་མཚུངས་ཏེ། མགོ་ལ་གསེར་གྱི་ཅོད་པན་ལྟ་བུ་བསྐོན་ཡོད་ལ། གདོང་ནི་སྐྱེས་པའི་གདོང་དང་འདྲ།

⁸སྐྲ་ནི་བུད་མེད་ཀྱི་སྐྲ་དང་མཚུངས། སོ་ནི་སེང་གེའི་མཆེ་བ་དང་འདྲ།

⁹དེ་དག་གི་བྲང་ཁར་ཁྲབ་ཡོད་ཅིང་དེ་ནི་ལྕགས་ཀྱི་གོ་ཁྲབ་དང་མཚུངས། གཤོག་པའི་འུར་སྒྲ་ནི་ཤིང་རྟ་དང་རྟ་མང་པོ་གཡུལ་སར་ཞུགས་པའི་སྒྲ་དང་མཚུངས།

¹⁰དེ་དག་གི་རྔ་མ་ནི་སྡིག་པ་རྭ་ཙའི་རྔ་མ་དང་འདྲ་ཞིང་དུག་མདུང་ཐོགས་ཡོད་ལ། རྔ་མ་ནང་དུ་ཟླ་བ་ལྔའི་རིང་མི་ལ་གནོད་འཚེ་བྱེད་པའི་ནུས་པ་ཡོད།

¹¹ཞབས་མེད་པའི་དོང་གི་ཕོ་ཉ་ནི་འབུ་ཆ་ག་པ་དེ་དག་གི་རྒྱལ་པོ་ཡིན་ཞིང་། ཨིབ་རིའི་མི་རིགས་ཀྱི་སྐད་དུ་ཨ་བད་ཏོན་དང་། གྷི་རིག་སྐད་དུ་ཨ་པོལ་ལི་ཨོན་ཞེས་ཟེར་རོ།།

¹²ཆག་སྒོ་དང་པོ་མཇུག་རྫོགས་ཤིང་། ལྟོས་དང་། དོན་དེ་དག་གི་རྗེས་སུ་ད་དུང་ཆག་སྒོ་གཉིས་འབྱུང་བར་འགྱུར་རོ།།

¹³དེ་ནས་ཕོ་ཉ་དྲུག་པས་དུང་བུས་པ་ན། དཀོན་མཆོག་གི་མདུན་དུ་ཡོད་པའི་གསེར་གྱི་མཆོད་ཁྲིའི་ཟུར་བཞི་ཡི་རུ་ཐུར་ནས་སྒྲ་གྲགས་ཏེ།

¹⁴དུང་ཐོགས་པའི་ཕོ་ཉ་དྲུག་པ་ལ་འདི་སྐད་དུ། གཙང་པོ་ཆེན་པོ་ཡུ་ཕ་རཱད་དུ་བཅིངས་ཡོད་པའི་ཕོ་ཉ་བཞི་པོ་ཁྲོལ་ཅིག་ཅེས་བཀའ་བསྒྲགས་པ་བདག་གིས་ཐོས་སོ༎

¹⁵དེ་ནས་ཕོ་ཉ་བཞི་པོ་བཀྲོལ་བར་གྱུར་ཏོ།། མ་གཞི་ཕོ་ཉ་བཞི་པོ་ནི་ལོ་ཟླ་དང་། ཉིན་དང་ཆུ་ཚོད་ངེས་ཅན་ཞིག་ལ་མིའི་རིགས་ཀྱི་གསུམ་ཆའི་གཅིག་གསོད་པའི་ཕྱིར་སྟ་གོན་བྱས་ཡོད།

¹⁶རྟ་དམག་དུང་ཕྱུར་གཉིས་ཡོད་ལ། དེའི་གྲངས་ཀ་ནི་བདག་གིས་ཐོས་སོ།།

¹⁷བདག་གིས་ཞལ་གཟིགས་ནང་དུ་མཐོང་བའི་རྟ་དང་རྟ་ལ་ཞོན་མཁན་རྣམས་འདི་ལྟ་སྟེ། རྟ་ལ་ཞོན་མཁན་རྣམས་ཀྱི་བྲང་ཁར་མེ་དམར་པོ་དང་། རྟ་ཀླད་དམར་སྨུག མུ་ཟི་སེར་པོ་བཅས་དང་མཚུངས་པའི་གོ་ཁྲབ་ཡོད་ལ། རྟའི་མགོ་ནི་སེང་གེའི་མགོ་དང་མཚུངས་ཤིང་། རྟའི་ཁ་ནས་མེ་དང་། དུ་བ། མུ་ཟི་བཅས་ཕྱིར་ཐོན་ནོ།།

¹⁸རྟའི་ཁ་ནས་ཐོན་པའི་མེ་དང་། དུ་བ། མུ་ཟི་བཅས་པའི་ཆག་སྒོ་རིགས་གསུམ་གྱིས་མིའི་གསུམ་ཆའི་གཅིག་བསད་པ་རེད།

¹⁹རྟ་དེ་དག་གི་ནུས་པ་ཁ་ནང་དང་རྔ་མའི་སྟེང་དུ་ཡོད་ལ། རྔ་མ་ནི་སྦྲུལ་དང་མཚུངས་ཤིང་མགོ་ཡོད་པ་དང་གཞན་ལ་གནོད་འཚེ་བྱེད་པའོ།།

²⁰ཆག་སྒོ་དེ་ལས་མ་བསད་པའི་མིའི་རིགས་ཀྱིས་རང་གི་ལག་པས་ཅི་བཟོས་པ་དག་ལས་འགྱོད་བཤགས་མི་བྱེད་པར། སྔར་བཞིན་དུ་གདོན་འདྲེ་ལ་དད་གུས་བྱེད་པ་དང་། མིག་གིས་མི་མཐོང་བ་དང་། རྣ་བས་མི་ཐོས་པ། འགྲོ་མི་ནུས་པ། གསེར། དངུལ། ཟངས། ཤིང་། རྡོ་བཅས་ཀྱིས་བཟོས་པའི་སྐུ་འདྲ་དག་ལ་ཕྱག་འཚལ་བ་དང་།

²¹ཡང་དེ་རྣམས་ཀྱིས་མི་གསོད་པ་དང་། ངན་སྔགས་པ། ལོག་གཡེམ་བྱེད་པ། རྐུ་བྱེད་པ་བཅས་ལས་འགྱོད་བཤགས་མ་བྱས་སོ།།