Read new_tumbuka_bible Mutendeko 11 Bible Online

Mutendeko 11 - new_tumbuka_bible bible

Mutendeko 11

¹Sono ŵanthu ŵa charu chose ŵakaŵa na chiyowoyero chimoza ndipo mazgu nagho ghakaŵa ghamoza.

²Ndipo ŵanthu ŵakati ŵasamira ku dera la ku mafumiro gha dazi, ŵakafika pa malo gha chidika mu charu cha Babuloni, ndipo ŵakakhara kwenekuko.

³Ŵakayoyeskana ŵakati, “Tiyeni tiwumbe njerwa, tiziwoche mpaka ziphye chomene.” Ŵakaŵa na njerwa mu malo mwa mawe ndipo ŵakazengera ulambwe wakunata mu malo gha thope.

⁴Ntheura ŵakati, “Tiyeni tijizengere msumba na chigongwe chakuya kafika ku mtambo, mwakuti tithuwuske zina lithu, mzire tiparanyikire mu charu chose.”

⁵FUMU yikakhira kwiza kawona msumba na chigongwe, vyeneivyo ŵanthu ŵakazenga.

⁶Ndipo FUMU yikati, “Wonani, ŵanthu mbamoza, ndipo wose ŵali na chiyowoyero chimoza. Uku ndiko nkhwamba waka kwa ivyo ŵizamkuchita. Palije kanthu ako ŵakughanaghana kuchita ako iwo ŵatondekenge kuchita.

⁷Tiyeni tikhilire kwenekura ndipo tikatimbanizge chiyowoyero chawo, mwakuti ŵareke kupulika kayowoyero ka yumoza na munyakhe.”

⁸Ntheura FUMU yikaŵafumyapo na kuŵambininiskira mu charu chose, ndipo ŵakareka kuzenga msumba.

⁹Pa chifukwa ichi, malo ghara ghakathyika Babuloni, pakuti penepara ndipo FUMU yikatimbanizgira chiyowoyero cha mu charu chose. Kufuma penepara FUMU yikaŵambininiskira mu charu chose.

¹⁰Iyi ndi miwiro ya ŵana ŵa Shemu. Para Shemu wakaŵa na virimika 100, wakababa Aripakishadi, vikati vyajumphapo virimika viŵiri kufuma pa chigumura.

¹¹Sono Shemu wakati wababa Aripakishadi, wakakhara virimika 500. Wakababaso ŵana ŵanyakhe, ŵanarume na ŵanakazi.

¹²Para Aripakishadi wakakhara virimika 35, wakababa Shela.

¹³Wakati wababika Shela, Aripakishadi wakakhara virimika 403. Wakababaso ŵana ŵanyakhe, ŵanarume na ŵanakazi.

¹⁴Para Shela wakakhara virimika 30, wakababa Ebere.

¹⁵Wakati wababika Ebere, Shela wakakhara virimika 403. Wakababaso ŵana ŵanyakhe, ŵanarume na ŵanakazi.

¹⁶Para Ebere wakakhara virimika 34, wakababa Pelegi.

¹⁷Ebere wakati wababika Pelegi, wakakhara virimika 403. Wakababaso ŵana ŵanyakhe, ŵanarume na ŵanakazi.

¹⁸Para Pelegi wakakhara virimika 30, wakababa Rewu.

¹⁹Wakati wababika Rewu, Pelegi wakakhara virimika 209. Wakababaso ŵana ŵanyakhe, ŵanarume na ŵanakazi.

²⁰Para Rewu wakakhara virimika 32, wakababa Serugu.

²¹Wakati wababika Serugu, Rewu wakakhara virimika 207. Wakababaso ŵana ŵanyakhe, ŵanarume na ŵanakazi.

²²Para Serugu wakakhara virimika 30, wakababa Nahoro.

²³Wakati wababika Nahoro, Serugu wakakhara virimika 200. Wakababaso ŵana ŵanyakhe, ŵanarume na ŵanakazi.

²⁴Para Nahoro wakakhara virimika 29 wakababa Tera.

²⁵Wakati wababika Tera, Nahoro wakakhara virimika 119. Wakababaso ŵana ŵanyakhe, ŵanarume na ŵanakazi.

²⁶Para Tera wakakhara virimika 70, wakababa Abramu, Nahoro na Harani.

²⁷Sono iyi ndi miwiro ya ŵana ŵa Tera. Tera wakababa Abramu, Nahoro na Harani. Ndipo Harani wakababa Loti.

²⁸Harani wakafwira mu msumba wa Uru mu Babuloni mu charu icho wakababiwiramo apo wiske Tera wakaŵa wachali wamoyo.

²⁹Ndipo Abramu na Nahoro ŵakatora ŵanakazi. Zina la muwoli wa Abramu likaŵa Sarayi, ndipo la muwoli wa Nahoro, likaŵa Milika. Milika wakaŵa mwana wa Harani uyo wakaŵaso wiske wa Isika.

³⁰Sono Sarayi wakaŵa chumba. Wakaŵavye mwana.

³¹Tera wakatora mwana wakhe Abramu na muzukuru wakhe Loti, mwana wa Harani, ndiposo na mukamwana wakhe Sarayi, muwoli wa Abramu. Ŵakawuka pamoza kufuma mu msumba wa Uru mu charu cha Babuloni na kuruta ku charu cha Kanani. Kweni ŵakati ŵafika ku msumba wa Harani, ŵakakhara mwenemura.

³²Tera wakaŵa na virimika 205 ndipo wakafwira mu Harani.